بعد ما جرد الموظف معنا الاشياء اللي لازم ننتبه لها ( المرساة ، الاطناب ، الغاز ، اريل التلفزيون ، عصا طويلة تساعد في دفع البوت عن المرسى وقت الحاجة ...الخ ) قال لنا بروح 10 دقايق وارجع اعلمكم عليه ... رتبنا اغراضنا في الاداراج وحطيت السيارة بالمواقف قدام المراسى ( مواقف مجانية تابعة للشركة ) ... ورحت للبوت ... الخطوة عن خطوتين واحيانا ثلاث ... وما احسن ما قال المتنبي :
لقد دب الهوى لك في فؤادي *** دبيب دم الحياة إلى عروقي
موضوع الجو كان غايب عن البال تقريبا ...وماانتبهنا له الا بعد الحجز بفترة وان الجو بيكون اكثره ممطر ... بس دايم اقول ان العلم اولا واخيرا عند الله سبحانه وكلها توقعات ... وان شاء الله ماتضبط التوقعات ويصير جونا حلو .... الجو يوم الرحله كان يبشر بخير وانه بيكون يوم مشمس نسبيا وهادئ ... طبعا احنا عارفين انه الربيع لسى في بداياته وتو الاشجار بادية تورق ... يعني مافيه خضره بشكل كبير .... الطيور منتشرة بكل مكان







وش هالنشبه ... كيف بنطلع



جاء الموظف مره ثانيه وعلمنا كيف نشغل ونطفي وعلمنا على اللوحات في امام السواق


ثم قال يلا ورنا مشيك يا فلان .... وبسم الله واشغل وامشي بشويش... وطلع المقود سهل التعامل معه وازيد السرعه .... قلنا له كيف نرجع لك بعدين ؟! احس انه سؤال وجيه !! قال عادي ماراح تضيعون !!!! وقال لو احتجتوا مساعده اتصلوا واحنا نجيكم ... قلت خلاص اجل ... انس موضوع كيف نرجع لكم .... النية ضيعه ... نسيت اقول لكم انهم معطينا كتاب عن البوت كيف تتعامل معه وكيف توقف وكذا وخريطه... وطبعا كعربي اصيل ... رميته بالدرج ... وماشفته الا بالليل يوم وقفنا وخلصنا من نص التعليمات بروحنا ....رجعنا نرجع الموظف وطبعا كان معلمنا انه بما ان ايجارنا لمدة ثلاثة ايام فما نحتاج للتزود بالوقود ... لان الديزل اللي فيه يكفي اسبوع ... والموية ممكن نحتاج نعبي كل يوم ... قلت من وين ؟ قال عادي بالطريق بتلقون اماكن كثيرة للتزود بالديزل او المويه او لشفط الصرف الصحي اجلكم الله ... المويه قال غالبا مجانية ولو احد طلب فلوس فغالبا 50 بنس ( نصف باوند ) وبالمناسبة المويه صالحة للطبخ وفيه فلتر صالح للشرب ( بس ماعجبني طعمها للشرب ) بس للطبخ والشاي والقهوة كانت عاديه وماحسينا بشي ... احنا اصلا كنا ماخذين موية بس رجعنا بها لان مويتهم مناسبة للطبخ ... وعلمنا ان فيه كثير مواقف مجانية ... وانه لازم مانوقف في المواقف الخاصة ... او المكتوب ممنوع الوقف هنا ..


بعد ما نزلنا الرجال ... انطلقنا بعون الله ... لوحدنا ... في بوتنا ... لا سائق يمنع حريتنا ... كأننا في بيتنا ( المتحرك ) ... بدأت فعاليات الاطفال ... لعب وصراخ ... وهذا كيف يشتغل ... وهذي بطه قدامنا بابا لا تصدمها ...
لوحات اسماء الانهار مثل اسماء الطرق
هذا نهر آنت اللي نطلقنا منها




مناظر على جانبي النهر



مشاهد تتغير باستمرار



فيه بعد ردارات سرعه !!!









