☆★ كرسي الاعتراف ★☆

ناصر الخميساني · 21-01-2017, 07:26 AM

اقتباس : المشاركة الأصلية كتبت بواسطة آخـــرفـــرصـــة

اختيار موفق يا أبرار
ياهلا و مرحبا بـ ناصر ابن عمان الغالي

هلا وغلا حبيبي
أتشرف والله لكن شوي كثرت علي بالاسئلة ههههههههههههههههههههههه
فالك طيب نجاوب مب مشكلة

،

يسرك حالي، بنعمة ولله الحمد، طمنا عليك؟!

،

القهوة عشق، بس اميل دايماً للقهوة التركية
اذا مب موجودة اشرب القهوة العربية

،

كنت أبحث عن دولة، وعندي قايمة بمجموعة دول غير مألوفة
لكن الدول الاخرى ما حبيت اغامر ف وقت يمكن ما يكون مناسب لها لتغطيتها
فوقع الاختيار على هذي الدولة،

،

وجهاتي اختارها اول شي بزخم الاشارات السياحية فيها
وغير ألفتها، واختيار الوقت المناسب لزياررتها

عادة الترتيبات تكون قبل شهرين واكثر
عشان يكون عندي إلمام بالدولة أقل شي 75%
امشي على خطة بالتواريخ والوقت
عشان اغطي اكبر عدد من المعالم السياحية ونقدر نسوي فيديو جميل

،

هههههههههههههههههههههه
لا والله ما حاولت رغم انه كان يعني خاطري ادخل بالاعلام
لكن بعدين هونت واشتغلت بمجال البترول ومرتاح

اما الصوت ترا مستغلنه ف الانتاج الصوتي
خواطر وإلقاء واناشيد وتقارير إلخ

،

ههههههههههههههههههههههه
ان شاء الله ولا يهمكم، بإذن الله احاول ارتب لكم شي
لعيونكم بس

،

- رحلة شباب قروب الواتس اب لتركيا -
طبعاً هذي الرحلة كانت لشباب ما نتعارف ابداً
جمعنا واحد م الاحباب وعددهم 40 شخص من اماكن مختلفة
لكن اللي ف الرحلة كانو 6 اشخاص بسبب الظروف اعتذرو البقية

المهم

كانت الرحلة ع القطرية
وبطبيعة الحال راح تنزل ترانزيت لقطر
مدة الترانزيت كانت ساعة
طلعنا متاخرين م دبي، ووصلنا قطر وعاد ما باقي إلا نص ساعة
كنت حاط البوردنق باس (2 وحدة مال دبي - قطر والثانية مال قطر- اسطنبول)
كنت حاطنها ف جيب الكرسي اللي قدامي
ومن السرعة سحبتهن ع السريع وتحركنا
والبوابة كانت بعيدة
لما وصلنا وانا اشيك ع البوردنق تفاجأت ان جوازي مب موجود
وين يا ترى؟!

تذكرت اني كنت حاطنه ويا البوردنق وشكله طاح ف الطيارة
وشو الحل؟!

ناصر: شباب روحو، انا بدبر اموري مب مشكلة
محمد: شو تدبر امورك؟! ما يستوي كيف بترجع، اندوك هذيلا ارقام قطريين تواصل معاهم عشان ترجع البلاد عقب ما تحصل الجواز
ناصر: تطمن محمد ما بيصير الا الخير
محمد: (وف عينه دمعة) ياخي بننتظر بعدنا شوي الين ما يلقون الجواز ف الطيارة واييبونه
ناصر: روحو انتو توكلو على الله، واذا لقيته ترا بيي واذا ما استوى ترا برجع البلاد
ابراهيم: دير بالك ع نفسك
ناصر: ما توصي الامور طيبة لا تحاتي

قعدت انتظر ف الانتظار وباقي ع الطيارة 5 دقايق ع الاقلاع طبعاً بندو البوابة
وفجأة >>>>>> تخيلو صوت رعد وبرق ما ادري شو السالفة بس جيه اكشن

وصل جوازي ووقفو الطيارة وفتحو البوابة عشان الشيخ ناصر اللي مغيب جوازه يركب حضرته

المهم
وانا أمشي وجيه احس انه فيه ايقاع مال افلام الاكشن قبل لا يستوي الاكشن
ويوم دخلت الطايرة
ووصلت عند الجماعة والا اشوف محمد ينقز من مكانه وايي يحضني
والشعب صريخ هههههههههههه >>> فلم هندي والله قلبته

طبعاً شنطتي نزلوها كانو م الطايرة ع اساس ما بسير
فقالو لي ف البوابة ان بتوصل بالباجر عندكم وانتو اول ما توصلون اسطنبول
روحو ع المكتب وسجلو تقرير وكتبو اسم الفندق عشان اييبولكم اياها

اهم شي انا رحت ويا الشباب الحمد لله
وطبعاً بت هذيج الليلة بدون شنطة ما بدلت
والصبح لقيت شنطتي ف الاستقبال ...

