بسم الله الرحمن الرحيم

اكتب تقريري هذا مع جزيل الشكر لكل الاخوان والخوات الي ساعدوني على التخطيط للرحله الجميله

• الناقلة: الخطوط الجوية القطرية تذكرتين على الدرجة السياحية بسعر 390 دينار بحريني (كان عندهم عرض خاص)
عجبتني الخدمة على الطائرة وكذلك قصر فتره الانتظار بالمطار (ساعة واحده) قارنته بالإمارتية وربحت القطرية في المقارنة لان الطيارة كانت مريحه والطاقم جدا متعاون وحبوب. طبعا أكتوبر مو وقت زحمة واجازات فمتوقع خدمه أحسن لكن القطرية مازالت بنظري أحسن من الإماراتية.
• السكن: فندق Premier Inn London Euston لمده 8 ليالي بسعر GBP 1401/- غرفه مكيفه مع الفطور . عجبني الفندق برغم بساطته للأسباب التالية: قربه من محطات الباصات والمترو خدمه ممتازة وموظفين بشوشين. فطور جيد جدا ولكنه غير متنوع. قربه من المطاعم ومنطقته جميله وحيوية.
• حجزت تاكسي من المطار الى الفندق وبالعكس عن طريق الانترنت لشركه blackberrycars.com بقيمه 98 باوند لشخصين. حسيته سعر مناسب لان الفندق يبعد عن مطار هيثرو تقريبا ساعة. مع وجود خيار الدفع كاش بعد المشوار.

• نزلنا برنامج citimapper على الاي فون وصراحه برنامج قوي يعطيك طريقه الوصول لأي مكان مع كل طرق المواصلات واسرعها واسهلها مع كم تكلف . مثلا لو نبي نروح من فندقنا هارودز ادخل هارودز وجهه الوصول يعطيني قائمه بكل الباصات والمترو من المحطات القريبة من مكان تواجدي وقت البحث. ويقول لي كم تكلف كل رحله وكم محطه توقف واي محطه لازم انزل فيها وكم دقيقه مشي من مكاني الى المحطة. وما تحتاج نت متواصل عليه فممكن اتنزله وانت بالفندق وبعد ما تطلع يوصلك الى المكان الي اخترته بشرط تمشي على الخط الي اخترته.

للأمانة احنا ما اخذنا خط انجليزي لان النت متوفر بأغلب الأماكن والمطاعم وحتى بالشوارع فاغلب المحلات والصيدليات عندهم فري واي فأي تشبك عليه وانت بره المحل وكان النت المفضل عندي حق صيدليه بوتس التسجيل فيه سريع وبسيط.
انا ما احب استخدم المترو وافضل عليه الباصات . لأني اشوف الشارع وسائق الباص ويعطيني شعور بالارتياح ومااخاف إني اضيع. طبعا في كل مره اركب الباص كنت اسال السائق هذا الباص يأخذنا لهذي المحطة (للتأكيد) خصوصا ان معرفه اتجاه الباص رايح والا جاي ممكن تخربط . بس ترا التنقل سهل بالباصات وخصوصا في الجو الجميل الانتظار مو مشكله. صراحه سواق الباصات لطيفين ومتعاونين جدا.
• اخذنا بطاقتين اويستر من السفارة البريطانية بالبحرين بسعر 20 دينار لكل بطاقه وفيها شحن بقيمه 40 باوند اظن وصراحه استخدمناها في كل مواصلاتنا ولا خلصت لين رجعنا .

يوم الوصول: رحلتنا كانت بالصباح الساعة 11 طلعنا من البحرين وصلنا قطر وعلى طول ركبنا الطيارة الي لندن وصلنا اهناك على الساعة 7 مساء من توقيت لندن وصلنا الفندق نزلنا العفش طبعا فندقنا محد يطلع لك الشنط لغرفتك ساعد نفسك بنفسك. بس الحمدلله شناط شخصين ماهي مشكله. قلنا نروح نستكشف المنطقة حوالين الفندق وأول ما مشينا لقينا قريب من الفندق Pizza express طبعا على طول دخلنا وطلبنا بيتزا خضار وسلطه وعصيرين وطبق مقبلات كانت الفاتوره حوالي 30-35 باوند . بعد العشا حسينا الجو برد وكنا مو لابسين ثقيل رجعنا الفندق ونمنا استعدادا لليوم الأول في الجميلة لندن.

