اولا: اشكر الأعضاء على شرح تجاربهم لنا واهم المتطلبات لاستخراج الفيزا من ألمانيا عن طريق مكتب الفيز الموحد

ثانيا: تجربتي السيئه مع المركز ال

1- الحجز تم اون لاين عن طريق الصفحة الانجليزية ( والسبب هو ان الصفحة العربية تحسب سعر الموعد 140 بينما الصفحة الانجليزية حسبت لي سعر الموعد 125 لجميع الأقسام سواء ذكور او سيدات (مخصص للعوائل ليس للسيدات فقط) او ال في اي بي .. نعم حتى ال في اي بي كان ب 125 .... حجزت موعد لعائله في قسم ال في اي بي في موعد واحد عن طريق وضع عدد الأشخاص المتقدمين في خانة Number of applicants عند الحجز من موقع المواعيد وطبعا لازم تدفع عن كل واحد 125 ... عند حجز الموعد يطلب منك ادخال الأسماء وأرقام التواصل والبريد الالكتروني لك شخص ورقم الجواز طبعا .. ارقام التواصل والايميل ممكن تحطونها حقت شخص واحد منكم ما تفرق..

2- كان الموعد في حدود الساعة 10 صباحا وتم الوصول وهنا تبداء التجربة المريرة

1/ مواقف مافي ...زحمة ... و وضع السيارات جدا سيّء مسوين زحمة حول المكان كله لان مدخل المركز خلف المبنى من جهة كودو
2/ مدخل واحد للجميع سواء رجال او نساء او عوائل بعدين تفتيش ( التفتيش كان النساء معزول عن الرجال طبعا) واجهزة الواي فأي تصادر من قبل رجال الأمن الى موعد خروجك ( الجوالات عادي)
3/ بعد التفتيش تطلع درج جدا مزحوم الى ان تصل الى كونتر سحب الرقم
4/ الكونتر واحد (طاولة وحده) مقسم الى 3 أقسام ...اول شي بريطانيا(ازرق) ثم سنغافورا والشنغن (اصفر) ثم كندا (اخضر) ... ويوم وصلت كانت السيرا حقت الأصفر الى اخر نص الصالة ... الله يجزاه خير واحد من اللي يطلعون الأرقام يوم قلت له موعدي في اي بي والحين على طول طلع لي رقم وما احتجت أوقف لان السيرا كان كله رجال
5/ تروح بعدين لسيب طويل في اخره يسار باب لفيزا بريطانيا وطريق يمين (يودي لسيب وباب فيزا الشنغن وسنغافورة {سنغافورا اخر السبب ماتدخل الباب} ... أنا طبعا رحت يمين بعدين الباب ... في واحد يسال معك رقم عند الباب ويتأكد منه وبعدين يدخلك
6/ بعدها دخلت قسم الشنغن وحسيت نفسي في طواف حج من الزحمة ... جدا جدا جدا مو طبيعه .... الحمد لله اول غرفة مزبرقه على اليمين كانت ألمانيا قسم ال في اي بي
7/ دخلت وكان مافي الا موظفين 2 هنود يشتغلون من أصل 5 المفروض يشتغلون ... اسألهم كم الرقم يقولون الحين 17 اناظر رقمي 55 ... قالوا لي استني الى مايجي دوركم .... قعدت عندهم يجي ساعه ونص الى 11ونص ومازال الأخ يشتغل على رقم 17 ....بينما يوم شيكت على قسم العوائل في نص ساعه يخلصون يجي 10 ارقام .... طبعا ماعدا أتحمل معاي الأهل وقلت لهم مو معقول التأخير ورآنا دوامات ... قالوا السيستم دوان (عطلان) طيب يوم انه عطلان ليه ماقلت لي اروح للكونترات حقت قسم الرجال ولا النساء ... المفروض على طول تدخلوني عليهم بدون انتظار ... وقَعَدت أتهاوش (بعقلانية) مع مديرهم (القسم هذا بس...ألمانيا) هندي اسمه الزبير (وبتجيكم قصته بعد هو وأخوه)... قام يتفلسف علي قال روحي القسم الثاني واسحبي رقم ... عناد بس صدق مبزره .. الحين مسوين لي فيها في اي بي وهذي خدمتكم ...الشرهه على اللي يجيكم ويعتبركم ناس بروفيشينال
8/ورجعت وطلعت رقم في قسم العوائل .... وكان الرقم وقتها 48 ورقمي شي و 80 قلت معليه نصبر ... يجي قعدت ساعه والحمد لله جاء ... قابلوني بنات سعوديات ماشاء الله عليهم ذوق ... شافت الأوراق ونجي لسالفة الاوراق:
قالت أوراقكم فيها المشاكل التالية (بحكم اننا اول مره نقدم على شنغن مع العلم اننا قد قدمنا على أمريكا واستراليا لكن دون اي عناء او تعب او متطلبات كثيرة مثل ذي)

