رحلتي اللندنيه ( 2013 ) - الصفحة 6

هداوه · 12-02-2015, 04:08 PM

الهايد بارك

هاي ثاني زياره لنا للهايد بارك

تذكرون المره اللي طافت لما زرنا الهايد بارك ومايلسنا فيها غير شويه بسبب البرد

بس هاي المره غير

طلعت من الشقه وانا أسحب ريولي لين الهايدبارك

وكلمت البنات انه ايوني في الهايد بارك

ورغم الالم اللي في ريولي الا انه هذا احسن قرار خذته

خصوصا انه ماتمشينا في الهايد بارك من يينا

ماشاءالله ركيض في ركيض

ومب عارفين ع الشو بنلحق ولا بنلحق

وصلت لين البحيره بعد جهد كبير في المشي وانا أسحب رويلاتي

وع طول من وصلت عند البحيره سرت الكوفي

واخترتلي مكان مقابل البحيره ويلست اتنفس الهواء المنعش

واتمتع بمنظر البحيره ع انغام محمد عبده

وتميت فتره طويله وانا يالسه ومستمتعه باليلسه لين راحوا كل

الناس اللي حواليه

واللي كان يالس كان اييهم راعي المطعم ويخوزهم ويلم الكراسي

الا أنا

الظاهر ماحب يخرب عليه خلوتي وتركني انا الوحيده اللي يالسه في جوي

ورغم برودة الجو الا اني مابغيت أتحرك من مكاني لين بدأت تغرب الشمس

والبنات ماوصلوا

عقب دخلت واخترت طاوله تطل ع البحيره ويلست أشرب شاي

وأعبي اوراق التاكس فري

وأخيرا وصلوا البنات

وكانوا واصلين قبلها بفتره وانا ماكنت أدري ويالسين يتصورون عند البحيره

وعقب يوني ويلسنا فتره في الكوفي نسولف ويخبروني سوالفهم

وأخبرهم كيف يومي كان تعيس بسبب الم ريولي

وعقب قررنا نرجع الشقه لأنه ورانا ترتيب شنطنا والدنيا بدأت تظلم

وهذا الجزء بتكلم عنه لما أوصل في اليوم الأخير من التقرير لأنه فيه وايد سوالف

وانتهت زيارتنا في هذا اليوم لشارع أكسفورد اللي

على المرات اللي سرت فيها لندن بعدني ماغطيته كله

بالنسبه لألم ريولي

بعد مارجعت البلاد الالام زادت فيني بسبب الجهد والمشي اللي مشيته

وبعد فتره زرت الدكتور وقاللي اللي صارلج هو تمزق في العضلات والاربطه

وافضل شي تسوينه هو الراحه

بهاي الرحله الخفيفه انتهت زيارتنا للهايد بارك والتسوق في شارع اكسفورد وان شاءالله

المره اليايه بوديكم مكان سياحي أكيد تعبتوا من السوق ويبالكم استراحه

انتظروني في رحلتنا لمصنع الشوكليت

كادبوري

وليد عنبه · 13-02-2015, 04:01 PM

الله الله ياسلام على لندن رغم ان سكان الجزر يحبون العزلة الا ان اللنديين خلاف ذلك
متابع

فيصل · 13-02-2015, 04:30 PM

سلامات من كثرة المشي وعدم الراحه
ما ألومك أسواق*أسواق
خيار حيد الهايد
وبكره السفر ودك ما تخلي شيء كل شيء بتزوره

**نونا** · 14-02-2015, 10:00 PM

يسعدك يأم عيسى..رحلتك هذي شجعتني كثير وزرعت الثقة بداخلي..حزمت حقائبي واستمتعت بإجازة العيد في احضان مدينة الضباب..التخطيط الجيد واعتمدت على معلوماتك القيمة في رحلتك اللندنية..والحمدلله ماتهنا كثير واسمتعت برفقة عيالي..بارك الله في جهودك الملموسة يامبدعة..

