رحلتي الى استراليا اغسطس 2016 ملبورن سيدني قولد كوست - الصفحة 2

ali pontiac · 01-09-2016, 01:53 PM

تسلم يابوركان عزيز وغالي اخوي

ali pontiac · 01-09-2016, 03:49 PM

MELBOURNE

اليوم الثاني

اليوم الثاني نكمل تجولنه واستكشاف المدينه الحلوه، طبعا كل شي كان مخطط ،جدول كامل كل يوم وبرنامجه

موضوع الشنط،،،،في اليوم الأول يوم دخلنه رقم الـTrack في موقع الإماراتيه، يطلع we are still tracing your baggage please try again later والمصيبه الأكبر انه يطلع لي العنوان في البحرين،، وخفت يرجعون الشنط البحرين،،

طلعنه من الصباح الباكر وتفطرنه في احد المقاهي الجميله، على مايفتح مكتب طيران الإماراتيه الي موجود في شارع Collin street ، بعد الفطور، على طوول رحنه مكتب Telstra واخذنه شريحه، وشغاله على طوول لي نهاية الرحله من اجمل مايكون،

رحنه مكتب طيران الإماراتيه، وقالو انه موضوع الشنط مايخصهم وهم فقط مختصين في الحجوزات، طلعنه بخيبة امل، ونحاول نتصل في مكتب Dnata الي في مطار ملبورن ولكن بدون رد اتصلنه مرارا وتكرارا لكن بدون فايده،،في آخر محاوله ردو علينه وقالو لنه انه مابيدهم شي والموضوع عند مطار كوالا لمبور،،،، لحسن الحظ انه زوجتي خذت رقم مكتب الشنط في مطار كوالا لمبور،،، اتصلنه فيهم واعتقد انه الي ردت علينه نفسها الي دخلت البيانات،،، وقلت لها انه في موقع الإماراتيه يطلع عنواني البحريني،، قالت لي لا الشنط بيوصلون لكم ملبورن،،، ولكن لحد الآن لا خبر عن شنطكم،،، اعطيتها عنوانه في سيدني احتياط لو وصلو متأخر يرسلونهم مطار سيدني،...

وقلنه الله المستعان لعلها خيره...

واكملنا برنامجنه وهوه زيارة الـ Royal botanic gardens

هذي صورة الفطور الذيذ ياريت صورت المكان الي كان فيه المقاهي ، 38.3 دولار الفطور

وطلعنه نتشمه

امتداد محطة Flinder Station

Lord of the fries اول مره شفته في تقرير بوغسان ، وحطيته عندي في قائمة الأشياء الي لازم اجربها

اخذت شبس مع السوس الفيتنامي وبصراحه لذيذ

محطة Flinder Station وخلفها واضح مبنى اليوريكا

الـFedration square

طيور هذي القاره جميلين جدا و مميزين

نتمشه على شارع ST Kilda road للوصول للحديقه

وهذي المدام تركض قبل لا تطفي اشارة العبور

كنت اتوقع الحديقه كلها Royal botanic garden لكن جزء منها King domain و مجموعة حدائق أخرى مايهم اسمهم كثر مايهم جمالهم والمشي فيهم وتشوف وين توصل فيهم

اعتقد انهم مجهزين حق حفل غنائي

الباب الي قدام العاشقين مدخل للـ Royal Botanic garden

هذي الجميل فيه اصابه و مايقدر يطير

جلسنه على كرسي مقابل هذي البحيره نتأمل جمال الخالق سبحانه واشوف هالطيور الغريبه

نواصل المشي ولفت انتباهي العلم الأصفر وهذي المبنى الجميل داخل مكان اروع، فتحت google map وطلع انه هذي مبنى الحكومه Government House، محظوظين الموظفين يداومون في مكان جميل مثله

وصلنه الى Shrine of remembrance واهوه صح تم بنائه في نوفمبر 1934 تحليد لذكرى الي توفو في الحرب العالميه الأولى

