14-12-2016, 09:52 AM
|
#380 |
عضو قدير
تاريخ التسجيل : Dec 2014 رقم العضوية : 732 الجنس : انثى المشاركات : 1,600
| أوسـمـة: Deena |
كل الاوسمة:2 (more»)
| | 
هاد وانت متأخر .. طلعت الأول والتالي ههههه
على قلبي متل العسل والله يا مجدي .. بس تحملوني عاد بكتر الكلام ..
1. اذا خيروكي توخذي اولادك او زوجك او صديقتك المقربة وتكون افضل رفيقة سفر ممكن تتخيليها او تسافري لحالك. ايش بتختاري وليش ؟
غالبا حسب المكان، لكن انا بفضّل عموما السفر لوحدي .. الحرية المطلقة في السفر منفرد شي ما بيعرف لذته الا اللي جربه. وقت ما بدي بعمل أي شي، يخرب برنامج وبعمل برنامج جديد، باكل بنام بمشي مسافات .. بتسوّق أو بعتكف بالغرفة .. فالخيار الأول دوماً هو وحدي ..
لكن في مدن تحتاج لرفقة وخاصة المدن "الرومانسية" .. يعني روما مثلاً شعرت فيها بالوحدة وبدي معي حد لأنها بلد كلها فرح .. في هالحالات بفضل يكون معي زوجي ..
2. اذا وقفتي قدام مفترق طرق وقالولك يا اما بتختاري افضل شغل بتتمنيه مع مرتب عمرك ما حلمتي فيه لكن بدون ما تقدري تسافري نهائيا بحياتك، او السفر لكل بقعة على وجه الارض مجانا لكن بدون ما تقدري تشتغلي طول عمرك وتكوني معدومة ماديا. ايش بكون قرارك وليش ؟
هم الحالتين extreme ... بشكل واقعي طبعا رح اختار الحالة الأولى لأني لا زلت بحاجة الشغل والدخل المادي..
أما لو جاء الخيار في وقت أنا مكتفية فيه ماديا (بعد دراسة الأولاد وزواجهم خلص) . بختار الخيار التاني وبنطلق انا وأبو الشباب ..
الوضع المثالي اني اختار الوضع الأول، أوفر فلوس قدر الإمكان وبعدها أغير رأيي .. وأسافر وأصرف الفلوس اللي وفرتها ههههه
3. اذا قدامك شخص عمره ما سافر وبعتبر السفر مضيعة للوقت وتبذير غبي. كيف ممكن تقنعيه انه غلطان ؟
بعرف ناس كتير هيك.. وانا بقول الناس أذواق وآراء وأولويات .. في ناس همها الكوفي شوب والمطاعم طول السنة وبعدين بيحكوا انه السفر تبذير. وفي ناس همهم الملابس والمكياج من الماركات الغالية وبيعتبروا السفر تبذير. انا بعمل العكس، تقريبا ما بروح كوفي شوب او مطعم وانا بالأردن (قليل جدا زيارة المطاعم يعني مرة كل شهرين او تلات) .. لاني مقتنعة انا والعائلة انه هالمصروف أحلى لما يروح لسفرة عائلية كبيرة وحلوة ..
بالتالي الشغلة أولويات وانا ما بحاول اقنع حدا انه غلطان .. لانه هم ممكن يبلشوا فيي ويقنعوني انه الماركات الغالية اهم من السفر وان المشاوير الأسبوعية للسينما والمطاعم أكتر متعة من سفرتين بالسنة..
4. لنفترض صحيتي هسا من النوم وحكولك بعد ساعه بالضبط لازم تكوني بالمطار ولازم حالا تطلعي من البيت. ومعاكي 5 دقايق بس تختاري اشي واحد توخذيه معك وبلد واحد تسافري عليه، ايش بتكون خياراتك ؟
عموما الوضع مش غريب.. انا ما بفتح شنطة السفر لارتبها الا قبل ما اطلع على المطار بساعة .. فبقوم عادي وبغسّل وبلبس وبرتب شنتة كاملة في ربع ساعة
اما لو كان معي شي واحد اخده فهو اكيد رفيق الدرب وحبيب القلب – اللابتوب..
