ماليزيا... كل عام وإليك وجهتي ...

ثنيان · 12-09-2016, 02:26 AM

اقتباس : المشاركة الأصلية كتبت بواسطة بو عبدالله

الحمدلله عالسلامه

ما شاء الله عليك اخوي اول مشاركه في المنتدى هي كتابه تقرير

احييك و إن شاء الله من المتابعين لتفاصيل رحلتك الخامسه

هلا بك ابو اعبدالله
يقولون اول ماشطح نطح
مافي تفاهم ابد على التقارير مباشرة
شرفني مرورك يالغالي

بو عبداللهمعجبون بهذا.

ثنيان · 12-09-2016, 04:27 AM

هلا بكم...

وصلنا ماليزيا والتعب وصل حده معي ومع عيالي
رحلة طويلة وانا مايجيني نوم في السفر تقل حارس
وكالعادة ننتقل بالقطار للصالة الثانية وقدامك منظر الجوازات والطابور والزحمة
لكن تهون طالما وصلت للحبيبه ماليزيا هالمرة طولت شوي في الطابور لدرجة ان
يوم وصلنا سير العفش لقينا الشناط لحالها ماحولها احد الناس راحو وانا صاف سرا
وفكنا الله من التفتيش اللي قبل تطلع من صالة الوصول
لانهم يخلونك تنزل شناطك وتحطها في الجهاز وترجع تشيلها مرتن ثانية لحد يقول جمرك
لانهم ياخذون الواحد حسب هيئته يعني ماهوب كل الناس يفتشونهم الخواجات طبعا محد حولهم
والعرب هم اللي يركز عليهم .. بغيت اعصب
لكن تذكرت اني غريب فلازم اصير اديب
رحت لمكتب الاتصالات وخذيت 3شرائح بقيمة 150 رنقت وكملت على مكتب
التكاسي بمبلغ 167رنقت وطلعنا من المطار باتجاه فندق الصن واي لاقون لمدة 3 ايام جناح مطل على الحديقة

ملاحظة بعض الصور لاتحمل توقيع لانها من النت

مميزات الجناح التنفيذي
استقبال خاص في الدور 20
الدخول للكلوب مرتين في اليوم يحتوي مأكولات خفيفة وعصائر وقهوه
غسيل مجاني لعدد 3 قطع في اليوم

عطوني سرير إضافي مجاني

وحقيقة هالفندق احبه جدا لعدة اسباب رغم انه غالي لكن:

-يقدم خدمة مرضية لي بمقابل المبلغ المدفوع
-تعاون واستقبال اكثر من رائع
حبيبنا الاخ داوود وهو فلسطيني مقيم في ماليزيا ومدير في الصن واي
كان في غاية اللطف والتعاون في الرحلتين الاخيره

-توفير مترجمين عرب متعاونيين وصبورين في الاستقبال
-نظافة وخدمة غرف ممتازة
-تنوع الفطور عندهم حكاية (ماتدري وش تاخذ وش تخلي) مراعين فيه الذوق الخليجي

-مسابح الفندق جميلة وواسعة تناسب الكبار والصغار

هالسنة عندهم قهوة عربي جايبين مكوناتها من السعودية (حسب كلام داوود)
عاد قهوتهم جيده كبداية منهم ومحاولة لإرضاء النزلاء الخليجيين والعرب إضافة الى
الشورما والبليلة والترمس والباجلا وتجدونها بجوار المسبح والقهوة موجودة باللوبي بعد

-حديقة مائية وحديقة العاب مايحتاج اوصفها ابد(اسبق عيالي عليها) وسبق أن تكلموا عنها الأخوان بالتفصيل في المنتدى.