منظر المدينه جميل من فوق ولكن الجو كان غائم لو كان مشمس كانت الصور احلى

لفت انباهي هذي المبنى وعليه شعار مرسيدس

رجعنه الفندق صلينه وارتاحينه شوي وطلعنه في الليل للعشاء وكانت وجهتنه مطعم اسمه fancy hanks bbq يوم وصلنه للأسف الوجبه الي ابغيها الي اهيه الأضلع المشويه خلصت،، احتارينه وين نتعشه ، زوجتي قالت لي انه في تطبيق Trip advisor في مطعم تقييمه عالي واهوه مطعم كوري اسمه Gami وله افرع فقط في ملبورن (للأسف)، توكلنه على الله ورحنه له

طلبنه قطع دجاجه كامله بخلطتين الأولي original والثانيه sweet chili، من الآخر احلى شي كلته في السفره كلها،، كل يوم اقول حق زوجتي تتذكرين الدجاج السعر 41.8 دولار

ورجعنه الفندق نتمشه

ملبورن تكثر فيها المحلات الي تبيع بضائع آسيويه وبعضها فقط بضائع من اليابان وتذكرت الأخ العزيز العضو Prince Kytu

الآسيويين يشكلون نسبه كبيره من السكان ولهم نفوذ قوي جدا في استراليا، وماشاءالله عليهم ماتعرف تفرق بين الصيني و الياباني و الكوري والتايواني....

صورة ليليه للمكتبه

وهذي كانت نهاية اليوم الثاني

يتبع،،،

مجدي, آخـــرفـــرصـــة, فارس من خيال و 6 آخرون معجبون بهذا.

مجدي · 01-09-2016, 03:57 PM

الحمد لله عالسلامه اخ علي
دقيت الحديد وهو حامي

ان شاء الله رح تكون اضافة ممتازة منك للبوابة
بجوار تقارير عمالقة المنتدى

قديش وقت اخذ معك الطيران ؟

تأخير الشنط او ضياعها اكبر كارثة للمسافر
الله يعينك

غريبة حركت الشريحة
كيف بيبيعوا شريحة لشركة معينة وعليها شعار شركة ثانية
هذا النصب بعينه

واضح انه الفندق مرتب ونظيف
كيف تقييمك ليه ؟

متابع معاك ....

sent from Galaxy Note 5 using Tabatalk

آخـــرفـــرصـــة و توبليرون معجبون بهذا.

ali pontiac · 01-09-2016, 04:18 PM

هلا بيك اخوي مجدي

وقت الرحله في الطياره من البحرين الى دبي 50 دقيقه تقريبا شي جدا بسيط وتالي من دبي الى كوالا لمبور 8 ساعات ومن كوالا لمبور الى ملبورن 8 ساعات اخرى

مشكلة الشريحه يبيعون شركات صغيره وهذي الشركات تستاجر او تستخدم خطوط الشركات الكبيره، بس مب نفس مستوى الخدمه و الأداء

تقيمي للفندق ممتاز صراحه، اشوف فيه الي المسافر يحتاجه نظافه و موقع وحديث البناء او مجدد بالكامل، و واي فاي ممتاز مجاني، لا توجد مواقف للسيارات ، ولكن يتعاملون مع شركة مواقف سيارات والمقيم في الفندق له تخفيض للمواقف بتطرق لموضوع المواقف لأني استأجرت سياره لمدة يومين للتجول في الريف.

مجدي, آخـــرفـــرصـــة, فارس من خيال و 1 آخرون معجبون بهذا.

ali pontiac · 01-09-2016, 04:31 PM

اسعار التذاكر

نسيت اذكر اسعار التذاكر
تذكرة طيران الإمارات : 201.5 دينار بحريني للشخص
تذكرة Air Asia الي من كوالا لمبور الى ملبورن : 53 دينار بحريني للشخص !! ولكن بدون وجبه الوجبات اسعارهم 25 رنقت ماليزي في الطياره، وفيه تذاكر مع وجبات

وتذكرة Air Asia العوده من قولد كوست الى كوالا لمبور، 75.6 دينار بحريني للشخص

يعني مجموع التذاكر 330.1 دينار بحريني...للشخص

متوسط سعر التذاكر لإستراليا 470 دينار الى 520 دينار بحريني واكثر

(هذي من غير اسعار تذاكر الطيران الداخلي و بذكرهم في وقت لاحق)

فندق Brady سعره 25.6 دينار بحريني لليله الواحده.

