السلام عليكم ورحمة الله وبركاته
يعطيكم العافيه
اذا ماعليكم أمر نبي كل واحد جرب القياده في جنوب افريقيا يعطينا الإيجابيات و السلبيات و كل شي صار له و المشاكل الي حصلت ... كل شي بالتفصيل و من وين إلى وين

وعليكم السلام ورحمة الله وبركاته

إن شاء الله بتحصل في تقريري اللي خبرتكم عنه ملاحظات تخص ها الموضوع،،

طبعا أنا ما جربت السواقة هناك،، بس زوجي وبنتي نوف كانوا يسوقون،،

ومادام بنتي ما شاء الله عليها اللي عمرها 19 سنه كانت تسوق بسهوله هناك،
فأكيد إنتوا بعد بيكون الموضوع سهل بالنسبة لكم

أنا تقريبا خلصت التقرير، بس الحين في مرحلة المراجعة،،

احتمال اليوم أو باجر أنزّله إن شاء الله.

ماشاءالله الله يخليكم لبعض يارب
دام عمرها 19 الله يخليها و جربت تسوق هناك انا بأجر سياره من السعوديه إلى جنوب افريقيا ههههههه
يعطيك العافيه والله متشوقين للتقرير

ماقصرت ام نوف

انا برضه سقت هناك وكانت سهلة جداً
الشي الايجابي ان القيادة توفر عليك كثير لأن السيارة مع سائق
مكلفة جداً
كمان تخرج وقت ماتحب وما ترتبط بوقت معين
و فيها خصوصية و راحة لكم

اتذكر نسيت رخصة القيادة في السيارة بكيب تاون
ولما وصلت جوهانسبرج استلمت السيارة الثانية و طلبوني الرخصة
قلت له بالسيارة اللي في كيب تاون قال خذ السيارة
و لما توصل الرخصة نوصلها لك الفندق

يعطيكم العافيه اخباركم ....من زمان ماكتبت شي و صراحه اشتقت لكم قلت أحرك الموضوع شوي
وين الناس إلي جربت القياده سولفو اكتبو تجاربكم

مثلها مثل القياده ببريطانيا أو ماليزيا
تختلف فقط في الإتجاه حيث مقعد السائق يكون يمين بدلا من اليسار
والطريق معكوس يعني الذهاب عندنا عوده عنهم وهكذا يعني
في بدايتها ستكون صعبه شويه ويوم بعد يوم بتتعود وتصير سهله

أنا جربتها فجأة وبدون ماحد يعلمني وسهلة بس لما تلاقي إشارة مكتوب فيها قف stop لازم توقف وتطلع يمين ويسار وبعدين تمشي لأن أغلب العرب ما يسوونها يخففوا السرعة وبعدين يمشوا لا لازم توقف
وشي ثاني التقاطعات اللي له الطريق رح يمشي وما ينتظر أحد يعني فيه تقاطعات تكون الأفضلة لأحد الجهات فـ لازم تستناه عشان يعدي لأن لو صدمك الحق عليك رح يكون

حياك الله أخي الأحب
راح تتعود على السياقة في غضون ساعات بس خلي في بالك أن الخط الفاصل بين الشارعين يكون يمينك (عكس اللي معنا بالخليج). كنت في البداية متردد في السياقة و سكنت قريب من الحرم الجامعي و المستشفى، بس بعدين قررت أغير منطقة السكن و أضطريت أشتري السيارة وفي خلال يوم واحد تعودت و صارلي لحد يومك أسوق الحمد لله سنتين بدون أي مشاكل.
اهم شيء، تنتبه من سايقين الميكروباص التكاسي لأن سياقتهم متهورة جدا.
و مثل ما قال لك أحد الأخوة، إذا لقيت مكتوب لك على أسفلت الشارع Stop ، فمعناه لازم توقف حتى لو ما شفت سيارات في التقاطع. حصلت لي مرتين مسكوني الشرطة بسبب هذه النقطة، أشوف الشارع فاضي و أبطئ السرعة و ما أوقف و على طول زخوني.
الأمر الآخر، فيه شرطة مرور سرية، لا تسوق و تتكلم تلفون. العقوبة هي مصادرة التلفون و ما راح تستلمه إلا من تروح مركز الشرطة.
الأمر الأخير و المهم أيضا، إذا مسكت خطوط صوب الجاردن روت و لا دربان و لا صوب سفاري كروجر و أشرت لك الشرطة سواء كانت رسمية ولا سرية، لا توقف أبدا لحد ما تحصل محطة بترول أو تجمع محلات و أوقف هناك، و هذا الشيء متعارف عليه و لا يمكن تحاسبك الشرطة عليه