14-12-2016, 10:30 PM
|
#406 |
مشرف سابق
تاريخ التسجيل : Jan 2015 رقم العضوية : 1224 الدولة : فلسطين الجنس : ذكر المشاركات : 1,409
| أوسـمـة: مجدي |
كل الاوسمة:2 (more»)
| | 
 |
يا مرحبا يا مرحبا بالأخ مجدي المرابط بالأرض المباركه
أنت جيت يا رمضاااااااان 
بما انك جيت ونورت الكرسي فسأوجه لك كم سؤال على السريع حتى أجهزلك الباقي يا عزيزي
1) بما انك من هواة التصوير فكيف بدأت معك تلك الهوايه وكيف تحولت لمجال إحترافي ؟
2) كم لغة تجيد غير العربي طبعا ؟
3) هل الدراسه بمناطق الـ 48 في المراحل ما قبل الجامعي باللغة العربيه أم العبريه ؟
4) ما رأيك في زنجبار كإقليم سياحي هل يستحق عناء السفر أم هو متشابه مع أماكن أخرى أكثر جذبا ؟
5) هل تحب الفن الزنجباري ؟
6) أهديتني إسطوانه لفن زنجباري بلغة غير مفهومه فهل تستطيع ترجمة لغتهم ؟
7) ما تأثير إنتفاضات الأقصى الأولى والثانيه على فلسطينيوا الداخل ؟
8) الدكتور عزمي بشاره من الناصره فما رأيك به كمفكر سياسي ؟
9) ما إسم عائلة الدكتور عزمي بشاره ؟
10) هل اعطيت صوتك من قبل للدكتور عزمي بشاره ؟ ولماذا رغم وجود منافسين عرب له في الإنتخابات ؟
11) هل ذهبت لتل أبيب من قبل ومن هو أبيب اللي سموا التل على إسمه ؟
12) هل تحرص على ترتيب برامجك السياحيه قبل السفر أم تترك الأنشطه للظروف ؟
13) وأنت في طائرة العوده من رحلتك السياحيه صف لنا مشاعرك مقارنة بمشاعرك في رحلة الذهاب ؟
14) رأفت الهجان كان يمتلك وكلة سياحيه بتل أبيب فهل لو مازال عايش كنت ستحجز من خلال وكالته ؟
ولنا لقاء قريب آخر بإذن الله | | يا هلا بحبيبي الغردقاوي
طيب مش ترحم اخوك شوي من باب الجيرة عالاقل [emoji22]
استحملوني يمكن تكون اجوبتي طويلة شوي
1) بما انك من هواة التصوير فكيف بدأت معك تلك الهوايه وكيف تحولت لمجال إحترافي ؟
بالنسبة للتصوير كان عنا زمان كاميرا فيلم قديمة كنت انا مستلمها وعامل مصور عالعيلة، ولما ابوي يروح يحمض الفيلم يلاقي الصور يا ساتر زوايا بحياته ما توقعها ودايما اتبهدل. مع الوقت طلعت الكاميرات الديجيتال وكان اسعارها خيالية فما كان امكانية نشتري وحده منها، لكن شوي شوي اصبحت بكل جوال كاميرا بسيطة بتطور سنة بعد سنة، وكانت هاي الفترة الي حاولت فيها اطور من نفسي.
وهيك مرق الوقت لحد ما قربت اتزوج وحجزت اول رحلة عليها القيمة بحياتي، فقررت اني اشتري كاميرا احترافية وادرب نفسي بنفسي، فجلست يمكن 3 اشهر اقرا مقالات واحضر فيديوهات عاليوتيوب واجرب في البيت. وبعدها اتعرفت على مجموعة مصورين صرنا نطلع مع بعض جولات تصوير ونتعلم من بعض. هيك ممكن تقول اني اتقنت اساسيات التصوير والباقي بعتمد عالشخص نفسه ورؤيته الفنية.
2) كم لغة تجيد غير العربي طبعا ؟
طبعا العربي لغة الأم. اما اللغة الثانية الي بتقنها بصورة كاملة كاللغة الام تماما قراءة وكتابة ومحادثة فهي اللغة العبرية بحكم الدولة الي احنا ساكنين فيها. بما ان احنا نعتبر مواطنين مع الجنسية الكاملة فتعلم اللغة العبرية بمدارسنا اجباري. وكمان حياتنا اليومية خارج المدينة كلها بالعبري، من شغلنا لحد كل المؤسسات الحكومية. الشخص الي ما بتقن هاي اللغة مستحيل انه يتقدم بحياته، وما بقدر يمشي اموره الاساسية. فالبنك وصندوق المرضى والمستشفيات والشركات والمؤسسات الحكومية والجامعات كلها بتحتاج لغة عبرية بمستوى عالي.