آخـــرفـــرصـــة, فارس من خيال, مجدي و 4 آخرون معجبون بهذا.

ali pontiac · 01-09-2016, 05:50 PM

MELBOURNE

اليوم الثالث

اليوم الثالث صحينه وكانت وجهتنا سوق الملكه فكتوريا Queen victoria market

ولكن قبل السوق كنت ابحث عن حلاق، ادوات الحلاقه في الشنط الي ماوصلو، وشكلي صار كأني سجين، كنت ابحث عن حلاق عن طريق google map ولكن اكثرهم عن طريق حجز مواعيد، والأغلبيه مايحلقون الذقن فقط شعر الرأس، قلنه مانضيع وقت ونروح السوق

واحنه نتمشه عجبتني هذي الرسمه لدونالد ترامب المتعجرف على حائط بنايه قريبه من السوق

وصلنه مبكر مازالو البياعين ماعرضو بضائعهم

الخضره طازجه

مشروم عملاق

والطيور فطورهم جاهز

وقفت عند شخص يصمم لوحات سيارات على مزاجك مثلا تبقي اسمك او رقم معين، وفي الي عليهم صور سيارات وشعارات صناع السيارات

PONTIAC

شفنه مقهى تركي في السوق واعتقد بوغسان جربه، اخذت من عنده سندويش فلافل وقهوه تركيه رائعه وزوجتي سندويش فلافل على ماعتقد ، كان سعر الفطور 22 دولار

رجعنه نكمل جولتنه في السوق

انواع العسل

اللحوم و الأسماك الطازجه

السوق كان خفايف (ركزو في الصوره) وكنت ابقي شي دايم اشوف صورته ينباع في سوق فكتوريا واهوه عباره عن طبق اسباني رز اصفر و ربيان ، ولكن ما لقيته زوجتي قالت اكيد في السوق الليلي، سوق الملكه فكتوريا يسوون فيه night market كل يوم اربعاء في شهر اغسطس على حظنه

اكملنه جولتنه ورجعنه نتمشى

ياريت يبيعون سياراتهم عندنه

واحنه نتشمه حصلت حلاق فاضي وحلقت عنده، سعر الحلاقه 20 دولار، لكن لم تعجبني حلاقته ،

اكملنه المشي واليوم المخطط نروح منطقة yarra river ونتمشى قدام النهر

مجمع الـ South bank مقابل النهر

دخلت مطعم اسمه Waterfront موصيني عليه اجرب حساء/شوربة

اكنفينه فقط بالشوربه ، وعصير برتقال و عصير اناناس ، السعر 46 دولار

اكملنه المشي

وبان مجمع الـ CROWN العملاق

الأكواريوم في الجهة المقابله

الـ Crown فعلا ضخم وممتد على طوول النهر

منطقة جميله جدا جدا للتمشي

وصلنه الى هذي المبنى واعتقد انه صالة معارض، وتوقنه ورجعنا نتمشى من الدرب الي سلكناه

دخلنه مجمع الـ south bank وحلينه في محل Lindt جوكلت غني عن التعريف

تحليه بسيطه، السعر 12 دولار

طلعت الشمس ودفئ الجو شويه، وقلت حق زوجتي ابقي ارجع Shrine of Remembrance الي رحناه امس ابقي اصور مره ثانيه والشمس طالعه بكون التصوير احلى

المنظر من فوق رائع وتشوف امتداد شارع St Kilda و شارع Swanston بالكااامل

ركزو شوفو المبنى عليه صورة وجه ، ما ينشاف الا من فوق الصرح

ورجعنه نتشمى

هذي الجرو يلعب مع صاحبه

عندي حب تصوير السيارات و الدراجات الناريه هذي الجميله اسمها Speed Triple من شركة Triumph

رجعنه Bourke street وجلسنه شوي نشوف الرايح و الجاي، في هذي الفتره اتصلنه بمكتب الشنط في مطار كوالا لمبور، وقالو لنه شنطكم على الطياره الماليزيه رقم الرحله كذا كذا ،، بيوصلون مطار ملبورن هذي المساء والحمدلله رب العالمين بما انهم بيوصلون المساء ، احنه في اليوم الرابع اساسا وجهتنا المطار من الصبح لإستلام سيارة الأجار وبناخذ الشنط مره وحده الصبح،، بفضل رب العالمين تيسرت الأمور وزال الهم...

