السلام عليكم ورحمه الله وبركاته ...

حبيت اشاركم بتجربتي بالسكن في بادن بادن وكانت هذه المره الاولى اللي اسكن فيها بهالمنطقة .. احنا عائلة كبيرة مكونه من 8 افراد فوقع الاختيار على شقق لا سويت وحجزتها من موقع بوكينق .. شقق اثاثها حلو وفيها مطبخ ومسبح وسعرها مناسب

تاريخ الوصول 31\8\2016 حتى تاريخ 5\9\2016 الحجز ل 5 ليالي مع موقف سيارة مجاني وتم سحب كامل مبلغ الحجز قبل اسبوعين من الوصول.

وصلنا الموقع واتوقعنا ان بيكون مبنى فيه شقق وانصدمنا ان بيت عادي صغير قسم ل3شقق شقة بالسرداب وشقة بالاول وشقة بالثاني قلنا ما عليه نشوق الشقة بالاول و بعدها نحكم .. ولقينا صاحبة المنزل بانتظارنا وعرفتنا عن اسمها باترينا وكانت بشوشة وتبتسم (عكس يوم تسليم الشقة )ودخلنا نشوف الشقة ولقيناها حلوة واثاثها حلو بس الغرف شوي ضيقة.. الحجز كان ل8 اشخاص والغرف كانت بس 3 غرف تكفي ل6 اشخاص .. سألتها ان في 2 باقيين وين غرفتهم ؟ ودتني الصالة ولا حاطه سريرين نفخ بطرف الصالة وتقول هذي غرفتهم !! ماحبيت اتجادل معاها فالتزمت الصمت وعدينا الموضوع وكملنا التجول بالشقة ولما خلصنا قالت انا اهم شي عندي الكهربا فرجاءاَ ما تطلعون الا مطفين كل الانوار وانا وعدتها ان راح نلتزم بهالشي وسلمتنا المفاتيح وقالت اذا ضيعت المفاتيح راح تدفع مبالغ بالالاف لان راح اضطر اغير كل مفاتيح الشقة واخذت مني مبلغ 250 يورو تامين قلت عطيني وصل انج اخذتي مني هالمبلغ عشان اضمن حقي تعذرت وقالت انها مستعجله ودفتر الوصولات ببيتها الثاني وراحت .. قعدنا بالشقة نريح شوي وقمت ابي افتح البلكونه ولا الستارة تطيح!! رحت ركبتها ومشى الحال وطلع هذا حال كل اثاثها مركبته تركيب اي مسكه يطيح !! عشان تاخذ عليه فلوس .

مرت الايام واحنا ملتزمين ان نطفي كل الانوار قبل لا نطلع بس لا حظنا من التغيرات في الشقة انها تدخل من ورانا الشقة وتتاكد بدون علمنا !! والمسبح اللي حاطة بالموقع ان متوفر ومجاني مع الشقة طلع عليه رسوم تحسب لكل ساعة للشخص الواحد .. واجرت كذلك لعمال شركة عزاب الدور الارضي وسببوا لي الحرج مع عائلتي لانهم كل ليلة يسهرون بالبلكونه بجانب المدخل عراة الصدر ويسكرون !! ولما سالتها ليش تاجرين لهم قالت ما كنت ادري انهم عزاب ..

**(يوم التسليم )**

وصل يوم التسليم ورتبنا اغراضنا بالسيارة واتصلنا عليها عشان تجي تشوف الشقة وتسلمنا مبلغ التأمين
والاتفاق بعقد بوكينيق ان تخصم من المبلغ 85 يورو رسوم التنظيف
اول ما وصلت ولا تصفط سيارتها ورا سيارتنا عشان تصك علينا لا نطلع !! وجت معفسة وجهها ومعصبة (كل هذا قبل لا تشوف الشقة )وتدخل الشقة وتصارخ علينا وتشتمنا لان الشقة وصخة انا تفاجات منها الصراحة وابتزتنا قالت عطوني فلوس زيادة لا اطلب الشرطة انا عندي قريب لي بالشرطة ..انا عصبت منها لان مافي تلفيات بالشقة مجرد اوساخ بسيطة !!
وقلت اطلبي الشرطة .. وطلعت بره الشقة انتظر عند سيارتي ولا تطلع من البلكونه مالت الشقة وتقعد تشتمنا وتصارخ علينا وكل هذا على مسمع من الجيران بالشارع !! ومحد طلع منهم يشوف شنو يصير لانه من الواضح انهم معتادين عليها بافتعالها المشاكل مع الزبائن .. وقعدنا ننطر تقريبا ساعة الا ربع على ما جت شرطتهم قلت الحمدلله جا الفرج .. ولكن اطلعت هالنصابه على معرفة وعلاقة مع الشرطة اي انها معتادة تجيبهم عشان تبتز الزبائن حيث لم يسمعوا لشكوانا فكان تعاملهم معانا جداٌ سيء وبعدها طلبت منا ومعاها الشرطة مبلغ 400 يورو بالاضافة الى ان مبلغ التامين لن يسترجع يعني التوتال 650 يورو (تخيلوا هالمبلغ الخيالي للتنظيف فقط !!)مع العلم انني قدمت ورقة الحجز للشرطة وقلت الاتفاق بينا ان تاخذ 85 يورو فقط رسوم التنظيف فكيف تطلب هالمبلغ الخيالي وان الشقة حتى لا توجد فيها مشاكل ولا تلفيات والاوساخ بسيطة ولكن اتضح ان الشرطة متعتونين معاها فطلبوا جوازات السفر وهددونا بسحبنا للمخفر اذا لم ندفع وان الوصع سيكون اصعب بالمخفر ومنعا للمشاكل وحتى لا نتاخر عن حجزنا في الفندق الاخر اضطررنا لدفع المبلغ المطلوب وقد علمنا منها وانها سبق وابتزت سواح خليجيين بمبلغ 800 يورو لانهم اتلفوا جولة المطبخ يعني بالاخير طحنا بشلة من النصابين المتعاونين مع الشرطة لاجل ابتزاز السواح ولما قلت لها راح اشتكي عند بوكينق واكتب بالتعليقات عنج عشان الكل يعرف انج نصابه وما يتوهق ويحجز عندج قالت انا بشتكي قبلك وراحت واشتكت ووصلتني رساله من موظف بوكينق احمد الصباغ وكاتب ان احنا طلعنا من الشقة من دون لا ندق على صاحبة الشقة عشان تشوف الشقة وان طلعنا تاركين ابواب الشقة والانوار مضاءة فيعتذر موقع بوكينق ان ماراح يرجع مبلغ التامين !! وان ماراح يسمحون لي ان اعلق عن رايي بالشقة في موقعهم !!

تواصلت مع الموظف وقلت له كل اللي حصل وللاسف مارد علي .. فقلت لازم ابري ذمتي وانبه كل السواح من هالنصابه اللي ماتخاف الله وماقول الا حسبي الله ونعم الوكيل
هذا عنوان الشقق على قوقل ماب
(بادن بادن, ألمانيا) Römerweg 18, 76547 Baden-Baden, Germany

وهذا موقع الشقق على بوكينق
Booking.com: ط´ظ‚ظ‚ ظ„ط§ ط³ظˆظٹطھ - ط¨ط§ط¯ظ† ط¨ط§ط¯ظ†, ط£ظ„ظ…ط§ظ†ظٹط§