ماليزيا+اندونيسيا 22يوم وصور بتقنية جديده (للتحدي) - الصفحة 19

رائد بومريم · 17-02-2015, 09:09 AM

اقتباس : المشاركة الأصلية كتبت بواسطة كتكات783

أهلا بمبدعنا ( بو مريم )

الصن واي لاقون .. من أبرز معالم كوالا السياحية
مشكلته الوحيدة وقوعه في سيلانجور ( بعييييدة )

هلا بيك
هي فعلا بعيده شوي بس مو مشكله هذا البعد
لانه يبغى لها يوم كامل
يعني المشوار واحد .. من الصبح ولا ترجع الا تالي الليل
عفوا بس .. هي مش نفس محل القهوه او الشوكلاته .. ربع ساعه او نص وتطلع من المحل
او مثل اي مجمع ممكن انك تلفه في ساعتين او ثلاث
وبصراحه انا مااعتبرها بعيده كثير .. مشوارها 20 دقيقه .. لو قارنها ب افاموسا اللي تبعد اكثر من ساعه .. تعتبر قريبه

اشكرك على المتابعه والرد والمشاركه في الموضوع

رائد بومريم · 17-02-2015, 09:45 AM

اليوم الثاني عشر

كنا محتارين نروح افاموسا والا مانروح... والا نرجع الصن واي لاقون ... بصراحه خطيره الصن واي لاقون .. وحنا مالفيناها كلها .. المهم وبعد كر وفر قلنا بنروح الحديقة المائيه ديسا.. بس عرفت انها ماتفتح الا الساعه ١٢ الظهر قلنا نتسوق على خفيف في مجمع السوانج..
ومايمنع ان حنا نحلي شوي

هذا الروتي ادمان .. ماله حل

وبعدها استخدمت برنامج التاكسي عشان اعرف قيمة المشوار الى الديسا واتر بارك.. شفت المشوار من ١١ الى ١٧ رينجت بس انا كالعاده مااتصل على اصحاب التاكسي وانتظرهم لين يجون لي .. اوقف اقرب واحد لي واقوله بكم وكالعادة رفع السعر وقالي التاكسي ب٢٠ رينجت ..!! قلت ب١٥ رينجت.. كلها كذا كيلو .. (طبعا اذا قلت لهم كذا يفكر اني عارف المنطقة وان هذي مش اول مره اجي هنا .. ينصدم ) قالي لا .. واصريت وتركته.. وناداني بعدها.. ووصلنا عند الحديقة المائيه ديسا

ونزلنا ومشى .. بس للاسف طلعت ذاك اليوم محجوزه بالكامل لموظفين شركة كانون ولا احد يقدر يدخل.. وبعدها مشينا وطبعا مافيه تكاسي .. واستخدمت ذا المره البرنامج وطلبت تاكسي.. واتصل علي صاحب التاكسي وقال بجيك.. وانتظرته وجاني وركبت معه وقلت له ودني مجمع سوقو...

المجمع رخيص مثل مجمع السوانج بس يبغى له وقت..

طبعا هذه ماركات (مثل بيجون وديزني وبولو بس عليها تخفيض)

المهم لفينا فيه شوي وشرينا منه وفيه محلات

ومطاعم(بس اغلبها مطاعم ماليزيه)
وهذا جلسه جنب المطاعم

مشينا ماطلبنا شي من مطاعمهم .. الا وشفنا مطعم قصة حب (مانهاتن فيش ماركت) قلنا نجربه مثل ماجربوه باقي الاعضاء .. والكل يمدحه ويمدح الوجبه
طبعا انا مااكل ربيان بس المدام جربته وقالت حلو .. لذيذ
هذا الصوره في المنيو

وهذا الصوره في الحقيقه

وطلعنا واخذنا تاكسي بعد ماعرفت قيمة المشوار الى الفندق من البرنامج.. اخذت التاكسي وعطيته على قيمة المشوار اللي قالي عنها البرنامج.. وكنت افكر اخذ سيارة اجار عشان اروح فيها افاموسا.. لانه بتطلع ارخص لي بس غيرت الفكره.. ورجعنا للفندق وريحنا شوي وبعدها قلنا بنطلع نتسوق.. ورحنا مره ثانيه للسوانج وشرينا كم هديه وقلنا خلنا نرجع ندخل البرجايا تايمز سكوير .. ودخلنا المجمع طلع مثل السوانج واحسن ومثل السوقو واحسن يعني كانه يضم المجمعين