الجوانب بعد شهر او اكثر شوي من الان بتكون كلها خضراء باذن الله ..









تقابلك احيانا ابوات ثانية ...



تمر احيانا بقرى ..


او مزارع



او براري خاليه





ام عبدالله اخذت دورها في قيادة البوت ... وبالمناسبة البوت له 4 قباطنه ... كل افراد العائلة جربوا واستمتعوا بقيادته ... وبما انه اقترب وقت المغيب ... واحنا لسى جديدين في الشغله ... وكنا شايفين في النهر اكثر من مرسى ... بتشوفون صورهم ... اخترنا نوقف هنا ... وبدأت فعالية اول توقف حقيقي.. اول توقف بدون موظف يوجه او يساعد ... خففت السرعه واقتربت من اليابسه بشويش ... اول مره التدئه الكبرى كانت بصدم الميناء .... ونزلت بالحبل



البوت خفيف نسبيا عشان المويه ... ويستجيب للسحب ...او الدفع ...
كل المراسي مجهزة باماكن للربط .. والمراسي تختلف احيانا التوقف يكون على جنب مثل الان ... واحيانا للخلف ... وموجود في البوت حبل في الامام + مرساة للتثبيت حال التوقف بالخلف ... وموجود حبلين في خلف البوت للتثبيت مع الزوايا ...
جيران ....


موقف بعيد عن اللي ورانا ... والصبح كانت هذي المساحه كلها مليانه ...




شبينا على الغدا العشاء .... والقهوة



قهوتنا ...


البوت مثبت ... بوجود جيراننا الحلوين









اول وجبة بوتيه .... الاواني موجوده كامله مع البوت ....



طلعنا نشرب الشاهي بعد العشاء برا ... وكان الجو حلو ... بس شوي وبدأ المطر ودخلنا ... النت كان حلو وسريع وشغل كل الاجهزة اللي معنا... 4 جوالات ولاب توب ...طبعا حسب مكان توقفك اذا كان قريب من قرية فيكون النت زين.. الشاحن الموجود مثل شاحن السيارة ... لذلك انصخ باخذ اللي له منفذين او اكثر ... فيه فيش بدورة المياه عشان الاستشوار ( ممكن يوفرون استشوار برسوم اضافيه ) ...

ثم الى تجربة اخرى ... تجربة اول مبيت داخل البوت ...



قرينا اذكارنا وكان الجو برد شوي مع المطر .... وخلينا الدفاية تشتغل ... وكان فيه بطانيات كافية للجميع ....

عاد اول تجربة لي انام في مكان يهز ... يمكني مالحقت على سراير الهزاز يومني صغير .... فكل شوي اقوم وافتح الستاره اشوف البوت في مكانه والا مشى بنا .... وتجيك الافكار السودا وماتتركز الا عند النوم ... طيب لو مر واحد الحين وفك الحبال ودفنا عشان ياخذ الموقف ... وش نسوي بهالليول ... وخذ من هالافكار .... كلهم ناموا الا انا وعبقريتي وهواجيسي ... ونمت وانا مدري ... وبالمناسبة ابواب البوت الاماي والخلفي تنقفل بالمفتاح ... عشان العيال ... وعشان المجرم اللي بيغتالني ما يدخل وانا نايم ... ولازم كونان وشارلوك هولمز يجون وتبدا التحقيقات ... لو صار كذا ...طيب لو مااشتغل البوت الصبح ومافيه ارسال جوال .... هههههه صح افكار جهنمية .
وصحيت بدري قبل جرس المنبه لصلاة الفجر بس كان الوقت داخل وصليت الفجر ... وضبطت ام عبدالله القهوة ... وطلعنا نتقهوى برا وكان الجو حلو ...







