تجربه جديده
ومغامرة حلوه
متابعين معاك الرحلة

تسلم على هالتقرير ابو عبدالله
وسعر البوت مره حلو
انت لو تروح دبي تحجز ساعه ب 1500

ناس تستقطب وتنمي سياحتها
وناس تدور دخل
الفكره جميله بجد
استمتعنا مع بالاجواء
الله يعطيك العافيه على هالتقرير الفريد من نوعه

ماشاء الله تجربه رائعه

بدل الكشتات بالمخيمات تكشت ببوت


متابعين

بعد ما جرد الموظف معنا الاشياء اللي لازم ننتبه لها ( المرساة ، الاطناب ، الغاز ، اريل التلفزيون ، عصا طويلة تساعد في دفع البوت عن المرسى وقت الحاجة ...الخ ) قال لنا بروح 10 دقايق وارجع اعلمكم عليه ... رتبنا اغراضنا في الاداراج وحطيت السيارة بالمواقف قدام المراسى ( مواقف مجانية تابعة للشركة ) ... ورحت للبوت ... الخطوة عن خطوتين واحيانا ثلاث ... وما احسن ما قال المتنبي :
لقد دب الهوى لك في فؤادي *** دبيب دم الحياة إلى عروقي
موضوع الجو كان غايب عن البال تقريبا ...وماانتبهنا له الا بعد الحجز بفترة وان الجو بيكون اكثره ممطر ... بس دايم اقول ان العلم اولا واخيرا عند الله سبحانه وكلها توقعات ... وان شاء الله ماتضبط التوقعات ويصير جونا حلو .... الجو يوم الرحله كان يبشر بخير وانه بيكون يوم مشمس نسبيا وهادئ ... طبعا احنا عارفين انه الربيع لسى في بداياته وتو الاشجار بادية تورق ... يعني مافيه خضره بشكل كبير .... الطيور منتشرة بكل مكان







وش هالنشبه ... كيف بنطلع



جاء الموظف مره ثانيه وعلمنا كيف نشغل ونطفي وعلمنا على اللوحات في امام السواق


ثم قال يلا ورنا مشيك يا فلان .... وبسم الله واشغل وامشي بشويش... وطلع المقود سهل التعامل معه وازيد السرعه .... قلنا له كيف نرجع لك بعدين ؟! احس انه سؤال وجيه !! قال عادي ماراح تضيعون !!!! وقال لو احتجتوا مساعده اتصلوا واحنا نجيكم ... قلت خلاص اجل ... انس موضوع كيف نرجع لكم .... النية ضيعه ... نسيت اقول لكم انهم معطينا كتاب عن البوت كيف تتعامل معه وكيف توقف وكذا وخريطه... وطبعا كعربي اصيل ... رميته بالدرج ... وماشفته الا بالليل يوم وقفنا وخلصنا من نص التعليمات بروحنا ....رجعنا نرجع الموظف وطبعا كان معلمنا انه بما ان ايجارنا لمدة ثلاثة ايام فما نحتاج للتزود بالوقود ... لان الديزل اللي فيه يكفي اسبوع ... والموية ممكن نحتاج نعبي كل يوم ... قلت من وين ؟ قال عادي بالطريق بتلقون اماكن كثيرة للتزود بالديزل او المويه او لشفط الصرف الصحي اجلكم الله ... المويه قال غالبا مجانية ولو احد طلب فلوس فغالبا 50 بنس ( نصف باوند ) وبالمناسبة المويه صالحة للطبخ وفيه فلتر صالح للشرب ( بس ماعجبني طعمها للشرب ) بس للطبخ والشاي والقهوة كانت عاديه وماحسينا بشي ... احنا اصلا كنا ماخذين موية بس رجعنا بها لان مويتهم مناسبة للطبخ ... وعلمنا ان فيه كثير مواقف مجانية ... وانه لازم مانوقف في المواقف الخاصة ... او المكتوب ممنوع الوقف هنا ..


بعد ما نزلنا الرجال ... انطلقنا بعون الله ... لوحدنا ... في بوتنا ... لا سائق يمنع حريتنا ... كأننا في بيتنا ( المتحرك ) ... بدأت فعاليات الاطفال ... لعب وصراخ ... وهذا كيف يشتغل ... وهذي بطه قدامنا بابا لا تصدمها ...
لوحات اسماء الانهار مثل اسماء الطرق
هذا نهر آنت اللي نطلقنا منها




مناظر على جانبي النهر



مشاهد تتغير باستمرار



فيه بعد ردارات سرعه !!!