1) حجوزات الفنادق لازم تكون لكل مدة الرحلة ( أنا كنت حاجزة اول 9 ايام من أصل 15 منها 4ألمانيا و الباقي سويسرا لان ماكان عندي وجهه محدده لباقي الأيام) غير عن كذا طلبت ان تكون اكثر مدة ألمانيا ... قالت سوا حجز لالمانيا للمدة المتبقية وهذا اللي صار
2) التأمين الصحي سويته اون لاين من التعاونية فرفضته وقالت لازم بويصلة تأمين نطلعها من مكتب التعاونية وغير عن كذا كنّا غلطانين بأحد تواريخ الميلاد لأحد الأفراد ...فذهبت للتعاونيه في نفس المبنى حق بنده وسويت البويصله وراحت علي تكاليف الاولى الله يخلف علينا
3) نسخ من تعريف العمل والمرتب وكشف الحساب وحجوزات الفنادق و خطاب تحمل المصاريف لكل أفراد العائله(تحمل المصاريف لازم يذكر فيه اسماء أفراد العائله وصلة القرابة)
4) أعطتنا نسخه من إقرار 54 و 55 قالت صوره لكل فرد وكل واحد يجاوبه ويوقع عليه
5) وطبعا الأبليكيشن يعبأ اون لاين ويطبع ويوقع من قبل كل فرد مع صورة لصفحة الجواز الاولى
6) طلبت منا التوقيع على الجوازات في الصفحة الثانية عند خانة التوقيع
7)قالت روحوا انجزوا المتطلبات وارجعوا لي ....بس طبعا بسحب رقم مره ثانيه والانتظار ... فاول شي سويته سحبت رقم جديد واشتغلت على الأشياء اللي طلبت
8) في وحده هندية عند مكتب رخص القيادة في صالة سحب الأرقام تطبع بإرسال إيميل لها وتصور الأوراق ...طبعا تجارة رابحه طلعت يجي مني فوق ال 150 ريال ...ولا بعد طبعت لي الحجز وصورته اول مره وما كان فيه رقم تاكيد الحجز أشوا أني انتبهت له بعدين ورجعت لها ... وبالرغم من انه خطائها الى أني اضطريت ارجع ادفع لها
9)خلصت كل المتطلبات ورحت لها في قسم العوائل (في تصفيف معين للورق وهو الأبليكيشن ثم إقرار 54 و55 ثم صورة الجواز ثم الخطابات وبويصيلة التأمين ثم الحجوزات وطبعا الصور الشخصيه عدد 2)
10) الصور الشخصيه ألمانيا شروطها دقيقه جدا وكثير شفتهم ردوا صورهم وراحوا يصورون في الاستديوهات خارج المركز لازم تكون على الوجه مركزة ..زوم) قياس الوجه من منابت الشعر الى اخر الذقن من 32ملم ال 36ملم و مقاس الصورة نفسه 3.5 عرض *4.5 طول خلفيه بيضاء او رمادي فاتح ... الحجاب عادي بشرط اتباع المقايس وفي الموقع الانجليزي شروط الصورة الصحيحة لان الموقع العربي بيوديكم لشروط الصورة لفيزا فرنسا
11) القصر اصغر من 18 سنه لازم لهم ورقة تطبع من الموقع (السفارة الألمانية بالسعودية ) فيها يوقع الأب والام وتكتب أسمائهم على موافقتهم على تقديم القاصر للحصول على تأشيرة

