ماليزيا+اندونيسيا 22يوم وصور بتقنية جديده (للتحدي) - الصفحة 16

ياسمين و جوري · 12-02-2015, 12:06 PM

يعطيك العافيه تقرير رائع
الكاميرون عشقتها وحبيتها

رائد بومريم · 12-02-2015, 12:21 PM

اقتباس : المشاركة الأصلية كتبت بواسطة رهف البدر

يعطيك العافيه تقرير رائع
الكاميرون عشقتها وحبيتها

الله يعافيك
دائما الارياف او الجزر مثل الكاميرون ولنكاوي يكون لها جو رائع بعيد عن زحمة المدن

رائد بومريم · 12-02-2015, 01:57 PM

اليوم الثامن
مشينا ووجهنا النفيقيتور الى جنتنج وللاسف كانت غلطه

اول شي تاخرنا شوي في الطلعه من الفندق يعني طلعنا تسع ونص الصباح... طيب مو مشكله.. المسافه ٢٠٠ كيلو.. يعني ساعتين.. بس هذا اذا كان الطريق عادي

بس طريق الكاميرون ملتوي مثل الحيه ومرتفعات يعني السرعه القصوى ٤٠ هذا في احسن الحالات

خذنا في ذاك الطريق اكثر من ثلاث ساعات ووقفنا شوي نبي نشتري عسل وغيرنا رأينا شكينا في مصداقيتهم.. وانا مش ذاك الاهتمام في العسل
وشفنا حديقة الفراوله في الطريق بس كانت مسكره

وبنتي شوي قامت ترجع من ذاك الطريق واللفات

وواجهتنا بوابه في الطريق

طيب والشي الثاني طلعت جنتنج نفس طريق الكاميرون كله تعرجات بس احسن شوي واوسع شوفوا النفيقيتور كيف الطريق صاير

وضباب .. ياحبيبي...

يعني بياخذ وقت طويل بسبب اللفات والمرتفعات ...

ماوصلنا الا ثلاث الظهر تقريبا .. ولاتنسى تصور الموقف

لاتقول بحفظه .. صوره وخل الذاكره اللي في راسك فاضيه للصور اللي بتلقطها بعيونك

ودخلنا

وتمشينا لفات سريعه

العابهم حلوه جدا ورخيصه .. يعني تشحن البطاقه بخمسين .. تزهق ماخلصتها .. وتقدر تسترجع المبلغ اللي ما لعبت فيه

ودخلنا القريه الثلجيه

قصينا التذاكر

ودخلنا وقالوا لنا ممنوع التصوير داخل

وطلعنا من جنتنج بدري بسبب كنا نبغى ندخل كوالالمبور في النهار ... وقلنا وحنا طالعين بندخل القريه الفرنسيه بس للاسف مسحت الاحدثيات بالغلط ... وحنا طالعين بعد كانت حديقة الفروله مسكره ... بالعربي صحيح دخلنا جنتنج وعجبتنا.. بس فوتنا اشياء كثيره على الطريق.. وزيارة جنتنج كانت سريعه .. ماعطينها حقها .. المهم دخلنا كوالالمبور

وكانت الخريطه مش محدثه.. وفيه طرق جديده مش موجوده على النفيقيتور .. ضيعنا شوي.. بس وصلنا..

ودخلنا الفندق وشيكنا على الغرفه ولا قلنا ان حنا عندنا حجز .. كنا خايفين ان الفندق مايعجبنا ... قلنا اذا عجبنا والا بنكنسل الحجز
المهم عجبنا وقلنا لهم حنا عندنا حجز وقامت اللي في الاستقبال تعوج في فمها كأنه مش عاجبها اللي سويناه (بس بصراحه استقبالهم حلو .. انا انصح بالفندق)
وهذا تقرير عن الفندق
http://www.arabtrvl.com/vb/t1042.html
المهم دخلنا.. ودخلنا الاغراض وطلعنا نتمشى حول الفندق اللي كان مقابل التايمز سكوير وكان فيه مجمع رخيص الظاهر اسمه سوانج (عندي له صوره بعدين احطها ان شاء الله )شرينا شغله سريعه ورجعنا.. قلنا يبغى له نجي له مره ثانيه.. وحنا راجعين دخلنا مطعم القلعه

