عسى الصور طلعت عام ؟؟

ايي طلعت[emoji1360][emoji1360]


Sent from my iPhone using Tapatalk

👍🏻👍🏻صور حلوة
وتقرير احلى
متابعين للآخر

ما أحلى الصدفة لما تدخّلني موضوع بهالجمال ..

استمتعت جدا جدا بروايتك ... ومن أسلوبك كأني قرأت لك مواضيع في المنتدى القديم ؟؟ أبو طنبول و11 يوم في اسطنبول؟

بانتظار تكملة السرد الرهيب.. وبما أنك عرفت تنزل الصور فزيادة الخير بركة ونص

اه يا عظامي .. اه يا عضلاتي

كان هذا حال الجميع بعد يوم مرهق .. قال الاب / لن اكرر تجربة الترانزيت أو تكون الرحله بدون نوم كافي ..

31/7 كان يوافق يوم الأحد ..

ولذلك كان المخطط الذهاب لحي ( كوفنت قاردن ) الذي يكون مميز بهذا اليوم , ويمتلئ بالسياح .. والانجليز أنفسهم .. وكذلك يشمل سوق للخضار والفاكهة .

فطرنا بالشقه .. نزلنا للمترو القريب .. أخذ الاب تذاكر المواصلات .. واسمها ( Oyster Card ) تستخدم لكل مواصلات لندن البريه والبحريه .. تعبيها بأي مبلغ تريده حسب احتياجك ومدة رحلتك , وتوجد عروض عليها وباقات , ويمكن للشخص الرجوع لموقعهم في النت لمعرفتها , علماً بأن تكلفة المترو 2.5 باوند لكل شخص في الرحله الواحده والطفل أبو 6 سنين مجاناً .

وصلنا لمحطة ( كوفنت قاردن ) .. حي جميل .. محلات تسوق ذات طابع جديد ..

مطاعم وكافيهات .. كشكات صغيره .. عروض فنيه في الشوارع للاطفال والكبار



شوفوا الحلاوة يا اخوان !! دققوا النظر في الساعه !!

نعم إنها الساعه الواحده ظهراً !!

يا ويل قلبي ويلاه

لو اطلع بالديره الساعه وحده قسم دجاج مشوي انا وعائلتي

تمشينا في المكان .. الغيوم فوقنا .. والجو البارد المنعش يحفنا .. ساعتين كانت كافيه ..

الحي به حاجات كثيره ولا يمكن تغطيته بالقليل من الصور , ولذلك انصح بالبحث في صور قوقل عنه وستجد صور جميله للحي وما يحتويه .. وهو يستحق الزياره .

بواسطة الخريطه توجهنا سيراً على الاقدام إلى ( الهدف الثاني ) .. ربع ساعه .. ميدان أو ساحة ترافلجار أو الطرف الأغر وبالانجليزي ( Trafalgar Square )







قضينا فيه حول الساعه ..

ثم توجهنا إلى ( الهدف الثالث ) .. ربع ساعه .. كله سيراً على الأقدام ..

ونحن في الطريق كان هناك ماراثون سباق .. وأنواع التصفيق والحماس ..



تلاحظون ساعة بيج بن في الخلف

وصلنا ..

ساعة بيج بن المشهورة ..

شعور غريب راودنا ونحن نقف أمام الساعة المعلم المشهور عالمياً .. احدى عجائب الدنيا

الساعه فقط للفرجه والتصوير , وغير مسموح بالدخول لها ..







الساعة تقع على نهر التايمز , وبجوارها المراكب السياحية ( هدفنا الرابع )

دقت الساعه الرابعة عصراً .. أخذنا مركب أبو لون أزرق .. 6 أشخاص 44 باوند .. الجولة ساعه كامله .. نص ساعه رايح ونص ساعه راجع

متعه أخرى من متع لندن

الغيوم من فوقنا .. لا أمل أبدا من هذه المقوله .. الغيوم فوقنا وفوقنا وفوقنا .. أشكال وأشكال

سبحان الخالق المبدع

هواء منعش جميل .. اجواء رومانسيه

طبعاً السناب شغاااااال .. كل مبنى وكل غيمه وكل منظر يتم تصويره واحنا رايحين واحنا جايين ..









انتهت الساعه وليتها لم تنتهي !!

نزلنا مكان ما طلعنا امام ساعه بيج بن , واخذنا الجسر المؤدي لمعلم اخر مشهور وهو ( هدفنا الخامس ) ..

لندن آي

اطول طابور رايته في حياتي !! لو يوزعون فلوس يا شيخ !!

اعتقد طابور ركوب لندن آي كان واصل المطار !!

طيب منا ولا منا !! واسطه !! شوف ولد عمك !! شوف رحيمك !!

كان فيه طابور صغير .. رحنا له قالوا / هذا اللي دافع أكثر ..

( تنويه / تذاكر لندن آي تباع عن طريق النت أو من نفس الموقع , وفيه عندهم تذكرة سريعه تمسك بها طابور صغير لكن فلوس زياده عن التذكره العاديه )
( تنويه اخر / وزارة السياحه في لندن شطار , مقدمين عروض لفعاليات لندن السياحيه , اذا دخلت على موقع أي معلم سياحي تلاقي عروض باقات لباقي المعالم , يعني كل ما تحجز معلم يطلع أرخص , شيل يا حبيبي اللي تقدر عليه وتطلع ارخص من انك تاخذ كل معلم لوحده )

قال الموظف للأب / التذاكر اللي معاك هذي من النت , لازم تغيرها من المبنى المجاور !!

