☆★ كرسي الاعتراف ★☆

مجدي · 15-12-2016, 08:29 PM

اقتباس : المشاركة الأصلية كتبت بواسطة فهد المنيع

يا هلا بالمبدع مجدي
تفضل يا حلو .. وتحملنا

- جوازك وجنسيتك لتلك الدولة هل يسبب لك مشاكل عند السفر ، يعني نظرة استغراب او استنكار او كره . وكيف شعورك وانت عربي مسلم مالك علاقة بالجنسية ؟
- من خلال تقاريرك تهتم بادق التفاصيل وهذا يحتاج وقت وجهد في السفر ، هالشي ما يضايق زوجتك ؟ وكيف توفق بين الامرين ؟
- في التصوير هل انت من النوع اللي يحب يقتني افضل الكميرات والعدسات ويعرف تقنياتها او من النوع اللي يهتم بالتصوير نفسه والاخراج الجميل ؟
- ذكرت انك ما تقدر تزور الدول العربية بسبب جوازك ، هل جيت للحج او العمرة قبل كذا وكيف للي مثل حالتك يحج ؟
- الفلسطينيين في الضفة وغزة كيف ينظرون لكم يا عرب 48 ؟
- ماهي وجهة نظرك تجاه المبادرة العربية ؟
- بحكم تميزك في التقارير السياحية وش تنصح اللي حاب يكتب تقرير مميز ؟
- هل كثرة التصوير في السفر وتوثيق التفاصيل قللت من استمتاعك الفعلي بالاشياء ، او التصوير جزء من المتعة ؟
- رحلتك الاخيرة للصين كان معك زوجتك واخواتها .. هل شلت همهم واثر هالشي على استمتاعك بالرحلة ، او كانت تجربة جميلة ؟ ----> انتبه لايشوفون الموضوع
- صفة فيك تتمنى تتخلص منها في السفر ؟ وصفه تتمنى تكتسبها ؟
- لو كنت في سفره ومرتب جدولك اليومي بالملي وصارت لك مشاكل غيرت ترتيب الرحلات واضطريت تصف في طابور طويل لمدة ساعتين ووصلت لمرحلة من التعب النفسي والجسدي ولما وصلت شباك التكت حصلت الغردقاوي موظف التذاكر يقول لك التذاكر انتهت توكل على الله .. وش بتسوي له ؟

- وش بعد اممممممم خلاص يكفي وتقبل محبتي وتقديري

هلا بأخوي الفنان فهد
اذا ما رح أتحملك رح أتحمل مين يعني
عالراس وغالي

- جوازك وجنسيتك لتلك الدولة هل يسبب لك مشاكل عند السفر ، يعني نظرة استغراب او استنكار او كره . وكيف شعورك وانت عربي مسلم مالك علاقة بالجنسية ؟

حصلي أكثر من موقف لكن أصعبها كان أثناء رحلة العودة من سريلانكا، كانت تذكرتي بتضمن ترانزيت في مطار دبي.

قبل ما أدخل بالحكاية حبيت أقول ان أغلب الي حاملين الجواز الاسرائيلي بتجنبوا الترانزيت في مطارات الدول العربية تجنبا للمشاكل، لأنه في احتمال يتم توقيف الشخص واستجوابه، وحصل مرة قبل هيك انه تم منع الطيارة من الهبوط في المطار وتغيير مسارها اضطراريا لدولة مجاورة بتقيم علاقات دبلوماسية مع اسرائيل بسبب انه أحد الركاب معه جواز اسرائيلي.

لكن المشكلة انه أغلب اليهود الي ساكنين اسرائيل معهم جنسيتين وبحملوا جوازين على الأقل، مثل ما انتم عارفين أصولهم أوروبية، لذلك بستعملوا جوازهم الأجنبي في رحلاتهم ومش الجواز الاسرائيلي، وعلى فكرة بنزلوا في المطارات وبدخلوا الدول العربية والاسلامية عادي جدا بدون ما حدا يعرفلهم او يستجوبهم، هذه المعلومة يمكن كثير من اخوتنا العرب ما بعرفوها.