اليوم الأول :

قبل كل سفره أحب أخلى لي جدول بالتمشيات والأماكن الي أبغي ازورها واحدد الأماكن القريبة من بعض واضبطتها في يوم وبعدها اشوف اذا المكان مفتوح في هذا اليوم واذا اقدر احجز تذاكر من قبل لأني ما احب المفاجآت كثير واحس ان التخطيط يوفر عليك الوقت والجهد في السفر.
المخطط لليوم الأول كان: قبل ال11 نكون عند قصر بكنجهام علشان نشوف عرض الحرس وعقبها نتمشى بالهايد بارك ومن الحديقة ناخذ باص للهارودز ونتغدى في منطقه الهارودز وبعدها نتمشى البيكاديلي Piccadilly Circus . وجنبه الطرف الاغر .
رحنا القصر وشفنا ناس متجمعين وشفنا القصر والحرس بس طلع للأسف هذاك اليوم ما عندهم عرض لان عروض الحرس يوم وترك. رحنا تمشينا بالحديقة الي يم القصر مو الهايد بارك اسمها سانت جيمس بارك وكانت حديقة جميله مثل بقيه حدائق لندن فيها بحيره وبط وخضار وجو جميل ... طلعنا بعد تقريبا ساعتين من الحديقة زوجي قال فلنغير الخطة ونروح انشوف الاكسفورد استريت !
طلع ابو الشباب ايحب التسوق وانا لا؟؟؟ قلت له على امرك ... تمشينا اشوي الا نشوف ال hope on hope off bus حق شركه golden tours تحمس زوجي وقال يالله ناخذ الباص يودينا كل الأماكن السياحيه على الخريطه اسهل من الباصات. واخذنا تذكرتين لمده 48 ساعه شامله رحله نهريه لمده 35 دقيقه بقيمه 58 باوند. اكتشفت ان بلندن 3 شركات للباصات السياحيه وهذي وحده منها. في big bus tours اظن أحسن من الجولدن لان شفنا محطات اكثر لها وتواجدها اكبر. اهم شيء ان الجولدن كان لهم محطه قريبه من فندقنا نصعد منها الصباح ولها 3 خطوط البرتقالي والاحمر والازرق كل واحد يأخذك على مناطق سياحيه مختلفة . كنا طبعا بوسط النهار وطلعنا من المحطة القريبة من قصر بكنجهام والحديقة وقلنا بنشوف الخط الأحمر أي محطات يوقف فيها . للأمانة انا حسيت اني استفدت من بطاقه اويستر اكثر من الباص السياحي. اقصد القيمة مقابل الفائدة يمكن لان شركه القولدن تورز مو احسن شركه لان محطاتها قليله بس فيها شي حلو بالباص ممكن تحصل على واي فاي .
تغيرت الخطة من أكسفورد وقلنا نمشي على خط الباص الأزرق وشفنا قلعه ويست منستر وشفنا البج بن وصورنا عندهم وبعدها نزلنا عند محطه نهر التايمز وقلنا ناخذ رحله القارب مدام الجو حلو ومشمش. ( لا تؤجل عمل اليوم الي الغد) وأول ما وصلنا قبل محطه القارب النهري قال زوجي بيصلي الظهر والعصر عطيته السجاده واخذ جانب يصلي وجلست اصور . بعد ما صلى قلنا بنروح الرحله الا نشوف اثنين من الشرطة الإنجليزية يسلمون علينا بأدب ويقولون احنا من الشرطة ممكن نسالكم كم سؤال بالبداية قلت يمكن يبون اراء السواح وكذا طلع بيسون عنا تقرير لانهم شافو زوجي يصلو وخافو نطلع من الانتحاريين . قال لي اغلب الانتحاريين كانوا يصلون قبل تفجير انفسهم واحنا شفناكم وبتروحون السفينة فحبينا نتأكد واخذو بطاقاتنا الشخصية وتفاصيل الفندق الي ساكنين فيه ورقم الغرفة وبنفس الوقت كلمو الفندق واتاكدو وبعدين رجعوا كل اوراقنا واعتذروا وقالو نتمنى تتفهمون ان هذي اجرآت روتينية . وصراحه كانوا بقمة الذوق والادب صراحه ما تضايقت من تصرفهم وقلت من حقهم.
المهم ركبنا القارب وكانت رحله جميله زادها جمال الجو البديع والشمس المشرقة ونزلنا عند عين لندن. قلنا يالله ناخذ لفتنا ونستمتع طالما وصلناها وكانت لفه جميله الحمدلله. نزلنا منها تمشينا اشوي بالمحلات الي حوالين عين لندن وتمشينا على الجسر الجميل. وصورنا كم صوره وبعدها قلنا انروح الاكسفورد ستريت . رحنا المحطة وركبنا الباص السياحي ونزلنا قريب من الهايد بارك على أساس بناخذ الخط الأزرق للاكسفورد ستريت ومشينا ومشينا وكلما سألنا قالو لنا الاكسفورد ستريت قريب 15 دقيقه ما تحتاجون باص؟ لين عجزنا نلقى محطه الباص السياحي للخط الأزرق استخدمنا بطاقه الاويستر وركبنا باص عادي وماقصر وصلنا بأول السوق عند بري مارك نزلنا واكلنا ببيتزا هت وتسوقنا لين تعبنا اهم شي شرينا الفراولة والبلاك بيري والكرز من الخضار الي باكسفور ستريت لذيذ انصحكم فيه .
ورجعنا الفندق بالباص العادي. وكذا يكون اليوم الأول خلص سوينا أشياء غير عن الخطة بس كان يوم جميل.