الترام وكانهم مستعدين يتسابقون

رجعنه الفندق، وصلينه المغرب و العشاء، وطلعنه نتعشه ،،، اتصلت في مطعم Fancy hanks الي كان المفروض اروح له امس، وقالي متوفر عندهم طبق الأضلع المشويه ويوم وصلت لحسن الحظ كان باقي آخر قطعتين، المطعم شكله غريب من الداخل كأنه مستودع قديم وتحول مطعم واهوه مقابل سوق فكتوريا واللحوم طازجه يشترونها من السوق

زوجتي ماتشجعت وماعجبها شي قالت باخذ من كنتاكي واحنه طالعين، سعر الأضلع 45.6 دولار

وهذي كانت نهاية اليوم الثالث،،

يتبع

آخـــرفـــرصـــة, فارس من خيال, ملاك و 6 آخرون معجبون بهذا.

فارس من خيال · 02-09-2016, 02:27 AM

جزء رائع وتصوير جميل جدا
الحمد لله ان شناطكم وصلت في الوقت المناسب
بصراحة تاخير الشناط يعكر اجواء الرحلة وخاصة اذا كان فيها اشياء مهمة

مالبورن جميلة ويبدو ان الاجواء شتوية اشوف الاشجار في الشوارع مافيها اوراق

مبدع ياعلاوي متابعين للاخر

ali pontiac, مجدي و توبليرون معجبون بهذا.

ali pontiac · 02-09-2016, 09:15 AM

هلا بيك اخوي فارس من خيال، نعم التوقيت كان شتوي شهر اغسطس ابرد شهر عندهم، بس بردهم حلو مب مثل البروده الي تخليك ماتستمتع وفترة الضهر الجو يصير ربيعي

مجدي و توبليرون معجبون بهذا.

ali pontiac · 02-09-2016, 11:33 AM

MELBOURNE

اليوم الرابع

99 صوره

اليوم الرابع يوم جميل وما انساه، صحينه من وقت مبكر وصلينه الفجر و على طوول نزلنه، برنامج اليوم الرابع انه ناخذ السياره الأجار من المطار ومره واحده ناخذ شنطنه و ننطلق الى Great ocean road و نشوف صخور الـ Twelve Apostles

المخطط انه نروح المطار بالـ SKYBUS وهيه خدمة الباصات الي توصل من والى المطار

الشمس ما أشرقت

محطة الـ ٍSKYBUS قريبه من ملعب الإتحاد واسم المحطه Southern Cross station

رحت مقهى صغير اسمه Brother baba budan غني عن التعريف عند المحليين في منطقة الـ CBD ويفتح مبكر الساعه 7:00 وصلنه عنده 6:50 ، قلت ننتظر 10 دقائق حق يفتح وداخله الشاب العامل فيه كان يرتب الأكواب ويجهز المحل، لكن حاط علامة Closed ، فتح لنه الباب وقال دخلو الجو برع بارد، للأمانه شعب طيب و ودود ماعنده تمييز ولا عنصريه، طبعا هذي المقهى الصغير يمتاز بقهوته الي قريت عنها كثير في النت قبل الرحله، وبديكور الكراسي في السقف !!

وانه كل ما اروح مقهى حق اطلب قهوه اطلي شوكولاته ساخنه!! وماعرف ليش!!

هذي المحل من الداخل

هذي هوه صغير جدا ولكن مع الساعه 9:00 يزدحم و تنتظر حق توصل وتطلب قهوتك

اخذت هوت جوكلت ، وقطعة كعك على زبدة الفول السوداني ،السعر 10
دولار

ركبنه الترام المجاني في المنطقه ونزلنه عند محطة Southern Cross

وهذي المحطه والدرج المؤدي الى من منطقة الـ Dockland و ملعب الإتحاد

دخلنه وشرينه التذاكر بالجهاز والأمور سلسه، يوم ركبت الدرج ابهرني المكان ماتوقعته مثل الي في البال، وقلت لازم ازوره مره ثانيه للتصوير

سعر التذكرتين 38دولار وسعر التاكسي، الي اوصلنه من المطار 40دولار لذا الأوفر لشخص واحد هوه الـ SKYBUS ولكن لأكثر من شخص الأوفر التاكسي.