أما المشكلة انه الفلسطينيين الي معهم هذا الجواز مثلي، ما معنا جواز غيره نهائيا، حتى ما معنا الجواز الفلسطيني الي بتعطيه السلطة الفلسطينية لسكان الضفة وغزة، لأنه احنا لا نعتبر مواطنين ضمن الحدود الي واقعه تحت نفوذ السلطة الفلسطينية، انما مواطنين داخل الحدود الي حاكمتها اسرائيل. لذلك وضعنا جدا صعب، ما بنقدر ندخل الدول العربية وبعض الدول الاسلامية نهائيا، إلا باستلام دعوة من مواطن أو مؤسسة موجودة في هذه الدولة وبطلب خاص انه ما يتم ختم جوازنا، لأنه في حال تم ختم الجواز من دولة عربية رح يتم توقيفنا فورا بعد ما نعود وندخل اسرائيل واحتمال كبير يتم اتهامنا بالخيانة والتخابر مع العدو. حالات قليلة بيتم فيها السماح النا ندخل الدول العربية بشرط نقدم طلب لوزارة الخارجية، ويكون سبب الزيارة رسمي، يعني مشاركة في حدث رياضي\فني الخ.. والدولة العربية طبعا بتشترط انه يكون معنا جواز فلسطيني، فبيتم التنسيق مع السلطة الفلسطينية انها تعطينا جواز فلسطيني مؤقت.

لكني حبيت أخاطر لأنه كان نفسي أزور دولة عربية مثل الامارات، حتى لو كان المطار بس، ولما سمحتلي الفرصة رغم اني ترددت كثير، لكن اتوكلت على الله وحجزت ترانزيت في دبي.

أما بالنسبة للموقف الي صار معنا في مطار دبي، بعد ما دخلت المطار رحت لشباك الخطوط الملكية الأردنية علشان استلم تذاكر الطيران للأردن وتذاكر الطيران من الأردن لاسرائيل، كان في شباكين، شباك واحد للسياح وقدامه طابور كبير، وشباك صغير على جنب للعمالة الوافدة إلى اسرائيل وقدام الطابور ثلاث أو اربع أشخاص عالاغلب من شكلهم فلبينيين. انا وزوجتي طبعا مثل الناس المحترمين وقفنا في طابور السياح. ولما أجا دورنا بعد كثير وقت ابتسمت للموظف وأعطيته جوازاتنا، فجأة بدون مقدمات عبس وجهه واطلع علي وأشرلي باصبعه بعصبية إني أروح لشباك العمالة الوافدة، طبعا وقتها كنت مصدوم وما حكيت اشي، رحنا بسرعة للشباك الثاني، وقتها كان الطابور فاضي، فدخلنا مباشرة وأعطيت الموظفة جوازاتنا، لكن هالمرة حكيتلها قبل ما أعطيها الجوازات "السلام عليكم"، حكتلي وعليكم السلام فأعطيتها جوازاتنا، فجأة بتقلي "عربي ؟" باستغراب ووجهها عابس فيه دهشة، حكيتلها طبعا، سألتني "بتعرف (تحكي) عربي؟"، قلتها آه فلسطيني وانا عم ببتسم لعل الأمور تنحل بسلام، بعدها أخذت تفحص بأسامينا وتحكيلي "مجدي" و "اسم زوجتي"، بعدها هيك اخذت دقيقتين وهي تستوعب الموضوع، فقالتلي "هاي أول مرة بمسك جواز اسرائيلي"، قلتلها الاسرائيليين ما بستعملوا الجواز الاسرائيلي بستعملوا جوازهم الأجنبي لأنه معهم جنسيتين، فهيك ابتسمت وشكلها اتأكدت من لهجتي اني فلسطيني، فبلشت تفحص بالكمبيوتر والدقايق بتمر. بعد وقت طويل أجا موظف ثاني وقف وراها وهو بطلع بالجوازات، فجأة سألها "اسرائيليين؟!"، حكتله لا فلسطينيين، وهو عابس ووجهة غضبان صفن فيي ثواني طويلة وبعدها راح بدون ما يحكي. المهم بقينا قدام الشباك مش أقل من نص ساعة واحنا واقفين، لغاية ما اعطتنا الموظفة تذاكر الطيران للأردن بس، سألتها ليش ما اعطتنا تذاكر الطيران من الأردن لاسرائيل، حكتلي ما بتعرف وهذه أول مرة ما بتطلع معها كل التذاكر، حكتلي آخذهم من مطار عمان.