حجزت الدخول للحديقة عن طريق النت من موقع
Asiatravel.com | Hotels Resorts Air Ticketing Tours Packages Reservation

بسعر حلو بالنسبة لي وهو 385 رنقت 2بالغين و3اطفال والاخير كان باقي له شهر ويوصل لسن 3سنوات
فكان دخولة مجاني وفرق معي من اني احجز من عند البوابة
فقط عطيتهم ورقة اللحجز اللي طابعها وعلى طول عطوني الاساور
من الساعة العاشرة موعد فتحها
نستمتع بالحديقة من فوق لين تحت وعادة ابدأ من الملاهي فوق افرها كلها انا وعيالي
وبعدين ننزل نكمل باقي اليوم في المسابح لين يقفلون واخر واحد يطلع انا (أحلل دراهمي)
وللمعلومية تم افتتاح قسم جديد في الحديقة NICKELODEON THEMED LAND
اعتقد فيه احد من الاخوان معنا بالمنتدى غطاه لنا جزاه الله خير
لم يناسب الاولاد عندي (مزاجهم عجيب)
الحديقة جدا رائعة ومناسبة للجميع صغارا وكبارا

حلو اني اخلي اول رحلتي عندهم ارتاح كم يوم وعشان عيالي يفرغون شحنة الطاقة اللي بهم اول مانوصل
وعشان ورانا فرفرة طويلة في ماليزيا

-مول كبير وحلو فيه تنوع وبضاعة جميلة
- توفر المطاعم بكل انواعها في المول

من تجربتي بحط لكم مطعمين جربتهم

الأول مطعم هندي

المطعم جيد لمن يبحث عن المذاق الهندي

المطعم الثاني هو مطعم الطربوش
وهو مطعم معروف لمرتادي البراميد

ويميز المطعم وجود جلسات خارجية مطلة على الحديقة المائية

-المهم انه فندق يوسع الصدر

يتبع ...

himzmz, أبن السلطنة, فيصل و 6 آخرون معجبون بهذا.

ثنيان · 12-09-2016, 04:53 AM

قيادة السيارة..

في هذه الرحلة تشجعت وقررت اني اجرب قيادة السيارة في ماليزيا
طبعا بعد ما شفت تجارب بعض الاخوان بالمنتدى توكلت على الله
حجزت السيارة من السعودية عن طريق موقع الطيار للسفر والسياحة

https://www.altayyaronline.com/ar/Cars.html

الطيار عندهم ميزة تختلف عن باقي المواقع الثانية وهي انك تقدر تاخذ
السيارة من مدينة وتسلمها في مدينة ثانية وانا كنت ابي اخذها من كوالا
واسلمها في بينانج لمدة اربعة ايام والباقين تستلم وتسلم في نفس المدينة
الموقع بسيط وطريقة الحجز ايضا بسيطة

اخترت شركة هرتز

موب لان اسعارها رخيصة ولكن لانها شركة عالمية وموثوقة
خصوصا لواحد مثل حالتي اول مرة اتعامل مع شركات تأجيرسيارات في غير بلدي
السيارة كانت هونداي النترا

ب 180ريال في اليوم عشانها كبيرة
وتشيل الشناط (ام العيال تشيل كل اللي تحتاجه واللي ماتحتاجه)

طبعا تحتاج فيزا لاتمام عملية الحجز وللمعلومية كل المواقع وشركات تأجير السيارت
يطلبون فيزا غير مسبقة الدفع لكن ماعليك منهم بطاقتي فيزا مسبقة الدفع من الراجحي
ومشت الأمور وتسهلت مادام الحروف بارزة لايهمونك ولا تقول لهم انها مسبقة الدفع
عطهم البطاقة وابتسم ونفس الشي مع اي مكان او موقع وش دراهم طالما فيها دراهم

المهم اني طلعت رخصة دولية ب 120 ريال من مكتب سياحي بجدة وسددة قيمة مخالفات
قاهر(ساهر)ب2000ريال الله يخلف بس والغبنة اللي تبط التسبد انهم طلبوا الرخصة السعودية
قلتلهم معي رخصة دولية هاكم قالوا مانبي غير السعودية وزين اني جايبها معي
ومدري هل هالنظام مع هرتز بس او مع كل المكاتب

كان الحجز اني اخذ السيارة من مكتب في وسط كوالالمبور وأسلمها في مطار بينانج
كنت محدد تاريخ استلام السيارة قبل السفر الى بينانج بيوم عشان لو حصل شي غير مخطط له
اقدر اتصرف واحجز طيران لاايبوه وما اتعطل ويضيع حجز الفندق (كانت ايبوه في مخطط
الرحلة اني اوقف فيها لمدة 3 ايام قبل اروح بينانج)