وغير انه يضم مدينة الملاهي في داخله (قطار الموت اذا ركبته يمر جنب المحلات .. خطير) بس دخول مدينة الملاهي اللي داخل المجمع بفلوس

بالعربي قريب من فندقنا ولاندري عنه... ويبغى له وقت.. وقلنا شلون بكره نروح والا لا للديسا واتر بارك لانه طلع لنا مجمع يبغى له وقت ونشاط.. ذا الحين خلنا نرجع ننام وبكره نكمل .. وتعرفون الرجيم والمحافظه على الوزن يمنع انك تاكل اكل ثقيل قبل تنام .. بس مايمنع من انك تحلي شوي بكريب .. هاه ؟؟ والا شرايكم؟؟

المهم رجعنا الفندق
وبكذا انتهى اليوم الثاني عشر من الرحله

ملاحظات : اذا صادفكم نفس هذا اليوم من مجمع الى مجمع ومن تسوق الى تسوق وكان معكم اطفال .. فأعرف انهم بيزهقون من التسوق.. وبيتسببون ..وهاتك ياصياح.. لان التسوق ممل عند الاطفال .. فنرجوا ضبط النفس والانتباه لهذه النقطه وعدم اللجوء للضرب.. ومحاولة تسلية الاطفال بجعلهم يشاركونكم في كل شي ممكن ان يشاركونكم فيه .. مثل (تعالي شوفي شريت لك بيجاما او شريت لك كذا .. اي لون تبين؟؟.. او تدخلونهم محل الالعاب اللي في المجمع وبعدين ترجعون تكملون تسوق ..

Deena · 17-02-2015, 09:52 AM

ما عرفت عن هالمجمعات للأسف والا كنت حاولت أمرها طالما أسعار كويسة وماركات محترمة.. عموما متل ما قلت اللي معه أطفال صعب يتسوق واللي صار انه ما كان في أي فعاليات تسوق الا سريع شغل مشّي حالك

رائد بومريم · 17-02-2015, 10:04 AM

اقتباس : المشاركة الأصلية كتبت بواسطة Deena

ما عرفت عن هالمجمعات للأسف والا كنت حاولت أمرها طالما أسعار كويسة وماركات محترمة.. عموما متل ما قلت اللي معه أطفال صعب يتسوق واللي صار انه ما كان في أي فعاليات تسوق الا سريع شغل مشّي حالك

صعب صعب جدا التسوق مع الاطفال .. طبعا والامر نفسه يصير معنا حنا الكبار .. لو رحت في مكان مافيه شي يجذب انتباهك .. بتترك المكان وبتمشي .. حتى السوق في بعض الاحيان اذا كنت رايح مع زميل لك وانت مش ناوي تشتري اي شي .. وان مشيت حالك وجلست تتفرج في الاول .. بس كلها كم لحظه وبتمل .. وكل شوي بتسأل اللي معك .. هاه ماخلصت؟؟

اشكر مرورك الكريم

فيصل · 17-02-2015, 10:11 AM

صدقت كثر التسوق ما يصلح لكن مول فيه العاب بيرضي الاطفال
ما يوضح اذا الملاهي مغلقه باليوم الفلاني افضل من الواحد يروح

شكرا لك

رائد بومريم · 17-02-2015, 10:24 AM

اقتباس : المشاركة الأصلية كتبت بواسطة فيصل

صدقت كثر التسوق ما يصلح لكن مول فيه العاب بيرضي الاطفال
ما يوضح اذا الملاهي مغلقه باليوم الفلاني افضل من الواحد يروح

شكرا لك

حياك الله اخوي
بصراحه بسبب التسوق واللي يصير من ذا الاطفال في التسوق وانك ماتأخذ راحتك في التسوق والاحراج اللي يسببونه لك قدام الناس .. هذا اللي خلاني اقرر بعدم اخذ بنتي في الرحله .. و دست على قلبي واتبعت عقلي بأنها ماتصلح تسافر وهي في هذا العمر ... بس الحمدلله اني تراجعت واخذتها معي (ماطاعني قلب نهيته .. ماطاع) (انا بتبع قلبي وبس ماعلي من الناس) ... بصراحه هي ملح الرحله .. وبتعرف الملح اذا زاد اخترب الطعم واذا صار مضبوط .. ضبط امورك

