ساعدوني في ترتيب رحلتي لالمانيا والنمسا

أم سارونة · 08-02-2015, 12:20 PM

السلام عليكم اخواني واخواتي الأفاضل ارجو منكم مساعدتي في تخطيط لرحلة وان شاءالله تكون رحلتنه انا والعايلة 4 اشخاص بشهر أغسطس وحجزت على التركية علما اني حجزت تذكرتي بحرين - فرانكفورت
ميونخ- بحرين
بس خايفة انه تخطيطي للرحلة خطأ وبتكون رحلتي :

مطار فرانكفورت تاجير سيارة والسكن في بادن بادن 4ليالي ومنها زيارة :
- روز هايم
-رست
-ستراسبورغ

السكن في انسبورغ 2 ليالي

-السكن في كابرون 5 ليالي ومنها الزيارة لـ :
-قارمش
سالزبورغ

السكن بميونخ 2 ليالي

وهل المناطق اللي بتكون مرور صح او لا

Azzam · 08-02-2015, 12:59 PM

وعليكم السلام ورحمه الله

هلا يا وخيتي وحياكي

بخصوص مخططك ممتاز باذن الله
المسافة الطويلة هي من بادن الي انسبورك تقريبا 4 ساعات ونص

بس الافضل تخلي بادن بادن 3 ايام تكفيها

يصير المخطط على النحو التالي

فرانكفوت وصول فقط
بادن بادن 3
انسبروك 2
كابرون 5
ميونخ 3 اياام ومن ميونخ تخصصون يوم كامل الي قارمش

خط سيرك على الخريطة

أم سارونة · 08-02-2015, 01:44 PM

ماشاءالله عليك اخوي والله ماتقصر بس نسيت اذكر اني في فرانكفورت بتكون سكن ليلة وبالنسبة حق كابرون حجزت شقة كيتشتاينهورن اللي مايصير اغير الحجز ولا التاريخ وتوهقت فمايصير اغير أي تاريخ واي يوم في البقية اذا عندك فكرة عن الشقة ياريت اتفيدني ولوتكرمت تجوف لي المناطق اللي بتكون مرور هل هي صحيحة او لا في الترتيب واشكرك من كل قلبي

Azzam · 08-02-2015, 02:12 PM

ابشري يا غالية

Rudesheim الالمانيه تبعد تقريبا ساعه و50 دقيقة عن بادن بادن
وهي قريبة من فرانكفروت تقريبا 50 دقيقة

ومدام انكم تبون تزورنها من بادن بادن خصصو لها يوم كامل من الصباح

او عند خروجكم من فرانكفوت تقدرو تزورها من الصباح وبعد ما تنتهون منها تكملو الي بادن بادن
والمسافة كلها من فرانكفوت الي Rudesheim وبعدين بادن بادن تقريبا 3 ساعات

وباقي التخطيط ممتاز

Azzam · 08-02-2015, 02:19 PM

ونسيت اضيف شي بخصوص قارمش الافضل تخلوها عند خروجكم من كابرون اخر يوم ومتجهين الي ميونخ تمرون عليها

لان المسافة تعب عليكم المسافة بين كابرون الي قارمش بحدود 3 ساعات صعب تكون رايح وجاي

أم سارونة · 09-02-2015, 12:55 PM

اخوي عزام الله يجعل كل كلمة وتعب وجهد بميزان اعمالك ماقصرت والله تعبتك معايي بس بعد عندي سؤال شكلك ماتخلص مني ممكن ازور مدينة هايدلبرغ في طريجي لبادن واخلي Rudesheim وايهم افضل

Azzam · 10-02-2015, 01:13 AM

لا تعب ولا شي يا وخيتي انا والمشرفين والاعضاء تحت خدمتكم

هايدلبرغ تقدري تزوريها وانتم ساكنين في بادن تقريبا بينها اقل من ساعه
اما Rudesheim اشوف ما تستاهل الروحه هي ريفية وعلي نهر الراين وفيها كم معلم سياحي

وايهما افضل كل شخص وله نظرة بس لو عني انا

بلا منازع مدينة الأحلام والجمال (( هايدلبرغ ))

أبو مهاب · 15-02-2015, 02:54 PM

هايدلبرغ

وجهات أوروبية · 15-02-2015, 09:55 PM

ماقصر اخوي بومحمد بيض الله وجهه

هايدليبرغ اعرفها شارع شارع ونقه زنقه ههههه
هي مدينه صحيه ومستشفيات يعني مب حقت سياحه
عندهم شارع المشاه اسمه بيز ماركت
وعندهم حديقه الحيوانات داخل منطقه المستشفيات الله يكفينا ويكفيكم الشر

انا ارشح لج تطلعين من فرانكفورت وتروحين منهايم
وانا بقولج وين تروحين منهايم خلج بمركز المدينه حلوه وتتغدون في مطعم اسطنبول حلو مقابل الساحه
وفيها محلات كثيره والمنطقه منطقه للتمشي والتسوق

من فرانكفورت الى منايهم تقريبا 45 دقيقه او اقل 80 كيلو
وبعدها تكملين على نفس الخط الى بادن بادن المسافه 50 دقيقه 110 كيلو

لما تطلعين من فرانكفورت الشارع ياخذكم اجباري على منهايم وانتو رايحين باند بادن
نزلو في منهايم بدل هيدلبيرغ احسن
لاحظي الخريطه تحت
الخط البنفسجي على الي راح تمشون عليه بالسياره
وتلاحظين الخط يمر بالنص على منهايم

العاب

واي استفسار اختي اكيد ماراح نتردد في الاجابه عليه

أم سارونة · 19-02-2015, 09:13 AM

شكرا اخوي qa6ar911 على الرد بس بقيت استفسر Rudesheim نفسها منهايم في بادن بادن قلت باروح مبنى كورهاوس في بادن وLa petite france في ستراسبورغ وبحيرة زيلامسي بس ماعرف شنو احداثيتهم وتعبت واناابحث مالقيت واجوف في كل منطقة فيها بحيرة شنو افضل بحيرة ازورها عشان مايصير في تكرار واذا احد عنده فكرة عن الطقس في شهر 8 في المناطق اللي بازورها عشان اعرف شنو اخذ معاي من ملابس

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الى المانيا وفرنسا وسويسر والنمسا	Fahad Mandi	بوابة المانيا	122	19-07-2019 03:09 PM
ساعدوني في ترتيب الايام	k.s.a 2	بوابة سويسرا	7	12-07-2015 09:05 AM
ساعدوني رحلتي قربت	الحاتمي	تركيا	5	19-06-2015 10:11 PM
ساعدوني في ترتيب شهر العسل	حنونه	تركيا	12	08-04-2015 12:29 PM
ترتيب خط سير رحلتي ...	رزان	بوابة سويسرا	14	07-01-2015 01:27 PM