وعشان اتعود على القيادة في ماليزيا خصوصا انها يمين ماهو بمثل عندنا
وفي اليوم الموعود طلعت من الفندق واخذت تكسي وعطيته عنوان مكتب التأجير وقالي انت
تبي تستأجر سيارة؟ وعلامات الاستغراب في خشته قلت له ايه رح بس للعنوان ماعليك
وطول الطريق وهو كل ماشاف زحمة يقولي شف الزحمة شلون تبي تسوق انت مع هالناس
وانا اقول ماعليك رح بس وكل ماقربت لكوالا واشوف الزحمة كل ماجتن ام الركب لين اني فكرت
اكنسل الموضوع كله وشل لي وشل الغرابيل وهالزحمات لكن تراجعت وتذكرت الفشلة اللي بتصير
لو كنسلت .. لين دخل بي مع شارع العرب ووصلنا للمكتب حق هرتز والسواق الصيني كنه يقول
الله يعينك يالمسكين .. دخلت المكتب وكان استقبالهم جميل ورائع نسوني التوتر اللي كان فيني
الأجراءت كانت يعني متوسطة استغرقت 30 دقيقة (بسبب ماعندهم سيارتي)

وكانت المفاجأة اني يوم جيت استلم السيارة قالوا لي ماعندنا النترا لكن بنرقي لك السيارة وتاخذ اكبر منها
وش رايك نعطيك هونداي توسان (جيب صغير) وما تدفع شي تاخذها بنفس سعر الالنترا
عاد انا استانست جيب يعني وسع لعيالي ويشيل شناطنا ويعنني ماني راضي عنهم قلت طيب

سألتهم عن بنزين السيارة وعن بوابات الضرائب اللي على الطرق
قالوا لي البنزين فل لكن تراك ترجعه لنا فل مثل ماعطيناك وتعبيها البنزين الاصفر 95

وتاخذ بطاقة اسمها تاتش اند قو

من اي محطة او بقالة سفن الفن لكني مالقيتها غير في صيدلية واتسون اللي قدام الصن واي
وكني باخذ بنادول لكن الشحن تلقاه باي مكان مافي مشكلة
المهم انها تنشحن وقلت لهم حطو فيها ب 30 رنقت على بالي تكفيني لمدة 4 ايام لكن زدتها عقب ب 20 رنقت

واستخدمت برنامج وييز

وكان برنامج ممتاز ورائع يغنيك عن قوقل ماب وسايجك وقارمن
وهو مجاني سهل الاستخدام تفاعل الماليزيين معاه كبير لانه يعتمد على رسائل واشعارات السائقين المستخدمين للبرنامج

يعلمك ان بوه زحمة قدامك واذا بوه سيارة متعطلة واقفة على جنب او اذا فيه حادث لا قدرالله أو نقاط تفتيش
تكتب اول حرفين من الفندق او المكان اللي تبيه ويسرد لك على طول ويعطيك العنوان وكم كيلو عشان تاصل وكم
يبيلك من وقت واذا فيه محطات في طريقك .. المهم اني استفدت منه جدا واستخدمته لين وصلني لبينانج وهو نعم الخوي
توكلت على الله وركبت السيارة ومشيت والأمور سلكت بشكل ماكنت اتوقعه لكن تساهيل من رب العالمين
وجمال السواقة عند الماليزيين محد يسرع ومحد يتجاوز من راسة بدون اشارة ومحد يعلق البوري وراك يستعجلك ويغثك

حست شوي في شوارع كوالا لكن حوسه جميلة عرفتني بعض الاماكن والمناظر لين وصلت لبوابات الضرائب