هداوه · 20-02-2015, 12:41 AM

اقتباس:
المشاركة الأصلية كتبت بواسطة وليد عنبه

الله الله ياسلام على لندن رغم ان سكان الجزر يحبون العزلة الا ان اللنديين خلاف ذلك
متابع

ياهلا وسهلا فيك أخويي

اقتباس:
المشاركة الأصلية كتبت بواسطة فيصل
سلامات من كثرة المشي وعدم الراحه
ما ألومك أسواق*أسواق
خيار حيد الهايد
وبكره السفر ودك ما تخلي شيء كل شيء بتزوره

الله يسلمك

صح كلامك مشي وايد مره وحده ممتعودين عليه النتيجه ضغط ع ريولي وايد لين تمزق العضل

اقتباس:
المشاركة الأصلية كتبت بواسطة **نونا**
يسعدك يأم عيسى..رحلتك هذي شجعتني كثير وزرعت الثقة بداخلي..حزمت حقائبي واستمتعت بإجازة العيد في احضان مدينة الضباب..التخطيط الجيد واعتمدت على معلوماتك القيمة في رحلتك اللندنية..والحمدلله ماتهنا كثير واسمتعت برفقة عيالي..بارك الله في جهودك الملموسة يامبدعة..

ياسلاااام كلام جميل فرحني وأسعدني وايد اني كنت سبب لو بسيط في راحتكم

الله يباركلج في عيالج ويحفظهم لج

هداوه · 20-02-2015, 01:12 AM

رحلتنا لكادبوري

قبل رحلتنا بفتره حجزنا من موقعهم حق الرحله

Cadbury World: A fun chocolate day trip to one of the UK’s most popular family attractions

ودفعنا بالفيزا رسوم الدخول

وطرشولنا التاكيد ورقم الحجز ع الايميل

وكانت رسوم الرحله للعائله ( 2 كبار + 2 صغار ) =

45.80 باوند

وكان موعدنا ع ما أذكر الساعه 2

اليوم رحلتنا فيها وايد مراكض ومغامرات

وكنا نحن الاربعه بس

بغيت آخذ ويايه عيال أخويه

واستغربت انهم ماتشجعوا يسيرون هاي الرحله

اليوم الجو باااارد

ومطر وغيوم

ثقلنا في اللبس وطلعنا بدري نسحب شنطنا الترولي حق الشوكليت اللي بنشتريه من هناك

طلعنا قبل موعدنا بـ 3 أو 4 ساعات

بصراحه ما اتذكر بالضبط أي ساعه طلعنا

كان ورانا درب وتبديل قطارات

وانطلقنا من محطتنا ماربل آرش ، وخذينا الخط الأحمر

الى توتنهام كورت

وعقب بدلنا القطار وخذينا الخط الأسود الى محطة

ونزلنا في المحطه وسرنا عند شباك التذاكر

وخبرناهم انه نبا نسير منطقة

سيره ومرجع ( ذهاب وعوده )

فخبرونا انه أول بننزل في محطة برمنجهام ناشيونال

وعقب بنبدل القطار اللي بيودينا للمنطقه اللي فيها

مصنع كادبوري

وطلعت التذكره علينا حقنا نحن الاربعه بـ 171 باوند

وع قطار فيرجن وهذا الأغلى لأنه الأسرع

عقب بخبركم ليش أكفخ عمري

صارلنا موقف هنيه

وأنا أكلم الحرمه اللي تقص التذاكر وعقب ماعطتني التذاكر

يلست تشرحلي كيف بنسير

وتعرفون الانجليز رمستهم غير عن الامريكان

تحسونهم يبلعون الحروف وسريعين

وماينفهم كلامهم في بعض الاوقات

المهم الحرمه كل ماترمسني

أقولها :

WHAT

مب قادره أجمع وافهم كلامها

قمت وقلت لبنتي كوكي ( بناتي أفضل عني في اللغه )

تعالي شوفيها شو تقول

وقفت بنتي تسمعها

وتردد :