اللغة الثالثة هي الانجليزية اكيد، قراءة وكتابة بشكل ممتاز، لكن المحادثة بستصعب بالحكي احيانا، لانه ما بمارسها الا قليل.
اما اللغة الرابعة فهي الفرنسية، خلال دراستي للماجستير كان اجباري ندرس لغة (ثالثة)، طبعا العربي تعتبر لغة الام والعبري شيء مفروغ منه، الانجليزي كانها لغة ثانية، وهيك اخترت الفرنسي، درستها لمدة سنتين ومعاي اجازة منها، لكن هذا الحكي كان من اكثر من 6 سنين، وبسبب عدم ممارستها نهائيا فاليوم بحس اني ما بتقنها.
وهناك لغات قديمة درستها في الجامعة خلال دراستي للبكالوريوس، مثل الارامية والاكادية، درست قواعدها النحوية اكثر من المعاني.
3) هل الدراسه بمناطق الـ 48 في المراحل ما قبل الجامعي باللغة العربيه أم العبريه ؟
مدارسنا الابتدائية والاعدادية باللغة العربية والكتب كمان، لكن مثل ما حكيت في دروس باللغة العبرية، وطبعا الانجليزية. اما المرحلة الثانوية اغلب الكتب بتكون بالعبري خصوصا الكتب العلمية لكن التدريس نفسه بكون بالعربي. وبشكل عام المنهج موضوع عن طريق وزارة التعليم الي هي اصلا جزء من الحكومة الاسرائيلية، فكثير من المواد ما بنتعلمها، مثلا تاريخ العالم العربي، مع انه بنتعلم تاريخ العالم الاسلامي القديم. كتب التاريخ اكثر عن اوروبا. ودروس الادب ممنوع تدخل فيها مواد مثل الشعر او الرواية او القصة الي بتخص القومية وخصوصا الي بتهاجم الدولة، مثلا شعر محمود درويش ممنوع.
بشكل عام ثقافتنا العربية والاسلامية بنوخذها من البيت ومن المجتمع، يعني اجتهاد ذاتي مش مؤسساتي
4) ما رأيك في زنجبار كإقليم سياحي هل يستحق عناء السفر أم هو متشابه مع أماكن أخرى أكثر جذبا ؟
بالنسبة لزنجبار فهي مشهورة جدا سياحيا على مستوى الدول الاوروبية، من افضل الوجهات بالنسبة للفرنسيين والايطاليين. بالنسبة الي بتستحق جدا عناء السفر. الي بميزها طبيعتها الخلابة، شواطئها الساحرة، ولون بحرها الصافي، والحياة البدائية البسيطة الافريقية. لكن مقومات السياحة مثل المواصلات العامة والمعالم فما في اهتمام فيها، لذلك هاي ممكن تكون سلبية كبيرة بالنسبة لبعض المسافرين، لكن بالنسبة الي اكبر متعة.
صعب تقارنها بدول ثانية، لانه طبيعتها شبيهة مثلا بالمالديف وسيشيل لكن البساطة والحياة الافريقية بتميزها عنهن.
5) هل تحب الفن الزنجباري ؟
الفن الزنجباري هو خليط بين الطرب العربي وبين الايقاع الافريقي. شخصيا جدا حبيته. لدرجة انه كان بسيارتي اسطوانة كاملة لاغاني زنجبارية كنت اسمعها يوميا قبل ما سفرت وبعد ما سافرت. انا بحب اعيش جو البلد الي بزوره وهيك بتعلق فيه.
6) أهديتني إسطوانه لفن زنجباري بلغة غير مفهومه فهل تستطيع ترجمة لغتهم ؟
ههه لا طبعا
انت ركز باللحن والايقاع وسيبك من الكلمات ههه
7) ما تأثير إنتفاضات الأقصى الأولى والثانيه على فلسطينيوا الداخل ؟
كفلسطينيين احنا جزء لا يتجزأ من القضية، لكن الفرق بينا وبين اخوتنا في الضفة وغزة والشتات، ان احنا موجودين داخل الدولة ومقيدين بقوانينها وحياتنا مربوطة فيها تماما، لذلك وضعنا جدا معقد في القضايا السياسية، فبأي فترة بكون فيها الوضع متوتر مثل الانتفاضات الاولى والثانية وهبة القدس الاخيرة وحتى في الحرائق الي صارت اخر شهر من اوائل الناس الي بيتم اتهامهم او وضعهم في الزاوية او مهاجمتهم همي احنا، حتى لو كان بسبب تصريح كلامي او تعاطف خفيف، فما بالك لما يصير في تضامن كبير واضرابات واحتجاجات وغيرها. فاتعودنا مثلا انه يحصل مضايقات بهاي الفترات بالشوارع او حتى تعرض كلامي وجسدي، او طرد من الوظايف، او مقاطعة مثلا ما يتعاملوا معنا تجاريا، واحيانا حتى القتل.