واتذكر اني ماشريت البطاقة حقتهم وش اسوي بعمري هالحين واختار بوابة مابها سيارات وادرعم لها ووقفت
ومن شين الحظ هي البوابه الوحيده اللي مافيها موظف طلعت هي حقت البطاقة بس تمرر البطاقة على الجهاز وتفتح لك البوابة
وانا ماعندي بطاقة والسيارات وراي سرا لكن لكن شهادة لله مافيهم واحد دق بوري ولا فيهم واحد غير مساره
لين جاء الموظف وبكل ادب قالي ادفع 2.50رنقت عطيته خمسين من الروعه احسبوه يبي يهاوشن وراح وجاب لي الباقي
وفتح البوابه ومشيت كملت طريقي (لين سلمت السيارة في بينانج وانا كل ماجيت عند هالبوابات احوس واروح لبوابة غلط
ماتقبل البطاقة بس الحمدلله بمساعدة عيالي اذا وصلت دلوني على البوابة الصحيحة)

لين وصلت للصن واي لاقون بحفظ الله بدون اي مشاكل وبكل يسر وسهوله
وطلع الموضوع كله بسيط جدا ومايحتاج ابدا للتوتر اللي جاني من قبل
ونظرات الاستغراب كانت على وجيه كل من قابلتهم عند بوابة الفندق كيف استأجرت سيارة ووصلت لهم خصوصا مكتب
التكاسي لانه كان عارف العنوان اللي بروح له وسط كوالا ولمكتب التأجير واستخدمت مواقف نفس الفندق مجاني
عطوني بطاقة دخول للمواقف ونفس الحال مع الفنادق اللي نزلت فيها ومعي السيارة.

مميزات ومساوئ تاجير سيارة وقيادتها في ماليزيا:

- اي مكان تبيه تروح له وقت ماتبي وترجع وقت ماتبي
- زوجتك وعيالك ياخذون راحتهم في المشوار عكس لو انهم في التاكسي
-وتفتك من سواليف بعض السواقين وبثارة الصينيين وريحه الهنود وتماثيل بوذا اللي بكل سيارة اشوفه
- مناظر تشوفها تسر العين والنفس والروح
- توقف بأي مكان تصور أو تمغط وتطلق رجليك ماااااعندك مشكلة
- تسافر اي مكان يخطم براسك أو باللوحات قدامك بالطريق(الكميرون ماكانت في مخططي ابد
لكن شفتها قريبة من ايبوه وام العيال شجعتني نروح لها ورحنا مافي اي مشكلة)
-محطات البنزين متوفرة بكثرة في طرق السفر وهي جميلة ونظيفة وفرصة للمتعة والتجول
- المصليات متوفرة بكل محطة في الطريق
-ترتاح من المطارات ووجع الراس عفش وشناط ووزن وموعد طيارة وانتظار اقلاع وحضور بدري
-القيادة هناك امنه جدا تراهم فنانين حتى سواقة حريمهم ماعليهم
-اختلاف القيادة من اليمين لليسار مافيه اي مشكلة 10 دقايق والوضع معك تمام
(حصل وعكست شارع لكن جت سليمة ماكان غير سيارة وحده في وجهي وقف لين تنبهت
وعدلت وضعي ومشيت بدون اي تذمر منه الحبيب)
-مافي نقاط تفتيش في الدخول والخروج من المدن ولا شفت اي شرطي أو مرور طول مدة السفر
-يازين ساهر عندهم ينبهك يقول لك تراني قدامك لا تسرع (لوحات تنبهك انك في منطقة تصوير سرعة)
مسافة بسيطة بس وبعدين ادعس وانت منت محتاج للسرعة أصلن للأمان أولا وللمناظر اللي تأسرك ثانيا
-سعر لتر البنزين اعبي فل 85رنقت وعبيتها مرتين طوال مدة الرحلة لين سلمتها لهم فل
المساوئ:
حقيقة لم ارى لها اي مساوئ تمنع من التمتع بقيادة سياره في بلاد جميلة مثل ماليزيا (وجهة نظر شخصية وتجربة)
ندمت اشد الندم اني اخذت السيارة لمدة 4 ايام فقط كنت حاجز لجوهور من بينانج على طيران اسيا ولا اقدر استعيد المبلغ او الغي الحجز
تمنيت اني خليتها معي طول الرحلة من راحة ووناسه شفتها وفلة حجاج
لا تحرمون انفسكم وعيالكم من هالمتعة توكل على الله وجرب

يتبع .. أول مشوار بالسيارة مع العائلة .. بوتراجايا

Al-Hajri VIP, أبن السلطنة, آخـــرفـــرصـــة و 6 آخرون معجبون بهذا.

