تجربتي في إستخراج الفيزا السياحية - الظهران - الصفحة 2

FaisalAS · 05-05-2016, 12:29 AM

اقتباس : المشاركة الأصلية كتبت بواسطة منيرة

شكرًا لذكر تجربتك
لا تنسانا بالتقرير

Sent from my iPad using Tapatalk

عفواً

إن شاء الله ..

فيصلمعجبون بهذا.

FaisalAS · 25-05-2016, 03:01 PM

+ تحديث للموضوع و تكملة المستجدّات.

بعد طول إنتظار, في يوم 19 مايو تفضّلت علي السفاره الأمريكية بإرسال إيميل لي مفاده :

( عزيزي المقّدم على الفيزا, فيزتك تحت الإجراء الإداري, لإكمال الطلب يرجى منك إتباع المعلومات المطلوبه وإعادة إرسال الرد على نفس الإيميل ,
1- جميع أرقام جوازاتك القديمة والجديده.
2- برنت ( كشف ) من مديرية الجوازات تفيد بعدد جوازاتك و أرقامها.
تحياتنا لك. السفارة الأمريكية ).

وقت و يوم الرساله لم يتم إلا من قبل شخص لعين لعين لعين جداً ! يعني فوق تأخيركم يا أنجاس ترسلون الرسالة يوم خميس الساعة 3 و نص العصر !!!! مافيه أي دائرة حكومية تعمل هذا الوقت ونهاية أسبوع ! ثانياً أضطر إني أجلس إلى يوم الأحد يعني يومين أسب وألعن فيكم !!!!!

هدّيت من نفسي وقلت كل تأخيره فيها خيره وإنتظرت إلى يوم الأحد حتى رحت للجوازات مواصل دخلت الجوازات ورحت لمنطقة سفر السعوديين ودخلت على مكتب الرئيس هناك ضابط برتبة مقدّم محترم جداً وواضحه القيادة والوحوشيه اللي فيه

سلام عليكم عليكم السلام.
لاهنت طال عمرك أحتاج برنت للسفارة الأمريكية من وين آخذه؟
قال روح السيب ثاني غرفة كلم فلان الفلاني هو يعطيك إياه .. قلتله أمرك طال عمرك

وأروح والحمدلله ماكان فيها هالغرفة إلا شخصين أو ثلاث مع العلم إنها ( غرفة تسليم الجوازات ) يعني غرفة مهمه جداً.

وأكلم الموظف من ورى القزاز بنبرة هياط خفيفه ( أنا جاي من طرف المقدّم وأبي فلان الفلاني ) قام من مكانه العسكري قال أزهمو فلان إسترح طال عمرك الحين بيجيك الشباك الأخير.
جاني قلتله السفارة الأمريكية طلبت مني برنت للجوازات اللي طلعتها من أول قال أوكيه عطني بطاقتك الأحوال عطيته و صرف لي برنت لعدد السفريات ! و مشيت
وأرجع البيت وأسوي سكان للبرنت وأرسله لهم وأصور عدد ختومات كانت بجوازي القديم وأنا صغير مو موجوده بالبرنت وأيضاً جوازي كامل صورته وأرسلت لهم أرقام جوازاتي اللي كلها إثنين واحد بيدي و الثاني محجوز عند السفاره فقط وكلام منمق يمكن لو شخص قراه بيقول خلاص عطوه الفيزا انا رحمته مابي شي ثاني منه

+ أرسلولي الرد بنفس اليوم الساعة 3 العصر قالو :-

عزيزي. الرسالة غير مقبوله بالكامل, نبي برنت من الجوازات يعلمنا كم جواز طلعت فقط سفرياتك حطها في أذنك .

طبعاً حالتي كانت صعبه والنوم مقطّع كل شوي أصحى أشوف ردّوا أو لا يعني الوضع صعب جداً ويوم قريت كلامهم الجوال بغيت أفتته بيدي أنقهرت وعصبت وأرتفع ضغطي يعني لازم أروح بكره نفس الحكاية لنفس المقر لنفس الشباك وأفهمه الموضوع مره ثانيه و زحمه وحر والوضع لا يُطاق

