اليوم الخامس عشر الاحد 24 يوليو :
بعد نومة جميلة ومريحة على سرير الويستن الذي يحصد جائزة افضل سرير في العالم باستمرار بين كل الفنادق توجهنا بعربة القولف اللي دائما تحضر بسرعة الى بوفيه الافطار الاكثر من رائع والغني عن التعريف بوجود الاصناف العربية والعصيرات الطازة الطازة
واثناء الافطار وعلى التاسعة تقريبا بدأت الامطار تهطل بغزارة والرياح قوية واحنا مستمتعين بهذه الاجواء الخوررافية ...
بعدها نزلنا اخذنا لفة على المسابح والشاطي ورجعنا الى الفيلا لاخذ بعض الاغراض الشخصية للخروج
فين نروح فين نروح ؟ الاجواء امطار وغيوم .... هيا على المانغروف
وبالفعل توجهنا بسيارتي وعند البوابة جاء واحد شكله سمسار... انتو حاجزين ... لا ... طيب تعالوا وراي بالدباب وانا بسيارتي وانا اقول في نفسي انقلع ما لك شي عندي ... المهم قال وقفوا في المواقف وانا عندها قلت له انت ايش عندك لو سمحت لاتتدخل انا احجز اللي ابغاه ومو انت اللي توجهني بكيفك ... كشر وزعل والمهم اشر لواحد من اصحاب المراكب المتواجدين عند الكاونتر هذا زبون وجاني واحد منهم ... قلت له اسف انا حاجز ومنتظر واحد
وبروية وهدوء شفت الاسعار على الشباك وتوجهت لامرأة كبيرة هي وزوجها سماسرة واعطوني سعر 250 رينجت لساعتين واذا حاب 3 ساعات ما في مشكلة حسب اختياري انا
اسعار المطار ارخص لانها تشمل التوصيل من والى الفندق بس انا ما تفرق معي بسبب وجود السيارة
بدأت الرحلة بعد انتظار 10 دقائق الى ان يجهز المركب والاجواء الخورافية تزداد روعة وجمال والمطر صار خفيف وهذا المطلوب
نزلنا كهف الخفافيش واخذنا كشاف بالايجار بواحد رينجت وحمودي علقه على رقبته ودخلنا انا وهو اما ام محمد وتمارا كانوا على كراسي الانتظار في الخارج وهنا حصل موقف لحمودي كره ام الرحلة
بعد الخروج من كهف الخفافيش كان قدامنا واحد طفشني صارحة اعتقد انه يصور كل خفاش صورة ويأخذ سيلفي مع كل خفاش وفي النهاية سوى لنا مشكلة مع القرود قام يأكلهم في الممر الخشبي وتجمعوا القرود حولنا وصار الكل خايف وبالذات النساء اللي في الممر وفجأة واحد من القرود يقفز على حمودي ويبغى يأخذ الكشاف وانا لا اراديا عطيته كف على ظهره وهرب الحبيب وتفرق القرود
وهوووبا هرووووب سريع للخارج والناس صارت تعاتب الاخ المصور الله يهديه
خرجنا كملنا الرحلة وحمودي مصدوم وخايف وصار طفشان وبدأت اطمنه شويتين الى ان عاد لوضعه في مزرعة الاسماك بعد ما اطعم السمك وهناك انكسر المفتاح للقارب وتأخرنا 15 دقيقة الى ان تم تبديل القارب وجاء واخذنا على اطعام النسور ثك كهف التمساح واخير قال ها البحر المفتوح وزوجتي تعطيني نظرة وانا اقول قدام يا معلم وهي خايفة من القصص اللي تسمعها
الجو كان غيم والهواء والمطر خفوا كثير واقنعتها وقلت قدام يا معلم وبالفعل كان البحر المفتوح روعة وكانت الاجواء مستقرة وجاتني هناك رسالة ترحيبية من تايلاند ورجعنا من نفس الاتجاه
بعد ان انتهينا من المانغروف .. توجهنا الى langkawi adventure x- treme park وهو مكان يجمع بين دبابات الدفع الرباعي في الغابة وليس مزارع الارز ورمي السهام وسباق الفورمولا ون والزيب لاين وركوب الخيول وينما 5d ولعبة الباينت بول ومتحف مهاتير محمد
طبعا مكانها وانت خارج من المانغروف راح تحصلها على الشارع العام يعني المسافة جدا قريبة دقيقتين بالسيارة .. توجهت لها لان في شخص اعتقد من مكه جزاه الله خير واحنا خارجين جاني وقال لي خذ هذي الكوبونات انا اليوم مغادر لنكاوي وهذي زايدة وهي بكج بقيمة 550 رينجت لشخصين شامل كل الالعاب يقول بنته تعبت وما لعبت في الالعاب ... واعطاني صواريخ والعاب نارية ... قلت وكمان العاب نارية .. شكلك جايبها من سوق الحمام بجدة وجلس يضحك ... المهم تشكرت منه كثير بعد ان امتنعت عن اخذها الا انه اقنعني اني اخذها لانه ماشي والقريب اولى من الغريب في البلد
وتم تجربة الفومولا ون من قبل زوجتي وحمودي وانا انتظرتهم واستغليت الوقت برمي السهام
المكان جدا متواضع والاسعار فيه غالية واغلب العاملين من اخواننا من الجنسية اليمنية المهاجرين بسبب الوضع في اليمن
وبعدها اخذنا غدانا من بيتزا هت القريب من فندق ايديا وكان عبارة عن بيتزا ومعاها اصابع الجمبري اللذيذة ... تغدينا في الفيلا وبعدها سباحة وكان الوقت تقريبا 3 مساء .. استمرينا بالسباحة واللعب برشاشات الماء مع الاولاد ...