المهم خلصنا من الشباك ودخلنا صالة الانتظار، زوجتي دخلت الحمام وأنا وقفت في وسط الصالة بستنى فيها، فجأة بدون مقدمات أجا لعندي شخص لهجته مصرية بسألني وين ممكن يدخن سيجارة، طبعا انا ما عندي فكرة وحسيت انه الموضوع مش طبيعي، يعني من بين مئات البشر الموجودين ما لقي شخص ثاني يسأله، أطلعت عاللافتات المعلقة، شفت وحدة مع رسمة سيجارة، قلتله اكيد في هناك محل للتدخين مع انه بتقدر تدخنها بالحمام عادي ما حدا شايفك وصرت اضحك، فجأة أخذ نفسه وراح، لكن العجيب انه راح بالإتجاه المعاكس، فهذا أكدلي انه وكما يبدو أمن المطار بعثوه علشان يتأكدوا من هويتي.

هذا أصعب موقف وفي نفس الوقت أطرف موقف حصلي

- من خلال تقاريرك تهتم بادق التفاصيل وهذا يحتاج وقت وجهد في السفر ، هالشي ما يضايق زوجتك ؟ وكيف توفق بين الامرين ؟

صراحة بالعكس، هي كثير مرتاحه من الموضوع، ما بتتعب نفسها أبدا، كل شيء جاهز ومرتب، بعد ما نوصل البلد بتحول بالنسبة إلها لمرشد سياحي هههه.

- في التصوير هل انت من النوع اللي يحب يقتني افضل الكميرات والعدسات ويعرف تقنياتها او من النوع اللي يهتم بالتصوير نفسه والاخراج الجميل ؟

من ناحية بحب فأنا بحب جدا، لكن في نفس الوقت ما بحب أصرف على الأدوات إلا الي محتاجها بشكل كبير. يعني ما عندي حاليا غير كاميرا وعدسة وحدة بس. المشكلة انه أدوات التصوير غالية جدا، وبالنهاية أهم شيء زاوية التصوير وتقنيات التصوير ومش الكاميرا والعدسة.

- ذكرت انك ما تقدر تزور الدول العربية بسبب جوازك ، هل جيت للحج او العمرة قبل كذا وكيف للي مثل حالتك يحج ؟

سؤال ممتاز
الدول العربية الوحيدة الي مسموح نزورها هي الأردن (زرتها) ومصر (كان نفسي أزورها لكن الوضع الحالي ما بشجع) بحكم اتفاقيات السلام الي وقعتها. بالاضافة للمغرب وما بعرف السبب صراحة. والسعودية فقط للحج والعمرة.