الجوانب بعد شهر او اكثر شوي من الان بتكون كلها خضراء باذن الله ..









تقابلك احيانا ابوات ثانية ...



تمر احيانا بقرى ..


او مزارع



او براري خاليه





ام عبدالله اخذت دورها في قيادة البوت ... وبالمناسبة البوت له 4 قباطنه ... كل افراد العائلة جربوا واستمتعوا بقيادته ... وبما انه اقترب وقت المغيب ... واحنا لسى جديدين في الشغله ... وكنا شايفين في النهر اكثر من مرسى ... بتشوفون صورهم ... اخترنا نوقف هنا ... وبدأت فعالية اول توقف حقيقي.. اول توقف بدون موظف يوجه او يساعد ... خففت السرعه واقتربت من اليابسه بشويش ... اول مره التدئه الكبرى كانت بصدم الميناء .... ونزلت بالحبل



البوت خفيف نسبيا عشان المويه ... ويستجيب للسحب ...او الدفع ...
كل المراسي مجهزة باماكن للربط .. والمراسي تختلف احيانا التوقف يكون على جنب مثل الان ... واحيانا للخلف ... وموجود في البوت حبل في الامام + مرساة للتثبيت حال التوقف بالخلف ... وموجود حبلين في خلف البوت للتثبيت مع الزوايا ...
جيران ....


موقف بعيد عن اللي ورانا ... والصبح كانت هذي المساحه كلها مليانه ...




شبينا على الغدا العشاء .... والقهوة



قهوتنا ...


البوت مثبت ... بوجود جيراننا الحلوين









اول وجبة بوتيه .... الاواني موجوده كامله مع البوت ....



طلعنا نشرب الشاهي بعد العشاء برا ... وكان الجو حلو ... بس شوي وبدأ المطر ودخلنا ... النت كان حلو وسريع وشغل كل الاجهزة اللي معنا... 4 جوالات ولاب توب ...طبعا حسب مكان توقفك اذا كان قريب من قرية فيكون النت زين.. الشاحن الموجود مثل شاحن السيارة ... لذلك انصخ باخذ اللي له منفذين او اكثر ... فيه فيش بدورة المياه عشان الاستشوار ( ممكن يوفرون استشوار برسوم اضافيه ) ...

ثم الى تجربة اخرى ... تجربة اول مبيت داخل البوت ...



قرينا اذكارنا وكان الجو برد شوي مع المطر .... وخلينا الدفاية تشتغل ... وكان فيه بطانيات كافية للجميع ....

عاد اول تجربة لي انام في مكان يهز ... يمكني مالحقت على سراير الهزاز يومني صغير .... فكل شوي اقوم وافتح الستاره اشوف البوت في مكانه والا مشى بنا .... وتجيك الافكار السودا وماتتركز الا عند النوم ... طيب لو مر واحد الحين وفك الحبال ودفنا عشان ياخذ الموقف ... وش نسوي بهالليول ... وخذ من هالافكار .... كلهم ناموا الا انا وعبقريتي وهواجيسي ... ونمت وانا مدري ... وبالمناسبة ابواب البوت الاماي والخلفي تنقفل بالمفتاح ... عشان العيال ... وعشان المجرم اللي بيغتالني ما يدخل وانا نايم ... ولازم كونان وشارلوك هولمز يجون وتبدا التحقيقات ... لو صار كذا ...طيب لو مااشتغل البوت الصبح ومافيه ارسال جوال .... هههههه صح افكار جهنمية .
وصحيت بدري قبل جرس المنبه لصلاة الفجر بس كان الوقت داخل وصليت الفجر ... وضبطت ام عبدالله القهوة ... وطلعنا نتقهوى برا وكان الجو حلو ...







Free Moorings يعني مراسي مجانية ... فيه مراسي بفلوس احيانا ... وفيه مراسي خاصة ... وفي ممكن توقف بأي مكان ثاني مثلا تحت شجرة وتربطه فيها ... عادي ... المهم كل كل مرسى يوضح تعليماته ... هنا الوقوف لمدة 24 ساعة ثم ماترجع لنفس الموقف لمدة 24 ساعه ... وفيه مواقف لمدة ساعتين او ثلاث وتكون غالبا في اماكن الخدمات مثل التزود بالماء او الوقود ...

ضيوف شاركونا قهوة الصباح ...