جهاز التذاكر

وصلنه المطار، وعلى طول مكتب Dnata الي ما بيدهم شي ولا يردون على المكالمات، وعلى طوول شفت شنطي ، وقلت للموظف الي هناك هذي شنطي وعطيته رقمهم الـ Tag ورقم الـ Track واحسه خايف ومشكك ومب واثق و عطيته بطاقة الهويه ينسخها واخذنه الشنط

توجهنه الى مكتب شركة التأجير Thrifty

السياره حجزتها من موقع

Cheap Car Rentals, Best Prices Guaranteed! - Rentalcars.com

الموقع اجرت منه من قبل في سفرتي لأمريكا الموضوع عادي حجزت ودفعت واستلمت السياره على طول، بس هالمره يوم حجزت السياره ودفعت و دفعت حق الـGPS المكتب قالي لي الي دفعته حق الـGPS مبلغ حجز للجهاز فقط !! وايضا دافع لتأمين شامل، وقالو لي ادفع للتأمين، لأنه الي دفعته حق الطرف الي حجزت منه يأمن عليك واحنه تأمينه غير !! المشكله القصه صارت نفسها في اوكلاند و قولد كوست !! وقلت براسل الموقع اشوف ليش ادفع رسوم وانه حاجز ودافع كل شي ولكن ماصار عندي وقت....

اخذنه السياره وضبطنه الـGPS على وجهتنه، الـGPS من شركة NAVMAN و ابدا مايتقارن مع الـ GARMIN بطيئ و معقد

هذي اول مره اسوق فيها سياره والسكان جهة اليمين، اول خمس دقائق مربكه ، بس تالي صار الوضع طبيعي اخليكم مع صور الدرب الطويل

قبل الرحله كنت دائما اقول ابقي اشوف هذي المنظر، الخضره والأبقار و الأغنام على الطريق لأنه هذي الشي الي اعرفه عن هذي البلد

مرينه بهذي المدينه الصغيره اسمها Colac حسب الإحصائيات عدد سكانها 11415 نسمه في عام 2011، ولها جريده خاصه تصدر كل 3 ايام في الأسبوع

والمزيد من

الطريق كان طويييل و ممتع وتوقفنه في استراحه اخذنه اشياء خفيفه ناكلها، وتقريبا اكثر من ساعتين ونص من القياده في المناظر، تالي قلت اكيد في غلط وين المحيط!!! ماشفناه متى بنوصل!!؟ اكيد الدرب غلط، ما اكملت كلامي اله شفت لافتة Great ocean road قلت الحمدلله الدرب صح، شوي واله احنه واصلين

المنظر لا يوصف

المزيونه

وصلنه وجهتنه المطلوبه

وهذي الصخره اسمها Razor Back

الموج كان قوي ويضرب في الصخر بقوه

طبعا في مواقف سيارات على الطريق، تصفط السياره و تتمشه لمشاهدة المناظر

وهذي كان من اجمل المناظر واسم المكان Lorch Ard Gorge سمي بهذي الأسم، تعود تسمية المكان لأسم السفينه Loch Ard الي ابحرت من انجلترا الى الوجهه ملبورن في سنة 1878، وتحطمت بعد اصطدامها في هذي الصخور، و من بين 54 شخص هم ركاب وطاقم فقط شخصين الي نجو

وانتو على البال

عجبني المكان وخلعت الحذاء وتمشيت على الرمل الناعم، وبدون سابق انذار جات هذي الموجه الي مانعرف من وين طلعت ورشتني ورشت العائله الي كانت واقفه مستمتعه بالمنظر و الكاميره عند زوجتي وصورة اللقطه العجيبه

وصل الموج فوووق وبلل حذائي و طيره مسافه خلاني اركض وراه، اهم شي انه الموجه مارجعت بلعت الحذاء

