اكسفورد التي رأيت - الصفحة 2

آخـــرفـــرصـــة · 22-08-2016, 03:30 AM

ملاحظاتك رائعة و بتفيد كل من يمر على اكسفورد
تعامل غريب من المديرة بس تصرفكم رائع
البريطانيين فيهم الزين و فيهم الشين

متابعين يا عسل

فيصل, مجدي, توبليرون و 2 آخرون معجبون بهذا.

سفير جوجل · 23-08-2016, 09:52 AM

اقتباس : المشاركة الأصلية كتبت بواسطة آخـــرفـــرصـــة

ملاحظاتك رائعة و بتفيد كل من يمر على اكسفورد
تعامل غريب من المديرة بس تصرفكم رائع
البريطانيين فيهم الزين و فيهم الشين

متابعين يا عسل

يسعدني مرورك

توبليرون, نانا ابو عابد و فارس الجبيل معجبون بهذا.

سفير جوجل · 23-08-2016, 10:01 AM

الجزء الثاني من رحلتي لاكسفورد

السلام عليكم يا شباب ويا شابات
أعتذر عن تأخري في كتابة الجزء الثاني
لأني مثل ما قلت لكم كسول جدا في الكتابة ولكن في القراءة لا .. شي ثاني
في الجزء الأول

http://www.arabtrvl.com/vb/t21417.html

ذكرت لكم الفنادق اللي سكنتها وبعض الملاحظات البسيطه
واليوم بالجزء اثاني بتكلم عن الأماكن اللي استهوتني في اكسفورد مدينة الأبراج التاريخية
أنا مدحتها لأني وجدت فيها ضالتي وهي السياحة التاريخية والمتاحف والمباني الأثرية والقرى الصغيره الريفية
وش اسوي هذا اللي احبه
كل مرحلة عمرية لها اهتماماتها
بالمرحلة من عمري هذا اللي الله قدرني عليه
ما علينا ,,,
طبعا أول شي سويناه لما قررنا الجلسه باكسفورد اننا أخذنا بطاقة اسبوعية للباص
زي أويستر اللي يعرفونها أهل لندن
وكان سعرها 40£ لجميع الخطوط والشركات
كأنها كانت تصلح للسمارت وزن .. وش حدود السمارات زون ؟ .. علمي علمكم المهم
انها تودينا لكل المناطق اللي رحنالها بدون اي مشاكل
وأذكر كان فيه شركة رخيصه اسمها Magic على ما أظن .. كنا ناخذها مرات ب 1£
اذا نسينا البطاقه مثلا .. أما باقي الشركات فكانت ب 1.80 و 2.10 على حسب الوقت .
على فكره المدينه عبارة عن جامعة مقسمة لعدة كليات وبعدها بنوا حولها المدينه ... مو العكس
فلا تستغرب لو كل شوي أقولك كلمة كلية .. والكليات أغلبها كانت دينية .
سنتر أوكسفورد الرئيسي هو ألتقاء 3 شوارع هي
ٍSt. Aldate`s
Queen St
High St
هذا هو السنتر
المطاعم والمقاهي والمحلات والزحمة والفله
خليط عجيب من الأمم اللي أغلبهم جاييين يدرسون لها في مكانها الصحيح
لكن الأكثر هم الصينيين .. اللي لاحظته عليهم ان ماعندهم أتيكيت أو ذوق .. فعلا همج بالنسبة لباقي السواح
وكثرة الطليان أيضا .. فرق بينهم وبين الصينيين .. الطليان يسوون جو للمكان اللي يجونه
أول يوم وصولنا باستكشاف المدينه .. تمشينا في شارع High St
لقينا University Church
كنيسة الجامعة .. وهي كلية بنيت عام 1200 تقريبا
كان الدخول لها ب 4£
وكان فيها برج عجيب تشوف فيه أطراف اكسفورد .. الصعود له عن طريق سلم تقريبا رأسي ويكفي شخص واحد بس
صعوده متعه ,, اللي نازل يوفق ويعطيك ظهره وانت تنحشر وتطوفه .. مع الابتسامات طبعا
وما أنصح اللي وزنه زايد أنه يصعد السلالم .. لكن أنا وصاحبي ضعاف ونصعده بدون مشاكل
وفيه كنيسه أيضا ومقهى تبع للكنيسه .. تحرجنا أننا نشتري منه .. لأننا مو من الضرورات أننا نشتري
وفيها مبني دائري يسمونه THe camera أو القمره وهو اسم عربي وكان مكانه بنص الكنيسه
وهذا هو البرد اللي كلمتكم لكم عن صعوده