اليوم الثاني :

كان المخطط زيارة كوفنت قاردن بالصباح والقيام برحله نهريه في نهر التايم بعدها انروح تور اف لندن ولندن برج , وفي المساء اذا كان في وقت نروح الكامدن تاون ( طبعا ما طبقناه لان جزء من الخطه سويناه امس – بس الأهم ان كل المحطات السياحيه بالخطة رحناها ) صحينا وفطرنا الحمدلله بالفندق ورحنا محطه الباص السياحي وقلنا اليوم بناخذ الخط الأزرق ونزلنا عند الرويال البرت هول وتمشينا داخل كان فيه معرض للصور وانه مو من هواياتي هالسوالف فجلسنا شربنا كوفي وبعدها طلعنا نتمشى ندور متحف العلوم وصراحه متحف كبير وجميل في منطقه الجامعات ..الغريبة ان الكثير من المتاحف بلندن بدون رسوم دخول وهذا شي مشجع غير ان المتحف يكون جدا منظم وفيه أشياء جميله المتحف العلمي يستحق الزيارة لما فية من اشياء علمية وصناعات قديمة والكبسولة التي نزلة من القمر في 1969 وقريت في الكثير من التقارير ان متحف الطبيعة يمه بس الصراحة ما قدرنا نلقاه وكان الجو بارد فاكتفينا بهذا المتحف .
المتحف فيه واي فاي مجاني وهذا شي مشجع للتصوير والنشر على شبكات التواصل الاجتماعي وكان في حديقه جميله في هذي المنطقة صراحه مااذكر اسمها رحنا تمشينا فيها وجلسنا نستمتع بالمناظر الطبيعية والهواء العليل. بعدها ركبنا الباص السياحي ونزلنا محطه بج بن وصورنا صور عن قرب وتمشينا على الجسر الجميل ورجعنا ركبنا الباص السياحي ونزلنا بمحطه هارودز وطبعا ما يصير نروح لندن ما نشتري شكولاتات من هارودز.
في شارع هارودز في كثير مطاعم دخلنا مطعم اسمه الأرز للاكل اللبناني. صراحه مقبلاتهم جميله بس الشوراما كان فيها دهن كثير بس عامتا مطعم حلو وله فرع ثاني في ادجورد رود. وقضينا اليوم لاخره بهذا الشارع.

اليوم الثالث :

كان يوم جمعه وكانت الخطه اننا نروح حديقة الرجنت بارك هذه الحديقة الجميلة التي لا يمل الانسان من المشي فيها ..فيها بحيرة جميلة وبالإمكان استئجار القوارب التي تستخدم بالعجل وزيارة حديقة الزهور فيها ويوجد بها مكان لممارسة الرياضة وكوفي شب جميل ومشاهدة السناجب مع اطعام البجع والسبب الأساسي لاختيار الريجنت بارك في يوم الجمعة قربه من المسجد الكبير ورغبتنا لاداء صلاه الجمعه في هذا المسجد الجميل.
بعد الفطور صعدنا الباص السياحي واحنا مقررين ننزل عند محطه الريجنت بارك ولكن يبدو ان هذا كان خطأ لان علشان نوصل الريجنت بارك كان لازم الخط الأحمر بطوله مما أدى اننا ونوصل بعد ساعتين واكثر وفاتتنا صلاه الظهر بالمسجد مع الجماعة .لكن بعد ما وصلنا الحديقه رحنا ا صلينا بالمسجد وشفنا الكثير من المسلمين من جميع الجنسيات صراحه شعور جميل وروحاني. الحمدلله على نعمه الإسلام.

