خبراء مانشستر و الليك ديستريكت

منيرة · 14-02-2015, 10:52 AM

السلام عليكم ورحمة الله

بالعادة اذا قلنا بريطانيا مانعرف الا لندن
وإذا شطينا شوي رحنا رحلة يوم سواء الى بيرمينغهام او بورتسميث او برايتون

هلمرة نبينغير شوي
استفدت من عرض القطرية 35٪
وحجزت
البحرين مانشستر
هيثرو البحرين
بسعر 300 دينار

التقسيم
أسبوع مابين مانشيستر و الليك ديستريكت و ليفربول

اولا:
الليك ديستريكت 3 ايام تكفيها ؟
و اي أجمل البحيرات؟ عرفت ان وينديرمير هي الأشهر في شي جميل بعد
وماهي النشاطات؟

ثانيا:
اخلي سكني دائم في مانشيستر و اطلع يوميا
شفت ان الليك ديستريكت تبعد عن مانشستر ساعة وكذلك ليفربول

ثالثا:
في منطقة او فعالية حلوة قريبة من مانشستير ؟

رابعا:
نشاطات وفعاليات في مانشيتر و ليفربول وبلاكبول ؟

خامسا:
ارجع من مانشيستر الى لندن بقطار ولا أخذ طيارة؟

سادسا:
اما لندن خلوها علي اعرفها شارع شارع

وجهات أوروبية · 14-02-2015, 05:12 PM

ياهلا ومرحبا اختي منيره
زين حلووو التغيير أبشري ان شاء الله
راجع لج اليوم بكتب لج كل شي

بلاك بوول حلوه كفايه لو تقضين يوم كامل على كورنيشهم رووووعه اشوي عليه وخاصه اذا الجو مغيم

كلها العاب و الاكواريوم والحنطور ومحلاتهم حلوه بسيطه
نظام الالعاب فيها نفس مدينه برايتون على البحر ورى بعض في تقريبا 3 مناطق العاب والرابعه اكبر منهم اشوي مش البحر لكن قريب منها

بالنسبه للبحيرات في مدينتين رئيستين تقريبا راجع بالتفاصيل عنها

مانشستر اقدر اقول لج انها لندن المصغره

راجع لج انتظريني

منيرة · 14-02-2015, 07:56 PM

هلا فيك
في انتظارك

وجهات أوروبية · 16-02-2015, 01:17 AM

اقتباس :

اقتباس : المشاركة الأصلية كتبت بواسطة منيرة

السلام عليكم ورحمة الله

عليكم السلام ورحمه الله وبركاته

بالعادة اذا قلنا بريطانيا مانعرف الا لندن
وإذا شطينا شوي رحنا رحلة يوم سواء الى بيرمينغهام او بورتسميث او برايتون

ههههههه اي صح
وعدل شغلج التغيير حلوو

هلمرة نبينغير شوي
استفدت من عرض القطرية 35٪
وحجزت
البحرين مانشستر
هيثرو البحرين
بسعر 300 دينار

ماشاء الله حلوووو

التقسيم
أسبوع مابين مانشيستر و الليك ديستريكت و ليفربول

اولا:
الليك ديستريكت 3 ايام تكفيها ؟
و اي أجمل البحيرات؟ عرفت ان وينديرمير هي الأشهر في شي جميل بعد
وماهي النشاطات؟

اي وينديرمير هي الاشهر وحتى البحيره بأسم هالمدينه
وفي مدينه ثانيه اسمها Waterhead

وينديرمير تكون بنص البحيره وحجمها كبير وفيها معظم النشاطات
والمدينه الثانيه اضغر منها وجايه براس البحيره
اي 3 ايام حلوه لها حق الاسترخاء وتشوفون المكان عدل
وتزورون المدينه الثانيه بعد وتستمتعون فيها

هذا موقعهم والنشاطات الي فيها
و أي استفسار اكثر عن الشناطات خبريني

خارطه تشمل كل شي في البحيره مواقف نشاطات مكان العباره والسياكل

http://www.lakedistrict.gov.uk/visit...togo/?a=348818

Brockhole - the Lake District Visitor Centre | Brockhole

ثانيا:
اخلي سكني دائم في مانشيستر و اطلع يوميا
شفت ان الليك ديستريكت تبعد عن مانشستر ساعة وكذلك ليفربول