أستهديت بالله و جمعت أنفاسي وقلت مو مشكله نروح بكره كل تأخيره فيها خيره , جا من بكره يوم الإثنين و طلعت على الساعة 8 الصباح و رحت الغرفة على طول بدون ما أمر على المقدّم لأني حفظت الطريق خلاص هههههههه ونفس الكلام نادولي فلان الفلاني , لكن هالمره طوّل علينا وبنفس الوقت الشباك اللي أكلم فيه هو نفسه شباك للضمان الإجتماعي , يعني قدامك شيبان وأنا أصغر شخص فيهم ( فعلياً ) ! كان قدامي 3 شيبان خلصوا في ظرف نص ساعة وجيت بعد ما تأكدت إنهم مشوا وأكلم بالشباك نفس الموظف اللي خدمني أمس بس مو هو اللي أنا كنت أبغاه واللي موصّيني عليه الضابط ، قلتله أمس جيتك وطلبت منك برنت لكن صرفت لي برنت سفريات ورفضوه السفارة فاللي أحتاجه الآن برنت لعدد الجوازات المستخرجه من عندكم فقط لا غير ! قال أبشر أجلس أنتظر وأنا بدخل داخل أكلمهم ( داخل غرفة الحاسب الآلي ) قلت مو مشكله.

أنتظرت نص ساعه و طلع عسكري ثاني غير الأول اللي كلمته وأدقق بإسمه وإلا فعلاً نفس اللي أبيه أنا , وأنقز له السلام عليكم لا هنت الموضوع كذا كذا كذا قال أوكي عطني جوازك القديم وعطيته قال أجلس والحين بجيب لك البرنت قلت أوكي.

جلست وأنا عيني على باب هالغرفة متى تفتح وآخذ الأوراق وأطلع لأن طقت كبدي , جاء بعد 5 دقايق وأروح له وأشوف عطاني ورقتين , الأولى تبيّن أول جواز إستخرجته في 2006 والثانيه الجواز اللي مع السفارة , و كل جواز له ورقته الخاصه قلت أبوك مرحوم ياشيخ هذا اللي أبيه من أول , قال بتدرس بأمريكا ؟ قلت لا سياحه , قال الله يوفقك ويسهل عليك إذا دقرّوا لك أو صارت لك مشكله تعال عندي على طول. شكرته و طلعت وعلى طول وصلت البيت وأسوي سكان للبرنت وأرسل الورقة للسفارة وردوّ علي بنفس اليوم هالرد :

عزيزي, تم قبول الرسالة.
وسنخبّرك إذا أحتجنا معلومات إضافية.
شكراً لتعاونك.

أنا هنا تنفسّت الصُعداء قلت حمدلله فيه مبشّرات خير. عدى يوم الإثنين على خير جاء الثلاثاء دخلت على موقع التحقق من الفيزا وشفت الإجراء إداري بس إنهم محدثّين الطلب حقي بتاريخ 5/24 يعني نفس اليوم , قلت حلو يعني شغالّين ع الطلب ومهتمين فيه.

دخلت اليوم الصبح و حصلت هالرسالة الجميله

ISSUED الكلمة الجميله على القلب

تم الإنتهاء من الإجراءات باقي يرسلون الجواز لأرامكس , فنقول إن شاء الله إذا مو اليوم حيكون بكره , وإذا مره مره مو بكره راح يكون الأحد. وأستلم الجواز وأطير وأسابق العصافير

أعتذر عن الإطالة بس حبيت تشاركوني المعاناه وأن كل تأخير يصيب المؤمن فهو خيره له وكل الخير.

* لاحظت يردون ع الإيميل بسرعة , طبيعي هالشي أو أنا لحالي لاحظته ؟ يعني ما في أي لطعات بالإيام مرتين كلمتهم الساعة 10 ويردون لي 2 العصر أو 1 يعني مافي تأخير ! ..

آخـــرفـــرصـــة و فارس الجبيل معجبون بهذا.

آخـــرفـــرصـــة · 26-05-2016, 01:29 AM

ما شاء الله

1000 مبروك بعد المعاناة
المهم كلمة issued و الباقي يهون

شكراً علىى اهتمامك و تحديثك للتجربة لين حصلت على الفيزا

رحلة سعيدة

user01 · 26-05-2016, 06:31 AM

مبروكككككككك
وبدون عصبية طول بالك
أنا أسوا منك
في 2010 طلبوا مني ورقة خلو سوابق
ورحت وبصمت وأخروني بالشهور ..
مع أني الحمدلله شاب حالي حال نفسي لا مشاكل ولا شيء
فمصيبتك أهون من غيرك

آخـــرفـــرصـــةمعجبون بهذا.

