هــذا الجديـد .. آسـيا الـحقيقيـة .. من الجـدة إلى الحـفيد .. (اغسطس 2016) - الصفحة 16

Al-Hajri VIP · 06-11-2016, 02:57 PM

بالفعل هي اذواق الباص البرمائي جربناه هذا العام وصادف نزولنا للبحر امطار غزيره جدا اضافت اكشن غير متوقع..
الباص قديم والمفروض يستبدلونه لكن التجربة الجديده تظل ممتعه حتى لوكانت اقل من التوقعات..
جزء جميل جدا في انتظار المزيد ..

Fahd · 07-11-2016, 09:50 PM

اقتباس : المشاركة الأصلية كتبت بواسطة Al-Hajri VIP

بالفعل هي اذواق الباص البرمائي جربناه هذا العام وصادف نزولنا للبحر امطار غزيره جدا اضافت اكشن غير متوقع..
الباص قديم والمفروض يستبدلونه لكن التجربة الجديده تظل ممتعه حتى لوكانت اقل من التوقعات..
جزء جميل جدا في انتظار المزيد ..

ياهلا وغلا اخوي Al-Hajri VIP ..
فعلا اتفق معك ولاحظت هذا الأمر حتى في التقييمات لما سويتها ..
كلنا طالعين مع بعض وشايفين نفس الشي ناس تعطي 5 وناس تعطي 2
والحمدلله انكم استانستم فيه وهذا الأمر اللي يخليني انصح الجميع بقراءة تجارب متعددة
حتى يستطيعون تكوين خلفية وفكرة أفضل عن الأماكن اللي يودون زيارتها ..
شاكر لك ياغالي متابعتك وإثراءك المتواصل للتقرير ..
تحياتي لك ..

Fahd · 07-11-2016, 09:11 PM

الــــــــــيـوم الـــــرابــــع:

كنا قد انتهينا من الأماكن الرئيسية التي نود زيارتها وتشاورنا في الليلة السابقة على الأماكن اللي ممكن نزورها هذا اليوم واتفقنا على حديقة الفواكه وشلال Durian بشكل رئيسي .. ذهبنا في الصباح لشاطيء التانجونج رهو المجاور بينما اختار البعض البقاء في البيت واخذ قسط أطول من النوم .. وبحدود 11:30 ظهرا توجهنا لحديقة الفاكهه وبعدها لشلال Durian ومن ثم انقسمنا مجموعتين .. مجموعه راحت للينابيع الحارة وأخرى راحت للدبابات .. وختمنا اليوم بالتوجه لمطعم صقر الهندي الموجود قريب من شاطيء سينانج.

شــــاطيء الــتانجونج رهو

Tanjung Rhu Beach

# بسبب وجوده قريب من الفيلا .. ذهبنا له أكثر من مرة مجتمعين ومنفردين ..
# شاطيء عام وجميل وما عليه زحمة ابدا إلى درجة إن أكثر من مرة ما كان يوجد أحد غيرنا خصوصا في الصباح الباكر ..
# يوجد قسمين أو منطقتين للشاطيء كما في الخريطه أعلاه ..

# المنطقة الأولى: بجوار منتجع الفور سيزونز و كان قريب من الفيلا وهو اللي توجد فيه شركة NAAM اللي تؤجر الدبابات البحرية والبراشوات والبنانا بأسعار ضعف ما سوف تجده في شاطيء سينانغ (شغلهم أكثر احترافية وعندهم تأمين على أي حوادث أو إصابات لا قدر الله ونشاطهم مرتبط بإستقرار حالة البحر) .. وعندهم البراشوت طريقته مختلفة عن الموجود في شاطيء الباتو فرنجي في بينانغ حيث يتم الإنطلاق والعودة على مركب في وسط البحر .. الشاطيء عام توجد فيه مطاعم قليلة جدا وبعض الشاليهات ذات الأسعار الإقتصادية ويمكنك السباحه فيه إذا كانت حالته مستقره وجزء من هذا الشاطيء يتبع لمنتجع الفور سيزونز ..

# المنطقة الثانية:هو الموجود بجوار منتجع التانجونج رهو والمكان الثاني لإنطلاق رحلات المنغروف وله طريق خاص تمر فيه من بوابة المنتجع (يحاول الحارس إيقافك لأي سبب كأن توقع على نموذج تحمل مسؤولية استخدام الشاطيء لكن لن يستطيع منعك بأي حال) وهذا الشاطيء أجمل من الأول ويوجد به محلات هدايا ومطاعم محلية أكثر ويبدو لي إنه الأفضل او الأشهر للسباحه, ومالقينا فيه أي نشاطات سوى مرور المراكب الخاصة برحلات المنغروف. ونفس الأمر بالنسبة للقسم الأول يوجد جزء من هذا الشاطيء محجوز لمنتجع التانجونج رهو.