طبعا رياضة الكاياك مشهورة هنا ..اللي هو القارب الصغير ... اللي تحس ان رجول اللي راكبه نازله بالمويه





ثم دخلنا وصلحنا فطور سريع عبارة عن مشروم + فاصوليا حمراء وشاهي ...



اللوحة اللي قدامنا المرقمه هذي دايم تجي قبل الجسور ... وفيها ارتفاع البوت المناسب للدخول الان .... وتتغير حسب ارتفاع منسوب النهر ... فكرة ذكية



انطلقنا ...



طبعا البوت بطيئ جدا ...يعني مافيه سرعات عالية ... وبكذا هو امن جدا ...







جو جميل ... مستحيل الصور تنقل جماله ... وانتم تعرفون ان الصور عجزت تنقل جمال سفراتكم بالشكل المطلوب ...



هذا موقف خاص ...











ابوات وقوارب من مختلف الاحجام



ممرات مائية مختلفة



كانك في طريق سيارات ... بيوت ومطاعم على جوانب النهر ...







المراسي منتشرة ومتوفرة ....




الاجمل ... نظااااافة .... والله ماتشوف اي شي بالنهر ... لا اكياس ولا علب ... ولا اي مخلفات ...





رغم زحمة الناس في بعض الاماكن ... الا ان التنظيم الرائع يخليك ماتحس بوجود اي زحمه + التزامهم بالنظام ومعرفتهم بأن للاخرين ايضا حق ... انا ومن بعدي الطوفان غير موجوده ...

رحلات سياحية ...


طبعا حنا احسن منهم ... لاننا في بوتنا ... اللي احنا انسوقه ....



لو احد بيعطيني هدية بيت هنا مع بوت ترا والله مارده ... لاتستحون ...





الاماكن هادية ...

بالمناسبة .... في بيوت صغيرة للايجار ... بيوت عطلات



تطلع من بيتك ... تركب بوتك ... تروح دوامك ...




ورشة ...



كوفي ...





ولاني نسيت التنبيه في البداية انبه الان ... انه يمكنكم صيد السمك في الانهار ... كل ماعليك هو توفير سنارة او خيط ولو نسيت بتلقاها في القرى اللي بتزورها... ثم استمتع .... فيه اماكن يمنع فيها الصيد وعليها لوحات ...







مثل الحواري .... تدخل مع جهة وتطلع مع اخرى ...









نوع اخر من مرابط الابوات وتحت اشراف البطات ... اذا وقفت يمكن تركب البطه ... لانها متعوده يحطون لها اكل



لوحات تنبيه عند الحاجة



كأنه فنار قديم ...



بالمناسبة في الطريق قد تجدون الكثير من القلاع او بقايا الحصون القديمه والمتاحة للزيارة ... او غير متاحة .. وذلك حسب اللوحات الموجودة بالمكان ...



يوجد الكثير من الفعاليات بالطريق مثل الملاهي ، الحدائق ، المتاحف ، جولات الغابات ، زيارة اكواخ الاشجار ... ولكن اكثرها كان مقفل الوقت هذا وتفتح بداية ابريل ...













القرى في الطريق كثيرة والخدمات متوفرة ...







الحين طقنا الجوع ... نبي نوقف نريح ونصلح غدانا ...

وشفنا قارب ايسكريم وقلنا نوقف حوله








اوقف هنا ... وبقي جزء واحد ... فيه من صدمنا ... وليش ؟ !!

جزء رائع يابو عبدالله

منظر الانهار والمكان لو تجلس يكفيك كيف وانت تتمشى بينهم

يا سلاااام عجييب والله
عليكم بالعافيه يابو عبدالله
اذا حصلت هديه بيت هناك عطني الملحق هههه
جوهم عجييب
بانتظار اخر جزء والصدمة

بعد ماتغدينا وحمدنا ربنا على نعمته ورزقه ... شغلنا البوت مرة ثانيه ... المكان جميل والجو حلو ... بس نبغى نشوف زيادة ... ونبغى نسوق البوت ... وبما ان البوت بطيئ ... فهو مناسب حتى للاطفال انهم يستمتعون بقيادته ... وانا ماخليت بخاطرهم شي ... واغلب الناس اللي يقابلونا نشوف عيالهم يسوقون وهم قريبين منهم طبعا ... والمناطق كثيرة وتطلع من نهر لنهر ... يعني صعب تكرر المناظر الا اذا رجعت من نفس طريقك ... والفعاليات اللي بتكون مفتوحه بتاخذ وقت ... مااعتقد ان الملل بيطرق بابكم ابدا ... انطلقنا نتجول في الانهار وبعض المناطق بالمناسبة هي بالاصل مناجم قديمه جدا غمرتها المياه ... وفي وحده من الدخلات لقينا مكان للتزود بالماء وكان فاضي ... فقلنا نوقف عنده ... ورجعنا للخلف الين وقفنا عنده ... وطبعا مميز هو اما بلوحة او تشوفون ليات الموية الزرقاء ..

