..:: تقرير برائحة القهوة البيضاء الماليزية ::..

Fahd · 26-01-2017, 08:16 PM

اختي الكريمة ام جسومي .. كما ذكرت لك هذا التقرير من أوائل التقارير اللي كنت مخطط اقراها لسبب رئيسي وهو الحرص والترتيب اللي كان واضح منك قبل السفر والسؤال عن الكثير من الأمور اللي ما شالله خلتك خبيرة وهي على ما تقولين أول سفرة لك .. مافعلتيه هو ما أعتقده شخصيا نهج المسافر المثالي أو الذكي بشكل أحرى ..

أشكر لك حرصك على إفادة إخوانك وأخواتك والله يجعل ما كتبتي في ميزان حسناتك .. الكثير من التفاصيل اللي ذكرتيها أعتقد تعتبر مرجع للأمهات خصوصا .. استمعت بقراءة التقرير من الجوال على مدى أيام وبدون مبالغة استفدت منه في العديد من النقاط اللي ذكرتيها .. كل يوم اقرى جزء واسجل بعض الملاحظات في النوت ..

# ماشالله بالنسبه لتوقيتكم خارج الموسم ممتاز في الحصول على عروض مميزه خصوصا على التذاكر وهذا اللي دايم انصح فيه الناس غير المرتبطه بالمدارس تحديد راح يلقون اسعار مميزه اذا حجزو في غير اوقات المواسم ..
# اختيارك لمكان الكراسي استراتيجي ماشاءالله واول مرة اعرف ان الخطوط السعوديه تقدم سرير للطفل ..

# تذكرت نفس الموقف بالنسبه للجوازات في مطار كوالا ومن دون عربيه بعد رحله طويله واتفق معك من ناحية وضوح اللوحات .. الوالده واخواني ومن بعدهم ولد اختي رغم انها اول مرة لهم في مطار كوالا بس ماشالله كانت واضحه لهم ووصلو لصالات المغادرة في وقت اسرع من اللي توقعته ..

# كفو عليكم والله في اختيار قراب للانتقال من المطار للفندق .. وهذي فايدة قراءة التقارير والتحضير الجيد يساعدك حتى في اقل التفاصيل تتعامل معها كخبير .. هذي الجزئية تحديدا فاتت عليا في مطار بينانغ لاني كنت مبرمج نفسي على استخدام تطبيقات التكاسي في كوالا ولافكرت في بينانج كثير ..

# بصراحه فندقكم في كوالا (البوتيكي) اشوفه "لقطة" باعتبار الصور والنظافه وتفاجأت بأنه نجمه وحده فقط لكن يثبت نفس النقطه .. التحضير الجيد والبحث المتواصل وهذا الشيء لما يوفر عليك ماليا هو بالاحرى كسبتم فيه ..

# وانا معك في نقطة استخدام بوكنج لمعرفة الفنادق وتقييماتها واسعارها ومن ثم البحث عن السعر في موقع الفندق نفسه او حتى في المواقع الثانيه .. شخصيا استخدمت اكثر من موقع لما حجزت لسفرتنا وهو شي اول مرة اسويه تقريبا لكن ان شفت لاسعار حول بعضها افضل بوكنج ..

# الحمدلله على سلامة راشد مايشوف شر يارب .. كانت نفس الاجراءات اللي واجهتها في مستشفى بينانغ عند الاشتباه باصابة يد ولدي فيصل بالكسر .. لكن كان الايداع 500 رنقت وفعلا الاشاعه والعلاج ما كان مكلف الحمدلله حدود 275 ...

# احييكم على استئجار السيارة طول هالمدة شريتم راحتكم ووفرتم فلوسكم وسبق ان ذكرتها في تعليق سابق لو سهل الله رجعتنا لماليزيا راح استأجر سيارة لاغلب الاماكن وفي الغالب اتحاشى كوالا نفسها .. لنكاوي هي افضل مكان الواحد تكون معاه السياره لانها سهلة ولافي زحمه والاماكن السياحية متناثرة اما اكثر مكان تمنيتها معاي كان في كاميرون هايلاند ..

# بالنسبه للخط الجبلي في بينانغ اهنيكم بصراحه كان ودي امر عليه وحنا رايحين لفندق لكزس اللي جنب المطار .. نفس الوقت من الباتوفرنجي الى هناك مقارنة بالطريق المعروف الخط الاخر .. لكني ماصملت لاني معاي الوالده والاطفال وخفت يتعبون ..

# في هذا التقرير دروس يجب ان يستفيد منها الكل .. اعجبني تحليلكم لتجارب اقاربكم والاخرين وبناء عليه قررتم ماهو اليوم المناسب لزيارة الصن واي لاقون ..