ذهب الأب وطابور طويل استغرق 20 دقيقه !!

الموظف / بتطلع لندن آي اليوم ؟
الأب / ما ظنيت الطابور اليوم زحمه , احتمال اخليه يوم ثاني , انت بدلي التذاكر وانا اشوف اموري .
الموظف / لا يا حبيبي , ما يمشي ذا الكلام !! التذاكر كل يوم بيومه !! اليوم اللي تقرر فيه تركب لندن آي تعال عندي بدل التذاكر !!!
الأب / الحين واقف عشرين دقيقه وهذي آخرتها !!

رجع الأب لعائلته ووجدهم في قمة الوناسه والسعاده

غيوم .. جو جميل .. ساعة بيج بن .. لندن آي .. نهر التايمز .. جسور .. مراكب .. سفن ..

كلها في عين واحده



حركة بشريه هائله .. أصناف البشر من كل أنحاء العالم

عربات ايس كريم .. كيكات .. وماكدونالدز !! >>> ورانا ورانا ذا البرقر !!!!

دقت ساعة بيج بن بصوتها المشهور معلنة الساعه السابعة مساء , فكتب الأب ملاحظة في جدوله / تأجيل لندن آي ليوم آخر , وقال / ربما هذا من حسن حظنا لكي نعود لهذا المكان الرااااائع .

الاب / ها نرجع الشقه ؟
العائله / والله ما ودنا نمشي من هنا , وش أحلى من كذا , ممكن نتعشى هنا .
فقال الاب / للاسف مافي أكل هنا غير اللي ما يتسمى , وما ابغى اقول اسمه عشان ولدك ما يمتحنا ( ماك دونالدز ) !! ثم أضاف الأب / برنامج الجدول لهذا اليوم انتهى , لكن باقي النهار ما انتهى , فيه مكان قريب من هنا خلونا نتعشى فيه .

في نفس الموقع توجد محطة مترو ومنها إلى ( الهدف السادس )

ليستر سكوير .. Leicester Square ..

عالم أخر وكثافة بشريه اخرى !!

مسارح .. سينما .. مطاعم .. كافيهات ويا كثرها في لندن

عروض فنيه في الشوارع .. موسيقى .. رقص

يا زينك يا لندن

لا تمل أبداً أبداً أبداً

قال الأب / هنا يوجد مكان بينبسط عليه ولدك وبيتشقق من الفرحه

محل ( m & m ) للحلويات .

للاسف المحل كان مغلق ( المحل يغلق يومياً الساعه 12 مساء .. ما عدا يوم الاحد يغلق الساعه 6 مساء )

بالله عليكم في محل في اوروبا كلها يقفل الساعه 12 بالليل !!! لا وكمان محل حلويات حق اطفال !! الساعه 8 بالكثير وتدور فندقك في بقية مدن اوروبا !!!

إنها لندن .. انها الحياه .. نهارك ليل وليلك نهار ..

قالت الأم / ربما هذا من حسن حظنا أن المحل مغلق لكي نعود لهذا المكان الجميل .

خطوتين وشارعين ونحن في الحي الصيني ( Chinatown ) ( الهدف السابع ) وهو يعتبر داخل ( ليستر سكوير )



اسم على مسمى , مثل شارع العرب , كله صيني في صيني

لفيناه سريع لوجود رائحة مزعجه صادره من بعض المطاعم الصينيه , وحاجات غريبه معلقه في مطاعمهم !!

الحمدلله على النعمه

زاد الجوع .. وتضاربت الاراء

وفجأة يقف امامنا مطعم تركي .. وتعود بنا الذاكرة للأكل التركي .. ودخلنا

كان اختيار موفق جداً

مطعم من دورين .. راقي .. أكل لذيذ جداًً .. وأجمعت العائلة ان اكله ألذ من اكل اسطنبول نفسها لخلوه من الدسم .. كانت الفاتوره 70 باوند ( ماسكه مع المطاعم 70 باوند .. وهذا ملاحظ كون الوجبه للشخص تكلف 10 باوند تقريباً , ما عدا الاخ ماكدونالدز , رخيص في لندن يكلف حول 4 باوند للشخص , لكن دا بُعده اني أكله )

المطعم اسمه / Istanbul pide salonu
وموقعهم في لندن / 53 shaftesbury avenue

يوم حافل بكل ما تعنيه الكلمة من معنى

قال الاب / اعتقد اننا انهينا لندن في يومين ههههه

ضحكت الاسره معه

ولم يكن يعلم أن لندن لا تنتهي ..

يتبع ..

البرنامج /

حي كوفنت قاردن + ميدان ترافلجار + ساعة بيج بن + جوله بالمركب في نهر التايمز +

لندن آي + حي ليستر سكوير + الحي الصيني + m & m .

..................................

والمعذره على قلة الصور

والجود من الموجود

وبعضها من النت

الصور طلعت وايد حلوه
خصوصا صورة الغيم الساعه وحده الظهر
الله يرزقنا الغيم والمطر

التقرير صار احلى مع الصور [emoji1360][emoji1360]
بس حرام عليك تقول مافي الا ماك لو ماشين اشوي عالنهر بتلقون مطاعم وممتازه
عوافي عليكم التركي


Sent from my iPhone using Tapatalk