الـسلام عليـكم ، موضوعي اليوم عن الناس اللي تتكلم عن ماليزيا وانها صارت موضة قديمة وانها تغيرت ومدري ايش الخ الخ ، وطبعا اغلب الناس هذي صارت تروح تركيا ويحسسوك ان تركيا لندن او باريس وهي بالحقيقة مشابهة لماليزيا وبنفس المستوى !!

العربي لما يسافر بدور المطاعم اللبنانية والمعسل عكس السايح الاوربي اللي يجي دول جنوب شرق آسيا يدور الفود ستريت والبسطات واكلاتهم الشعبية واسواقهم الغريبة ، عشان كذا نادرا ماتحصل عربي بالسوق الصيني او بشارع جالان الور القريب من كنتاكي شارع العرب وهذول من اهم الاماكن اللي تجذب السايح الاوربي .. السايح العربي رح تحصلو عند مطاعم الشاورما والمطعم اللبناني والايراني عشان المعسل ، وعشان كذا الكثير صار يفضل تركيا لان جوهم واكلاتهم اقرب للعربية من الجو الماليزي الآسيوي !

شارع جالان الور .. شارع المطاعم الصينية اللي ورا كنتاكي .. بالنسبة لي افضل مكان بكوالالمبور اخر الليل .. مليان بالحياة والسياح الاوربيين والمحليين ، بس طبعا مستحيل تحصل اي واحد عربي .. لان العربي مستواه اكبر من كذا ومايستحمل الاماكن [ المقرفة ] بالنسبة لهم ! .. بينما تحصل السياح من كل مكان بالعالم مبسوطين بالشارع هذاك .. الاسواق الليلية والمطاعم الشعبية بماليزيا من النادر جدا انك تحصل عربي فيها لكن لما العربي يروح تركيا ماعندو مشكلة يوميا ياكل شاورما وكباب [ نفس الاكل اللي ياكلو ببلدو ] بمطاعم رخيصة تركية .. الفكرة هنا ان السايح العربي شايف نفسو على كل شي آسيوي وشايف اي شي تركي او اوربي فخم خصوصا ان تركيا صارت موضة بعد المسلسلات وكثرة المشاهير اللي يروحو هناك

بعض العرب يقولك بوكيت بينتانج [ شارع العرب ] صار مقرف ومدري ايش .. واذا راح تركيا يزعجك تصوير في شارع الاستقلال .. شارع الاستقلال طبعا شارع جميل جدا .. لكن اذا جيت تقارن .. من ناحية التسوق .. شارع العرب افخم من ناحية الماركات .. والشارع ارقى خصوصا بالجزء اللي عند البافليون لين H&M .. مع هذا العالم تتكلم عن شارع العرب وان ماليزيا تغيرت ومدري ايش وكان شارع الاستقلال بتركيا هو الشانزليزيه . . !!

واللي يقولك ماليزيا صارت موضة قديمة .. كوالالمبور رقم 8 عالميا بالنسبة لعدد السياح ، هذي موضة قديمة ؟

واهم شي موجود بماليزيا الجزر الجميلة زي لنكاوي وبرهنتيان واللي ماهي موجودة بتركيا ، ومع هذا ماليزيا موضة قديمة وتركيا هي الموضة الحالية

اذا جيت تقارن كمان من ناحية المولات الكبيرة .. المولات الكبيرة [ بافليون ، مدفالي ، سنواي ، ioi ، ون اوتاما ، KLCC ] اكبر من المولات الموجودة بتركيا

ونقطة اخيرة .. العربي لما يروح تركيا كل الاماكن السياحية هناك مساجد قديمة ، ولما يجي ماليزيا ماليزيا يقدر يشوف مساجد فخمة [ بوتراجايا ] ويقدر يشوف معابد هندية [ باتو كيف ] ومعابد صينية ، يعني 3 معابد كبيرة في مدينة وحدة لكن العربي مستحيل يفكر يروح اماكن زي كذا ، لان عقلية السايح العربي عبارة عن مطاعم عربية غالية ومعسلات

انا ماقول بموضوعي هذا ان ماليزيا احسن من تركيا ، بس حبيت اوضح لناس كثير ان في ميزات واشياء بماليزيا نفس اللي بتركيا وفي اشياء احسن ومع هذا تسمع العالم تتكلم عن تركيا وكانها لندن او باريس ، البعض يفضل تركيا بس تركيا تظل بنفس المستوى هي وماليزيا وتايلند . . وانا بالنسبة لي كل بلد فيه مميزات وانا افضل الجانب الآسيوي