اقترب موعد السفر وفي يوم الجمعة الموافق 17 سبتمبر كانت موعد إقلاعنا في تمام الساعة 4 فجرا إلى الدوحة ثم ترانزيت مدة 4 ساعات في الدوحة ثم الإنطلاق إلى كوالا في رحلة استمرت قرابة 7 ساعات ....

من عادتي دايما أكون قبل الرحلة بوقت كافي حتى اخذ راحتي وتحسبا للظروف .. لما وصلت مطار الملك خالد وجيت اشحن الشنط ومرر جوازي على الجهاز رفض يقبل ومرة ثانية ومرة ثالثة وانا ايش السالفة قال الجهاز رافض جوازك قلت : داري انه رافض لكن ايش المشكلة وينادي مديره ومدير مديره ومدير مدير مدير مدير جد اللي ما أدري مين , ماني فاضي وجع راس بعدين قالوا خلاص انحلت المشكلة عاد انا ما صدقت خبر ولا سألت أصلا ليش

وصلنا ولله الحمد إلى مطار حمد الثاني وكان تحفة معمارية ومن شدة الإرهاق والتعب نسيت أصلا حتى التصوير ومن حسن حظي لما نزلت من رحلتنا من الرياض توجهت للصالة المغادرة الى كوالا وطلعت أمامي مباشرة وأقرب كرسي وأحط راسي نوم .... ما حسيت نفسي إلا أم سعد تقول يالله الوقت قرب وناظرت الساعة وبالفعل كان الوقت وصل وتوكلنا على الله على كوالا أو ما ركبت الطايرة لقيت المقاعد اللي على الدريشة عددها اثنين بجنب بعض وكنت قد اخترت مسبقا المقاعد والوجبات وصاروا المضيفين يجيبوا لنا الوجبات في صحون خاصة ويعطونا الوجبة لحالنا غير عن بقية المسافرين عاد اللي بجنبي يناظرني يقول وش عندهم ذولا عاد أنا حسيت إني فخم بصراحة

كان أغلب الرحلة نوم ومهما نمت بالطيارة ما رأح احس بالراحة إلا على السرير




كل شوي وأناظر في الخريطة ودي أمسك الطيارة وأحطها على كوالا على طول




وبدأت تظهر معالم الفاتنة ......

وصلت للمطار واستلمت الشنط وعلى طول على محلات الاتصالات وشريت شريحة اتصال ب 30 رينجت وشريحة 3 جيجا انترنت هوت لينك بسعر 70 رينجت , وبعد ذلك توجهت لمكاتب التاكسي وأخذت تاكسي ألى الصنواي بسعر 130رينجت ....




وصلنا ولله الحمد إلى الفندق








عملت تسجيل دخول وكان سريع وللأسف الموظف كان تعامله سيء للغاية ...



أول ما دخلت الغرفة كانت المفاجأة سريرين منفصلة والغرفة أعزكم الله متسخة وقمت نظفتها وكانت الخزانة عطلانة وهي أهم شيء عندي . بصراحة كانت صدمة ولكن رغم هذه السلبيات يبقى الفندق الأول بكل شيء فيه , قلت ما فيه حل إلا أنام والصباح بإذن الله راح أتفاهم معاهم عاد قبل النوم مدة ربع ساعة أجهز محاضرة كاملة علشان أوريهم اليوم الثاني
.
.
.
.
.

بإذن الله سوف أكمل معاكم لاحقا ما حصل معي اليوم التالي ...

دمتم بود