بعد الصلاة بالمسجد وقراءه سوره الكهف تمشينا بحديقة الريجنت بارك صراحه حبيت الحديقة كثير مريحه للنفس ..هاديه وفيها الكثير من المناظر التي تبهج . اكلنا البط والحمام ما شاء الله البط والحمام عندهم لطيفين ويحبون البشر ويقربون منك .... وبالمساء تقريبا ركبنا الباص وتمشينا عند قلعه وسترمنستر ومشينا على الجسر مره ثانيه وبعدها رحنا شارع أكسفورد وقررنا ندخل مطعم هندي واخترنا على نصيحة الترب ادفايز أقرب مطعم هندي وكان اسمه راجدوت وكان اكله لذيذ بس لازم تقول لهم ما يخليه حار. بالنسبة لي كان لذيذ بس كان في معانا خليجين بالمطعم مساكين ماقدرو يخلصون اكلهم كانو يقولون مليان فلفل .
وبعد الاكل تمشينا بالاكسفورد استريت وشرينا ملابس من Primark صراحه ملابسه حلوه وأسعار عجيبه انصحكم فيه وبشده. ودخلنا همليز وتذكرنا ايام الطفولة. وختمنا المساء بعشاء في بيتزا هت وبعدها رحنا البيكاديلي سيركس يقولون بالمسا يكون حيوي بس لما رحنا كان برد والمكان هادي تمشينا اشوي ودخلنا مكتبه Paper Chase وشرينا للعيال قرطاسيه موصينا عليها ورجعنا الفندق.

اليوم الرابع:

هذا اليوم كانت الخطة اننا نروح Little Vince فينسيا المصغرة بناء على اقتراح اخت غاليه علي بالمنتدى ( اتعرف نفسها ) لج شخر خاص عزيزتي ربي يجازيج كل خير عنا ... فأخذنا الباص ونزلننا بمحطه بادنجتن وتمشينا بجانب النهر ندور وين السفن الي تأخذك لفه في النهر. على نظام الجندولا بفينيسيا. ولقينا ناس مصطفه وواحد يحسبهم رحنا اصطفيا معاهم اعتذر بأدب وقال السفينة مكتمل العدد عليها تقدرون تروحون الضفة الثانية في سفينة راح تطلع على الساعة 1:30 وكان الوقت تقريبا:40 دقيقه 12... تمشينا الى الضفة الأخرى وشفنا الاصطفاف والحمد لله هالمره كنا من الأوائل فحصلنا تذاكر للدخول.
ممكن تأخذ الرحله ذهاب واياب وممكن اتجاه واحد وتنزل بالكامدن تاون. وقررنا ننزل بكامدن تاون وهي منطقه سوق شعبي جميل وفيه مطاعم كثيره تحتاج تقريبا نص يوم للتمشي فيها والاستمتاع بكل الأشياء الموجودة. كانت التذكرة ب13 باوند للشخص اتجاه واحد و20 باوند ويرجعك لنفس المحطة.
رحله جميله بالقارب تحس فيها أنك ابتعدت عن جو المدينة وفي شرح للاماكن الي نمر عليها ومنها حديقة حيوان لندن وتفاصيل عن تاريخ لندن. نزلنا بمحطه كامدن وتمشينا بهذا السوق الجميل وتغدينا ..وواصلنا تمشى لين المسا بعدها رجعنا فندقنا وتعشينا ب ناندوز القريب من فندقنا.

اليوم الخامس :

هذا اليوم طلعنا من بعد الفطور الى المتحف البريطاني وصراحه متحف جميل ورايق وكبير الي يحب التاريخ والاثار راح يستمتع فيه جدا تمشينا فيه لساعات وحسيت اني للحين ما كملته . كلنا لازم نطلع على 12 لان كان عندنا تذاكر دخول ل sky Garden وحجزت التذكرة عن طريق صفحتهم بالنت يعطونك موعد للدخول وممكن تجلس ساعه فيه تصور وتشوف المناظر الجميلة من فوق . رحنا بالقطار للمحطة القريبة من المنطقة وتمشينا لين لقيناه هو بنايه طويله جدا فيه مطل تقدر تشوف فيه تقريبا كل لندن من فوق وتصور الصور البانوراميه وفيه كوفي شب ومطعم في الطابق العلوي المكان جميل والصور تكون رائعه .
شربنا شوكلاته حاره وتدفئنا اشوي بعد التصوير وطلعنا في المنطقة ... للأمانة حسيت المنطقة منطقه بنوك وشركات بس كان بين المباني الطويلة محلات ومطاعم حلوه تغدينا في مطعم إيطالي للأسف نسيت اسمه كان اكله لذيذ جدا. وبعدها رجعنا الاكسفور ستريت واصلنا تمشي وتسوق.

