17-09-2016, 04:13 PM
|
#1 |
مسافر فعّال
تاريخ التسجيل : Mar 2015 رقم العضوية : 2751 الجنس : انثى المشاركات : 941
| أوسـمـة: ملاك |
كل الاوسمة:1 (more»)
| |  كمساميدا..كوريا(رحلة2016)
بِسْم الله الرحمن الرحيم
كل عام وأنتم بألف خير وبصحة وسعادة وهناء
بما ان العيد خلص والإجازات خلصت حبيت أبدا تقريري و احترت في
المقدمة خصوصا ان البلد بالنسبة لي غير عادية خلوني أحكيلكم قصتي واللي كانت سبب وراء اختياري لكوريا
🇰🇷🇰🇷🇰🇷🇰🇷🇰🇷🇰🇷🇰🇷🇰🇷🇰🇷🇰🇷🇰🇷🇰🇷🇰🇷🇰🇷🇰🇷🇰🇷
في شهر مايو من سنة 2008 كان يُعرض في احدى القنوات مسلسل كوري نعم مسلسل كوري (بداية ماتطمن)
كان هذا أول مسلسل كوري أشوفه في البداية استغربت ولاعرفت من اي جنس بحكم التشابة بينهم او زي مانحنا
نعتقد كان اسمه (قصة حب حزينة) لفتني المسلسل بالرغم انه كان مدبلج "ماحب الدبلجة"
أعجبتني القصة وأداء الممثلين وخفة دمهم وحتى نغمة جوالي كانت نفس موسيقى المسلسل
صرت أبحث عن مسلسلاتهم ومسلسل ورى مسلسل لكم ان تتخيلو من سنة 2008 الى 2016 كم مسلسل
وقدرت عن طريقها أعرف شوي عن طبيعة بلدهم عاداتهم وتقاليدهم وبعض من الكلمات الكورية والأكل الكوري حبيتهم و حطيت البلد براسي وقلت إن شاء الله راح أزورها في يوم ما
والصراحة ماكنت أتخيل أبدا أني ممكن أزورها ماعمري سمعت أحد سافر كوريا أقلها في محيطي
المهم في هذيك الفترة كنّا خارج السعودية في رحلة عمل ورجعنا بلدنا وأنشغلنا بتجهيز وتأثيث بيتنا
وكانت الأحداث متسارعة في حياتنا أجلنا موضوع السفر لفترة وتعدي الأيام والسنين والحلم الكوري مازال في
البال حتى سنة 2015 كان وقتها إجازة عيد الأضحى وعندنا النيه للسفر لكن ماتنفع كوريالأن الإجازة قصيرة
ومافي وقت نخطط ونرتب فضلنا تكون رحلتنا في مدينة صغيرة مانحتاج نتنقل فيها كثير ولله الحمد كان
اختيارنا موفق (هونق كونق)
بعد مارجعنا قلت خلاص جاء وقت كوريا وجلست أخطط لي رحلة الحلم وكان التخطيط على قد الحب
والإنتظار سنة كاملة وانا أبحث وأسجل فترة طويلة كنت أقول لنفسي مابغى ولا غلطة أبغى يظل في بالي نفس
الفكرة اللي ماخذتها عنها ماودي أنصدم بواقع مغاير ل توقعاتي علشان كدا بحث كثييير وبيني وبينكم كان
يضايقني نبرة التصغير والإستهزاء في كلام الناس يعني "كوريا"وايش جابكم عليها رايحين تشتروا غسالة او ثلاجة 
حبيت أثبت للجميع ان كوريا بلد جميل وتستاهل الزيارة لكن للأسف أغلب التقارير واللي كانت قليلة ماتبشر بالخير ومع ذلك قلت كوريا يعني كوريا الله لايعوق بشر
واللي سهل الموضوع أكثر مانحتاج فيزا لدخول البلد إذا كانت الزيارة لمدة شهر أو أقل
"أقدر الدول اللي مانحتاج نفيز لها"
نجي للتخطيط الفعلي التخطيط للرحلة 
أغلب رحلاتنا أنا أكون العقل المدبر 😈 المسؤولة عن كل شي
أختيار البلد -المدة-الفنادق-الأماكن السياحية]
وصاحب الحلال يعطينا الموافقة ويدفع
طبعا بدأت اولا أبحث عن أسعار الطيران واللي ناسبنا من ناحية السعر ومدة الترانزيت كانت الخطوط القطرية
وكان سعرها لعدد 5أفراد
2كبار
3 أطفال
