16-03-2016, 02:17 AM
|
#2 |
مسافر جديد
تاريخ التسجيل : Mar 2016 رقم العضوية : 8285 الجنس : ذكر المشاركات : 9
| 
مرحباً مجددا ،،،،
اليوم راح اعلمكم وش صار معي بالمقابلة وعلشان الخص الموضوح راح اقسم الموضوع لنقاط رئيسية ونفصلها كل واحد لحاله وهالنقاط هي :
1. الوثائق المطلوبة في المقابلة .
2. الممنوعات والمسموحات عند الدخول للسفارة.
3. اجراءات المقابلة من الدخول الى الخروج.
4. مابعد المقابلة .
+ + + الوثائق المطلوبة في المقابلة + + +
راح اذكر الوثائق المطلوبة واللي لازم تجيبها معاك وامام كل وثيقة راح اكتب اذا هي طلبت مني او لا. بس لازم تلاحظ شغلة مهمة كون وثيقة معينة ما طلبت مني ما يعني عدم طلبها منك علشان كذا خلك بالمضمون وجب كل الوثائق الضرورية :
1- وثيقة تأكيد النموذج D160 اللي فيها صورتك والباركود (طبعا لكل افراد الاسرة).طلبوها مني.
2- وثيقة اثبات الموعد.طلبوها مني في التفتيش الامني لدخول حي السفارات وعند دخول السفارة.
3- سند تسديد رسوم الفيزا.لم يطلبوه مني.
4- الجوازات.طلبوها مني.
5- صورتين شخصيتين لكل فرد من الاسرة حسب مواصفات السفارة.لم يطلبوها مني.
6- الاثباتات الشخصية السعودية ( الهوية الوطنية – سجل الاسرة )لم يطلبوها مني.
7- تعريف العمل لرب الاسرة.طلبوها مني.
8- كشف الحساب لاخر 3 اشهر.طلبوها مني.
9- الجوازات القديمة.لم يطلبوها مني.
+ + + الممنوعات والمسموحات عند الدخول للسفارة+ + +
1- ممنوع احضار الجوالات 2- ممنوع احضار اي ريموت كنترول ( ريموت السيارة – ريموت باب القراج ....ريموت مكيف البيت  دايم انساه في جيبي ) 3- ممنوع احضار اي جهاز كهربائي. 4- ممنوع ادخال اي سوائل معاك ( ماء – عصير- عطر – كريم لوشن – اي مستحضر تجميل ) طبعا الحريم شناطهم مليانه من هالامور . الخلاصة السوائل كلها ممنوعه. 5- يسمح بادخال حليب الاطفال ومستحضرات العناية بالطفل الضرورية وذلك باشتراطات معينة وفي اضيق الحدود. 6- يفضل عدم احضار الاطفال تحت 14 سنة والسفارة تحث على هالشي.
+ + + اجراءات المقابلة من الدخول الى الخروج + + +
1- موعدنا كان الساعة 9:30 صباحا ، طبعا لوجيت قبل الموعد باكثر من ربع ساعة راح يطلب منك الانتظار خارج السفارة لين يبقى 15 دقيقة على موعدك ويدخلونك واذ جيت متأخر بأكثر من 30 دقيقة ماراح تدخل وبيطلبون منك تجدول موعد جديد 2- وصلنا قبل موعدنا ب 10 دقايق انا وزوجتي وما احضرت الاطفال لانهم تحت 14 سنة والسفارة تقول جنة الاطفال بيوتهم . 3- وقفنا بالمواقف وخلينا اغراضنا جوالات وريموتات بالسيارة ونزلنا وأول شي استقبلنا الامن السعودي وتاكدو من ان عندنا موعد وطلبو انا نرجع شنطة زوجتي للسيارة لانها ممنوعة !! فرفضت وقلت لهم انها مافيها الا اوراق ثبوتية ولافيه داعي لارجاعها فوافقوا وقالو ادخل واذا دخلوكم كان بها والا رجعوها للسيارة. 4- وصلنا للكاونتر الخارجي تأكد من 3 اشياء معي وهي الجوازات + اوراق تأكيد النماذج لكل جواز + ورقة اثبات الموعد ووجهنا لبوابة التفتيش والدخول. 5- في البوابة الحريم يدخلون مع بوابة والرجال بوابة والموضوع مثل تفتيش المطار عدين التفتيش بسهولة ودخلنا. 