وبالنسبه للملاهي .. هي مش مغلقه للصيانه مثل او ماشابه .. هي محجوزه بالكامل لموظفين شركة كانون المشهوره .. يعني اللي يدخل بس الموظفين من شركة كانون وعوايلهم .. في ذاك اليوم بس .. وممكن بعض التاكسي يعرفون بس مايقولون .. الله يهديهم ويصلحهم

مســـــــافر على طــول · 19-02-2015, 08:07 PM

تفاصيل مفيدة للمسافرين لماليزيا الجميلة
شكرااا ابو مريم

رائد بومريم · 19-02-2015, 08:11 PM

اليوم الثالث عشر والاخير في كوالالمبور
عزمنا التسوق والبدايه من برجايا تايمز سكوير اللي يعتبر كل دور عن مجمع كامل ... جلسنا فيه اربع ساعات وبعدها رجعنا للفندق ريحنا شوي.. واستخدمت برنامج التاكسي وكتبت في الملاحظات( غدا بروح المطار الساعه سبع الصبح وبدفع ٨٠ ) ورد علي واحد واتصلت عليه وتفاهمت معه ... قالي حنا نحسب السعر على العداد .. قلت له لا ...قال اجل كنسل الطلب من البرنامج وبكره بجيك بوصلك بثمانين... قلت اوكيه ... وطلعنا رحنا سورايا اخذنا من روتي بوي ورجعنا مشي الى البافليون.. تمشينا شوي وبعدها رجعنا الفندق ورتبنا اغراضنا استعداد للذهاب الى بالي ... وقلنا بنشتري شنطه زياده بس قلنا خلها بعدين

وبكذا انتهى اليوم الثالث عشر

مافيه صور في هذا اليوم لانه كله تسوق وكله مجمعات مصورها من قبل

رائد بومريم · 19-02-2015, 08:36 PM

[COLOR="red"][SIZE="6"]

[CENTER]

اليوم الرابع عشر مغادرة ماليزيا
من الساعه ٦:٣٠ صحينا .. والتاكسي يتصل علينا ... وشلنا اغراضنا بسرعه.. ونزلنا سلمنا الفندق واتجهنا الى المطار .. وقالي صاحب التاكسي الحركه اللي سويتها خطيره (اللي هي اني كنسلت الطلب من على البرنامج) ممكن يسون حظر على جولك وجوالي.. عشان مانقدر نتصل على بعض بس كويس انها مرت بسلام ... لانهم حريصين كثير.. ووصلنا المطار وباقي على الرحله ساعتين.. طلبنا لنا كلوب هاوس من المطار .. الحلو ان تختار وش تبغى يحطون لك في الكلوب هاوس .. واللي مش حلو كل شي بسعره .. يعني تختار جبن برنجت وتقوله حط لي خس برنجت وحط بيض برنجت او اكثر حط دجاج برنجت او اكثر

المهم طار الوقت .. وتاخرت الرحله شوي..

ماطرنا الا بعد ساعه تقريبا ...

بنتي سوت لي خاتم من العجينة

الى هنا ينتهي القسم الماليزي من الرحله
لتكملة التقرير في القسم الاندونيسي على الرابط التالي
http://www.arabtrvl.com/vb/t2185.html

Deena · 19-02-2015, 09:48 PM

استمتعنا معك لآخر لحظة في ماليزيا.. ونشد الرحال لأقرأ أول مرة في حياتي تقرير عن إندونيسيا ..

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلة الى اندونيسيا و ايضا ماليزيا ارجو الافادة	ابو الوليد	بوابة اندونيسيا	10	30-07-2019 02:29 AM
محتاج مساعدتكم بجدول 16 يوم ماليزيا و اندونيسيا	abdullah551	ماليزيا	15	06-12-2017 07:08 PM
مقارنة بين ماليزيا و اندونيسيا	ali-333	بوابة اندونيسيا	28	02-07-2015 06:15 AM
التصوير بتقنية 360 درجة ببرنامج bubbli على الايفون (للتحدي)	رائد بومريم	بوابة الكاميرات	20	27-06-2015 01:55 AM
ماليزيا+اندونيسيا 22يوم وصور بتقنية جديده (للتحدي) القسم الاندونيسي	رائد بومريم	بوابة اندونيسيا	65	26-06-2015 02:07 AM