ارجو المساعدة لرحلتي القادمة في شهر مارس

mgod0606 · 19-02-2015, 08:28 PM

السلام عليكم
أرجو مساعدتي في تخطيط رحلة ألمانيا بعد شهر ان شاء الله
اول شي تنصحون بالسفر لها في مارس القادم لأن رحلتي يوم 11 مارس لباريس بعدها بروح هولندا ان شاء الله 4 أيام وأفكر اروح من هولندا لألمانيا لمدة 5 أيام
وين أروح في ألمانيا أي مدينة واش فية ممكن يجذب وكيف التنقل وطريقة السفر من هولندا لها
معليش ع كثر الأسئلة بس ماعندنا بعد الله غيركم
وألف شكر مقدما

Azzam · 20-02-2015, 12:13 AM

حياك الله اخوي واهلا وسهلا بك

اول شي شهر مارس بارد وثلوج وما نصح السفر فيه اذا انت من محبي الطبيعه واغلب الفعليات
تبدا من بداية شهر مايو

والتنتقل بمكاكنك استاجار سيارة بس ياليت تحدد المدن اللي راح تزورها عشان المخطط .......وابشر

الوصول والمغادرة ؟؟

mgod0606 · 20-02-2015, 10:13 AM

شكرا لتجاوبك
رحلتي ان شاء الله يوم ١١ مارس والعوده يوم ٢٢ مارس المدة ١١ يوم الوصول لباريس والعوده كذالك المشكله اني حاجز من شهر ١٢ كان فيه عروض عالقطريه اول ما اوصل بروح ع هولندا وبلجيكا بالقطار تقريبا ٤ ايام وبعدها فكرت في المانيا بس مو عارف وين
بالنسبة لايجار السيارة صراحة اخاف يصير لي شي او اضيع خصوصا اني مع العائلة وكمان اسعار الوقود احس غااالية ولا ادري اذا تعتبر اوفر ممكن تفيدني فيها
وكمان اذا عندك اقتراح افضل من المانيا ؟؟؟
صراحة محتار والمشكله اني حاجز التذاكر وغير مسترجعه
الف شكر لك وسامحنا على كثر الاسئلة

Azzam · 20-02-2015, 10:42 AM

ولا يهمك الافضل لك تستاجر سيارة اوفر وارخص من القطار

بصراحه القطار تعب سواً في المسافة اوالشنط من غير التبديلات بين المحطات

بخصوص السيارة مارح تضيع والموضع جدا سهل استاجر السيارة من باريس وخذ معك قارمن وصدقني افضل بكثيرر من القطار وحوستها

اذا ممكن اعرف في اي مدينة في هولندا وبلجيكا عشان ازبط لك المخطط لان 11 يوم قليلة بس راح اضبطه لك ولا يهمك

ملللوك · 20-02-2015, 01:13 PM

وعليكم السلام

اذا معزم تزور المانيا
فأقرب مدينه أنصحك فيها قريبه من هولندا وبلجكيا
هي دوسلدورف

ومثل ماقال مراقبنا
اذا بستأجر سياره هذا الخيار الأمثل والسليم والصحيح ايضا
وبخصوص مسأله الضياع اشتر لك قارمن وركب عليه خرائط أوروبا
وخزن الأحداثيات الي تحتاجها فيه ولا راح تتعب وهو راح يوجهك للمكان الي تبيه

خصوصا انكم عائله والتنقل بالقطار متعب وحمل الشناط وتنزيلها
نصيحتي اذا أردت زياره المانيا استأجر السياره
اما اذا معزم انك ماتستأجر
فشيل المانيا من المخطط لأنك راح تتعب في التنقل كثثييير

بالتووفيق

mgod0606 · 20-02-2015, 02:30 PM

الله يسعدكم ويرزقم ويجزاكم جنات النعيم على مساعدتكم
الصراحة كنت شايل فكرة السيارة من بالي لأن سبق زرت اوربا واستخدم المترو فقط وحمستوني ودخلت موقع avis حصلت سيارة صغيرة استلام من المطارو التسليم في المطار 11 يوم ب240 يورو شامل تأمين كامل ومفتوح الكيلو بس هل عادي لو طلعت خارج فرنسا وهل فيه رسوم لو طلعت وكمان كم ممكن حق البنزين بيكلف تقريبا وسالفة المواقف مافهمتها هل في كل اوربا لازم مواقف معينة تروح لها يعني ما اوقف مجنب الفندق وانتهينا؟؟؟ وهل عليها رسوم ؟؟؟
بالنسبة للمدن فأول ماأوصل ان شاء الله بأروح أمستردام لأن باريس سبق زرتها فما أبغا ازورها وبقعد في أمستردام 3 أيام منها أزور قرية جيثورن وكمان روتردام وبعدين بلجيكا ممكن يوم أو يومين بروكسل وبروج بعدين تحمست لألمانيا بعد ماشفت تقارير الاخوان لكن ماني عارف وين أروح وايش الأنسب لي عجبتني ميونخ و غارمش ولا أدري وش الأنسب من ناحية الجو والفعاليات ولا أكنسل ألمانيا أفضل ؟ وايش ممكن خيار ثاني؟
تعبتكم معاي بس ماعندي غيركم بعد الله ,, تحملوني