وهذا مبنى القمره

بعد ما طلعنا من الكلية كملنا بطريقنا الى أن وصلنا جسر في آخر الشارع
وكان تحته محل صغير لتأجير القوارب
كان مكانه تحت هذا الجسر

القوارب 3 أنواع :
مجداف
وقارب زي قوارب البندقيه
وقارب البدالات أو الدواسات
أخذنا قارب البدالات
وكان سعرهم موحد ..
مع السايق 30£
من غير سايق 22£
وطبعا قارب البدالات من غير سايق
والأسعار بالساعه
قلت لصاحبي النص ساعه الأولى انت ارتاح
وعليك النص ساعه الثانيه
لما انتهت النص ساعه لقينا بنات ماخذين قارب زي قوارب البندقيه اللي واحد يوقف بالخلف ويجدف بعمود
ومن غير سواق !!
ومتوهقات وصايرات بعرض النهر ولا يقدرن يطلعن يمين أو يسار
والوقت قرب المغيب
لما قربنا عندهم صاحت وحده أرجوكم شوفولنا حل
صدمناهم خفيف وعدلنا وضعهم قلت لها امشوا على طول ... صارت تفتر بمكانها
قلت لها تبين نسحبك .. قالت يا ليت ونكون شاكرين
وما كانا حنا اصلا بعيد عن المرسى.. شغلة ربع ساعه
صرنا قدامهم وصاحبي ورا مقابلهم وماسك العصا حقهم وانا اسوق
نسحبهم بعصاهم ... لما مشينا استانسوا وكانو متروعات
وصلنا تقريبا أخر ناس
وما قدرت أنزل تعوقت من كثر الدوس
من كثر الأماكن اللي نشوفها قلنا باليوم الواحد ندخل مكان أو مكانين بس
ماودنا نحرق الديره .. وجهزنا ترمس شاي واشترينا فرشه صغيره واشترينا شاي أكياس
فصرنا أي جلسه حوالين النهر .. بسطنا فراشنا وجلسنا إلى ما نمل ولا عمرنا ملينا لكن نقوم نروح كافيه ناكل أو نشرب قهوه نرجع ناكل مره ثانيه
انا اذا سافرت يزيد وزني من كثر الأكل

فيه كليه ثانيه اسمها
Balliol College
بنيت تقريبا عام 1263
والدخول لها 2£
فيها كنيسه صغيره وأمكان الدراسه القديمه وصاله كبيره فيها لوحات قديمه لأشهر الذين تخرجوا منها على مر العصور
وبالنص فيه حديقه جميله ومرتبه ترتيب مو طبيعي وفيها مقر الطلاب
وهذي صورها :

معلش لا تدققون بالصور
يعني بسوي نفسي مصور وآخذ لقطات أقلد صاحبي
أصور أي شي وأقوله شرايك بالزاويه

وهذا اللي قدرت أتكلم فيه اليوم
وان شاء الله اقدر اكتب الجزء الثالث من رحلة اكسفورد اللي فيه فعاليات أكثر

ابو عبدالله, فيصل, مجدي و 6 آخرون معجبون بهذا.

ابو عبدالله · 23-08-2016, 04:22 PM

وعليكم السلام ورحمة الله ( ليش ماسلمت علينا يالشياب

جميل جدا انك تلقى مكان يناسب اهتماماتك .. وجميل انك ذكرت تكلفة المواصلات ... والصينيين مخطور اذا رفعت حصاة يطلع لك صيني ... فعلا مالين الدنيا ...ولو جربتو القارب الثاني يقولون يخرع الكتوف من كثر الدف وموقفكم حلو يوم سحبتوا اللي متوهقين بس كلتها انت وتعبت زيادة

متابع معاك

مجدي, نانا ابو عابد, توبليرون و 1 آخرون معجبون بهذا.

سفير جوجل · 26-08-2016, 02:04 PM

اقتباس : المشاركة الأصلية كتبت بواسطة ابو عبدالله

وعليكم السلام ورحمة الله ( ليش ماسلمت علينا يالشياب

جميل جدا انك تلقى مكان يناسب اهتماماتك .. وجميل انك ذكرت تكلفة المواصلات ... والصينيين مخطور اذا رفعت حصاة يطلع لك صيني ... فعلا مالين الدنيا ...ولو جربتو القارب الثاني يقولون يخرع الكتوف من كثر الدف وموقفكم حلو يوم سحبتوا اللي متوهقين بس كلتها انت وتعبت زيادة

متابع معاك

اللي متعلق بالسفر هذا للحينه شباب وما عليك من عمره

ابو عبدالله, نانا ابو عابد, توبليرون و 1 آخرون معجبون بهذا.

