السلام عليكم ورحمة الله وبركاته

يا أخوان باقي على سفرنا إلى لندن حوالي 3 أسابيع وما مدانا نطلع الفيزا من بدري لظروف

اللحين ما عندي وقت إني اخذ موعد واطلعها قلت بروح مكتب يطلعها لنا
ساعدوني بأسماء مكاتب موثوقه يستخرجون الفيزا بالدمام او الخبر الله يسعدكم

وهل ضروري عشان كشف الحساب لازم فيه مبلغ كبير ؟ مع العلم انه فقط الراتب !

وعليكم السلام .. الحين ماكو أجازة فـ مستحيل يكون زحمه انا توي مقدم هالشهر واخدتها في 8 ايام فقط وغير مستعجل موعد عادي ..

ترى الأمور كلها سهله وهذي المواضيع الموجوده بالمنتدى لمنع استغلال المكاتب بـ أموال طائلة ..

انصحك بـ قراءه بعض المواضيع المثبته المهمه وأمورك في السليم إن شاء الله ..

3 اسابيع تجيب القلق لراعيها لذلك توكلوا على الله وباشرو من الآن باستخراجها

اول شي جهزوا اوراقكم
تعريف بالراتب + كشف حساب اخر 3 شهور
2 صورتين
بعدين يوجد مكاتب منها الفيفا وهو اغلاهم سعر لاستخراج الفيزا بياخذ على الجواز الواحد ( الابلكيشن الواحد ) 200 ريال + 490 قيمة الفيزا ل6 شهور ويوجد بعض المكاتب يمكن 150 ريال سعرهم بجنب الفيفا وجميعهم متمركزين مكاتبهم جنب مكتب استخراج الفيز الي بالراكة الخبر .

والله يوفقكم ويسهل امركم

الله يعطيكم العافية توني جايه من فيفا و ٣ اشخاص ب ٤ آلاف مرا كثير صراحه


طيب اذا اللحين بعبي الابلكيشن واحجز موعد وبسدد بالفيزا لازم تكون بإسمي والا عادي استخدم اي فيزا ؟
الله يسعدكم انتظركم

حجز موعد وسداد مو لازم بأسمك الفيزا
لأني أذكر سددت من فيزا أختي قبل أطلع فيزا من كم سنه

كثير 4000 الاف
الجواز ب 700 شامل قيمة الفيزا يعني 4 جوازات ب 2800 بالكثير
مو لازم الفيفا يسويها لكم فيه مكاتب كثيره تسويها ابحثوا وستجدون

او انتم اكتبوها طريقتها سهلة لكن تحتاج لغة

شكراً لكم عالردود

رحنا لمكتب بالراكه جنب مركز التأشيرات وسواها ب 2200
وبكره موعد التبصيم والله يسهل .

تطلع بإذن الله .. ياليت تكتبين لنا تجربتك والأوراق اللي طلبوها منكم بموضوع جديد عشان يستفيد الغير


بالتوفيق

إن شاءالله بس تتسهل وتطلع الفيزا لأني قلقه من المده اللي بقت عالسفر

دعواتكم