احتاج رايكم في ترتيبي لسفرتي لشهر العسل

foofaa · 27-01-2015, 10:50 AM

حبيت اطرح برنامج سفرتي وأخذ رايكم فيه واذا احتاج أي تعديل عليه

السفرة بتكون 15 ليله (26/04/2015 - 11/05/2015) مقسمة كالتالي:

الطيران: طيران الإتحاد

5 ليالي فرنسا (ديزني لاند):
السكن: Kyriad Disneyland® Paris
وقت الوصول: الساعة 4 عصرا
البرنامج:
اليوم الأول راح يكون جوله استطلاعية بما إني راح أوصل العصر
اليوم الثاني بروح بالميترو لوسط باريس: برج ايفيل صعوده والحديقة، جوله نهر السين، والجولة بالباص الأحمر لمعالم باريس
اليوم الثالث: رحلة قصر فرساي، وجوله ثانية بالباص الأحمر مع النزول لأحد المعالم
اليوم الرابع والخامس : ديزني لاند والاوت لت
اليوم السادس والأخير: تجهيز الأغراض للإنتقال لبروج في بلجيكا
^ عندي استفسار هني .. أي افضل هل اروح لوسط باريس بالمترو وأخذ Thalys؟
أو اخذ على اقتراح اخوي qa6ar911 اني اروح دايركت من ديزني لبروج بالـ TGV - sncf وشلون أحجز له؟

5 ليالي بلجيكا (بروج):
السكن: B&B De Bornedrager
أحتاج اقتراحاتكم للترتيب واهم شي مصنع الشوكولاته

5 ليالي هولندا (امستردام):
السكن: Best Western Dam Square Inn
أحتاج اقتراحاتكم للترتيب وحابة أزور هاي الأماكن:
- قرية الطواحين
- قرية الجبن
- قرية الصيادين
- روتردام ودلفتولاهاي
- حديقة الزهور

وبعدها العودة من مطار امستردام على طيران الإتحاد

fanda · 27-01-2015, 12:55 PM

عالسريع

٥ ليالي باريس ممتازة
الأفضل كان تسكنون باريس على الأقل اول الأيام المخصصة لباريس بس الي اذكره انه قلتي حجزكم ما يتغير ؟!!!

نجي للجدول اول يوم مثل ما قلتي استكشاف المنطقة وبعدها ممكن تروحون مول فآل دي يورب القريب من ديزني تمشي وعشا

دام ناوين تصعدون ايفل الأفضل تحجزون قبل وترتبون يومكم على الوقت الي تلقونه لانه مو سهل المواعيد

الباص الأحمر ما احس يحتاج يومين ... يوم واحد كافي تلفون الروت كامل ويمديكم بعد تنزلون مكان الي تبون ( اذكر انه دخول اللوفر مو من مخططكم)
الرحله النهريه ممكن تكون في المساء اذا يمديكم الوقت او تنتقل لليوم الثاني

اليوم الثالث فرساي ( بس ما يكون يوم الاثنين لانه مغلق ) وبعده ممكن مونمارت او الحي اللاتيني فيه مطاعم حلال ممكن تتغدون في واحد منها

بخصوص القطار دام إنتوا في ديزني فالاريح طبعا القطار من هناك
نزلتكم باريس بالشنط وتبديل محطات بتصير حوسه

الحجز هين وتقدرين عن طريق النت ... انزل لج الرابط اذا فتحت اللابتوب

وان شاء الله الي عنده خبره عن بروج وأمستردام يفيدك بس ٥ ليالي بروج احسها وايد خصصي يوم لبروكسل عالاقل

foofaa · 27-01-2015, 04:00 PM

يا هلا اختي أم ريم ..

اي الحجز ما يتغير ..

بخصوص بروج انا بسكن فيها على انها أهدا من بروكسل بس اكيد ما بتكون كل رحلاتي فيها انا في بالي اروح يوم أو يومين بالمترو لبروكسل او على حسب البرنامج

فيصل · 28-01-2015, 01:28 AM

ما قصرت ام ريم
ليش ما تخلين روحتك لايفل عبر الباص الاحمر وتنزلين ومن بكره تكملين الباقي
ويفضل تنزلين من عند ميدان ترايكادور منه تقدرين تصورين افضل صور لايفل وفيه اكوايم صغير قريب المحطه