يس

يس

أوكي

ثانكيو

ولفت عليه وقالت يلا نسير

مشينا وياها وأنا أسألها بكل براءه

شو قالت الحرمه

ردت بنتي الحلوه

مافهمت

ههههههههههههههههههه

عيل أنا ليش يايبتنج ورازتنج عندها

ذكرتني بمسرحية باي باي لندن

( موقف انتصار الشراح ويا أمها مريم الغضبان )

تراكضنا صوب قطارنا لأنه ع وشك انه ينطلق وكان فيه دقايق بسيطه

اشترينا ساندويشات وعصاير وركيض ع القطار اللي انطلق الى

برمنجهام ناشيونال

يوم وصلنا محطة برمنجهام ناشيونال

وما أدري كم خذينا من الوقت لأني نسيت

سألنا عن القطار اللي بيودينا محطة برونفيل

فخبرونا انه لازم ناخذ القطار اللي بيودينا لمحطة برمنجهام نيو ستريت

وعقب نبدل هناك للقطار اللي بيودينا برونفيل

كملنا رحلتنا ووصلنا محطه برمنجهام نيو ستريت

وغيرنا القطار واتجهنا الى

محطة برونفيل

وهنيه صارلنا موقف

طبعا نحن تعبنا من قطار لين قطار

ومن محطه لين محطه

وفي كل محطه نراكض وندور ونسأل

كيف نوصل للمكان اللي نباه؟

وفي الأخير وصلنا لآخر قطار اللي بيوصلنا لغايتنا

ولكن للاسف تأخرنا عن موعدنا وقلنا نحن وحظنا

يلسنا بهدوء ننتظر متى بنوصل المحطه المطلوبه

لأنه القطار كان يوقف عند بعض المحطات

ونحن الاربعه يالسين وكل وحده راسها في فونها مندمجين

وشغالين ع الشات

فجأه

وقف القطار في محطتنا

ومشى

وعقب ماتحرك

قفزت بنتي الحلوه وقالت

هاذيج محطتنا

وقفنا مذهولين كيف طوفنا المحطه

كيف نسينا نفسنا وياموبايلاتنا

والا نشوف وحده أنجليزيه سمحه تبتسم وتقول

انتوا تبون مصنع كادبوري

أشكره أشكالنا واضحه انه سايرين مصنع الكاكاو

قلنالها : يس

قالت هاذيج اللي فوتوها هي محطتكم

عادي تحصل في أحسن العائلات

قالت :

الحين انزلوا المحطه اليايه واركبوا القطار اللي راجع

خاطري هاذيج الساعه اصرخ

وفي خاطري أقول ياليتني تميت في الاسواق ولاتعبت عمري ع هالمشوار

وهو بصراحه لو مب بناتي ويايه مافكرت أسير

هداوه · 20-02-2015, 01:14 AM

نكمل هذا اليوم الحلو والمتعب

نزلنا في المحطه اللي عقب وبدلنا القطار ورجعنا

أخيرا وصلنا محطة برونفيل

وتشوفونها مصبوغه بالبنفسجي

نزلنا وسألنا مكتب المعلومات

كيف نوصل للمصنع

قال :