Free Moorings يعني مراسي مجانية ... فيه مراسي بفلوس احيانا ... وفيه مراسي خاصة ... وفي ممكن توقف بأي مكان ثاني مثلا تحت شجرة وتربطه فيها ... عادي ... المهم كل كل مرسى يوضح تعليماته ... هنا الوقوف لمدة 24 ساعة ثم ماترجع لنفس الموقف لمدة 24 ساعه ... وفيه مواقف لمدة ساعتين او ثلاث وتكون غالبا في اماكن الخدمات مثل التزود بالماء او الوقود ...

ضيوف شاركونا قهوة الصباح ...





طبعا رياضة الكاياك مشهورة هنا ..اللي هو القارب الصغير ... اللي تحس ان رجول اللي راكبه نازله بالمويه





ثم دخلنا وصلحنا فطور سريع عبارة عن مشروم + فاصوليا حمراء وشاهي ...



اللوحة اللي قدامنا المرقمه هذي دايم تجي قبل الجسور ... وفيها ارتفاع البوت المناسب للدخول الان .... وتتغير حسب ارتفاع منسوب النهر ... فكرة ذكية



انطلقنا ...



طبعا البوت بطيئ جدا ...يعني مافيه سرعات عالية ... وبكذا هو امن جدا ...







جو جميل ... مستحيل الصور تنقل جماله ... وانتم تعرفون ان الصور عجزت تنقل جمال سفراتكم بالشكل المطلوب ...



هذا موقف خاص ...











ابوات وقوارب من مختلف الاحجام



ممرات مائية مختلفة



كانك في طريق سيارات ... بيوت ومطاعم على جوانب النهر ...







المراسي منتشرة ومتوفرة ....




الاجمل ... نظااااافة .... والله ماتشوف اي شي بالنهر ... لا اكياس ولا علب ... ولا اي مخلفات ...





رغم زحمة الناس في بعض الاماكن ... الا ان التنظيم الرائع يخليك ماتحس بوجود اي زحمه + التزامهم بالنظام ومعرفتهم بأن للاخرين ايضا حق ... انا ومن بعدي الطوفان غير موجوده ...

رحلات سياحية ...


طبعا حنا احسن منهم ... لاننا في بوتنا ... اللي احنا انسوقه ....



لو احد بيعطيني هدية بيت هنا مع بوت ترا والله مارده ... لاتستحون ...





الاماكن هادية ...

بالمناسبة .... في بيوت صغيرة للايجار ... بيوت عطلات



تطلع من بيتك ... تركب بوتك ... تروح دوامك ...




ورشة ...



كوفي ...





ولاني نسيت التنبيه في البداية انبه الان ... انه يمكنكم صيد السمك في الانهار ... كل ماعليك هو توفير سنارة او خيط ولو نسيت بتلقاها في القرى اللي بتزورها... ثم استمتع .... فيه اماكن يمنع فيها الصيد وعليها لوحات ...







مثل الحواري .... تدخل مع جهة وتطلع مع اخرى ...









نوع اخر من مرابط الابوات وتحت اشراف البطات ... اذا وقفت يمكن تركب البطه ... لانها متعوده يحطون لها اكل



لوحات تنبيه عند الحاجة



كأنه فنار قديم ...



بالمناسبة في الطريق قد تجدون الكثير من القلاع او بقايا الحصون القديمه والمتاحة للزيارة ... او غير متاحة .. وذلك حسب اللوحات الموجودة بالمكان ...



يوجد الكثير من الفعاليات بالطريق مثل الملاهي ، الحدائق ، المتاحف ، جولات الغابات ، زيارة اكواخ الاشجار ... ولكن اكثرها كان مقفل الوقت هذا وتفتح بداية ابريل ...













القرى في الطريق كثيرة والخدمات متوفرة ...







الحين طقنا الجوع ... نبي نوقف نريح ونصلح غدانا ...

وشفنا قارب ايسكريم وقلنا نوقف حوله








اوقف هنا ... وبقي جزء واحد ... فيه من صدمنا ... وليش ؟ !!