عدنا من جديد أحبتي
صحينا الساعة 5 الصبح ضبطنا امورنا وأغراضنا مواعدين التاكسي الساعة 6 ونص يودينا المطار لأن رحلتنا 8:45
طبعا مشوارنا مع الشنط زي ما جينا 3 دفعات نزلتها عند الباب ورجعت للاستقبال دفعت الفلوس (310 يورو)

وطلعت عالشقة صلينا الصبح والساعة 6:15 واحنا وراء الباب الخارجي طبعا ما فتحناه عشان الهواء والبرد

6:30 بالضبط فتحت الباب لقيت السواق واقف ، حطينا العفش وتوكلنا على الله

الدنيا هجدة وفاضية عشان يوم السبت مشينا على مهلنا وكانت رحلتنا على خطوط ايبريا اكسبرس من الصالة رقم 4

وصلنا الساعة 7 صباحا تقريبا ، رحت على الشاشة اشوف رقم كاونتر الشيك ان والتفت للنايمين الصحيانين اللي معايا يللا مشينا

رحنا عالكاونتر ويالهوتي ، طابور ولا طابور القرموشي (مطعم فول ومعصوب مشهور في جدة) واطالع في الساعة الاقيها 7:15 وهم كاتبين في الحجز الساعة 8 بيقفلوا الصعود يا حلاوة راحت الطيارة (اكلم نفسي)
ووقفنا مع الواقفين والجالسين صارت 7:40 والطابور على قشر البيض

وفجأة تجي وحدة طااايرة وتقول من هنا يللا ورايا وعلى طول انعطاف حاد وسريع على كاونتر تاني وخلصنا امورنا في 10 دقايق وعلى التفتيش قبل دخول صالة المغادرة

مشينا عادي ، تعمدت اروح من جهة فيها موظفة تفتيش عشان أم مهاب، طبعا كانت لابسة العباية اللي جينا بها من جدة وما غيرتها بحكم اننا ما فتحنا شناطنا في مدريد (كنت مخلي شنطة يد متوسطة وحشرت ملابس اول يومين فيها)

المهم الموظفة قالت فكوا العباية عشان تحطها عالسير للتفتيش ، قلنا لها ما نقدر قالت لا هذي زي الجاكيت لازم تخلعوها
قلنا لها لا اسفين ما نقدر، ابتسمت وقالت مافي مشكلة لكن لازم تفتيش شخصي ، قلت اوكي بس في غرفة مغلقة ، ردت وقالت شي اكيد
صراحة كانت في قمة الاحترام والتعامل وبعد التفتيش اعتذرت بكل لطف على تأخيرنا، وتوجهنا لصالة المغادرة

أقلعت الطائرة في موعدها وكانت من طراز ايرباص 320 وطبعا بدون وجبات مجانية (طلبنا للاولاد حليب شوكلاتة وكيك من القائمة بمبلغ 13 يورو)

وصلنا بالسلامة مطار مالاقا ولقينا مندوب شركة التأجير اللي وجهنا للباص الخاص لنقلنا وللمعلومية هذي تاني او ثالث مرة اتعامل معاهم وصراحة مميزين جدا (سرعة وكفاءة عالية) ما طلب الرخصة الدولية واكتفى بالسعودية

وسحب مبلغ التأجير كامل بدون زيادة ولم يطلب مبلغ تأمين ولا حاجة واعطاني مقعد طفل لبنتي مجانا
سيارتنا كانت حسب الحجز اوبل زافيرا واعطونا رينو بدلا منها بنفس المواصفات




وانطلقنا على بركة الله باتجاه كالاهوندا وهي احدى القرى الساحلية في ساحل الشمس او (كوستا ديل سول - costa del sol )
وتم تسجيل الدخول في منتجع ثاني Club Marbella Crwon Resort رغم ان السكن في منتجع آخر Club Delta Mar وهو ايضا موجود عن طريق بوكنغ

Crown Resorts Club Delta Mar, La Cala de Mijas, Spain - Booking.com

تمت الاجراءات بكل سهولة وانطلقنا لمكان السكن والذي يعتبر منتجع خاص وبه مجموعة من الشقق مع بوابة خارجية للسيارات لا يفتح الا برقم سري عند الدخول والخروج وكذلك بوابة داخلية للمجمع برقم سري ايضا او بمفتاح مع مفتاح الشقة الخاص

الشقة تتكون من غرفتين وصالة بها صوفا (تتحول الى سرير) وبلكونة صغيرة ومطبخ متكامل (ثلاجة وميكرويف وغلاية وادوات طبخ وباقي المستلزمات) بالاضافة الى حمام واحد أكرمكم الله

استرحنا لمدة ساعتين تقريبا ثم توجهنا لسوبرماركت قريب لشراء مستلزمات الشقة للفطور والنقنقة
وبالقرب من السوبرماركت وجدت مطعم ايطالي حجزت فيه للعشاء وكان اختيار موفق جدا جد وهذا اسم المطعم وموقعه الالكتروني وانصح به ولا أمانع لو اروح له كل يوم

Ristorante la Plaza in Mijas – Best Italian food, best atmosphere in Mijas

بعد العشاء حل بنا التعب ورجعنا الشقة للنوووووووووم
وبهذا انتهى اليوم الثالث في اسبانيا
شكرا على متابعتكم