اطلعوا من هالباب وامشوا دقائق وبتحصلونه

دقايق هااا

خلانا نمشي مشي لين تكسرت ريولنا

ونحن نمشي ونسحب شنطنا

عقب ماطلعنا من الباب مشينا ع طول

وبعد مسافه قصيره شفنا علامة كادبوري

قلنا هيه والله هاذوا قريب

شوي مشينا

وعقب لقينا سهم يقول في هالاتجاه

قلنا

خلاص هذا هو

دخلوا بناتي المكان

ومافهمت بالضبط شو هالمكان احتمال مكاتبهم

وقالولنا

بعد كملوا ع طول

نمشي

ونمشي

وكل شويه نفكر انه هو هالمكان ويطلع مب هو

وطبعا حصل سب بيننا

نمشي ونتحرطم ونسب

الشويه مالهم هاي

وايد عندنا

لمايقولون شويه لازم يكون أكثر شي 5 دقايق

مب نص ساعه ما أدري كم

قمنا نسأل الناس عن المصنع

وهم يقولون

بعد كملوا سيده

خيبه تخيبكم لين متى نمشي

معقوله أهل القريه متفقين علينا

قالوا هاي هداوه لازم نلعوزها شوي

وآخيرا وصلنا وماوصلنا

يعني وصلنا للمكان اللي بنلف فيه

وكان هناك ملعب كبير للكره

وحواجز مصبوغه بالبنفسجي

نزلنا سلالم ومشينا صوب الملعب

قالونا

ادخلوا وامشوا سيده لين الآخر وبتشوفون المصنع

الا بنشوف آخرتها وياكم

نحن ماعندنا شغله الا نسأل كل اللي يمر جدامنا

حتى جلابهم بغينا نسألها

عاد ونحن نمشي وقبل مانشوف المصنع

افتر راسنا من الشوكليت

امممممممممم

ياهي ريحه

صحصحتنا

ومن عقب أول شمه ، ركبنا في ريونا تواير السباق

قمنا مانسأل الناس

نمشي ونشمشم

حشا جلاب بوليسيه

وأخيرا

صلنا المصنع

هداوه · 20-02-2015, 01:18 AM

نتابع معاكم رحلتنا

لمصنع كادبوري

معلومات عن مصنع كادبوري

منقول من الأخ مهند

كادبوري هي شركة بريطانية لصناعة الحلوى

مقرها الرئيسي في أوكسبريدج، لندن المملكة المتحدة

وهى ثاني اكبر شركة لصناعة الحلويات بعد شركة مارس

وكانت تعرف باسم شركة "كادبوري شويبس بي إل سي

"منذ عام 1969 حتى مايو 2008

وقد وافق مجلس إدارة شركة كادبري لتصنيع الشوكولاته على عرض قدمه

شركة الاغذية الامريكية العملاقة كرافت لشراء الشركة البريطانية العريقة

مقابل 11 مليار جنية استرليني.

شعار الشركة ((العمل معا لخلق علامات حب الناس ))

تاريخ التأسيس 1824

المؤسس جون كادبوري

المقر الرئيسي أوكسبريدج، لندن المملكة المتحدة

الشركة الأم كادبوري

أهم الشخصيات روجر كار

الصناعة الحلويات والمشروبات الغازية

طريقة الوصول

ينطلق القطار من محطة

Euston

وهو موجود في مدينة برمنجهام BIRMINGHAM

من لندن إلى برمنجهام

ساعة و خمس و عشرين دقيقة بالقطار

ومن برمنجهام ناخذ قطار الى

برونفيل اللي فيها المصنع

أخير وصلنا مصنع كادبوري عقب ماتبعنا الريحه الغاويه ريحة كاكاو كادبوري

دخلنا ونشوف وايد زحمه

خذينا حجزنا وسرنا عند الكاونتر

وراويناهم ياه وقالولنا :