ابو جواهر · 17-06-2017, 07:36 PM

حجزت الدخول للحديقة عن طريق النت من موقع
Asiatravel.com | Hotels Resorts Air Ticketing Tours Packages Reservation

بسعر حلو بالنسبة لي وهو 385 رنقت 2بالغين و3اطفال والاخير كان باقي له شهر ويوصل لسن 3سنوات
فكان دخولة مجاني وفرق معي من اني احجز من عند البوابة
فقط عطيتهم ورقة اللحجز اللي طابعها وعلى طول عطوني الاساور
من الساعة العاشرة موعد فتحها

السلام عليكم
تشكر الغالي على التقرير الطيب
عاد السموحه ما عرفت اسوي اقتباس لكلامك لاني داش بالفون ولساتي جديد
الغالي عددنا نفس عددكم الله يحفظ الجميع-ما عدا اني ما عندي طفل رابع- الصغير الي عندك دخل بالمجان لذلك اعتبرت نفس العدد (الله يحفظه لك)
دشيت على موقع اسيا ترافل وسويت حجز لشخصين بالغين وثلاث اطفال
عطاني للكبير 130 رنجت
الاطفال 110 رنجت
الاجمالي 590
فهل في خطأ معين او السعر ارتفع
حجزي بدون قسيمة الوجبه الحجز العادي E 6 العاب او اركان

عموما انا ما كملت الحجز لحين تتضح هذي النقطة اما اذا كان السعر ارتفع فاكيد بنحجز امرنا لله
اما اذا فيه خطا يا ريت توضحه لي
🙄 وشكرا مرة اخرى

ابو حسن 9 · 17-06-2017, 10:10 PM

اقتباس : المشاركة الأصلية كتبت بواسطة ابو جواهر

حجزت الدخول للحديقة عن طريق النت من موقع

Asiatravel.com | Hotels Resorts Air Ticketing Tours Packages Reservation

بسعر حلو بالنسبة لي وهو 385 رنقت 2بالغين و3اطفال والاخير كان باقي له شهر ويوصل لسن 3سنوات

فكان دخولة مجاني وفرق معي من اني احجز من عند البوابة

فقط عطيتهم ورقة اللحجز اللي طابعها وعلى طول عطوني الاساور

من الساعة العاشرة موعد فتحها

السلام عليكم

تشكر الغالي على التقرير الطيب

عاد السموحه ما عرفت اسوي اقتباس لكلامك لاني داش بالفون ولساتي جديد

الغالي عددنا نفس عددكم الله يحفظ الجميع-ما عدا اني ما عندي طفل رابع- الصغير الي عندك دخل بالمجان لذلك اعتبرت نفس العدد (الله يحفظه لك)

دشيت على موقع اسيا ترافل وسويت حجز لشخصين بالغين وثلاث اطفال

عطاني للكبير 130 رنجت

الاطفال 110 رنجت

الاجمالي 590

فهل في خطأ معين او السعر ارتفع

حجزي بدون قسيمة الوجبه الحجز العادي E 6 العاب او اركان

عموما انا ما كملت الحجز لحين تتضح هذي النقطة اما اذا كان السعر ارتفع فاكيد بنحجز امرنا لله

اما اذا فيه خطا يا ريت توضحه لي

[emoji849] وشكرا مرة اخرى

الاسعار ارتفعت

ابو جواهر · 18-06-2017, 12:13 AM

اقتباس : المشاركة الأصلية كتبت بواسطة ابو حسن 9

الاسعار ارتفعت

يا حظنا 🤕

ثنيان · 18-06-2017, 12:45 AM

اقتباس : المشاركة الأصلية كتبت بواسطة ابو جواهر

يا حظنا 🤕

فعلا الأسعار زادت وارتفعت
انا حجزت قبل كم يوم نفس الاسعار اللي ذكرتها
130 رنقت للكبار
110 رنقت للصغار
الله المستعان لكن الخوف يرتفع الرنقت
هالايام سعروه زين
شكرا لك