اليوم السادس:

كان اليوم يوافق يوم عاشوراء ونوينا صيامه ..فطلعنا من الفندق بعد الصلاه .وكنا مقررين انخلي اليوم الأخير يوم حر نتمشى فيه.. وكل ما طرا على بالنا مكان رحنا له ... خذنا الباص ورحنا تمشينا على الجسر على نهر التايمز باتجاه القلعة وبعدها رحنا الهايد بارك وكان الجو جميل جدا اخذنا زورق ومشيناه بالبحيرة ..(من اكثر التجارب الممتعة كانت عندي)...احب الطبيعة وما شاء الله لندن سماها وبحيراتها والخضرة بحدائقها ..متعه للناظر... الله يرزقنا الجنة يارب . قضينا وقت حلو بهايد بارك لين قرب اذان المغرب اخذنا الباص ورحنا مطعم الأرز اللبناني تفطرنا عنده وبعد الفطور قضينا بعض الوقت في التسوق فقسمنا الوقت بين هرودز واكسفورد استريت ورجعنا نسكر الشنط ونستعد للرجوع لأرض الوطن في صباح اليوم التالي.


أتمنى ان يوميات رحلتنا مفيدة للي يبي يروح لندن وأتمنى ان تقريري يكون مسلي. اعتذر عن عدم ارفاق الصور لان تحميلها مااعرف ليش صعب علي 

الصــور مع التقرير
كالملح مع الطعــام
شكــرا

الحمد لله على السلامة ونورت القسم البريطاني بالتقرير


ولكن تواصل مع الدعم الفني بخصوص الصور وإن شاء الله تنحل المشكلة

واااااو واخيرااا تم كتابة التقرير
مع اني حابة اشوف صور ليتل فينس دام اللي قالت لج امدحتها وما راحتها ههههه بس دام استانستوا انا اعتبر نفسي شفتها الحمدلله انها عجبتج

وبعد سكاي غاردن بحط صورها انا بتقريري بس لو شايفينها
معاج بصورج ربي يحفظج

بداية تحميل الصور صعبة شوي
بس صدقيني لو تعلميتها ودج تحطين كل اللي عندج

بالاول جربي تنزلينهم ببرنامج التابلتك
سهل ومن جهازج للمنتدى

درسي الموضوع عدل وبتستانسين صدقيني وحطي لنا صور
واي استفسار احنا حاضرين يا عسل

تقريرج جميل ومرتب وعليكم بالعافية كل ما أكلتوا وشريتوا
بارك الله فيج والحمدلله ان معاملة البريطانين وايد حلوة وما تضايق في طلباتهم
واللي ماعنده شي ما يخاف وهذا ما حصل معاكم وقت صلاة بوالعيال
بارك الله فيكم
بانتظار الصور

تقوير رائع وممتعه لكم ولنا احنا عشنا الرحله معاكم
وين الصور ياحلوه


أرسلت بواسطة iPhone بإستخدام Tapatalk

شكرا لك علي التقرير

رأيك بالفندق مناسب
وهل يستحق التنقل 98 باوند الي المطار
التطبيقات صارت تساعد حقيقه السائح

نكون شاكرين اذا نزلتي الصور

الحمدلله على السلامه

سعر التاكسي رايح جاي 98 باوند يعتبر ممتاز .

النت .. أنا زيك ما أخذت خط انجليزي .. النت كان موجود بكل مكان .

بالنسبه لسكاي جاردن .. طلبتوا فقط ( هوت شوكلوت ) ؟؟

الحمد لله على السلامة

يوميات حلوة و تفتح النفس للسفر
أعجبني تفهمكم لموقف البوليس وتفتيشهم لكم
هذا دليل على وعيكم الكبير وخبرتكم السياحية

التسوق حلو وأنا مثل أبو الشباب يعجبني كثير
زين جربتوا رحلة ليتل فينس ومشكورة اللي دلتكم لأنها رحلة تستاهل

شكراً للتقرير الخفيف اللطيف
اللي مثل أجواء لندن ترد الروح

مالقيت وردة حطيت لك هذي

ماشاء تقرير جميل ويوميات حلوه ممكن تساعد في ترتيب جدول ...
على كثر مااصلي بشوارعهم ومحطات القطار واخرها امس بإدنبره ماحصل لي هالموقف الحمد لله .. هي مره وحده كنت بالسوق اللي يجي بالهايد بارك في الشتاء واحد جلس يطل علي .. بس حلو انه مانكد عليكم الموقف .

شكرا لك ع التقرير والله يهنيكم