وكان اسعاره ممتازه والطعم مقبول جدا

ورجعنا الفندق عشان نام ونريح لليوم التالي

حجــازية · 12-02-2015, 02:34 PM

تقرير ممتع وصور جميله
بس ماحسيت كاميرون متعبه ليله واحده
خصوصا انك جاي من سفر وجالس تلف عالحدائق
وكذالك جنتنج وخصوصا انك ماقضيت ليله فيها
اتمنى تقول رأيك في الموضوع

kazami · 12-02-2015, 09:47 PM

اشكرك على هالجهد الجبار.. وبصراحة احس من جد عشت المغامرة والمتعه في ماليزيا بك ماتعنية الكلمة ولاخليت شي ماشاءالله عليك.. بس ماكأن الرحلة هجولة؟؟ كاميرون يوم؟

السليم · 12-02-2015, 10:06 PM

ما شاء الله تبارك الله
ابداع يفوق الوصف والخيال
الحمد لله على السلامه
واتمنى لك التوفيق في كل امورك

رائد بومريم · 13-02-2015, 09:46 AM

اقتباس : المشاركة الأصلية كتبت بواسطة حجــازية

تقرير ممتع وصور جميله
بس ماحسيت كاميرون متعبه ليله واحده
خصوصا انك جاي من سفر وجالس تلف عالحدائق
وكذالك جنتنج وخصوصا انك ماقضيت ليله فيها
اتمنى تقول رأيك في الموضوع

اشكرك على المتابعه والرد
اما بالنسبه لتعب الرحله .. اتوقع اني بفصل فيها شوي .. بس تحملوني
انا ما اسافر عشان ارتاح جسدياً .. انا اسافر عشان ارتاح ذهنياً
اذا جلست في الفندق بدون مااتحرك .. احس اني ريحت جسمي بس اصير متضايق كثير.. احس اني ضيعت يوم .. وعلى هذا الاساس اسوي جدول الرحله .. جدولي اطلع من الصباح ولا ارجع الا في الليل .. للنوم فقط ... في تكملة الرحله صار لي هذا الموقف.. ماعرفت وين اروح بسبب خلبطه صارت .. تضايقت لدرجة اني احس ان واحد كاتم على صدري .. ولدرجة اني مرضت ذاك اليوم .. ولدرجة اني جلست احسب الايام متى ارجع الديره ومتى موعد الطياره .. تابعوا معي التقرير وبتشوفون ذا الشي .. المراااااد ان الفندق للنوم فقط ولذلك الفنادق اللي حاجزها رخيصه جدا لانها للنوم فقط .. مع اني اتفق معك في ان الفندق اذا كان حلو .. يعطي السفر متعة اضافيه.. بس هذا انا سكنت في برجايا في لنكاوي .. كان هذا المنتجع قمة .. بس وش استفدت منه ؟؟؟ انا ما اجي الا بعد مااتعشى .. يعني يدوب افصخ ثيابي وانام .. والقصد من هذا التعب الجسدي اني اشوف اماكن جديده .. لكي ارتاح ذهنياً .. طبعا ذا الكلام مش ضروري يصلح للكل .. اللي يصلح لي يمكن مايصلح لك والعكس صحيح .. والكل ينام على الجنب اللي يريحه ... وفي رأيي اذا تبي ترتاح جسديا .. ماليزيا مش خيار مناسب لك .. تقدر تروح المالديف لانه فيها نشاطات خفيفه والاغلب الطبيعه الخلابه او جبل بونشاك في اندونيسيا لان الجو بارد وتقدر تسترخي هناك او اوربا ايضا بسبب الاجواء والطبيعه .. اما ماليزيا كلها نشاطات .. دوله سياحيه من الطراز الاول .. دوله اسبوعين ماتكفي تلفها .. وتجي تقول ابي ارتاح .. اقولك هذا شي راجع لك وكل واحد ينام على الجنب اللي يريحه .. اتمنى الفكره اللي في راسي وصلت لك ولكل اللي يستفسر عن جدول الرحله ليش هو متعب جسديا كذا؟؟؟ الجواب باختصار هو متعب جسديا بس مريح نفسيا وذهنيا لي..
وشكرا لكم
لاداعي للتصفيق