فيصل · 23-08-2016, 10:22 PM

ما قصرت
يعني ما راح تعجبك اللي ما يحب التاريخ
البرج يذكرني بكاتدرائيه نوتردام في باريس يا هي تعب وزحمه
القوارب جميله

نانا ابو عابد, توبليرون و فارس الجبيل معجبون بهذا.

سفير جوجل · 26-08-2016, 02:05 PM

اقتباس : المشاركة الأصلية كتبت بواسطة فيصل

ما قصرت
يعني ما راح تعجبك اللي ما يحب التاريخ
البرج يذكرني بكاتدرائيه نوتردام في باريس يا هي تعب وزحمه
القوارب جميله

هي و كاتدرائية نوتدرام كلهم بناءهم متشابه وهو القوطي

ابو عبدالله, نانا ابو عابد, توبليرون و 1 آخرون معجبون بهذا.

مجدي · 25-08-2016, 03:46 PM

يعطيك العافية اخ صلاح

مشاركة الرحلات بالمنتدى مهمة جدا
بتفيد كثير من المسافرين
واكيد دعوة خير من عضو واحد كافية تدفع اي شخص يكتب تقرير ولو بشكل بسيط

يعطيك العافية عالمعلومات الكثيرة

sent from Galaxy Note 5 using Tabatalk

سفير جوجل, نانا ابو عابد, توبليرون و 1 آخرون معجبون بهذا.

سفير جوجل · 26-08-2016, 02:07 PM

اقتباس : المشاركة الأصلية كتبت بواسطة مجدي

يعطيك العافية اخ صلاح

مشاركة الرحلات بالمنتدى مهمة جدا
بتفيد كثير من المسافرين
واكيد دعوة خير من عضو واحد كافية تدفع اي شخص يكتب تقرير ولو بشكل بسيط

يعطيك العافية عالمعلومات الكثيرة

sent from Galaxy Note 5 using Tabatalk

اي فايده يستفيدها مسافر من اي موضوع في المنتدى انا اعتبره نجاح للمنتدى
ونجاح لكم اللي قايمين عليه

مجدي, ابو عبدالله, نانا ابو عابد و 2 آخرون معجبون بهذا.

سفير جوجل · 26-08-2016, 02:54 PM

الجزء الثالث

السلام عليكم
اليوم بعد ما رجعت من صلاة الجمعة حسيت إن فيني كتابة عن رحلة أكسفورد
فقلت خلني أكمل اللي اقدر عليه قبل ما يروح الحماس
في الجزء الثاني ذكرت لكم عن زيارة كنيسة الجامعة وزيارة كلية Balliol
ورحلة تجديف ورمت برجولي في نهر التيمز
على فكره سمعت ان منبع نهر التيمز مو بعيد عن اكسفورد وما ادري عن صحة هالمعلومه
من كثر ما مترنا اكسفورد اكتشفنا بالصدفه كشك أو بالأصح سيارة تبيع مأكولات خفيفه وكان اللي يبيع شاب مغربي اسمه أحمد
وأكله طبعا حلال , تعرفنا عليه وصرنا كل يوم نجيه وارتاح لنا
فصار يتفنن في تحضير الأكل لنا ,, طبعا الأكل على الواقف ,, مأكولات الشوارع
وكنت أسميه أكل المسلمين
وكان فيه كشك ثاني أو سياره ثانيه مو بعيده لواحد ايطالي حاط فرن خشبي داخل السيارة ويسوي بيتزا ولكنها من أفضل البيتزا اللي أكلتها
تنافس البيتزا اللي أكلتها في روما
وكنت أسميها أكل الكفار
المشكله ان صاحبي كان يحب أكل الكفار أنا كنت شاك فيه بصراحه
مره أكل عنده لما تغيرت ملامح وجهه وصرت ما أعرفه من كثر ما أكل بيتزا وكان من كثر وناسته عيونه قامت تصفر من الفرحه .
كان سعرها 9£ للحجم الكبير
و 5£ للحجم الصغير
وأحمد المغربي كان يسوي دجاج مسالا ب 4£ ولكن مثل ما قلت لكم كان يحب أكل الكافرين
ولقيت لكم هذي الصوره لسيارته اللي كانت توقف من 7م إلى 3ص كل يوم