وقفنا هنا ....


وطلع الموقف موب مجاني ... الى ساعة توقف بـ 1.5 باوند ... والمكان جميل جدا وفيه فعاليات واكواخ وتخييم للي يحب بس تفتح في اول ابريل ...



طبعا محد فيه ... وانت اخدم نفسك ...



عبينا المويه وتوكلنا على الله ...













وقفنا بموقف عند قرية ...


وتجولنا فيها ..





رحنا للبقالة ...



بس كانت مشطبه اغراضها قبل نوصل ..



خذنا توست وحلويات ...











يوم وصلنا بوتنا ... والا فيه ناس واقفين ورانا ... والمغرب باقي عليه ثلاث ساعات تقريبا ...

تونا معنا وقت ناخذ لفة ... وادفه ابيه يبعد نطلع ... عجزت عنه ... وراعي البوت الثاني شايب بريطاني ... واقف يتفرج ... قلت له اني ماعرفت اطلعه ... قال لف ويطلع ... وجلس يدف معي ... قلت رح سق انت ورني شطارتك .. ويركب ويحاول وانا وعياله ندف البوت على جنب ... وبغى يكسر قاربهم الصغير اللي يسحبونه وراهم ... اخر شي قال لعياله فكوا بوتنا وخلوا نطلع عنهم... وفعلا طلعوا عنا ومشينا ... واشوا مشينا .... طحنا بقرية جميلة مره ... البريطانيين جدا كويسين مع انهم هم يصنفون نفسهم انهم سيئين ...طبعا هم مايحبون الشخص اللي يطلب فلوس ... بس اذا مساعده او يفيدك بشي فهم جدا ودودين ... بس لا تقرب جهة فلوسه ..













الطيور مره موالفة ومتعودة على الناس ... لدرجة انها تركب على البوت اذا وقف ...



بوت للبيع ... بس مابيه ... يا بوت جخ او لا ..



موقف مجاني





بعض الجسور المرور تحتها بفلوس ... وشفنا رقمهم من الخريطه وكلمناهم نتأكد ... بس طبعا بوتنا ماكان يدخل لان المنسوب مرتفع... ويقول على اخر الاسبوع يمكن يصير مناسب ...



فرجعنا مع طريقنا



ووصلنا للموقف اللي نشبنا فيه مع البريطانيين ...



وكان الوقت خلاص قريب المغرب ... وماحبيت نغير المكان يمكن مانلقى موقف قريب ويجينا الليل ..









قهوة المغرب



بعد المغرب بدا الجو يتغير وجاء هوا قوي مع مطر .... يالله الخيره حنا يخوفنا المطر والهوا وحنا في بيوتنا كيف في بوتنا ... كيف وحنا في المويه ... زي ماقال ذاك ... اخاف من كلب يطلع لي اسد ...

بس مالك الا تقضب ارضك ... وين تروح ... وحتى القرية بين وبينها مسافة مشي !!! صلحنا عشانا وتعشينا وتقهوينا والوضع يزود .... وبدا البوت يتأرجح والموج يضرب من تحت لان كنت موقف في وجه الهوا ... ويمكن احسن من لو اني موقف على جنب ...
رحنا للنوم ... والنومة الله اعلم بها ... كل شوي اطل اشوف حنا بمكانا والا وين رحنا ... وراحت علي نومه ... الين وقت الفجر ... صليت الفجر ... وفكرت اسوي خبز ... فعجنت ولفيته بجاكيتي وحطيته قدام الدفايه... ورجعت انام ... بعد ساعة يمكن ...الا وطراااخ ... ونفز انا وام عبدالله ... وش السالفه .... شالنا الهوا لمكان ثاني !!! او وش ... وصار اللي قدامنا ( وكان بيننا مسافة بوت يمكن ) يوم فك حباله ماقدرو يسيطرون عليه ودفهم الهوا علينا وصدموا فينا ... جلست اطل عليهم بعد مالفوا ... بس مره عجزوا يلفون جهة الهوا ... كل ماحاولوا رجعهم للجهة الثانية ... غيروا مكانهم وبعدوا شوي عننا ... عادة المكان هذا البوت يلف للجهة المقابله بدون الحاجة للرجوع للخلف ... هم يمكن اخذوا اكثر من خمس مرات يرجعون فيها للخلف عشان يلفون وبالاخير نجحوا ...