اختي انا اشوف تسكنين في مانشستر وتروحين ليفربول بأيق وقت المسافه تقريبا نص ساعه بس او 35 دقيقه بالكثير
55 كيلو متر بينهم

ثالثا:
في منطقة او فعالية حلوة قريبة من مانشستير ؟

شوفي نفس ماقلت لج مانشستر لندن مصغره
عندهم سلفرج وبيكاديلي ومحطه قطارات بيكاديلي تعتبر الرئيسيه

وشارع العرب هناك اسمه روشوم هو شارع صغير ومب حلو
احسن شي عجبني هناك مطعم هندي لذيذ هههه

ومجمع سترافورد كبير وفخم وحلوووووو جداا

سفاري بارك Knowsley Safari Park
السفاري مابين مانشيستر وليفربول
بس ليفربول اقرب يعني وانتو رايحين ليفربول تروحون لها وبعدها تدخلون ليفربول
موقعهم
Knowsley Safari Park, Great days out & School Trips in the North West

وحديقه كليفرز gullivers فيها ترفيه وبحيرات صغيره والعاب
مكانها بالنص بين مانستر وليفربول
موقعهم
https://www.gulliversfun.co.uk/

رابعا:
نشاطات وفعاليات في مانشيتر و ليفربول وبلاكبول ؟

مانشستر ذكرناها
في ليفربول مجمع ليفربول ون liverpool1
في جنب اولت ليفربول اكوريوم للسمك حوض كبير وفيه انواع كثيره من السمك يعني من الاوت لت تروحون له مشي
اسم الاكواريوم بلو بلانيت
موقعهم
Blue Planet Aquarium | Home to over 100 living displays including Europeâ€™s largest collection of sharks

خامسا:
ارجع من مانشيستر الى لندن بقطار ولا أخذ طيارة؟

بالقطار اختي افضل مافي داعي طياره
بالقطار دايركت ياخذ ساعتين الى ساعتين و 10 دقايق الى لندن
يطلع من محطه بيكاديلي في مانشستر الى محطه ايستون في لندن
السنه الي راحت انا راجع بالقطار

سادسا:
اما لندن خلوها علي اعرفها شارع شارع

ههههه ماشاء الله عليج تمام التمام

طبعا الاجابات على السريع فوق

الحين بالنسبه للمخطط من وجه نظري كالتالي

اربع ليالي في مانشستر
و 3 ليالي في البحيرات

اول ليلتين في مانشستر وبعدها تطلعون على البحيرات تقعدون الثلاث ليالي هناك وترجعون ليلتين في مانشستر
قبل العوده منها الى لندن

طبعا مانشستر قريبه من ليفربول وتتنقلون بينهم على راحتكم المسافه نص ساعه

بالنسبه لبلاك بول
تخصصون لها يوم وانتو مانشستر ترحون لها الصبح
المسافه بالقطار بين ساعه وربع الى ساعه ونص دايركت
تطلعون لها من محطه بيكاديلي مانشستر الى محطه بلاك بول نورث
وبالسياره ساعه 85 كيلو متر
في بلاك بول تروحون الى الكورنيش او تنزلون في Talbot Square الى على الكورنيش
وبتشوفون مدينه العاب على البحر وفي ثنتين نفس الشي بعدها بينهم مسافه اشوي
واخر وحده اكبر منهم قدام اشوي يعني المكان كله حلو للمشي
يعني مدن الالعاب كلهم 4
3 على البحر
والاخيره بعد الملاهي الثالثه بتكون يساركم
والكورنيش من اول مدينه العاب لين الثالثه
على اليسار كلها محلات ومطاعم المكان وااايد حلوووو
وفي اكوريوم حلو انصحكم تدخلونه بدون تردد
وفي حنطور تتمششون فيه على الكورنيش
يعني يومكم كله هناك فقط + منتزه Stanley Park

اذا نسيت شي وتذكرت بخبرج ان شاء الله
وانتي اذا عندج اي توضيح او استفسار و أبشري

منيرة · 16-02-2015, 08:25 AM

اول شي يعطيك العافية على هالمعلومات القيمة
مبدئيا انا قررت التقسيم
ليلتين مانشيستر
3 ليالي ويندير مير
3 مانشيستر

اوصف لي بالضبط فعاليات وينديرمير
يعني انا سمعت في مطلات جميلة اذا عندك احداثياتها و اساميها