خياري للبلد ساعتها لازم تكون فيها أسواق حلوة عشان اعرف اشتري الأشياء الي ما اخدتها معي ههههه
بختار تركيا لانها من اقرب البلاد لقلبي
واذا طلعت بعجقة ما بدي كمان اسافر بعجقة ههه
5. عندك بلدين وهاي اخر سفرة الك، واحد الجو فيه حر ورطوبة عالية جدا لكن فيه كل عجائب العالم وغابات وطبيعة لا توصف، وواحد الجو فيه ممتاز يعتبر افضل جو للسفر ويعطوكي سيارة مجانا لكن البلد ما فيه غير المتاحف والمطاعم والمولات. ايش بتختاري وليش ؟
اكيد المكان الحار والرطوبة مع اني بكره الرطوبة بس كمان ما رح استفيد من متاحف ومولات ومطاعم ,, آخر سفرة قلت لي 
6. الان حالا انت واقفه قدام اجمل منظر دايما مرسوم بمخيلتك ونفسك تشوفيه باحدى سفراتك. اوصفيلنا هذا المنظر.
انا بعشق البحر عموماً .. أحلى مكان ممكن أشوفه بحر ومراكب صغيييرة وقديمة، الشمس عم تشرق من ورا المراكب والنوارس طايرة حواليها .. وانا جالسة على الرمل الأبيض وبكتب عالرمل وبمسح وبرجع أكتب ههههه ..
7. اذا اعطوكي 500 دولار بس وحكولك رح تسافري لمدة 3 اشهر والطيران فقط عحسابهم وما رح يكون معك مصروف غير هيك. هل رح تسافري ولا رح تعتذري وليش ؟
بسافر طبعا .. في طرق كتير للسفر والسكن بأقل التكاليف رغم اني ما طبقتها من قبل لكن ممكن أعملها عشان اعيش تجربة جديدة
8. اوصفيلنا هذه المواقف. اكله قلتي لا والله ما رح اوكلها، فعالية قلتي لا والله ما رح اجربها.
مرة كنت في ألمانيا وعزمتني بنت عمي على مطعم فاخر .. هي ألمانية وما بتعرف اذواقنا بالاكل نهائي لانه بعمرها ما اجت على بلادنا.. المهم انه عزومتها الفخمة طلعت طبق محار ... وتخيل وضعي انا والمحار وهواك . .. طبعا اكلت البطاطا المقلية
فعالية – رافضة اجرب الغوص مع أسماك القرش ههههه ومستحيل اجربها طبعا
9. اذا مكنتيش اليوم مترجمة، ايش كنتي بتحبي تكون وظيفتك ؟ (غير السفر)
مين قال انه وظيفتي السفر
بصراحة سؤالك صعب وانطرح علي كتير، وما عرفت اجابته. انا انسانة بيقتلني الروتين وبموت لو اضطريت كل يوم اروح نفس المكان واتعامل بنفس الموضوع .. لهيك شغلي الحالي –بفضل الله تعالى- هو الوضع المثالي بالنسبة لي.
بتوقع لو ما كنت مترجمة رح اشتغل في منظمة دولية أو إنسانية .. عندي اهتمام كبير بقضايا الاستدامة والتحديات العالمية متل التصحر وندرة المياه وغيرها.. ممكن اتجه لهيك أماكن ..
10. اقترحوا عليكي تكتبي كتاب عن احدى رحلاتك، عن اي بلد بتحبي تكتبي، ايش رح يكون العنوان، ومين رح تختاري من المنتدى يكتبلك المقدمة، ولمين رح تكتبي الاهداء ؟
رح اكتب عن أسوأ سفرة رحتها ... رحلتي إلى لاتفيا.. والعنوان حيكون "عندما اعتقدت انها النهاية"
المقدمة .. صعب اختار جد .. في كتير ناس أسلوبهم بالكتابة بيعجبني جدا .. يمكن اخلي الغردقاوي يكتب مقدمة كوميدية تخفف الدراما السوداء اللي في الكتاب هههه
والإهداء إلى والدتي الي عرفت قيمتها الحقيقية عندي لما حسيت اني رح اموت بدون ما اشوفها.