ملللوك · 20-02-2015, 08:21 PM

شي جميل
والموضوع بسيط

نعم تقدر تطلع من السياره خارج فرنسا عادي

واشتر لك جهاز قارمن من الحين وركب عليه خرائط اوروبا + الشرق الأوسط
عشان تدرب عليه هنا وتراااه بسيط جدا وواضح
واليوتيوب مليان شرح > اصلا مايحتاج شرح بعد

وبخصوص المواقف مواقف الفندق بالغالب مجانيه
والمواقف الأخرى على حسب بعضها موضح انه مسموح لمده ساعه مجانيه
وزياده على كذا تدفع الفلوس
الفكره عباره عن جهاز تحصله عند كل المواقف تدفع ويعطيك ورقه وتحطها داخل السياره فوق الطلبون

واخوي ترى رحلتك في مارس ف أحتمال الطبيعه ماراح تحصلها مثل ماتبي

وفي المانيا لايوجد رسوم بالغالب على الطرق
نادر جدا

بخصوص البنزين احسب 1000 ريال ميزانيه بنزين

mgod0606 · 21-02-2015, 08:53 PM

الله يسعدكم ماقصرتو
خلاص ان شاء الله بسوي الجدول كالتالي:
يومين بروكسل
3ايام امستردام
بعدين استلام سيارة من امستردام
بالسيارة يومين فرانكفورت و3 ايام ميونخ
**دخلت فرانكفورت لأنها متوسط المسافة بين امستردام وميونخ
وأخر ليلة بباريس
وش رايكم كذا مناسب ولا تقترحون تعديلات
وبالنسبة للسيارة وش تقترح سيارة للشخصين ومن أي شركة ؟
وكمان القارمن أحس أفضل أشتري تطبيق سايجك للآيفون وكمان القوقل ماب هل تكفي ولا لازم قارمن ؟
شكرا لكم

AbOFareS2011 · 22-02-2015, 12:15 AM

لاتخاف ولا شي كلنا زرنا هالمدن ولا ضعنا وين بتروح يعني احداثيات وتوصل انشالله
بس حط ببالك اعرف وين انت رايح دخل الاحدثيات صح واحفظها بالقارمن وقارن بينها وبين قوقل ماب
وجرب تدخلها من هنا بالقارمن علشان تتعود عليه والمشاكل اللي تمر عليك وباذن الله سهالات
بالنسبه للمصروف البنزين عادي تفلل 60 يورو يجلس يومين اذا انت مشاوريك قليله

جرب ماراح تخسر شي وتلتزم بانظمه المرور والمواقف بامستردام السنتر غاليه واذا معك سياره اسكن خارج امستردام

رحله موفقه باذن الله

ملللوك · 22-02-2015, 07:25 AM

بخصوص السياره عندك هالشركات هي الأفضل برأيي

SIXT , AVIS , EUROPCAR

بخصوص استفسارك عن القارمن أو برنامج السايجك
ل الأثنين بتكون كافيه ومناسبه
لكن مشكله خرائط قوقول انها تحتاج انترنت وتستهلك من بطاريه الجوال
وممكن الأنترنت يخلص معك وبتدفع فيه مبلغ محترم بعد
ونفس الشي بخصوص برنامج سايجك يستهلك بطاريه
فالقيمه الي بتدفعها في الأنترنت هناك اشتر بها جهاز وريح عمرك

وايضا بتحتاج تثبت الجوال بقزاز السياره عشان تشوف زين
وبتتعب عشان تكتب اسامي الأماكن أو الأحداثيات
وممكن تجيك مكالمه وتحوس عليك الوضع شوي
فبتتعب معاها شوي

انا اشوف القارمن افضل خصوصا اذا انك مسافر
اشتر لك جهاز قارمن موديل 52 سعره 500 ريال وركب عليه خرائط أوروبا
وخصائصه واضحه وبسيطه وله شروحات كثييير
وريح راسك

واذا انت بالرياض بدل لك على محل مناسب لبيع اجهزه القارمن

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ارجو المساعدة	habiba	تركيا	9	01-07-2015 12:28 PM
لطفاً ارجو منكم مساعدتي في اعداد جدول لرحلتي الى باريس	abdullah-123	بوابة فرنسا	1	03-06-2015 07:14 AM
ارجو المساعدة شهر عسل 20 يوم	الليث الابيض	بوابة اندونيسيا	17	13-05-2015 10:27 PM
مساعدة لرحلتي القادمة	حرمووه	بوابة البوسنة	5	28-04-2015 02:32 AM
مساعدة بخصوص جدول لرحلتي القادمة	سنايدي	تركيا	9	13-04-2015 03:38 AM