25-05-2016, 12:55 AM
|
#1 |
مسافر جديد
تاريخ التسجيل : Mar 2016 رقم العضوية : 8127 الجنس : ذكر المشاركات : 79
|  تجربة الحصول على Short Term Student Visa
بسم الله الرحمن الرحيم
السلام عليكم
راح انقل لكم تجربتي للحصول على فيزا Short Term Student Visa
وهي عباره عن فيزا للطالب اللي راح يدرس هناك لمده قصيره اقل من 6 اشهر
بنبدأ معكم من أول شيء وش الخطوات المطلوبه
بحثت عن معاهد بريطانيا وشفت وش الافضل بالنسبه للتعليم وبالنسبه لقلة العرب وبالنسبه للقيمه الماليه وبالنسبه للمكان لان ابغى رحلتي تكون دراسيه وسياحيه بنفس الوقت ان شاء الله
الحمد لله حصلت معهد نقول ان شاء الله كويس , بعدها راسلتهم علشان القبول قالوا لي ما نبغى منك الا صورة من الجواز , طبعا قبل لارسلهم صورة جوازي , حصلت لي موقع ببريطانيا وشغالين فيه ناس سعوديين واجانب واغلبهم مسلمين يجيبون لك قبول من اي معهد تبغاه مجانا
طبعا اكيد البعض يقول وش فايدتهم ؟!
فايدتهم : مثلا نقول ان سعر المعهد مع السكن لمدة شهرين 3000 باوند
طبعا هم بيكلمون المعهد وياخذون نسبه من المبلغ بحيث انه انت ما يزود عليك ولا ريال
يعني انت دفعت 3000 للمعهد هم راح ياخذون منها 300 باوند تقريبا يعني بالعربي انت ما عليك منهم تدفع للمعهد المبلغ المحدد وهم يتفاهمون مع بعض 
طبعا راسلت الموقع هذا وقالوا لي ابشر بس ارسل لنا صورة جوازك وارسلتها لهم , بعدها تقريبا ب3 ايام والقبول عندي قالوا لي عاد لازم تدفع رسوم وهي 250 باوند للمعهد علشان يرسلون لك الورقه اللي تقدم بها على السفاره ورقة ( Short Term Student Visa offer ) حولت للمعهد الرسوم عن طريق بنوك التحويل وبعدها ارسلوا لي الورقه
طبعا هذا كرت الموقع اللي جاب لي قبول المعهد للي حاب يتعامل معهم الله يوفقنا وياهم
وهذا رابط موقعهم
http://www.talibconsultancy.co.uk/
وعاد يوم بقى على سفرتي شهرين قدمت على السفاره وحجزت موعد بيوم 9 من شهر مايو قبل اسبوعين تقريبا بالمركز الموحد بالرياض بشارع ام الحمام بجنب هايبر بنده وقيمة الفيزا 132 دولار تقريبا 510 ريال , طبعا بما اني طالب جامعي لازم يكون فيه احد يتكفل بمصاريفي علشان يقبلون الفيزا
رحت لهم ومعي اوراقي وهي
1- جواز السفر
2- ورقة ( Short Term Student Visa offer )
3- خطاب تكفل بالمصاريف ( طبعته من موقعنا هذا من هنا ( http://www.arabtrvl.com/vb/t381.html)
4- صورتين شخصيه مقاس 45 ملل في 35 ملل ( طبعا ما ياخذونها منك لكن للاحتياط فقط )
5- تعريف عمل وتعريف راتب ( من الشخص المتكفل بمصاريفك )
6- كشف حساب لمدة 6 اشهر ( من الشخص المتكفل بمصاريفك )
7- الأبليكشين من موقع السفاره ( اللي سبق وعبيته )
8- ورقة الموعد
9- تذكرة الطياران ( مهب اجباريه لكن ممكن تساعد بتسريع اجراءات الفيزا )
10 - صورة بطاقة الأحوال ( مهب اجباريه لكن زيادة الخير خيرين )
كان موعدي الساعه 12 الظهر
وصلت لهم 11:30 ودخلت واخذت رقم قدامي تقريبا 3 او 4
انتظررت وجاء دوري جلست عنده ودخل بياناتي وقالي وش معك اوراق تخص الفيزا علشان احطهم بالملف
واوريه اورافي طبعا اخذ مني كل الأوراق المذكوره فوق ما عدا الصور ما اخذها مني
وطلعت من عنده وقالي رح لم صالة ال VIP علما ان فيزتي عاديه وليست VIP
دخلت الصاله وانتظرت شوي وناداني الموظف ودخلت لغرفة التبصيم بصمت وفتح الجواز وقالي هذا جوازك قلت له نعم وقالي طيب ناظر الكاميرا اللي فوق لمدة 5 ثواني
بعدين قالي ناظر الكاميرا الثانيه علشان ناخذ صوره لك للفيزا
بعدها قالي توكل على الله , وسألته كم يبغالها وتطلع قال 10 ايام تقريبا
طبعا الكلام هذا كان يوم الاثنين طلعت من عندهم الساعه 12 الظهر وجتني رساله العصر ان اوراقي راحت للسفاره وجتني رساله منهم يوم الثلاثاء بالليل تقريبا قالوا لي بدوا باجراءات الفيزا
ويوم الاثنين الموافق 16 من شهر مايو ارسلوا لي قالوا فيزتك جاهزه ويوم الثلاثاء بعدها بيوم ارسلوا قالوا تقدر تستلمها اليوم
طبعا ارسلت اخوي لهم ومعه الايصال اللي اخذته بموعد المقابله واستلم الجواز والحمد لله فيه الفيزا لمدة 6 اشهر
طبعا الشكر الأول والاخير لقائمين على هالموقع وبقية الاعضاء والله استفدت منهم كثير وازعجتهم بأسألتي وما قصروا والله
الله يجزاكم خير ويكتب لكم بميزان حسناتكم
وانا تحت امركم اللي عنده سؤال او استفسار يتفضل
شكرا لكم طولت عليكم لكن قلت ودي انقل لكم تجربتي كامله من طق طق للسلام عليكم
واسف على الحوسه لكن اول مره نكتب مثل هالتجارب وان شاء الله مهب اخر مره
ملاحظه لما يقول لك تدفع 10 ريال علشان الرسائل النصيه قله لا شكرا لاني دفعت ولا جتني منهم والله ولا رساله الا لما اخوي استلم الجواز جتني رساله منهم , ان جوازك استلم من المركز الموحد
التعديل الأخير تم بواسطة yssar3 ; 26-05-2016 الساعة 04:47 AM |
|  |
22الاعجاب
العرض الشجري
المواضيع المتشابهه 