# اشكرك على شرح ال swimming shoes اول مرة اعرف عنها واحتاجها شخصيا

# بصراحه تجربة حديقة الحيوانات جميله ولو دريت عنها كان ضميتها البرنامج خصوصا اني استبعدت افاموسا من البدايه ..

# بالنسبه لعرض الادفنشر زون (منطقة المغامرات) في القولدن ساندز بينانغ كنا ماخذين ثلاث غرف مع العرض وقلت لهم ماعندي الا طفل واحد يستفيد منه اذا احتاج وقت زياده باخليه يستخدم ارقام غرفنا الثانية قالو ماعندك مشكله وفعلا فيه يوم قعدنا فيه في الفندق ماشالله سعود استغل الوضع وحلل ال 6 ساعات ووالله كان ودي العب معاهم واتزحلق ووضعها يحمس بس استحيت ههههه .. لكن فعلا اؤكد على كلامك ولاحد يفوتها حتى لو كان في الفنادق القريبه لانها ممتعه جدا وآمنه بإذن الله

# تقييمك الموضوعي لفندق الهاردروك اعطاني فكرة واضحه عنه وكنت افكر لو رجعت بينانغ انشالله اجرب شي غير القولدن ساندز كتغيير فقط وليس تحفظ على القولدن ساندز ولكن الان شلت الهارد روك من اللسته رغم انه كان واحد من الخيارات .. واحب هنا ان اؤكد على نقطة اشكرك على تقيدك بها وهو النقد الموضوعي خصوصا ان رأيك في هذه المواقع يقرأه الآف الناس ويبنون عليه قراراتهم فالرأي أمانه .. البعض للأسف يبالغ في المدح او الذم ويتعاطى مع الأمر بشكل عاطفي بحت بسبب موقف واحد لايعكس صورة حقيقية للمكان او المزار السياحي وهذي ياما اكلنا فيه مقالب هههههه في سفرات سابقه خصوصا بعض الاوصاف الساااااااااحره الحااااااالمه ههههههه ..

# بالنسبة للمطل المفتوح في منارة كوالا .. ماشالله سمحو لكم بالاطفال ؟ حنا قالو لنا ممنوع الاطفال ينتظرون عند المصاعد فاضطرينا ندخل انا وام سعود كل واحد لحاله علشان الثاني يكون مع الاطفال ..

# بالنسبه للمصورين عادي يصورونكم ويحاولون يغرونكم تشترونها ونا في الغالب كنت ارفض لكن حتى لو تصورتم ممكن تتجاهلونهم في الخروج او تكسرون سعرهم بشكل كبير عشان يزهدون فيكم .. لا انسى الموقف في تلفريك لنكاوي كانوا يعرضون الصور بربع المبلغ على سائح اوروبي او امريكي من اجل ان يشتريها وهو مطنشهم ..

# اتفق معك بالنسبه لستاربكس والحال مع كثير من المحلات المشهورة .. لكن ستار بكس شخصيا لم يعد خيار اساسي بالنسبة لي من فترة طويله (أفضل القهوة السوداء من دون اي اضافات) ولكن كما ذكرتي التأثير الاعلامي وسبق ان قرأت تقييم في امريكا قبل سنتين او ثلاث عن القهوة اللتي يفضلها الناس هناك ولم يكن ستار بكس من الخمسه الاوائل والكثير منهم كانوا يشوفون مبالغه في سعره بالنسبه لمستوى القهوة والامر ينطبق لدينا على كوستا كوفي (الاسوء) .. اذكر مرة اطلب لزوجتي لاتيه من ستار بكس وجربت اذوقه كنت اقولها هذا "حليب" بالقهوة مش قهوة بالحليب ..

# الاكواريوم يبدو لي انه مو بعيد عن اللي في لنكاوي ون كمت متوقع من تقارير سابقه انه اكبر وافضل

# بالنسبة لاوتلت جوهر تحدثت عنه بالتفصيل في تقريري .. كان تجربه مخيبه للامال ولايستاهل المشوار ..

أشكر لك مرة أخرى أختي الكريمة هذا المجهود الرائع ..
تحياتي لك ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي الانتقال إلى العرض المتطور العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
كنا هنا (3) اروما كافيه ( نكهة القهوة ) جدة	آخـــرفـــرصـــة	بوابة السعودية	49	22-02-2017 10:15 AM
القهوة العربيه	kanari212	بوابة الامارات	1	13-02-2016 03:12 AM
منع شحن القهوة من اثيوبيا	فيصل	بوابة اثيوبيا	28	23-10-2015 04:11 AM
تقرير مصور وجولة في حديقة الحيوانات الماليزية Negara Zoo* " أبوناصر "	أبوعبدالله (الاسفار )	ماليزيا	13	21-07-2015 06:52 AM