انتوا تأخرتوا عن موعدكم بس ممشكله

سيروا ادخلوا ويالقروب اللي هناك

عطونا التذاكر ودخلنا ويا القروب

جولتنا في مصنع كادبوري

أول شي دخلنا وين الغابات

وهاي معلومات نقلتها من الاخت صفاصف

تبدأ الرحلة داخل المصنع بغابات المكسيكـ حيث توجد أشجار بذرة الكاكاو

و قد قام المكسيكيون بتقديم شراب الكاكاو إلى

شخص بريطاني يدعى

هيرنان و اعجبه الشراب واااصل

و عندما عاد لبريطانيــا جلب معه بذور الكاكاو

وسرعان ماانتشر مشروب الكاكاو في أوساط الطبقة الراقية

عقب ماخذينا لفه في الغابه وشفنا تاريخهم

ما اتذكر بالتسلسل الاماكن اللي دحلناها لكن بخبركم من خلال الصور اللي

براويكم ياها

دخلنا غرفه فيها عرض سينمائي عن تاريخ كادبوري

ودخلنا في ساحه بعد فيها عروض سينمائيه لصناعة الشوكليت وانواعها

واذكر مرينا ع منطقة تصوير

نوقف ع ارضيه مخصصه بالتصوير بس قبلها نختار الصوره اللي نباها

وهي صور ع شكل معين ومعبره مثل بانيو

وعقب مانتصور يركبون صورنا في المشهد اللي اخترناه

تصورنا صوره جماعيه وعقب بناتي بغوا يتصورون بروحوهم

فقمت انا وبنت عمي تجدمنا نترياهم

فشفنا طابور طويل ، والناس مصطفه يبون يدخلون مكان معين

قلنا بنوقف في الطابور لين البنات يخلصون

هذا هو الطابور

هنيه استوالنا موقف

لما يينا بندخل الطابور شفنا السياج طويل ومنحني في اتجاه داخلي

قلنا خلينا نختصر وندخل من تحت الحبل ونوقف ورا الناس

دخلنا ووقفنا ورا الناس وصادف كان فيه كراسي

يلسنا ندردش انا وبنت عمي ولاحظنا انه الناس اللي تخلص تصوير يمرون

من عدالنا ومايردون

يعني ماكانوا يدخلون من بداية السياج وماندري وين يختفون

والصراحه بنت عمي لاحظت هالشي

قالت اللي يطوفون ما ايونا

فقمنا تبعنا السياج ويوم لفينا شو تتوقعون شفنا

شفنا انه المصنع والجزء الأهم في هاك الصوب

وانه هذا الطابور هو آخر مرحله في الجوله

عقب يو البنات ومشينا ويالعالم هاك الصوب

شفنا المكاين اللي تصنع الكاكاو

وشفنا اليهال واقفين والموظفين

يصبون الكاكاو في قوالب ويشرحون كيفية عمل الشوكولا بالاشكال

يعطونهم الكاكاو السائله في المعاصير

عشان يشكلون فيها وعقب يمسحونهم

هداوه · 20-02-2015, 01:21 AM

نتابع جولتنا

وعقب شفنا الموظفين اللي يالسين يشكلون في الكاكاو

عقب مشينا وشفنا أرضيه عليها اضاءه وحركات واليهال يلعبون عليها

وبناتي بعد شاركوا وياهم

وعقب ماخلصنا من كل هاي الجوله وصلنا للطابور اللي كنا يالسين فيه هاذيج المره

وفي الطابور نوصل لمكان نركب فيه مثل قطار صغير

تمشينا داخل ونشوف مناظر تتعلق بكادبوري

ومصنع بكادبوري

وتاريخ كادبوري

وعقب ماخلصنا دخلنا في أحلى مكان

محل لبيع الشوكولا

هداوه · 20-02-2015, 01:25 AM

نتابع جولتنا

من دخلنا المحل انتشرنا

كل وحده بسلتها وتشل اللي تباه

وماقصرنا اشترينا واااايد والصراحه كاكاوهم وااااااايد لذيذ ماتوقعت جذي

الذ عندي من كاكاو نستله في سويسرا

حبيت كاكاو كادبوري من عقب مازرت مصنعهم

تشكيلتهم أحلى وأكثر تنوع من مصنع سويسرا

طبعا تصويري هو اللي خايس

ولا المحل روعه

وعقب ماخلصنا أحلى تسوق