زرنا Christ Church وهي عبارة عن كلية فيها بالطبع كنيسه ومعرض صور وصالة الطلاب
وموجوداتها من لوحات وتحف ثمينه كلها تستطيع الدخول لها ب 9£
واذا كنتم عائلة تتكون من زوجين وطفلين الدخول يكون ب 22£
وتفتح الى الساعه 5 العصر
والأجمل هو اللي حوالين الكنيسه من حدايق وساحات خضرا وممرات نهرية
تلقى الجميع متسدح فيها والأطفال يلعبون .. كنا نجلس فيها ونسوي الشاي والفله ومرات كانت تمطر ونخلي أغراضنا ونجلس تحت شجره
لحظات ويوقف المطر ويرجع كل شي طبيعي .

وبجنبها للي يحبون يشوفون الأزهار .. حديقة الأزهار Botanic Gardens
الدخول لها 5£ وفي آخرها تلقا النهر ومكان استئجار القوارب النهرية

دخلنا قلعة اكسفورد ب 11£ وفيها فندق مكان السجن اللي كان بالقلعه
والغرف هي زنزانات

وفي يوم من الأيام لقيت لوحة بالشارع باللون البني .. وأي لوحة باللون البني تعني مزار تاريخي او سياحي ومكتوب عليها
blenheim palace وكان يبعد 10 كم

صوره من النت

معلومه عن هذا القصر :
هذا القصر بني قبل 300 سنه وهو هديه من ملكة بريطانيا يمكن اسمها ان ما ني متأكد الى دوق مارلبورو واالي ساكنه للحين الدوق رقم 12
وهم أهل ونستون تشرشل رئيس وزراء بريطانيا ايام الحرب العالميه الثانيه
وأهل الأميره ديانا
دخلت قوقل مابز وطلعت رقم الباص اللي يروح له وقلت لصاحبي اليوم بوديك لمكان ما راح تحلم فيه
وافق ابو الشباب لأنه يثق فيني... المشكله إني ما أعرف هالمكان ولا مره سمعت عنه .. بس شفت لوحة بالشارع وتوقعت انه شي يسوى
قالي تدله
قلت افا عليك
هذا اصلا أشهر مكان في اكسفورد واللي ما يعرفه ما يعرف اسكفورد صح
قال توكل على الله
ركبنا الباص ومشينا .. طلعنا من اكسفورد وتعدينا المطار .. ووصلنا لقرية Woodstock ولا فيه سور كبير وبجنبه محطة باص صغيره
انا لما دخل صاحبي .. قلت للسواق واللي يرحم والديك اذا وصلنا لقصر بلنهايم قولي
أشر لي قالي تراكم وصلتوا يا شيوخ العشيره
شفت السور العالي وبعدين بوابة كبيره .. قلت أكيد هذي البوابه ودخلنا
طلع صح هذي البوابه .. لكن اللي أذهلنا وخلانا نناظر بعض .. بعد البوابه فيه ساحه كبيره جدا ومنبسطه وكلها خضرا
وهناااااك قصر رائع كأنه من قصور دزني .. هنا انا تنفست الصعداء قلت هالمره نجيت من خويي الظالم
صراحة شي ولا أروع مشينا تقريبا 5 - 10 دقايق متجهين للقصر ولقينا قدامنا كشكين صغار
واحد للسيارات وواحد مو للسيارات هههههه للمشاة
حق التذاكر .. سعرها 25£ للفرد واذا عندك سياره فالمواقف مجانيه مع التذكره
ومشينا ايضا 10 دقايق الى ان وصلنا لبوابة الدخول للقصر
طبعا واحنا نمشي الحدايق على يميننا ويسارنا نشوف أولها ولا نشوف آخرها
الحديقة اللي على اليسار فيه داخلها قطار صفير طبعا يوديك للحديقه ب 1£ وهو يحرك كل نص ساعه
واسمها Pleasure Gardens
واللي على اليمين ساحات خضرا ونهر وفيه نصب تذكاري
تقدر تاخذ تور بدراجات ناريه او بقيات ب 3£
المفاجئة قبل الدخول قالولنا تقدرون تمددون التذكره وتخلونها لمدة سنه ومجانا
ويسمونها Annual Pass Adult