اقتباس : المشاركة الأصلية كتبت بواسطة kazami

اشكرك على هالجهد الجبار.. وبصراحة احس من جد عشت المغامرة والمتعه في ماليزيا بك ماتعنية الكلمة ولاخليت شي ماشاءالله عليك.. بس ماكأن الرحلة هجولة؟؟ كاميرون يوم؟

الشكر لله
اسعدني حضورك ومتابعتك للتقرير
ههههه اما سالفة هجوله فهي فعلا هجوله ههههه
بس الجواب انا كتبته فوق في الرد اللي قبلك

اقتباس : المشاركة الأصلية كتبت بواسطة السليم

ما شاء الله تبارك الله
ابداع يفوق الوصف والخيال
الحمد لله على السلامه
واتمنى لك التوفيق في كل امورك

جزاك الله خير
واشكر لك حضورك

رائد بومريم · 13-02-2015, 10:25 AM

اليوم التاسع (بوتراجايا + تسليم السياره في المطار+شلال تمبلر+تسوق)

طلعنا بعد الفطور في الفندق

بصراحه كان جيد فيه تنوع بسيط وطعمه حلو

وجهنا النفيقيتور الى المطار اللي خذت احداثياته من هذا المنتدى وحنا فالطريق شفنا اسهم تؤدي الى بوترجايا قلنا خلنا نروح نلف فيها شوي احسن من ان حنا نروح لها بتاكسي ورحنا

ونزلنا على البحيره (بس ماادري وين راحت صورها ) المهم ودخلنا المسجد

داخل المسجد

القصر الرئاسي (اتوقع)

يتبع بإذن الله...

رائد بومريم · 13-02-2015, 10:25 AM

صور بتقنية 360 درجة

في الساحه امام مسجد بوتراجايا

http://on.bubb.li/257893a8gas3pq8s556am7v/

الساحه الداخليه للمسجد

http://on.bubb.li/257893ah4y0noosm4skfroj/

داخل المسجد

http://on.bubb.li/257893as1gfi229bcwz8zb4/

رائد بومريم · 13-02-2015, 11:17 AM

وطلعنا على المطار وعلى اللوحات الى المطار وشفنا لوحات السيارات الاجار واتبعت اللوحات لين وصلت مواقف السيارات الاجار ودخلت

وشفت كل مكتب وله مواقف خاصه .. ووقفت السياره في مواقف الشركه الخاصه فيها اللي هي (مكتب هواك).. وجلست اشيك على اغراضي تشييك اخير .. الا وجاء صاحب مكتب التاجير .. وعطيته المفتاح .. وسالته عن التكاسي؟؟ وقالي هنا فالمبنى الثاني؟؟ كلها خطفت شارع .. وقبل اروح قلت خلني اشيك على برنامج ماي تاكسي بكم المشوار..!!
(الا صحيح وين صاحب البرنامج؟؟ .. العدني.. كأني فاقده) المهم وعلى اني بروح شلال تيمبلر .. وشفت المشوار ب٦٠ الى ١٠٠ رينجت.. والمسافه حول السبعين كيلو.. قلت حلو ورحت واخذت من تكاسي المطار ... وقالي المشوار على العداد ... والتكلفه تقريبا من سبعين الى ثمانين رينجت .. قلت اوكيه ماشي.. ومشينا وحسيت على وجهه علامة الضياع ..!! وقالي شرايك تروح الصنواي لاقون؟؟ تراها قريبه من الشلال.. قلت له الوقت متاخر .. بروح لها يوم ثاني.. وضيع وشغل النفيقيتور على جواله.. وقالي معليش ضيعت... وطيب كم باقي على الشلال؟؟ قالي اربعين كيلو .. ومشينا وطولنا على ما وصلنا.. بعدما وقف يسال كم واحد لين وصلنا.. واشوف العداد وصل ١٠٠ رينجت.. ودخلنا وقال بنتظركم .. قلت بكم بتنتظرنا؟؟ قال على العداد... قلت طيب.. ودخلنا ولا ارتحنا اذا هذه اللوحه في البدايه وين ترتاح

لوحه تقول انتبه من النشالين
المهم دخلنا

وشفنا القرود تتمشى جنبنا

وكملنا طريقنا

وكان فيه واحد عنده حيه وببغاء تصور معهم تركناه وكملنا المشوار ..