رتبا كاكاواتنا في شنطنا الترولي وطلعنا من المصنع وسرنا الصوب الثاني

في الجهه الثانيه من المصنع في فعاليات ثانيه

في اشياء لحقنا عليها واشياء سكرت

والصراحه ما أتذكر كل شي موجود ماعندي تفاصيل ولكن اللي متأكده منه انه بعد

كان في محل كبير ويبيع نفس الانواع من الشوكليت

وقبلها يلسنا نتذوق الكاكاو في كاسات

وفي ساحة العاب كبيره للاطفال

للاسف عشان وصلنا متأخرين مالحقنا ع أشياء واشياء شفناها بسرعه

فوصيتي لكم

سيروا بدري

اطلعوا من الصبح من 8 حتى بس أهم شي توصلون من وقت وتستمتعون بكل شي

الحين بنكمل جولتنا الخارجيه

بعطيكم صور متنوعه

بنتي فديتها وهي تتذوق الشوكليت

وكنا يوعانين

المحل الثاني

عقب ماخلصنا جولتنا الخارجيه

رجعنا داخل

ويينا المطعم اللي داخل عشان نتغدى

ولكن للاسف قالوا خلص الغدا ولكن تقدرون تاخذون ساندويشات ومشروبات

يلسنا نرتاح عقب التلفليف طول اليوم ، وصبرنا عمارنا

بساندويشات وعصاير وكاكاو

وكنا خلاص تعبانين ومانقدر نرجع نمشي كل هاي المسافه لين محطة القطار

قمنا سألنا الموظفه اذا عندهم توصيل لين المحطه بس قالت

ممتوفر ولكن تقدر تطلبنا تكسي بس يبا وقت لين يوصل

قلنا خلاص بنمشي مانبا نتأخر أكثر وردينا نسحب الشنط لين المحطه

لين انقطع نفسنا

عقب هالمشي في لندن وماتبون عضلاتي تشد

ونحن في البلاد مانمشي ربع هالمشي

موقف صارلنا

في الرده ركبنا قطار من برمنجهام نيو ستريت الى برمنجهام ناشيونال

وفي القطار نحن نسمع انه هو يوصل لاوستن

ونحن مب مستوعبين انه هالقطار بيسير مباشر

لانه حاطين في بالنا انه لازم ننزل ونغير القطار

لما وصل نزلنا من القطار ، وصعدنا اللفت ( المصعد )

عشان عندنا هاندباك مشحونه شوكليت وثجيله وصلنا فوق

شفنا اللوحه وتقول ع خط 4 القطار اللي يودي اوستن

شفنا رقم 4 ونزلنا من الدري ( الدرج ) مع حمولتنا

ولما وصلنا تحت طلع نفس المكان اللي توا نزلنا فيه

وعقب اكتشفنا انه هاك القطار كان هو قطارنا الفيرجن

خلاص روح عنا القطار وماشي فايده

وخذينا القطار اللي عقبه بس ماكان الفيرجن السريع ، كان قطار عادي

وخسنا لين وصلنا لندن

ماتمت محطه ماوقف فيها

ياخسارة فلوسنا اللي دفعناها ع القطار الاسرع

هذاك يوقف محطات قليله يمكن 3 وما أدري اذا اللي طافنا يوقف ولا ع طول

الله أعلم

بس هذا يمكن وقف 11 محطه

انطباعي عن مصنع كادبوري

* وايد حلو ويستحق الزياره خصوصا للي عندهم اطفال

* يباله وقت والافضل زيارته بدري لانه مالحقنا ع عرض واحد

* الشوكليت لذيذ وارخص من برع

* اذا سرتوا بالقطار فالافضل احجزوا في الفيرجن

* اذا سرتوا بالقطار فالافضل تشيلون شنطه او أكثر وتكون ترولي عشان تحملون فيها

رحلتنا القادمه بتكون في مصنع
بربري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي 5 نجوم الى زيزا يونيو و يوليو 2013	himzmz	بوابة ماليزيا	56	25-08-2018 09:55 AM
كامــــيرون هايـــــلاند ..* هولنـــدا الشـرق *.. هكذا أسميـــها ( رحلتي في آب 2013 )	A.Alsubhi	ماليزيا	17	19-08-2015 08:53 AM
رحلتي الى سيريلانكا ( ديسمبر 2013) ملاحظات ونصائح	الإماراتي	بوابة الهند وسيرلانكا	14	15-04-2015 11:39 AM