بسم الله الرحمن الرحيم

رداً للجميل من المنتدى المميز والأعضاء الكرام ...

تقدمت للشنغن - المانيا . بعد قراءة الموضوع هذا والاستفادة من الردود والشرح .

http://www.arabtrvl.com/vb/t9210.html

اخذت موعد في الخميس 28 - 7 . الساعه 12 . ظهراً . الخروج الساعه 2 . المركز - الرياض

كل الأوراق والنماذج والتعبئة والتأمين والتصوير وصور الوثائق كلها اعرفها واحضرتها من الموضوع ومشاركات ومداخلات الأعضاء .

نموذج السفر للأطفال ما قبلوا اللي مطبوع عندهم نموذجهم عليه ترويسة السفارة . عبيته باليد . كذلك تكفل بالمصاريف . قلت للبنت انا معهم قالت ولوو . لازم . عبيته

الصور ماقبلوها لازم 3.5 من منابت الشعر . الاستديوهات اللي قدام المركز عارفين كل سفارة وش تحتاج ومتطلباتهم .

يوم شفت الموظفات كلهم منقبات ،،، التفت على زوجتي بحكم انها نفس النقاب كنها تقرب لهم . قلت اليوم يومك يا ام محمد . شوفي شغلك . جلست مع وحده تأكدت من اكتمال كل الأوراق والنماذج وجهزت لها واحد وقالت كملي الباقين مثلهم . وانا رحت الاستديو اللي قدام كودو عطيته الصور سحبها سكان بالكمبيوتر وطلع نسخ جديدة .

الاستقبال جيد . الزحمة قاتلة . التكدس للناس وأطفالهم متعب . اذا عندك موعد انصحك الحضور قبل بساعه . تأكد من أوراقك ونماذجك وصورك . ولا تجي الا انت مفطر ومروق وشارب قهوتك .. ولا تنسى تجيب مويتك معك . خدمات الكافيتريا كئيبة . احضر كاش بمبلغ اكبر احتياط . انا دفعت للصور مره ثانيه . مع ان البنات حاولوا لكن ما قدروا .

ومع الزحمة لو ادري انها كذا جيت في اوبر اريح .

الحضور يوم الخميس مثل ما قلت 28 - 7 . يوم التقديم والتبصيم .
في نفس اليوم المساء وصلتني رسايل جوال وايميل استلام الجوازات في السفارة .

الجمعة والسبت إجازة .

الأحد هذا وجه الضيف ماحد عبرني

الاثنين 1 - 8 العصر وانا في ساكو ادور زرادية . وصلتني رسايل ايميل وجوال مراجعة المركز الموحد للاستلام .

الثلاثاء 2-8 قبل الظهر . مريتهم وبنفس الوضع أرسلت ام نقاب حفظها الله في حلها وترحالها . وبأقل من عشر دقايق رجعت . جابت كل جواز في ظرف مغلق . ووصلتني رسايل جوال وايميل بأنه تم التسليم .

اعطونا مدة سنة . ... الإجراءات سهلة وبسيطة تحتاج الاعتماد على الله سبحانه ثم نفسك . او زوجتك . كل التعبئة فردية والتأمين والحجوزات للطيران والسكن كلها من البيت .

حبيت انشر تجربتي علشان يستفيد الغير مثل ما استفدت من تجارب غيري . وهذا أقل شي ممكن أرده لكم .