الجماعه حصلو نصيبهم اكثر مني والأب يقول That was unexpected

ورجعنه فوق واحس بالبروده في رجلي الهواء كان قوي وبدء مطر خفيف ينزل، ركبنه السياره ومشينه مسافه بسيطه لصخور Twelve Apostles

والسياح رايحين لمشاهدة المنظر

هذي الـ TWELVE APOSTLES

كان في سياح في المنطقه و جولات بالمروحيه رايحه و جايه

كان عددهم 12 صخره ولكن بسبب عوامل التعريه و الموج القوي هذي الي تبقه

وهذي واحده من المروحيات

خرفان قرب مواقف السيارات

ورجعنه الى المدينه و وقفت شوي اصور بعض الصور اثناء الرجوع، ونزل المطر القوي في الدرب ، ومن وصلنه حدود ملبورن وقف المطر

وهذي Melbourne Star

وصلنه الفندق ونزلنه الشنط من السياره، واعطاني موظف الفندق تذكرة لمواقف السيارات الي يتعاملون معاهم، موقف السيارات صاير على بعد شارع واحد ، والمواقف جدا صغيره وضيقه، وغاليه ، على ما اعتقد السعر لليوم 60 دولار، المواقف طريقتهم مثل اي مواقف ببوابه الكترونيه في جهاز تضغط عليه يعطيك تذكره، وتفتح البوابه، وفي الخروج تدخل التذكره وتدفع بالـ Credit card، التذكره الي عطاني اياها موظف الفندق ادخلها بعد تذكرة الدخول وقت الخروج وينزل المبلغ الى 20 دولار (سعر الليله). overnight price.

وتمشينه لي الفندق وارتاحينه شوي وصلينه، وفي اليل طلعنه و الجوع ضارب مليون ، اقترحت زوجتي نروح سوق فكتوريا في الليل لنه في نفس اليوم كان يصادف عندهم الـ night market وتمشينه للسوق

وصلنه !!! أهل ملبورن كلهم موجودين

عجبتني الأجواء كل مطعم فاتح له كشك صغير ويبيع الي عنده وبعضهم اصحاب مشاريع صغيره وطلاب جامعات والأكل من كل دوله في بالك والرائحه زكيه

زحمه يا دنيا، لاحظو فرق الزحمه بين صور السوق في النهار والليل

والعروض

ونزل ماشاء الله مطر قوي جدا مع زحمة الناس و فرقه موسيقيه و الأزعاج ولكن صوت المطر كان قوي جدا على سقف السوق

الأكل السيرالانكي

الأكل الأثيوبي

خذت لي بيتزا مرقريتا

دجاج مقلي جدا لذيذ

زوجتي خذت طبق مغربي خيالي و الكشك مالهم مزدحم

استمتعنه في السوق اليلي وايد و كان مايتفوت سعر الوجبات كان يتراوح بين 10دولار و 14دولار ، خف المطر شوي ورجعنه الفندق وكانت هذي نهاية اليوم الرابع الممتع

يتبع،،،

آخـــرفـــرصـــة, ملاك, مجدي و 5 آخرون معجبون بهذا.

آخـــرفـــرصـــة · 02-09-2016, 03:50 PM

يوم ممتع صحيح
و حلو أنك استأجرت سيارة و زرت طريق المحيط العظيم
يعني برأيك الطريق يكفيه يوم روحه و رجعة
سوق فكتوريا رائع بالنهار و الليل و فيه تنوع عجيب بالناس

معلومات رائعة و صور أروع

ali pontiac, مجدي, أبو سعد و 2 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تقرير PDF سياحي شامل لمدن سيدني وجولد كوست وملبورن	عبدالله الحمودي	بوابة استراليا ونيوزلندا	15	28-01-2020 11:07 AM
متاهة Infinity الممتعة (قولد كوست)	زهرة نيسان	بوابة استراليا ونيوزلندا	27	15-04-2015 07:40 AM
استئجار سيارة في قولد كوست وبرزبن	قوسي	بوابة استراليا ونيوزلندا	2	10-04-2015 08:15 AM
شهر سيحاحة في قولد كوست؟ رايكم	ابو عبدالله1	بوابة استراليا ونيوزلندا	7	20-02-2015 01:39 PM