Fahd · 07-11-2016, 09:12 PM

الصور التالية كلها من المنطقة الأولى
المجاورة لمنتجع الفور سيزونز

Fahd · 07-11-2016, 09:13 PM

الصور التالية كلها من المنطقة الثانية
المجاورة لمنتجع التانجونج رهو ورحلات المنغروف

Fahd · 07-11-2016, 09:14 PM

حـــــديقـة الفـــــاكهة
Mardi Agro Technology Park

# كان تقييمها منخفض (2.4 من 5) وهي بصراحة ما تستاهل العنوه خصوصا إذا كنت مخطط لزيارة بينانغ لأن حديقة الفاكهه في بينانغ أفضل بمراحل ..
# يتوقعون إنك جاي تاكل حبحب () بس وياخذونك لمكان الأكل قبل الجولة اللي ما تعدي 10-15 دقيقة ..
# جميع الزوار وفي كل الأوقات اللي كنا موجودين فيها كانوا خليجيين أو عرب ..
# حصل لنا موقفين غريبة عجيبة فيه ..

# الأول .. وهو يرتبط بجزئية (أنا ومن بعدي الطوفان) التي ذكرتها في الملاحظات وتكررت للأسف أكثر من مرة وفي أكثر من مكان .. بعد ما قصينا التذاكر وجلسنا في الإنتظار قرابة الـ 10 دقايق .. لم يكن قبلنا إلا رجل وزوجته ومن ثم جاء رجل آخر مع زوجته ومن ثم عائلة أخرى من 4 أفراد .. وصلت الشاحنه اللي تنقل الزوار وكانت من 4 صفوف كل صف يشيل 3 إلى 4 أشخاص .. كان المنطق أن نصعد بالترتيب ولكن الجماعة اختاروا سياسة (من سبق لبق) وأسرعوا للركوب قبلنا .. كل عائلة جلست في صف مستقل ولم يبقى سوى مقاعد متفرقة لم تكون كافية اصلا لعددنا .. نظرت لهم مستغربا لكن فضلت التجاهل بعد ذلك وطلبت من الجميع الإنتظار وقلت للسواق ماراح نركب .. بننتظر الشاحنه التالية .. كانت خيرة .. جات الشاحنة التالية خلال دقيقتين ولم يكن هناك غيرنا ..
# ذهبنا أولا لمنطقة التذوق .. لم يكن يوجد سوى أصناف محدودة جدا من الفواكه لاتتعدى 5 ..

# بعد ذلك ركبنا الشاحنة اللي تاخذنا في الجولة وهنا صار الموقف الغريب الثاني وأعتقد إن إحدى الأخوات Deena أو أم زياد ناجي صار لهم شيء مشابه .. توقفت الشاحنه عند أول الأشجار ولم ينزل أحد وبالكاد تسمع صوت المرشد .. والجولات هذي أساسها إنك تسمع وتسأل وتستفيد خصوصا لفواكه لا تتوفر زراعتها في بلدك .. وتوقفت المرة الثانية ونزلوا اخواني بينما لم ينزل أحد من الزوار الآخرين .. لكن المرشد هذي المرة ذهب أبعد قليلا يعني اذا ما نزلت ما راح تسمع وش يقول .. كنت مستغرب من بقية الركاب اللي ما تحركوا خطوه لكن قلت معليش ما دفعت فلوس عشان اقعد في الشاحنه .. ونزلت أنا واخواني وأطفالي واستمعنا وسألنا وتصورنا والبقية مكانك سر .. انتهت الجولة سريعا وأعادونا لنقطة البداية ..

# كانت الزيارة مخيبة للآمال خصوصا أنا وزوجتي قد زرنا مسبقا حديقة بينانغ في 2009 وكانت الجولة أفضل بكثير وتمر على أشجار عديدة ويتحدث المرشد عنها بإسهاب ..
# كان فيه برج مشاهدة قريب من نقطة البداية ورحنا نستكشف البرج ولقينا المنظر جميل (تحتاج تطلع 3 أدوار) وقلنا خلينا نحلل الزيارة وجلسنا فوق حدود الساعه .. ولا كان فيه أحد غيرنا.

Fahd · 07-11-2016, 09:15 PM

شـــلال دوريـــــــــــان
Durian Perangin Waterfall

# لا أعرف إن كان يوجد غير هذا الشلال أو شلال الآبار السبعه في لنكاوي .. لكن هذا الشلال أفضل بكثير في كمية تدفق المياه ..
# موقعه قريب من رحلات المنغروف وممكن زيارتهم في نفس الوقت ..
# يوجد جلسات مظلله على جانبي النهر المتدفق من الشلال .. ومنطقة هذا الشلال مجهزة بشكل أفضل من شلال الآبار السبعه حتى اننا جبنا قهوتنا معانا وكان يوجد على المدخل محلات الهدايا والأيسكريم وبعض الخفايف.
# يوجد أكثر من مصب للشلال وأحواض في الأعلى والأسفل يسبح فيها العديد من الزائرين .. جربنا السباحه في المصب العلوي انا واخوي وولدي سعود وكانت بصراحه ممتعه جدا خصوصا لما تجي تحت الشلال بالضبط .. يوجد منطقة ضحلة لكن أعمق نقطة كانت بحدود أقل من مترين .. كن حذرا فقط من الإنزلاق على الصخور ..
# الصعود للشلال العلوي لا يأخذ أكثر من 10 دقايق والأمر يستحق التجربة ..