بعد مداولات قررنا نقوم ونصلح قهوتنا ... ثم بديت اصلح خبيزاتي ...



جايبين معنا الفراده ...



ومقاس الخبزة على مقاس المقلى ...



خبز حاااار في الجو البارد ... بس ناقصه الفول



والفول قريب





بعد ماافطرنا وغسلنا مواعينا ...جلسنا نتابع اللي امس حادينا ثم تحركوا عنا ... كانوا ناشبين بين بوتين .. والهواء ضدهم بعد ..كل مالفوا رجعهم لمكانهم ... الين تحركوا اللي قدامهم شوي ... بعد ماراحوا ...فك جاك سباروا حبال الجوهرة السوداء .. وانطلقنا













شفنا لوحة موقف فيه بقالة ... ولفينا عليه ...

وهنا ساعدنا واحد ثاني في الوقوف بين بوتين ... رجعنا له ثم عطيناه الحبل وسحبنا عند بوته ... اقولكم جدا خدومين وودودين ومايعطونك فرصة حتى تشكرهم ... يعني وانت تشكره يقول لك لا خلاص ما سويت شي ويمشي ..

في كل اماكن التوقف يتوفر دورات مياه عامة ...



لوحة بالفعاليات





بقالة : والاسعار عادية











قصة قصيرة : البطة اللي في المويه كانت تتهاوش مع البطة اللي على البوت ...وجلدت اللي على البوت ورمتها بالنهر ... جت البطة السوداء وعضتها اللي فوق وطاحوا كلهم بالنهر ... بس موقفهم مره مضحك ...



انطلقنا من جديد عشان نفضي المكان لناس غيرنا يتزودون بالموية ...





بمناسبة لوحات السرعه ... شفت بوت للشرطة .. بس ما لحقت اصوره ...









للايجار ..



الخريطه مفيدة مره بالنسبة للفعاليات ومعرفة الطريق ... وسهله مره ... قوقل ماب يشتغل تمام ... بس ما يعلمك الطريق بالنهر بس كنت اشوف الطريق احيانا والاماكن اللي حولنا به ..





تشوفون فيه هواء وامواج بسيطه





منطقة مطاعم والوقوف بالمرسى بالحجز ...



مطعم ... ميزة البريطانين انهم يتعشون الساعه 6 ... فوقت عشانا لو حبينا نتعشى بمطعم مايكون زحمه ويصيرون فاضين لنا ...









































بما انه اخر يوم ... بدينا نرجع نقرب من مكان اخذ البوت .... لان التسليم تسع ونص الصبح







هذا جاية تقول ... وييييييييي اخر يوم لكم !!!









وصلنا ووقفنا وتعشينا ونمنا .... وش رايكم بالاختصار ... ومافيه صور بعد ... لان شحن الكاميرا خلص ...

كانت ليله هاديه وجميله ... ونمنا للصبح بدون اي فواصل اعلانيه ....

كنا متفقين نتحرك مع شقة النور زي مايقولون ونتمشى 3 ساعات لين موعد التسليم لان فيه لفة مارحنا معها ... محللينه ذا البوت



قمنا وتقهوينا ومشينا بدون فطور بعد .... والعيال توهم نايمين ...

















رجعنا للمكان الاول ولسان حالنا كما:
نال منا يوم الفراق كمـا***نـال من الناكثين سـيف الأمير




من هنا بدينا وهنا ننتهي ... بس النهاية كانت تعلق اكبر من البداية .... لجمال التجربة ... وغرابتها بالنسبة لنا ... امتزجت بالمتعة والاستمتاع ... فحمدا لربنا على رزقه ...وحمدا له على توفيقه ...وحمدا له على كل شي

هذا موقع الشركة :
Richardson's Boating Holidays - Norfolk Broads Boat Hire and Boating Holidays

تقيمي 10/10

وفيه شركات اخرى منتشرة في بريطانيا واوربا ... سعدت بصحبتكم واشكر لكم حضوركم ودعمكم ... كم اسعدتني ردودكم ... فلا حرمتم سعادة الدارين ... الى لقاء ولعله يكون قريب ...

رفعت الجلسة