اليوم الصباح كنت عندهم والله يعين على الزحمه للي مايروح بدري مكانهم في شارع ام الحمام وانت على طريق خريص وجهك غرب تاخذ يمين لشارع ام الحمام بعدين ريتيرن من عند اول اشاره بعدين 500 متر تقريبا تلاقيه يمينك
العوائل يدخلونهم قبل العزاب ويوزعون ارقام
بعدين يدخلون العزاب ويعطونهم الارقام
المهم قبل تروح خلك مجهز اوراقك وهي
الجوازات لجميع المسافرين مع صوره لاول صفحة لكل جواز
صوره من دفتر العائله لكل جواز
صوره واحده من الهوية الوطنيه للاب
تعبي الابل كيشن حق الفيزا من القوقل تحصله اكتب فيزا الهند وتطلع لك . وانتبه من الاخطاء والا راح ترجع تسويها مره ثانيه ، طبعا لكل شخص حتى الاطفال .
صورة لحجز الطيران التذاكر لكل شخص تصور له
صورة لججز الفندق باللغة الانجليزيه يكتفى ولو بفندق واحد ، اول واحد تسكن فيه
صورتين 4 في 6 لكل مسافر خلفيه بيضاء ،
ايضا عندهم ورقة تعبيها خذها وعبها وقت انتظارك طبعا بالانجليزي اذا تعرف والا خله يعبيها لك الموظف اذا هو مروق لك.
اي طفل من فوق 12 سنه لازم تروح به معك يبصم والكبار طبعا الزوجه الخ..
خلك عند الباب الساعه 9.30 بالضبط قبل الزحمه وتلحق على الرقم والا بتجلس عندهم الى العصر
سعر الفيزا للشخص الواحد 224 ريال صغير او كبير كاش ماعندهم سحب انتبه لايضيع وقتك وطبعا جميع الاوراق والجوازات تبقى عندهم وتراجعهم للاستلام بعد 5 ايام الفيزا والجوازات .
اجازتهم يوم واحد فقط وهو يوم العيد .
المهم ترى تعبئة الاستماره يدققون فيها مره اذا تعرف والا فيه مكاتب جنبهم تعبيها لك بس بمقابل .
اذكركم بالاطفال اذا تحت 12 سنه خله ينام
المرأه تبصم وتكشف للتصوير عند هندي يتمقل هههه اللي يقول يعقب لايروح اجل وأي سؤال جاهز والله يعينكم على الحر وبرمضان .