Fahd · 07-11-2016, 09:16 PM

مــــسجد نــور الإسلام
Masjid Nur Al-islam

# قريب جدا من مدخل الشلال على الشارع الرئيسي حيث يقع على الجهة الأخرى في الطريق الواصل بين كواه والتانجونج رهو Jalan Ayer Hangat
# توقفنا فيه لأداء صلاة العصر وكان مشابه لمسجد الهناء في وسط كواه ..
# بعد الصلاة انقسمنا مجموعتين .. مجموعة راحت للدبابات والأخرى للينابيع الحارة ..

Fahd · 07-11-2016, 09:16 PM

الدبابات

# هناك أكثر من مكان لإستئجار الدبابات في لنكاوي ورأيتهم على طول الطرق المتوجهه للتانجونج رهو سواء من الجنوب (كواه) Jalan Ayer Hangat او من الغرب (المطار) Jalan Ulu Melaka ..

# يتوفر مرشد لهذه الجولات والأسعار تتباين بشكل كبير جدا وتستطيع تجربتها حتى لو لم يكن لك خبرة سابقه ..
# هذا النشاط يناسب اللي ما عندهم خبرة ابدا أو خبرتهم قليلة جدا أو الخوافين ههههه لكن الناس المحترفه مايسوى عليهم إلا إن يستأجروا بشكل مستقل ..
# توجهنا بعد الصلاه لمحل قريب من مدخل رحلات المنغروف اسمه Langkawi Adventure & Xtreme Park
# المحل وضعه غريب تدخل مكتب محجوب تماما عن الخارج ومن ثم تدخل لغرفة أخرى يوجد فيها عدد من الموظفين وكان كل الزبائن كانوا خليجيين وعرب ..
المحل عندهم أكثر من نشاط منها حلبة سباق لكن كنا نبغى الدبابات .. قابلت موظف هندي وسألته عن السعر قال 350 رنقت للساعه قلت شكرا .. لحق وراي قال انت جاي بنفسك ولا مع سواق .. قلت لا جاي بسيارتي .. قال خلاص بــ 150 للساعه (من 350 !!) قلت حنا 4 كبار ومعانا طفل ولا ابغى الا نص ساعه .. قال اخر شي احسب لك بـ 100 رنقت لكن لازم تاخذون 3 دبابات .. رفضت وقلت ما ابغى الا 2 لكنه رفض وقام يمدح في شغلهم .. بصراحه وضع المكان على أسلوب الموظف ما شجعني ابدا والأمر اختيار .. اعتذرت وخرجت ..
# اتجهنا عائدين باتجاه التانجونج رهو ووجدنا محل قريب من مدخل شلال Durian .. وكان يعمل فيه شباب ماليزيين .. واتفقنا على سعر 60 رنقت لنص ساعه واخذنا 3 دبابات .. كان معنا مرشدين .. واحد في الأمام والثاني في الاخير كان المفترض يقوم بالتصوير لكن معنا جوالاتنا والكاميرا ..
# هناك أمرين يجب أن تضعهم في الإعتبار .. وجوب توفر الخوذه للجميع وكذلك الحذر الشديد عند السير على الشارع الرئيسي .. احتجنا لقطع الشارع مرتين ولكنهم كانوا يوقفون السيارات عشان نقطع ..
# كانت الجولة على مزارع الأرز وبعض المنازل الريفية من جهة شلال دوريان ..

Fahd · 07-11-2016, 09:19 PM

الينابيع الحارة
Air Hangat Village

# هذي ما زرتها شخصيا ولكن راحو لها الوالدة واخوي واختي اخوي بالذات من عشاق الينابيع الحارة وقالوا لي إنها مؤهلة بشكل بسيييط جدا ورسم الدخول لها رمزي وكانت شبه خالية من الزوار .. وكانت الشمس حارة وقت ذهابهم فالوضع ما ساعد كثير ولاتنصح أختي بزيارتها.

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الى استراليا اغسطس 2016 ملبورن سيدني قولد كوست	ali pontiac	بوابة استراليا ونيوزلندا	110	05-03-2020 06:52 AM
37 ليلة بين احضان الساحرة زيزا من 7 يوليو الى 14 اغسطس 2016	himzmz	ماليزيا	429	08-04-2018 07:38 PM
رداً للجميل ... تجربتي مع شنغن المانيا اغسطس 2016	un33	فيزا	15	04-10-2016 12:00 PM
نبارك للجميع الترقيات الجديدة ( اغسطس 2016 )	ادارة المنتدى	أخبار واعلانات الأعضاء	33	24-09-2016 01:22 AM
شنغن المانيا 2 اغسطس 2016	مبتدأ	فيزا	6	18-08-2016 10:42 AM