صح ما خبرتكم محمد يصير امير الرحلة وهو اللي مجمعنا ع الواتس

هالموقف درس تعلمته وما انساه

،

الين الحين اعتبر البوسنة أفضل مكان رحت له

،

عادة ف السفر أعمل تحدي
وتكون سفرة اقتصادية >>>> الهدايا اول سفرة سويتها وندمت عليها
احسب مبالغ مقدرة واشل مبلغ على اساسه
ولكن عندي احتياطي ف الفيزا

لكن الحمد لله اغلب شي كان مثل ما مخطط
واخر رحلة كان بالضبط حسب ما خططت له
كل شي مشت الامور مثل ما هي من كل النواحي
الحمد لله
اتعمد ف رحلاتي ع السفرات الاقتصادية
خاصة ف الفنادق والاكل

،

مع الاصدقاء، منها نسولف ونضحك مع بعض
ونتشال بالمصاريف >>>>>> يعني نقسم المصروفات بيننا تقسيماً هههههه

وافكر ان يكون الرحلات القادمة مع أشخاص جدد للتعرف ايضاً على بعض
والتشارك مع خبرات كل واحد

،

لا اميل للرحلات البرية بشكل كبير
رغم ان عندي عدة الرحلات البرية كلها
ورغم ان العايلة الكريمة كلهم رعاة بر وعزب
بس انا غير ما ادري هههههههههههههههه

،

آخر زيارة لي كانت لصلالة كانت في سنة 2002
مع ان كنت سنوياً اسيرها
ما صار فرصة اني ازورها من بعد ذاك الوقت
لذلك ما في تقارير عنها حالياً لاني بديت التصوير ف 2012

لكن حسب ما ذكرت ان عندي مشروع قادم للسلطنة
راح يكون من ضمنها صلالة وما حولها ان شاء الله

،

الله يسامحني
كنت من عشاق شي اسمه منتدى
حتى كان عندي منتدى اسمه واحة البريمي كنت اديره
بس بعدين صارت عندي أشغال كثيرة وابتعدت عن المنتديات
لذلك قليلة مشاركاتي

لكن ان شاء الله راح نجتهد ونحاول نتابع وياكم الجديد
حسب الوقت المتوفر

حقك علي الحبيب ولا تزعل ان شاء الله ابشر باللي يسرك

،

انا ايضاً مبتدئ ف هذا العالم
ربما تقاريري كبرتني وخلتني موسوعة سفر عند البعض
ولكن لا زلت ف البدايات ولا أفقه الكثير ف هذا العالم

،

كلمتي هي وحدة
اعطي انطباع جميل عن "العرب" ف اي مكان تروحه

احزنني كلام كثير اسمعه عن العرب ف بعض الدول
وهذا ما يسر

نحن نريد نستمتع ونستانس
لكن ف نفس الوقت، نقدر قيمة البلد اللي رايحينه
لانه احنا ما ف بلدنا علشان نقدر نسوي كل اللي يمر ف مزاجنا وخواطرنا
التعامل والنظافة والاسلوب والالتزام وغيره
أشياء المفترض تكون من اخلاق المسافر اياً كانت جنسيته ووضعه

وبس

......

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
☆ أجمل عشرة مناطق للتسوق في طوكيو ☆	السفيرة ب	بوابة اليابان	28	24-06-2019 08:13 AM
☆ أجمل 10 أماكن يمكنك زيارتها في اليونان ☆	السفيرة ب	بوابة اليونان	22	31-12-2017 09:38 PM
☆ أفضل مناطق الجذب السياحي في النرويج ☆	السفيرة ب	بوابة اسكندنافيا	18	27-06-2017 04:10 PM
★ جزيرة رودوس في اليونان ★	السفيرة ب	بوابة اليونان	22	15-02-2016 01:43 AM
☆ صور بيوت اليونان القديمة ☆	السفيرة ب	بوابة اليونان	14	10-08-2015 03:01 AM