19500ريال سعودي وهذة التذاكر وخلصنا منها على فكرة كان حجزنا قبل السفر 6شهور تقريبا ويقال ان هذا السعر بعد التخفيض😐
وبدأت أبحث عن السكن ومن فندق ل فندق ونحجز فندق ونرجع ثاني نكنسل كان يهمني جدا الموقع خصوصا في بلد
معروفة بالنسبة لنا كمسلمين صعبة من ناحية الأكل كان لابد من منطقة حيوية فيها مولات ومطاعم لعلى وعسى
نجد مبتغانا ومن خلال بحثي وجدت أفضل منطقة للسكن هي ميونق دونق(Myeong-dong)
وبعد الحيرة والتعب ثبتنا على فندقين
الأولى شقق فندقية 5نجوم فخم وراقي وبمسبح كل شي فيه حلو ماعدا الموقع للأسف بعيد
وهذا اسمه اذا حابين تشوفوه(سكن ذه كلاسيك 500بنتاز اكسكيوتيف)
والثاني فندق (ibis) وهو فندق 4نجوم ومذكور في أغلب التقارير وموجود في ميونق دونق وفيه مطعم هندي حلال اسمه (زعفران)
على فكرة في كدا فندق لي (ibis)
أخترنا ibis أقلها نضمن عشانا😉
تحسبونا خلصنا على كدا لاااااا
بعد فترة وأنا أقلب في اليوتيوب لفتني فيديو عن عائلة خليجية كانو برحلة لي كوريا وكان حجزهم عن طريق Airbnb
بالنسبة لي أول مرة اسمع عن هاالموقع
رجعت ثاني أبحث في الموقع وكثيييير شقق عجبتني وأسعارهم أرخص من بوكنق بس كنّا مترددين بحكم انه موقع
جديد علينا والتجارب قليلة
بعد مشاورات وها مني وها من صاحب الحلال أخترنا شقة كان صاحبها عليه تقييم عالي واراء الناس جدا مشجعة
توكلنا على الله وحجرنا عنده وكان جدا متعاون ومرحب فينا الشقة في كانقنام او (Gangnam)
معروف هذا الحي بسكان الطبقة الراقية وفيه كافيهات ومطاعم لكن مو زي ميونق دونق 😭 بعدين تعرفو سبب دا الوجة👉🏼
تحسبونا خلصنا على كدا لااااا أمزح أمزح 😄أقترح صاحب الحلال نزور اليابان بما انها قريبة من كوريا
وأنا رفضت (خلوني أركز في كوريا)
وبعد فترة فكرنا نزور جزيرة جيجو(هذااللي يخطط من بدري)
واللي ماكنت حطاها في بالي سامعة فيها وشفتها في المسلسلات وأدري انها حلوة وطبيعتها خلابة لكن شلت هم
أتنقل ونطلع طيارة مره ثانية وأرجع ثاني على سيول"ماحب أتهجول"
لكن مدح الناس وشفت كثير صور لها تحمس وفيها أماكن سياحية حلوة وتنفع للأطفال يعني مو بس طبيعة رجعنا ثاني مرحلة البحث 😰
وهذة المرة حبيت يكون سكنا نفس طراز الشاليهات فلل مستقلة وحولها حديقة وقدامها البحر وبما ان السكن بالمواصفات هذة راح يكون بعيد عن مركز المدينة فضلنا نستأجر سيارة ونتجول براحتنا
في النهاية صار حجزنا
من تاريخ 21اغسطس -27 في سيول
السكن في (The Kings park house in Gangnam )
والحجز عن طريق موقع (Airbnb)
وسعر الليلة تقريبا 1000ريال سعودي
ومن تاريخ 27اغسطس -31 جزيرة جيجو
السكن في (jungmun log pension &Resort)
فيلا دوبلكس غرفتين والحجز عن طريق (بوكنق)
والسعر لمدة 4ليالي 4173ريال سعودي
ومن تاريخ 31اغسطس-3سبتمبر العودة الي سيول والسكن في نفس الشقة السابقة 👆🏼
والتفاصيل ومعلومات أكثر في الأجزاء القادمة
وأعتذر عن هذا الجزء الناشف"بدون صور"
ونراكم ان شاء الله في الجزء القادم وبقية القصة وأول أيامنا الكورية |
|  |
1340الاعجاب
العرض العادي
المواضيع المتشابهه 