9/ أخذت رقمي الجديد وكان 100 وشئ حول 150 وهم لِسَّه في الأرقام 125.... انتظرت لكن طول الوضع وصارت الساعة 2 وشئ وقلت بأرجع اشوف ال في اي بي ... رحت لقيتهم في شي و سبعين وانا رقمي الاول 55 فكلمت الهندي وقال لا ما امشيك روحي خذي رقم جديد ... رحت وأخذت وكان 165 والمضحك الصاله مافيها الا 3عوائل وهم في شي و70 قلت باستنى واشوف وباقي الأهل عند قسم العوائل يستنون
10/ طبعا الهنود ذول يومهم بالسنه وفجاء من شي وسبعين نط ل 100 وشئ وبعدها نط ل 65؟؟!!! وش وضع الأرقام عندكم ... الا يدخل اخو الزبير والزبير ومعه واحد ويسقطه على الناس كلهم جاء واحد قال دوري ... قاموا يبربرون عليه وسحب عليه ومشوا خوي اخو الزبير (اخوه كوبي منه) وشوي الا الهنود تَرَكُوا الناس ويسولفون ويكلمون بالجولات علشان باقي أنا وعائلة ... فيه بنت تبصم الناس في الصاله قلت لها يا اختي وش الوضع متى رقمي راحت سالت واحد منهم قالت لي قدمك المفروض 9 قلت لها مافي احد غيري وذول قلت اي بس يخلصهم ويجي دورك ... رحت سألته قلت وش وضع الأرقام عندكم الا يرد random number... ارقام عشوائية ... ذيك الساعة أنا جدا طقت معي منهم وسحبت عليهم ورحت لقسم العوائل انتظر بكرامة ولا رحمة ذول (الشرهه على اللي جايب ذَا الأشكال مالت عليك)
11/ أبد ورحت للعوائل وقَعَدت استنى لدوري قدامي يجي 10 ارقام وقلت ربي يسهل ... البنات يشتغلون والله ما اظلمهم ومجتهدات ... الا يجي ثانيه اخو الزبير وبرضوا جايب له ناس ... ويجي مصري معه حول 15 او 20 جواز بينط على الناس كلها اللي بقسم العوائل (المكاتب الخاصة تخلص شغلها من قسم الرجال) وقالت له البنت انت مو هنا تقديمك .. انت بقسم الرجال قال عياء علي ادخل الأوراق وراحت معه وكلمت واحد في قسم الرجال ... الا بعد فتره يرجع ثانيه للبنت ومعه واحد ثاني وقاوموا الناس وشاشوا ان دخلتوه قبلنا ماراح نسكت ... طبعا كثير عوائل من ال في اي بي حولوا على قسم العوائل فصار زحمه وضغط على البنات وهذا الا يبيها تخلص اوراقه ولج الزبير ... معارف معارف السالفة وقال الزبير للبنت خلصي أوراقه .. البنت شاطره وأشكرها جزيل الشكر مشت كل الناس وخلته اخر واحد لان ما معه رقم و تقديمه عند قسم الرجال أصلا لانه مكتب سياحي
12/ صارت الساعة 3و شي وأخيرا جاء دوري ... وراجعت البنت الأوراق وقالت خلاص كذا إن شاء الله تمام وتبون الاستلام أرامكس ولا شخصي من المركز وطبعا قلنا أرامكس قالت عن كل جواز 40 قلنا مو مشكله وقالت استنوا البصمه نناديكم بالاسم .... وانتظرنا البصمه ساعه .. لان اول في هندي يدخل المعلومات بالكمبيوتر بعدين البنت تسوي للأوراق سكانر وبعدين تبصم فالإجراءات يأخذ وقت ...
13/ خلصنا الإجراءات بحمد الله و طلعنا من المركز ال (اترك لكم حرية اختيار الكلمة المناسبة ) الساعة 4ونص ... يعني قعدنا 6ساعات ونص في المركز ...

ثالثا: ... هل يسوى علينا التعب ذَا كله علشان اسافر لاوروبا؟!!! لا ... انصح بأستراليا او أمريكا ودوّل شرق أسيا وتركيا اواي دوله لا تتطلب فيزا من هذا المركز ال برضوا اترك لكم حرية اختيار الكلمة المناسبه

رابعا: أتمنى ان يعود التقديم على السفارات نفسها مثل اول كل سفارة مع نفسها ولا تجمع 2000 شخص في دور عمارة

خامسا: التكاليف كا الآتي للشخص بالريال السعودي؛
رسوم حجز موعد 125
رسوم الفيزا 250
أرامكس 40
مسج آس ام آس لمتابعة حالة الطلب 5

سادسا: النصيحه لا تروحون مكتب سياحي ...لان كان في عوائل جايه مع مكاتب وقعدوا زينا زيهم ...فقط المندوب يروح يسحب رقم عنهم ويكمل لهم أوراقهم ...والتكاليف الدبل نتكلم عن 750الى900 ريال

سابعا وأخيرا : أتمنى ان تمنح لنا الفيزا بعد كل هذا العناء والجهد والتكاليف ... والله يعطينا خيرها وخير ذَا السفره ويكفينا ويحفظنا من شرهم