8) الدكتور عزمي بشاره من الناصره فما رأيك به كمفكر سياسي ؟
طبعا الي ما بعرف عزمي بشارة هو من عرب ال48، رئيس حزب عربي وكان عضو في الكنيست، قبل سنين ولما كان خارج البلاد انتشر خبر انه تقدم ضده بلاغ بالخيانه والتآمر مع العدو، وهذا بسبب اراؤه السياسية الواضحة والمباشرة ضد السياسة الاسرائيلية وغيره، فقرر انه ما يرجع عالبلاد من وقتها لانه كان شبه مؤكد انه رح يتم محاكمته وحبسه. فاستقر فترة في سوريا وبعدها انتقل لقطر.
انصحك تتابع الدكتور "احمد الطيبي" ايضا عضو في الكنيست عن حزب القائمة العربية المشتركة، شخص حكيم ذكي سياسي محنك ولاذع، ورح تعرف كثير عن حياتنا من خلاله.
9) ما إسم عائلة الدكتور عزمي بشاره ؟
الله يسعدك هههه
10) هل اعطيت صوتك من قبل للدكتور عزمي بشاره ؟ ولماذا رغم وجود منافسين عرب له في الإنتخابات ؟
لما كان هو في الكنيست انا كنت تحت السن القانونية للانتخاب [emoji5] بعدي صغيييير
11) هل ذهبت لتل أبيب من قبل ومن هو أبيب اللي سموا التل على إسمه ؟
يا رجل ارحمنا شو سيرتك [emoji1] أبيب هو ابن عم ابو حسين
لا عنجد "تل أبيب" بالعبري يعني "تل الربيع" وهو اسم المنطقة بالعربي قديما، لكن تم ترجمته للعبري مثل ما تم تحويل اسماء كثير من المدن والقرى العربية القديمة.
اما بالنسبة للشق الاول من سؤالك فأكيد، لانها تعتبر المركز الي فيها اغلب الشركات والمؤسسات الحكومية وغيرها، وكمان درست في جامعتها وسكنت حوالي 6 سنين في سكن الطلاب، وشغلي في شركة موجوده فيها. مثل طوكيو في اليابان هيك اشي. وعلى فكرة يافا حاليا هي جزء من تل ابيب يعني بتقدر تقول انها مثل حي فتسمى مدينة "تل أبيب-يافا".
12) هل تحرص على ترتيب برامجك السياحيه قبل السفر أم تترك الأنشطه للظروف ؟
لازم ترتيب وتخطيط مسبق اكيد، ما بترك اي شيء للحظ، بحب تكون خطواتي مدروسة وبرنامجي واضح ومعروف من قبل، هيك بشعر بفرحة الانجاز، لكن طبعا لو حصل اي تغيير اضطراري سواء اضافة للبرنامج او حذف منه فما عندي مشكلة.
13) وأنت في طائرة العوده من رحلتك السياحيه صف لنا مشاعرك مقارنة بمشاعرك في رحلة الذهاب ؟
وقت سفري للبلد الي بدي ازوره بكون بقمة الشغف والشوق والاثارة، لاني بكون صرت دارس البلد وعارف كثير امور عنه وحتى حافظ جزء من الخوارط خصوصا للمعالم الي حابب ازورها، لهيك بتكون النار داخلي مشتعله، وحابب استكشف كل شارع. برحلة العودة طبعا لابد من غصة الفراق، لكن بكون جدا مرتاح ومبسوط اني انجزت مخططي بنجاح وحققت الي كنت ناوي اعمله، وبفحص كل صورة وصورة صورتها بكاميرتي بتمعن وفرحة.
14) رأفت الهجان كان يمتلك وكلة سياحيه بتل أبيب فهل لو مازال عايش كنت ستحجز من خلال وكالته ؟
قلتلي رأفت الهجان ؟ [emoji2] معها حق دينا انها اختارتك تكتب مقدمة كتابها. كنت بعطيه بخشيش كمان
كل هذه الاسئلة وبدك ترجع
خذ اجازة ابوس اجرك
sent from Galaxy Note 5 using Tabatalk |
| |
13209الاعجاب
مشرفنا القدير
.gif)
ليش انت رحمت دينا لما غرقتها بوابل من الاسئله الصعبه 
هههههههههه
العرض العادي
المواضيع المتشابهه 