قلنا ما عندنا مشكله .. قالت الموظفه عب الاستماره .. عبيناها وقالت وقفوا نصوركم
صورتني عطتني كرت بصورتي واسمي وحتى صاحبي زيي
وقالت تقدرون تدخلون الآن مجانا ولمدة سنة
وتقدر تدقع لنا الحين 5£ على شان يشملك خصم 15% للمطاعم والكافيهات اللي داخل
اما القصر من الداخل فحدث ولا حرج عن التاريخ والأبهه
مقسمين التور للقصر على هيئة غرف
كل غرفه لها اسم ولون ولوحات خاصة فيه
اترككم مع الصور

وبعدين فيه مطاعم وكافيهات تريح فيها أو تاكل .. لأن الرحله هذي ما يكفيها يوم
عني أنا رجعت للقصر بلحالي مرتين .. يعني حللت التذكره ولا قدرت أشوف كل مرافق القصر كالحدايق والشلالات وغيرها
وأنا اعتبر زيارة هذا المتحف درة تاج رحلتي
سبحان الله .. مرات تجي معاك على البركه وتصير هي أفضل السفره .. ومو اللي انت مخطط له أصلا

ودي أكتب لكم عن زياراتي للقرى اللي حولين اكسفورد لكن أعتقد اني مصختها حبتين
ولكن لا زم اذكر لكم هذي القريه اللي زرتها مشيا على الأقدام من فندقنا الى هذي القريه بدون اي تخطيط
شفتها بقوقل مابز فقلت لازم اشوفها
قلت صاحبي تعال .. المسكين ماكان فاضي لي .. كان ياكل بيتزا
لما ارسلت له فيديوات .. دقايق ولا هو صاف سرا وراي يصور

القريه اسمها كننقتون kennington

قرية رايقة وشكلها حقت ناس مرتاحين
يوجد فيها شارع واحد رئيسي واسمه
kennington rd ثم يصبح اسمه افنيو رود
فيها 3 بقالات تبيع كل شيء
وتعتبر هي البريد
وهي توزيع الطرود
وفيها مركز صحي
وعياده خاصة واحده
فيها مركز شرطه
وكنيستين
وقبل الدخول لها يوجد egrove park
حركة المشاة فيها قليلة جدا اما حركة السيارات فهي اقل من الطبيعي بسبب قلة سكانها
ما لفت نظري
كثرة كبار السن ولا شفت أطفال فيها ونظافة الخارجية للبيوت والاعتناء فيها كان شي مميز
وفيها منطقه استرخاء كبيره لاهل القريه وهي عباره عن مساحات خضراء جلسنا فيها , كأننا عايشين في فيلم كرتوني
سنجاب يطلع من هنا .. وفراشه تطير .. وبطه تسبح ولا تسأل فيها
عني أنا قلت الحين نشوف سنان منو اللي يذكر سنان
وهذي الصور من القريه

مو هذي كل فعاليات السفره لكن هذا اللي تذكرته واللي قدرت اذكر
بعض الأمور تبقى للأصدقاء فقط
بعد 15 يوم قررنا انا نروح لندن 5 أيام وبعدها ليك دستركت 5 أيام وبعدين نرجع لندن 5 أيام وبعدها للملكه
المضحك اننا رحنا لندن بالقطار وكان ويك اند !!!
بقينا واقفين من اكسفورد الى لندن بادنقتون ومو بس واقفين ,, منحشرين ما تقدر تلفتت من الزحمه ..
وكان سعر التذكره
25£ رايح
اذا رايح وراجع 27
واللي الشي الجديد ان تذكرة ارجعه تقدر تستخدمها ثانيه مو شرط رجعه .. تقدر تاخذ القطار مره ثانيه من اكسفورد الى لندن
كذلك الباص ولكن سعره
23£ رايح
اذا وايح وراجع 25
ان شاء الله ماكنت ثقيل عليكم و يمكن اكتب موضوع مستقل عن ليك دستركت او عن امبلسايد خصوصا .. اذا كان عندي وقت

والسلام عليكم

فيصل, q8ya metnaqla, ابو عبدالله و 5 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
اندونيسيا التي رأيت ( محدث باستمرار )	الطائرالجريح	بوابة اندونيسيا	273	06-12-2021 01:38 PM
قرغيزستان كما رأيت	ياسر المنسلح	بوابة الدول الاخرى	89	10-06-2021 05:51 AM
االسنغال التي رأيت لمهـ رحال ـاجر	فريق التطوير	بوابة الدول الاخرى	24	22-12-2020 12:42 PM
.	اوروبا عشقي	اوروبا	13	08-04-2015 08:50 PM