ابو جواهر · 18-06-2017, 02:22 AM

اقتباس : المشاركة الأصلية كتبت بواسطة ثنيان

فعلا الأسعار زادت وارتفعت
انا حجزت قبل كم يوم نفس الاسعار اللي ذكرتها
130 رنقت للكبار
110 رنقت للصغار
الله المستعان لكن الخوف يرتفع الرنقت
هالايام سعروه زين
شكرا لك

السلام عليكم

ياهلا فيك ثنيان وشكرا على الرد

خلاص اتضحت الصورة واحسن لي احجز لا يكون الاسعار ترتفع بعدها 🤔

بالنسبه للرنجت الماليزي لحد الحين ما حولت تنصحني احول دام قيمته زينه ع كلامك 🙏

ثنيان · 18-06-2017, 12:48 AM

اقتباس : المشاركة الأصلية كتبت بواسطة ابو حسن 9

الاسعار ارتفعت

هلا بك يابو حسن
شكرا لردك على اخونا ابو جواهر
نكمل بعض لا خلا ولا عدم

ثنيان · 18-06-2017, 03:57 AM

الجزء الثاني لبينانج ...

يالله انك تحييهم

من عاداتي في بينانج بعد الفطور نتقهوى بعدها إلى الساعة 10 بالبلكونة
جلسة الصباح جميلة فيها نسمات باردة ترد الروح ومناظر صباحية مع اصوات الطيور
تشرح الصدر

ثم ننزل للمسابح مسابحهم ميزتهاتناسب جميع الأعمار ومنوعة وهي عبارة عن 3 مسابح
مختلفة في العمق تناسب كل الأعمار اضافة الى نشاطات مباريات كرة الماء للكبار في
المسبح المخصص لهم ويوجد جاكوزي لكن كان معطل للاسف في هالفترة

والأهم على كل مسبح في منقذ واقف بصفارته تنبيه للاطفال
لعب وسباحة إلى الساعة 2ونص أو 3
بعدها على ماكدونالدز غدا

.
.

ونرجع ثاني للمسابح أو بعض الأيام فترة الظهر نقضيه في قرني بلازا إلى العصر
الساعه 6 نتوجه كلنا للشاطئ فعاليات ونشاطات بحرية إذا ماتبي تجرب تكفيك الفرجة
المغرب نرجع الجناح وطبعا الأولاد
غالبا من التعب يادوب عشاء خفيف ونوم

عشائنا الخفيف يكون خبز وجبن وشاهي ماهو لازم مطاعم يوميا

وأنا وأم العيال أحيانا نطلع للسوق الليلي اللي يبدأ من بعد المغرب على الشارع العام
.
.

بالنسبة لغسيل الملابس سهل جدا فيه غرفة غسيل موجودة بالفندق تقدر تغسل ملابسك بنفسك وتحطها بالنشافة وعادة هذه مهمتي
اصرف من عند الاستقبال أو محل الملابس اللي موجود باللوبي مبلغ 15 رنقت تعطيك هلل خاص بالغسالة وتاخذلك صابون
والشغلة كلها تقريبا ساعة وفية كراسي انتظار سواء داخل غرفة الغسيل او خارجها.

فيه مغاسل خارجية تعطيهم الملابس وهم يغسلونها لكن ما أنصح فيها لانه ماتدري شلون يغسلونها
ولا وش يحطونها مع اي ملابس ...
.
.

بالنسبة للمطاعم في بينانج جربت بعضها في باتوفرنجي والباقي احس الدعوى لغوصة خصوصا هاللي واقفين عند باب
المطعم ويحرجون وينادون الزين عندنا والشين حوالينا لكن في الحقيقة الوضع بائس إلا من رحم ربي