الله يسامحك خليتني ابكي
طبعا انا ما كنت رح اموت بس الوضع المأساوي والدراما اللي عشتها هناك حسستني بهالشي .. مع ان الشغلة كانت بسيطة وهم كبروها
11. في عضو بحب يقرأ التقارير في المنتدى وبعشق السفر، كل مره بنوي يكتب تقرير لكن الخوف مانعه. ايش رسالتك اله ؟
مقابل كل عضو مسافر وبيعيش تجارب السفر، في عشرات ومئات القراء المتعطشين لأي معلومة أو تجربة أو كلمة عن بلد معين.. تخيل لما كلامك يفيدهم، ولما واحد منهم يروح ويعيش تجربتك بناء على كلامك .. الدعوات اللي رح توصلك والأجر اللي رح ينكتبلك لما نويت تساعد الناس بدون مقابل ..
12. كعضوة فعالة بالمنتدى ومتمرسة بكتابة التقارير، احكيلنا كيف بتخططي لتقريرك وايش الخطوات الي بتقومي فيها من قبل ما تبدأي الكتابة لحد ما تنهيها ؟
أثناء السفر وفي كل خطوة او فعالية بعملها .. بترتسم في ذهني جملة رح اكتبها في المنتدى .. وكأني بشوف الصفحة قدامي وبكتبها بالألوان وبرفقها بالصورة اللي عم أشوفها، بالتالي برجع من السفر وفي عقلي مسودة للموضوع ! الخطوة الأولى والوحيدة هي تحميل الصور وتجهيزها، والباقي .. بمجرد ما ابدا الكتابة بينساب الكلام كله وبتطلع كل القصص .. وما بتبع أي خطوات او مخططات في هالحالة من بداي التقرير لآخره ..
13. حاليا في عشرات الزوار الي داخلين المنتدى بدون ما يسجلوا فيه او عشرات الاعضاء الغير فعالين نهائيا وعم بقرأوا رسالتك الهم. ايش بتحكيلهم ؟
سجلوا يا جماعة وتفاعلوا .. هالمنتدى كنز، والمحتوى العربي على الإنترنت – وتحديدا المحتوى الهادف- شحيح ونادر وبيحتاج لدعم.. كل كلمة بتكتبها رح تفيد شخص واحد على الأقل وكل موضوع بتعمله بيثري المحتوى العربي وبيدعم المنتدى اللي فعلا من أنجح المنصات العربية للسفر .. يلا تفضلوا معنا والله احنا جماعة كويسين هههه
14. ايش بكون شعورك اذا كتبتي تقرير ضخم وتعبتي عليه كثير لكن التفاعل فيه قليل، وبين لما تكتبي موضوع خفيف جدا مثل خبر لكن تلاقي التفاعل فيه كبير جدا ؟
أكيد رح يصيبني إحباط,,, المنتدى منصة تفاعلية ومش دفتر مذكرات تكتب فيه لنفسك .. أحياناً بعرف ان "ألجمهور" ما رح يتحمس لموضوع معين وبالتالي ما بكتبه من الأساس .. بينما رحلة عادية او كلام عادي الى وجهة محبوبة ممكن يجيب الاف الزيارات ..ساعتها رح أحاول اكتب الموضوع الصعب واعمل له "دعاية".. لانه تعب الكتابة والتقارير ما بيهون الا لما تشوف التفاعل والإقبال على موضوعك ..
بكفي هيك ؟
والله يعطيك العافية أسئلة مبتكرة ومتعوب عليها ... الله يسعدك
| توقيع : Deena | | "فاطر السماوات والأرض أنت وليي في الدنيا والآخرة توفّني مسلماً وألحقني بالصالحين"
| |
| |
13209الاعجاب
معلش ، وسامحني عالتأخير .. 
... 
ههههه 
كيف تعب الاشراف؟
.gif)
.gif "(2)")
.gif "(7)")
بعد السؤال هذا
العرض العادي
المواضيع المتشابهه 