بالنسبة للسعودية علشان نزورها لازم نقدم طلب رسمي للجنة الحج والعمرة الي موجودة عنا والمختصة بتنظيم هذه الرحلات. واللجنة بتقوم باختيار أقصى عدد مسموح فيه خصوصا في موسم الحج، أما العمرة فأغلب الطلبات ممكن يتم قبولها. وهيك بيتم اختيار الأشخاص، وبعدها اللجنة بتقدم الأسماء للوزارة في الأردن، والأردن بتقوم بتجهيز جوازات سفر مؤقتة خاصة بالحجاج والمعتمرين، وباستخدام هذه الجوازات فقط بيتم السماح النا بدخول السعودية. المشكلة انه كل هذه الإجراءات بترفع من التكاليف بشكل خيالي. فهذه الرحلات بتكون محددة بعدد أيام معين وقليل، أعتقد الحج بحدود الأسبوعين أو ثلاث أسابيع، أما العمرة على ما أظن عشر أيام، المهم تكاليف الحج ممكن توصل ما بين 10 الاف إلى 15 ألف ريال (حسب اختيار المسافر اذا كان برا أو جوا)، أما العمرة بحدود الـ 5 الاف، هذه طبعا تكاليف السفر والفنادق بس.

بالنسبة للحج أعداد الي بيتم قبولهم سنويا قليل جدا مقارنة بعدد الطلبات، واللجنة بتقوم باعطاء حق الأولوية للي أعمارهم كبيرة أو الي وضعهم الصحي صعب أو الي هذه رحلة الحج الأولى بالنسبة إلهم. ومثل ما فهمتوا أغلب الناس بالنسبة الهم هذه التكاليف شبه مستحيلة خصوصا اذا أضفنا المُحرم المرافق. فكثير من الناس بتقضي عمرها وهي تجمع المبلغ، وكثير جدا من الناس بيتم رفض طلبها سنة بعد سنة، ولهيك الناس الي بيتم الموافقة على طلبها بتكون فرحتهم رهيبة وكأنه عرس، والأقارب والمعارف والجيران بروحوا يهنوهم ويودعوهم.

الحمد لله والدي ووالدتي أتوفقوا وقدروا يتمموا مناسك الحج بسلام، وأنا ان شاء الله حاطط ببالي أعتمر مع زوجتي قريبا، لأنه قبولنا للحج بعمرنا الصغير مستحيل. وهذه فرصة نقابل الوجوه الطيبة مثل حضرتك.

- الفلسطينيين في الضفة وغزة كيف ينظرون لكم يا عرب 48 ؟

صراحة سؤالك مميز عجيب ويمكن الجواب يكون أعجب

الموضوع جدا معقد وفيه تناقض كبير، طبعا على المستوى العام كلنا في نفس الطبق، لنا ما لهم وعلينا ما عليهم. لكن على المستوى الشخصي الشعبي داخل النفوس النظرات مثل ما حكيت فيها تناقض غريب، مثل تعقيد القضية الفلسطينية كلها.

المسألة بتتعلق بالشعور النفسي وبالمقدرة المادية. ذكرت سابقا انه الشعب الفلسطيني حاليا مقسم إلى خمس أقسام : فلسطينيو الشتات خارج العالم العربي في أوروبا وأمريكا وغيرها، فلسطينيو الشتات داخل الوطن العربي مثل الأردن وسوريا ولبنان وغيرها، فلسطينيو الداخل أو عرب الـ48 الي أنا منهم، فلسطينيو الضفة الغربية، وفلسطينيو قطاع غزة.

مثلا :

الفلسطيني بغزة الأكثر فقرا بسبب الحصار، بتمنى يكون من فلسطينيي الضفة أو من الشتات في الدول العربية لأنهم عندهم اقتصادهم وتجارتهم حتى لو كانت ضعيفة، أما الفلسطيني بالضفة بتمنى يكون مثل إلي بالـ48 لأنا من الناحية المادية مقتدرين أكثر بسبب فرص العمل الي متوفرة عنا داخل الشركات الاسرائيلية وامكانيات التجارة المفتوحة، أما احنا بنقول يا ريت لو كنا من فلسطينيي الشتات في النرويج ولا في السويد، كان وضعنا المادي أفضل بكثير.