6- في الداخل ساحة فيها مبنى على اليسار تبع التأشيرات نصيناه على طول. 7- اول ما تدخل بتلقى مكتب في وجهك تروح له استقبلنا شاب عربي محترم اخذت الجوازات وادخل بياناتنا في النظام وحط باركود على كل جواز واعطاني دقم وقال احتفظ بالرقم الين تخلص آخر خطوة والحين اقعدوا بالانتظار لين ينادونكم. 8- طبعا اللي صدمني كان الرقم : 96100000 9- والعدد واصل 150 بس !!! 10- تعوذت من ابليس وقلبت الورقة واكتشف المفاجئة ان الرقم 00000196 هههههههههه طبعا مكتوب بالانجليزي وممكن تقراه من الجهتين 11- بس مع كـذا ضاق صدري قدامي 46 متقدم وكلهم مقابلات !! متى بنخلص. 12- بس كانت سرعة الانجاز رهيبة وفي فترة بسيطة نادو رقمي وقالو روح للشباك رقم 3 . 13- في شباك 3 كان فيه موظفة مبتسمة استقبلتنا واخذ الجوازات وسألتنا سؤال واحد فقط وهو سبب ذهابكم وجابوتها انها اجازة سياحية. 14- طلبت منا تعريف العمل وكشف الحساب. 15- اخذت بصماتنا طبعا تبدآ بالاربع اصابع لليد اليسرى ماعدى الابهام بعدها الاربع اصابع باليد اليمنى من غير الابهام بعدين الابهامين مع بعض. 16- بعد البصمات سلمتنا جميع الاوراق وقال روحو للشباك 12 او 13 لتأكيد ومطابقة البصمة. 17- رحنا على طول وكان قدامنا شخصين بسرعة وصلنا الدور وتوجهنا للشباك، وعنده طلب منا الموظف التبصيم من جديد بس كانت البصمة لليد اليسار فقط بعدها قال لنا ok ارجعو للانتظار وبينادون رقمكم للمقابلة. 18- ما امدانا نرجع الا هم منادينا على شبك رقم 5 وفيه قابلتنا موظفة امريكية مبتسمة تتكلم العربية بشكل جيد سألتنا 4 اسئلة الاول عن سبب الزيارة وقلت لها اجازة سياحية ، والثاني عن المدن اللي بنزورها وجابتها عليه ، والثالث عن اذا كان سبق لنا ان ذهبنا الى امريكا وقلت لها لا ، والرابع هو نفس السؤال الثاني بس جابته بلفه وجاوبتها بوضوح وبالتواريخ عن المدن اللي بنزورها. 19- قالت لنا مبروك تمت الموافقة ع الفيزا انتظرو 4 ايام عمل وبيجيكم رسالة من ارميكس لاستلام الجوازات ورجعت لنا كشف الحساب وتعريف العمل. 20- لاحظت ان كثير من الاوراق المطلوبة لم يسألوا عنها مع انها مطلوبة حتى الصور !! فتوجهت لموظفة الاستقبال وسألتها فقالت : هل اخذو جوازاتكم فقلت لها : نعم ، فقالت : اذا مبروك وهذا يعني ان معلوماتك واضحة ومكتملة وقلت لها طيب الصور ليش يطلبونها اذا ما بياخذونها فقالت لي بعض الطلبات تكون الصور المحملة من النت في النموذج غير واضحة علشان كذا نطلب الصور بس في حالتك ما احتاجوها عموما هذا دليل على ان اموركم كلها تمام.
طبعا لاحظت اشياء كثيرة اهمها:
1- الابتسامة الدائمة على وجيه الموظفين وتعاملهم اللطيف.
2- مدة الاجراء اللي مرينا فيه من نادو رقمنا ما تجاوزت 15 دقيقة والوقت الاكبر راح في انتظار دورنا مع ملاحظة ان العدد كان كبير جدا ولم نتأخر.
3- مقابلتنا كانت مباشرة وبسيطة بينما لاحظت ان فيه مقابلات طولت كانو يسألون بالتفصيل ويدققون في كل معلومة لكن الغالبية كانت مقابلاتهم سهلة ومباشرة.
+ + + مابعد المقابلة + + +
اتمنى اكون نقلت لكم هالتجربة بشكل واضح وسهل يساعدكم في استخراج الفيزا الامريكية.
لا تنسوني من دعواتكم واتمنى لكم رحلات سعيدة .
نراكم في مواضيع اخرى اعدكم ان تكون مفيده بإذن الله.
كان هنا
مسافر معاكم |
| |
139الاعجاب
العرض المتطور
المواضيع المتشابهه 