جربت مطعم ماروش والله لايوريكم تجربة شينه حسيت بطعم الثوم الان من كثره هاك اليوم

انا من شفت حاطين هالسكين وانا غاسلن يدي منهم بفلاش

مطعم الطربوش دائم مزدحم والحقيقة الواحد ماياخذ راحتة بعيالة وأهله

مطعم لبنان كان خيار جيد وأكلة ممتاز وخدمتة جيدة

مطعم باكستاني قدام بوابة الفندق في كورنر عند الإشارة
رغم تواضعة إلا ان عنده كباب يضرب بالمخيخ وخبز طازج كلام كبير
احيان اخذه سفري واحيان انا وام العيال نتعشا عنده وأسعاره جدا جيدة
روادة من الأوروبيين وزحمة لانه فعلا يقدم كباب رايق
وأكيد يوحشنا الخبز المدور حقنا اذا مليت من التوست رح لهم لا يفوتك
تقدر تاخذ منهم خبز فقط اذا حبيت يسمونه (نان)..

المغسلة لا تفوتكم

المطاعم الرايقة والاكل النظيف والجلسة دائما في قرني بلازا
تشكيلة رائعة وكلن وذوقة وبالنسبة لي دائما ماتكون وجبة الغداء
فيه مطعم دووم (حبيب قلبي)أو تشيلز..
وخيار عيالي الدائم ماك رغم كل الاغراءات اللي نسويها لهم عشان يغيرون لكن مافي فايده
تقل سرهم مجدوع بهالمطعم .

سنويا اطلب ستيك لحم مع صوص فلفل أسود لا يفوتكم لمحبي الستيك

اللازانيا في بينانج كلام ثاني
لهم فروع في كوالا في البافليون وسوريا مركز البرجين
وجوهور في الأوت لت
.
.

السوق الصيني مافي جديد بضاعة عادية جدا والاسعار مبالغ فيها
والله يعينك على المكاسر والبنقالة صاروا ينافسون
الصينين في كل مكان في ماليزيا موب بس بينانج
احيانا تجد بضاعة جيدة وعليك البحث عن الجديد والغريب

مركزهم وتجمعهم قدام بوابة الفندق تقدر تاخذ عربية منها وتلف فيك في جو من الصخب والمرح
.
.

السنه ذي كانوا مقفلين واحد من مسابح الاطفال بالفندق
على حظنا مسوين تغيير جديد
قابلت المسئول الاسترالي في الفندق وقالي انهم يسون
هالتغير عشان خاطر عيون العرب
ووسيلة جذب لهم ولعيالهم من كثرهم الله يكثرهم ويحميهم
الفندق يشتغل على حس الخليجين والعرب
رحنا وهم باقي ماخلصوا منه .

.
.

النشاطات اللي على الشاطئ متنوعة وجميلة
اول ماتطلع يعرضون عليك برشورات وصور منوعة للنشاطات ومنها زيارة
جزيرة القرود اللي زرتها عام 2007 وكانت تجربة بائسه لي ولعيالي لاداعي لذكرها
واحيان رحلات عائلية بحرية
ومنها البرشوت وهي من اهم النشاطات
كان لي تجربة مريرة في أول زيارة لي لبينانج عام 2007
طلعت بالبرشوت بعد ما اخذت التعليمات منهم وطلعت عادي
وصرت بالجو وش زيني لين جاء وقت النزول للأرض كان نزولي غلط بغلط
تكرفست وتقلبت وتمردغت بالارض لين عضيت التراب وصرت اكح رمل
واصابات وحالتي حالة وعقبها حرمت اطلع برشوت وخليتها لعيالي
الله يحفظهم اسعارهم مبالغ فيها ولازم تكاسرهم السعر ينزل للنص وأقل
ولو قدمت شوي بتلقى أرخص وهذا حال كل النشطات هناك
هالسنة خليت عيالي يجربونه مع واحد من العاملين يعني مايكونون لحالهم
وفي ممكن براشوت لشخص أو شخصين
وفيه دبابات البحر (جت سكي) وهذي عاد لعبتي
اذا شفتوا واحد يالله يمشي بالدباب وعلى مهله تراه انا
وغيرها من النشاطات اللي لازم الواحد يجرب ويطلع عن المألوف
حتى لو كان عليمي مثلي لكن المغامرة شيئ جميل وله سحره

حديقة الفرشات والتوابل والفواكه رحتها في زياراتي السابقة لماليزيا
وتكرار الزياره لها ماله داعي بالنسبة لي

متحف الالعاب تجربة حلوه للاطفال ويستحق الزيارة سبق وزرته
لكن مرة واحدة تكفي لمن يأتي لماليزيا كثيرا
.
.