مش طويل كثير بس انتبه لأغراضك

ماطولنا لان الهنود كثير هناك .. يخوف شكلهم.. طلعنا على طول

وركبنا التاكسي واشوف العداد وصل ١١٢ رينجت ..!! وقلت له ودنا عند ميد فالي.. مجمع هو قالنا عليه.. وراح وعبى غاز للسياره (اول مره اشوف تعبئة الغاز للسياره .. وأول مره ادري انها من الكبوت)

وصلنا عند ميد فالي والعداد وصل ١٥٠ ..!! قالي ب١٧٠ ..!! قلت شلون؟؟ قال البوابات.. وماادري وش قال.. قلت له والوقت اللي ضيعته وانت ضايع؟؟ قال لا انا ماضعت.. هو على الطريق .. قلت له لا.. انت ضعت.. مش على الطريق.. انت ضيعت الطريق .. وشغلت النفيقيتور ورجعت.. قالي نفس الطريق... قلت له انت ضيعت.. وهذي غلطتك.. تبيني ادفع لك على غلطتك.. واتحمل غلطتك.. هذي غلطتك انت تتحملها.. قال طيب عطني اللي على العداد 150 رينجت ..قلت بعطيك مع اني المفروض مااعطيك.. بس انا بعطيك وعطيته ١٥٠
ودخلنا المجمع اللي يقول عنه راعي التاكسي فيه محلات رخيصه وفيه غاليه.. سالنا مكتب المعلومات .. ان راعي التاكسي يقول فيه محلات رخيصه ومحلات غاليه في ذا المجمع واللي اشوفه في ذا المجمع كلها ماركات..!!؟؟ قال ايه الغالي في المجمع اللي جنبه وهنا الرخيص...

قلت هاااااه ذا الماركات ورخيص اجل وش موجود هناك؟؟ قال شانيل ولوريل وتوابعها.. قلنا طيب مشينا .. وين المترو؟؟ قال الجهه الثانيه.. وحنا ماشين حصل محل يبيع الروتي وشرينا

واستخدمنا المترو ب واحد رينجت للشخص (مع اني مستخدم المترو في اوربا واعرف نظامه ولله الحمد) بس شوي تبهدلنا معه.. لان تغيير المترو بصراحه يبهدل شوي.. لان تغير المترو لازم تنتقل من مبنى الى مبنى.. بالرغم من انه رخيص ... بس زحمه.. ونزلنا على بوكيت بونتانج... ونزلنا عند مجمعنا اللي امس (سوانجي وانج)

وتمشينا شوي

وتعشينا

وهذا الشي لابد منه (روتي)

ورجعنا الى الفندق نستعد لليوم الثاني
وبكذا انتهى اليوم التاسع

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلة الى اندونيسيا و ايضا ماليزيا ارجو الافادة	ابو الوليد	بوابة اندونيسيا	10	30-07-2019 02:29 AM
محتاج مساعدتكم بجدول 16 يوم ماليزيا و اندونيسيا	abdullah551	ماليزيا	15	06-12-2017 07:08 PM
مقارنة بين ماليزيا و اندونيسيا	ali-333	بوابة اندونيسيا	28	02-07-2015 06:15 AM
التصوير بتقنية 360 درجة ببرنامج bubbli على الايفون (للتحدي)	رائد بومريم	بوابة الكاميرات	20	27-06-2015 01:55 AM
ماليزيا+اندونيسيا 22يوم وصور بتقنية جديده (للتحدي) القسم الاندونيسي	رائد بومريم	بوابة اندونيسيا	65	26-06-2015 02:07 AM