وبعدها حسيت بالعطش فدخلت زوجتي تجيب العصائر والشيبسات وقارورة عصير العنب الضيافة واكلنا وشربنا ومع اللعب والسباحة نسيت امر القرود اللي في الغابة القريبة منتجع الويستن ... فصبت زوجتي كاسة ثانية وتركتها لي على الطاولة وفجأة وقع مالم يكن بالحسبان هجوم اول قرد على الكاسة ويدخل يده فيها وكنا كلنا في المسبح عدا تمارا نايمة في عربتها امام المسبح ...
لسه ابغى اخرج واطرد القرد الا تقريبا اكثر من 20 قرد فوق سور الفيلا في منظر مريب ومخيف واصواتهم وبدؤوا في النزول وبدأ الصياح والبكاء من حمودي ... فأخذت حمودي وصرت قدامهم واقول لام محمد خذي تمارا وادخلي من الباب الخلفي للفيلا .... ههههههه مسكينة من الفجعة ما عرفت تفك حزام العربة عشان تخرج تمارا فحملت العربة بتمارا وهرووووووووب الى الداخل وانا صرت وراها ارجع بهدوء الى ان دخلنا
وصرنا نشوفهم من النوافذ وام محمد تقول حسبي الله عليكم ... فتخيلوا شربوا العصير وكسروا الكاسات والقارورة طاحت عليهم وانكسرت وصار الزجاج في الارض وايضا في المسبح وبدؤوا بتفتيش اغراضنا اللي خارج المسبح وكان في شيبسات وحلويات اخذوها وصاروا يتضاربوا عليه وبفكووا الاغراض ويفتشوها يخرب بيتهم
وهنا تذكرت جوالي الجديد وكنت واضعه تحت المنشفة ... اخذت فاكهة و تمر وصرت ارميهم بيها بكل قوة وارمي شي خارج الفيلا لتشتيت الانتباه وعلى طول رحت اخذت جوالي ورجعت يخرب بيتهم
ودقيقة ورجعوا ثاني بس فوق الفيلا شافوا عش عصفور داخل بين فتحة وحاولوا يهاجموه فجات امهم وصارت الحرب بين الام والقرود
اتصلت بالامن وجاء وفرقهم وبلغني انهم مسالمين بس لاتضع أي اكل او مشروبات عند المسبح وهذا اللي سويته بعد كدا وصار الوضع اوكيه
هذا الاكشن كله تقريبا نص ساعة وبعدها جاء فريق الصيانة ونظف المسبح يدويا بحمل الاجزاء الكبيرة من الزجاج ثم بمكنسة شفط هوائي ورجع نظيف وزيادة ولحسن الحظ كان هذا قبل المغرب بساعة تقريبا بعدها كملنا نشاطنا على الشاطي وعند المسبح ورؤية الغروب ثم بعد المغرب اتعشينا من ماك في لنكاوي فير والاجواء كانت ماطرة بغزارة وبعدها رجعنا كملنا سباحة تحت المطر ثم نووووووووم بعد يوم حافل تعقد فيه حمودي من شي اسمه قرود
اتذكر في 2013 مشاهدتي للقرود على الاشجار عند الشاطي ومحاولة اخذ أي شي لمن يضع اشياءه على الكراسي ويتركها ... تقريبا يكونوا فوق الشجر وينشنوا على الشي اللي يبغوه ويسووا هجومهم الكاسح... طبعا الخطأ كان خطئي انا حيث بلغني الامن بعدم وضع المأكولات والمشروبات عند المسبح وانا نسيت اقول لأم محمد ومع السباحة واللعب نسيت الموضوع تماما والحمدلله عدت على خير ورغم هذا كله كانت ذكرى مضحكة وكل ما نتذكرها نجلس نضحك على كل شي صار لنا
يتبع
2015الاعجاب
16-10-2016, 07:12 PM
العرض العادي
المواضيع المتشابهه 