البحيرات الباقي ازروهم ؟ واي الاجمل بعد وينديرمير

سفاري بارك اللي ذكرته
مادري اذا زرته من قبل ولا لا بس هذهو اللي تركب باص و يفرونك على الحيوانات ؟

انا افضل الطيارة لان مرة خذت قطار باريس جنيف و تعذبنا بالشنط
كان القطار طابقين و يالله دخلناهم الدور الاول الى مال التذاكر قال اذا انتوا فوق و دوهم فوق
القطار جميل بس بهدلته الشنط تكرهني فيه
في بريطانيا نفس الشي مافي عمال ؟؟

بلاكبول شرحك وافي
بس اذا تشرح لي اكثر عن مانشستر
حدايق حلوة
قعدات حلوة
مطاعم تستحق الذهاب
مجمعات او شوارع مهمة
الداون تاون شسمه
اطلع من مانشيستر اروح التون تاور برايك ؟
في نفس لندن شركات سياحية تطلع بباصات لها و لا ؟

يعطيك العافية و بيض الله ويهك

وجهات أوروبية · 16-02-2015, 09:04 AM

الله يعافيج يااااارب ووجهج ابيض يا الشيخه

ان شاء الله ابشري بشرح لج بشكل تفصيلي اكثر
بس امس حسيت اني تأخرت عليج قلت بكتبهم على عجاله وبدون ترتيب احس اشوي مخربط هههههههه

ان شاء الله بس ارتب لج النقاط الاساسيه وافصلها لج وانزلها

بخصوص التون تاور
لا تروحين لندن ومنها الى التون تاور
اطلعي حق التون تاور من مانشستر
التون تاور بين مانشستر ولندن لكن اقرب حق مانشستر بكثير

من مانشستر الى التون تاور 70 كيلو
ومن لندن الى التون تاور 240 كيلو

خارطه توضيحيه
المربع الحامر التون تاورز

العاب

وراجع لج بتفاصيل اكثر ان شاء الله

وجهات أوروبية · 16-02-2015, 09:26 AM

بخصوص الذهاب الى التون تاور

تقدرون تاخذون سياره بسايق من الفندق
او تاكسي وياخذ عليكم ذهاب فقط بين 100 الى 120 باوند
بالقطار ما انصح فيه ياخذ 4 ساعات وتبديل مابين قطارين الى 3 قطارات وتوصلون مدينه التون وبعدها تروحون للملاهي بالباص او التاكسي
بالنسبه للشركات السياحه مادري بس اكيد ان في وتقدرين تكلمين كونسيرج الفندق وهم اكيد يتعاملون مع شركات

منيرة · 16-02-2015, 01:24 PM

على فكرة جيكت قطار مانشستر التون تاور
ساعة و نص و تبديل واحد بس و اوفر بعد في حدود 28 باوند
ومن المحطة فري شتل الى التون

في انتظار باقي شرحك

فارس الجبيل · 16-02-2015, 03:10 PM

كثير 3 ايام بالليك دستريك اغتنمي الايام اما في لندن ولا مانشستر
ليلتين كفايه
1 يوم ضيفية على لندن هي اللي تستاهل الجلسة

3 مانشيستر
2 وينديرمير
الباقي لندن

وجهات أوروبية · 16-02-2015, 05:49 PM

اقتباس : المشاركة الأصلية كتبت بواسطة منيرة

على فكرة جيكت قطار مانشستر التون تاور
ساعة و نص و تبديل واحد بس و اوفر بعد في حدود 28 باوند
ومن المحطة فري شتل الى التون

في انتظار باقي شرحك

ممكن تعطيني جدول الرحلات من محطه فري شتل

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شقق في مانشستر Premier Apartments Manchester	MOHANAD	اوروبا	10	26-07-2015 10:38 AM
شقق في مانشستر The City Warehouse Aparthotel	MOHANAD	اوروبا	11	18-06-2015 03:03 AM
ساعدوني بترتيب المدن,لندن,مانشستر.ليفربول,يورك,البحيرات	احب السففر	اوروبا	6	07-06-2015 05:27 PM
قطارات مانشستر - كارديف	منيرة	اوروبا	24	09-05-2015 08:27 PM
شقق في مانشستر Staycity Serviced Apartments	MOHANAD	اوروبا	14	16-03-2015 10:24 AM