أو اخذ على اقتراح اخوي qa6ar911 اني اروح دايركت من ديزني لبروج بالـ TGV - sncf وشلون أحجز له؟
tgv حاليا بالعربي سهل الحجز

foofaa · 29-01-2015, 08:59 AM

أووكي اخووي فيصل ماقصرت يالشيخ

أم ريم انتظر من صوبج رابط الموقع

وننتظر راي اخواني البقية

fanda · 29-01-2015, 09:53 AM

صباح الخيرات

هذا الرابط واعذريني عالتأخير

Train travel in France and Europe - Voyages-sncf.com

وجهات أوروبية · 01-02-2015, 02:18 AM

انا بااااااااك

الله يعطيها العافيه خبيرتنا ام ريم
ومديرنا فيصل
بيض الله وجهيهم ماقصرو

بالنسبه لحجز الفندق في دزني لاند مايتغير صح !!
لو حاجزه اول ليلتين او ثلاث في باريس عشان مايكون طريقج طويل لما تروحين فرساي
وعشان مب كل مره تروحين مشوار باريس

اذا كان السكن في دزني لاند اكيد اختي الافضل والاريح لج تاخذين القطار من دزني لاند الى بروج
وقلت لج تبدلين قطارين في الرحلة عشان يكون توصلين اسرع مابين 3 ساعات و 19 دقيقه
الى 3 ساعات و 31 دقيقه

والي يبدل قطار واحد فقط يوصل في 4 ساعات و31 دقيقه يعني ياخذ وقت اكثر

اذا تبغين نساعدج بحجز رحلات القطار او نساعدج في اختيار الرحله خبرينا ماراح نقصر معاج ان شاء الله

ان شاء الله بنسوي لج جدول أبشري
تبغين تزورين فقط مصنع الشوكلاته

او تبغين انتي تسوين شوكلاته بنفسج وتاكلينها

ان شاء الله رجعين للجدول للمناطق الي بتزورينها وكل الي تحتاجينه ان شاء الله

foofaa · 01-02-2015, 02:30 PM

ولكـم أخووي qa6ar911

بخصوص حجز ديزني ما بقدر اغيره

وعن حجز القطار .. انا دخلت على الموقع الي عطتني اياه اختي Fanda يزاها الله خير
بس شوي تلخبطت فيه ماعرفت شنو الي اختاره

انتظر من صوبك الجدول بفارغ الصبر

وعن الشوكلاته انا مينونه فيه فيعني لو يستوي الثنين احسن

وجهات أوروبية · 01-02-2015, 02:58 PM

يسلمووو اختي هههه

ان شاء الله أبشري بالجدول الليله بأذن الله

بالنسبه لحجز القطار
ان شاء الصور تكون واضحه سويتها على السريع ههههه

1- تدخلين على الموقع
وتكتبين نفس البيانات بالصوره
مع تحديد فئه العمر تحت وعددكم وتأكدي من التاريخ

العاب

2- هنا مرحله اختيار الرحله الي تناسبكم
شوفي اي وقت يناسبكم
الصوره الي ظاهره ان الرحله 4 ساعات و6 دقايق
بس شوفي اوقات ثانيه بتحصلين 3:31 و 3:19
ولما تضغطين المستطيل الازرق في اي رحله تطلع لج التفاصيل والمسافه معاها

مثال الرحله الي تحتها يمشي القطار الساعه 10:23 اضغط على الازرق بتشوفين المسافه 3:31

العاب

3- هنا تفاصيل الرحله
وتحت تختارين سياحيه او درجه اولى

العاب

4- هنا تكتبين بياناتكم الشخصيه وتستمرين لين الاخير
واي شي توقفين عنده خبريني عشان اوضح لج زياده

العاب

ان شاء الله يكون واضح

بالتوفيق اختي

fanda · 01-02-2015, 05:53 PM

اختي حاولي مره ثانيه مع المكتب الي حجزتوا منه
حتى لو تدفعون مبلغ زياده شوي بس تشترون راحتكم
غير المشوار اليومي لباريس فالرحله الى بروج ما احسها بتكون مريحه
حاولوا العفش يكون اقل ما يمكن والشناط ما تكون كبار عشان الصعده والنزله من القطارات

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
اللمسات الأخيره لجدول شهر العسل (ماليزيا) احتاج نصائحكم الذهبيه	sabic11	ماليزيا	59	15-08-2015 01:02 PM
تخطيط لشهر العسل 12 يوم انتظر رايكم في الجدول	sssh1988	بوابة اندونيسيا	2	16-05-2015 11:00 PM
اسبانيا لشهر العسل	ريم حربي	بوابة اسبانيا	2	06-04-2015 05:33 AM
رايكم بشهر العسل ضروري	msaed559	ماليزيا	7	21-03-2015 01:58 PM
رايكم يهمني (( الجدول + الاسعار )) لشهر العسل !!	out law	ماليزيا	10	16-01-2015 03:35 AM