وأيضا من الناحية النفسية الفلسطيني بغزة مقهور مهان محاصر، بتمنى يحصل على الحرية مثل الفلسطيني في الضفة رغم انها حرية منقوصة، اما الي في الضفة بتمنى يكون حر مثل الفلسطيني الي في الـ48 لأنه جواز سفرنا أقوى رغم انا واقعين مباشرة تحت جبروت السلطة الاسرائيلية، لكن احنا بنتمنى لو نكون من فلسطينيي الضفة أو الشتات لأنه جوازنا ما بسمحلنا نزور الدول العربية وأيضا مقيدين بالقوانين الاسرائيلية المباشرة، وحياتنا كلها مرهونة فيهم.

طيب الآن العكس خليك تفهم التناقض. الفلسطيني بالشتات بتمنى يكون في الـ48 علشان يكون في أرضه ويقاوم من الداخل، أما احنا بنتمنى نكون في الضفة علشان نكون حرين في آراءنا ونشعر انا داخل دولة مؤسساتها فلسطينية، شركاتها فلسطينية، شوارعها فلسطينية، منهاجها فلسطيني، كل الشعب فلسطيني بحكي عربي، أما الي في الضفة بتمنوا يكونوا من سكان غزة علشان يساعدوهم يقاوموا ويقهروا الحصار.

وفي النهاية هاي مجرد نظرات ومشاعر داخلية نفسية ما بتشعر فيها أثناء التعامل، كلنا بندعم بعضنا معنويا واقتصاديا، دعم من الشتات ومنا لاخوتنا في الضفة، اما الأخوة في غزة فلا سبيل إليهم إلا بالدعاء والمعونات المحدودة الي بتسمحلنا اسرائيل نمررلهم اياها. وما ننسى انه بتجمعنا علاقات قرابة، يعني كثير من بناتنا متزوجات بالضفة وغزة، وكثير من بناتهم متزوجات عندنا، وأصلا وقبل هيك، كثير من أقاربنا إلي كانوا ساكنين في القرى والمدن الموجودة حاليا داخل حدود اسرائيل هاجروا أثناء النكبة والنكسة للضفة وغزة والشتات، يعني شبكة كبيرة صعب تفككها.

ضيعتك أكيد

- ماهي وجهة نظرك تجاه المبادرة العربية ؟

واقعيا كثير من الدول العربية والاسلامية أقامت علاقات دبلوماسية سرية مع اسرائيل، وبين الفترة والثانية بيتم انتشار خبر أو صورة وبيتم اسكات القضية بسبب حساسيتها. في العلن الدول العربية الوحيدة الي بتقيم علاقات مثل ما هو معروف هي مصر والأردن بسبب اتفاقيات السلام.

بالنهاية في الوقت الراهن وعلى المدى المنظور أمامنا حلين : يا إما إقامة دولة فلسطينية بجوار دولة اسرائيل، أو ضم الضفة وغزة لاسرائيل واعلانها دولة واحدة ووقتها رح تكون الأغلبية الديموغرافية (عدد السكان) هي فلسطينية فهذا الحل اسرائيل رافضته نهائيا وبتحاول تهرب منه رغم ضغط الدول عليها، لأنه مستحيل يقبلوا انه عدد الفلسطينيين داخل الدولة يكون أكبر من عدد اليهود.

المشكلة في المبادرة العربية إنها مبادرة ممتازة لكن بدون دعم وسند قوي، يعني مثل ما بنقول بالشعبي (بدون ظهر)، لأنه طالما اسرائيل ما في أمامها دول عربية قادرة على تخويفها اقتصاديا أو سياسيا أو عسكريا ما رح تقبل بأي حل بينعرض عليها. عمرك شفت واحد قوي أتنازل لواحد ضعيف ؟

عندك مثال ايران، استطاعت تطويع وكسر شوكة كل دول الغرب وخصوصا أمريكا، فقط بالترهيب والتخويف وفرد العضلات سواء الاقتصادية أو العسكرية، فقط بالكلام مش أكثر. فإذا ضلت الدول العربية عامله نفسها محترمة مؤدبة دبلوماسية ما حدا رح يعيرها اعتبار نهائيا، والواقع كلنا شايفينه للأسف. القوي بفرض احترامه على الجميع هذا قانون العالم. والدول العربية امكانياتها ضخمة لا تقارن بأي دولة أخرى، لكن للأسف ضعيفة معنويا ومشتتة.