الهضبة زرتها وهي تجربة جميلة تستحق الزيارة خصوصا القطار
اللي يوصلك اعلى الهضبة الجو فوق حلو فيها معبد هندوسي
جيت بدخله عشان اصور فيه قالوا لي اخلع نعولك ولكم الكرامه
قلت بالطقاق والله لو اني داخلن مسجد وهونت مادخلت
رحتها بتكسي ورجعت بالباص ماخليت التكسي ينتظر حطيت في بالي ارجع بالباص
طبعا تركب أكثر من باص عشان توصل للشاطئ وماهو باص واحد
تمر على كذا محطة وتغير حسب خط السير اللي تبية
وتقدر تسأل سائق الباص وهو بيعلمك رقم الباص اللي بيوصلك لوجهتك
الجميل في الموضوع انك تتمشى في جورج تاون كلها وتمر
في شوارعها واسواقها الشعبية
احسن من جولة التكسي وبسعر رمزي (تجربة حلوه لاحد يتردد)

صور للهضبة من رحلتي 2010:

ركوب الباص من الهضبة للشاطئ

.
.

مصنع الشوكلاته والقهوة لم يسبق لي أن زرتها وليس في نيتي ذلك
لعلمي ان المسألة اتفاق بين سائق التكسي والمصنعين
لجلب الزبائن لكي يحصل على مقابل لذلك ..
يعني السالفة مافيها مشاهدة لكيفية صناعة القهوة أو الشوكلاته لا أبدا كأنك رايح متجر
بالنسبة لي زيارة مكان يعرض انواع شكولاته وانواع قهوة لا اجده جاذبا لي
(وجهة نظر شخصية ليست بالضرورة صحيحة)

بينانج جزيرة ساحرة تستحق الزيارة نشاطاتها كثيرة ومتعدده
صور ملونه تمر بك تعيشها بالوانها ومذاقها

عرض للفواكة في مطعم الفندق صباحا

الفجر وشروق الشمس من الشرفة.. الواقع أجمل بكثير من الصور

الاستعداد لبداية النشاط من الصباح الباكر

كشك المساج على الشاطئ جنب مدخل الفندق وللي يبي خصوصية لاهلة
ترى البنات اللي في الكشك ممكن تجي للغرفة

الأمن متوفر في مداخل ومخارج الفندق

اماكن للترويش بعد المسبح أو ازالة الاتربة بعد جلسة الشاطئ

شاي وقهوة ومأكولات خفيفة على مدار اليوم في صالة الفندق

مسرح تقام علية حفلات غنائية يوميا من المغرب لين الساعة 10 بالليل
وماهم سهلين يجيبون اغاني عربية وخليجية

حبيب القهوة كتكات

عصيرات وايسكريم بجانب المسابح ومأكولات
اسعاره غالية ما انصح فيه
خلك ذهين وسوي تسذا

خذ من البقالة في خارج الفندق ارخص

ساعة اغلاق المسبح وانا وعيالي في مضاربة عشان يطلعون منها لكن هذا دواهم

الليل يرخي سدوله على المكان

الجلسة على الشاطئ حزة الغروب مع القهوة تسوى كثير بالنسبة لي
.
.
.

ملاحظة
( الاراء في هذا التقرير عن الاماكن في بينانج وماليزيا عموما هي وجهة نظر شخصية
فما أراه أنا جميلا ويستحق قد تراه انت غير ذلك .. لذا خذ مايناسبك )

المغادرة الى جوهور ...

.
.
.

fahad_q8 و فيصل معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وجهتي القادمة الى أوربا .. خططو معي	سكوب	البوابة السياحية	5	11-08-2016 02:40 AM
أنتم من تحددون وجهتي ,, يالله اقلطوا	الانيق	البوابة السياحية	11	02-05-2016 02:08 AM
محتاااااره احدد وجهتي	abrar11920	البوابة السياحية	16	25-11-2015 07:19 PM