FaisalAS · 26-05-2016, 12:38 PM

اقتباس : المشاركة الأصلية كتبت بواسطة آخـــرفـــرصـــة

ما شاء الله

1000 مبروك بعد المعاناة
المهم كلمة issued و الباقي يهون

شكراً علىى اهتمامك و تحديثك للتجربة لين حصلت على الفيزا

رحلة سعيدة

الله يبارك لي بعمرك و يحفظك .. معاناه أكثر من 20 يوم واليوم بسنه

الله يحفظك أشكرك

آخـــرفـــرصـــةمعجبون بهذا.

FaisalAS · 26-05-2016, 12:40 PM

اقتباس : المشاركة الأصلية كتبت بواسطة بورمث

مبروكككككككك
وبدون عصبية طول بالك
أنا أسوا منك
في 2010 طلبوا مني ورقة خلو سوابق
ورحت وبصمت وأخروني بالشهور ..
مع أني الحمدلله شاب حالي حال نفسي لا مشاكل ولا شيء
فمصيبتك أهون من غيرك

الله يبارك لي بعمرك يابطل .. يارجال أنا متأكد مشتبهين فيني عشان كذا هالجربعه كلها

و لا أني ضعيّف و الله مثلك على قولهم أمشي جنب الحيط و لا لي بالمشاكل و الجرايم ههههههههههه

بشر عسى طلعت لك ؟؟ ..

آخـــرفـــرصـــةمعجبون بهذا.

user01 · 27-05-2016, 05:41 AM

ايه أستلمتها وسافرت أميركا ورجعت الحمدلله
والحين بجدد وبسافر مره ثانية إن شاءلله
الله يسهل سفرتي وسفرتك ..

ولا تحسب أنك الوحيد
سبق وطلبوا ناس أرقام جوازاتهم مثلك ،،

فارس الجبيل · 27-05-2016, 08:05 AM

تجربة جميلة وصحيح انهم معقدينها شوي لكنهم شحليلهم امورهم زينه ويخاطبونك مباشرة وواضحين حتى بالطلبات الي يبونها اعرف لك سفارات لو ناقصة ورقة ماعطاك مجل تكمل وتقدم من جديد وبرسوم جديدة هذولا ياحليلهم ياخذون ويعطون معاك وفعلا سريعين بالرد للأستفسارات وموقعهم محدث اول بأول شوف تجربتي لها في يوم خلصت

والله يوفقك ومبروك تخرج خويكم وترجعون بالسلامة ان شاء الله

FaisalAS · 27-05-2016, 03:13 PM

اقتباس : المشاركة الأصلية كتبت بواسطة بورمث

ايه أستلمتها وسافرت أميركا ورجعت الحمدلله
والحين بجدد وبسافر مره ثانية إن شاءلله
الله يسهل سفرتي وسفرتك ..

ولا تحسب أنك الوحيد
سبق وطلبوا ناس أرقام جوازاتهم مثلك ،،

ماشاءلله على البركه .. و الله يسهل لك فيزتك الثانية و سفرتك يا رب آجمعين.

صحيح و الحمدلله تجاوبهم ممتاز

FaisalAS · 27-05-2016, 03:14 PM

اقتباس : المشاركة الأصلية كتبت بواسطة فارس الجبيل

تجربة جميلة وصحيح انهم معقدينها شوي لكنهم شحليلهم امورهم زينه ويخاطبونك مباشرة وواضحين حتى بالطلبات الي يبونها اعرف لك سفارات لو ناقصة ورقة ماعطاك مجل تكمل وتقدم من جديد وبرسوم جديدة هذولا ياحليلهم ياخذون ويعطون معاك وفعلا سريعين بالرد للأستفسارات وموقعهم محدث اول بأول شوف تجربتي لها في يوم خلصت

والله يوفقك ومبروك تخرج خويكم وترجعون بالسلامة ان شاء الله

بالضبط أخوي فارس و الحمدلله خلصنا و أستلمت الفيزا 5 سنوات <3

وياك ياغالي والله يبارك بعمرك أشكرك ونورت.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تجربتي بأصدار فيزا امريكية من الظهران	فارس الجبيل	فيزا امريكا	21	15-05-2019 04:12 PM
تجربتي مع الفيزا النمساوية من السفارة الفرنسية	ماروكو	فيزا	10	08-02-2018 11:20 PM
تجربتي بأستخراج الفيزا الفرنسية السياحية في الرياض🇫🇷	user01	فيزا	18	27-04-2017 07:56 PM
تجربتي بأستخراج الفيزا الاسترالية السياحية🇦🇺	user01	فيزا	10	09-05-2016 10:31 PM
تجربتي بأستخراج الفيزا البريطانية السياحية في الرياض🇬🇧	user01	فيزا	4	13-03-2016 12:28 PM