- بحكم تميزك في التقارير السياحية وش تنصح اللي حاب يكتب تقرير مميز ؟

انصحه أولا يرتب أفكاره وملفاته
ثانيا يكون عنده صبر لأنه كتابة التقرير بتحتاج تأني
ثالثا الاستمرارية وعدم اليأس

- هل كثرة التصوير في السفر وتوثيق التفاصيل قللت من استمتاعك الفعلي بالاشياء ، او التصوير جزء من المتعة ؟

نهائيا، بل على العكس، جزء كبير من فرحتي وسعادتي بتكون من خلال عين الكاميرا، كثير أحيان بوقف قدام منظر معين دقايق طويلة علشان أختار زاوية وإعدادات التصوير، فالصورة بتنطبع في مخيلتي لفترات طويلة حتى بعد ما أرجع من الرحلة.

- رحلتك الاخيرة للصين كان معك زوجتك واخواتها .. هل شلت همهم واثر هالشي على استمتاعك بالرحلة ، او كانت تجربة جميلة ؟ ----> انتبه لايشوفون الموضوع

شلت همهم كثييييييير، وأثر على استمتاعي أحيانا، لكن اذا بتحب تعرف التفاصيل فانت مجبور اتابع التقرير لأني ما بدي أحرق الأحداث ههههه
فعلا الله يستر ما يشوفوا شو كتبت

- صفة فيك تتمنى تتخلص منها في السفر ؟ وصفه تتمنى تكتسبها ؟

ما بتمنى اني اتخلص منها، لكن حابب أجرب الشعور لما أسافر بدون تخطيط وترتيب مسبق، مش عارف ليش الإشي مخوفني.

صفة بتمنى اكتسبها ؟ هي مش صفة انما بتمنى لو اقدر آكل من الأكلات الشعبية في الدول الي بزورها، الأكل بالنسبة إلي مشكلة.

- لو كنت في سفره ومرتب جدولك اليومي بالملي وصارت لك مشاكل غيرت ترتيب الرحلات واضطريت تصف في طابور طويل لمدة ساعتين ووصلت لمرحلة من التعب النفسي والجسدي ولما وصلت شباك التكت حصلت الغردقاوي موظف التذاكر يقول لك التذاكر انتهت توكل على الله .. وش بتسوي له ؟

لا حول ولا قوة إلا بالله
الغردقاوي لاحقني حتى لهون ؟
ابتعدي عني أيتها اللعنة الفرعونية هههه

أسئلتك صديقي في الصميم
شخص مثقف محترم اتشرف بمعرفتك
استمتعت بكل جواب فسامحني عالإطالة

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
☆ أجمل عشرة مناطق للتسوق في طوكيو ☆	السفيرة ب	بوابة اليابان	28	24-06-2019 08:13 AM
☆ أجمل 10 أماكن يمكنك زيارتها في اليونان ☆	السفيرة ب	بوابة اليونان	22	31-12-2017 09:38 PM
☆ أفضل مناطق الجذب السياحي في النرويج ☆	السفيرة ب	بوابة اسكندنافيا	18	27-06-2017 04:10 PM
★ جزيرة رودوس في اليونان ★	السفيرة ب	بوابة اليونان	22	15-02-2016 01:43 AM
☆ صور بيوت اليونان القديمة ☆	السفيرة ب	بوابة اليونان	14	10-08-2015 03:01 AM