18-04-2017, 08:42 PM
|
#1 |
مسافر جديد
تاريخ التسجيل : Mar 2017 رقم العضوية : 14157 الجنس : ذكر المشاركات : 26
|  ياربي لك الحمد احلى تجربه لإستخراج فيزة فرنسا خلال 5ايام عمل
مساكم الله بالخير ياربي لك الحمد تسهل موضوع الفيزة وخلال خمس ايام عمل طلعت الفيزة انا قدمتها يوم الاربعاء 12-04-2017 واليوم الثلاثاء ارسلوا لي رسالة ان الفيزة جاهزة
والموضوع من اوله لأخره والله سهل وبسيط مره ولا يحتاج مكاتب بصراحه حرااااام المبالغ الخيالية اللي تاخذها المكاتب على شي بسيط مايسوى وتكفون لأحد يقول وش لي ووجع الراس اعطيهاا مكتب يصلح كل شي والقى كل شي جاهر
باعلمكم من الألف الى الياء وانتم قرروا تتركون المكاتب ولا تتعاملون معهم
اول شي عبيت الأبلكيشن وكله من فضل الله سبحانه ثم آخر فرصة مسوي شرح كامل وواضح عن طريقة تعبية النموذج واصلا الموظف المختص بالمكتب الموحد يشيك على النموذج واذا فيه شي ناقص يعبية يعني بالعربي انت جالس تتعامل مع بشر(موظفين سعوديين) بالمكتب الموحد منت جالس تتعامل مع كمبيوتر ولا واحد فرنسي ماتعرف تتكلم انت وياه واي غلط بيقولك مرفوضه الفيزة
والشي الثاني محلات التصوير قدام المكتب الموحد بالرياض كثر الرز كل واحد يقول تعال صور عندي والمكتب الموحد يبي صورتين بس
والشي الثالث يبون اخر شهرين كشف حساب بالانقليزي ويكون فيه رصيد بالحساب اتوقع من عشرين الف وفوق ومختوم طبعا انا جبته عربييييي ولا فيه ختم وعاااادي قالوا بنقبله على مسؤليتك
والشي الرابع تعريف بالراتب مكتوب بالانقليزي وبشرط يكون بالتعريف متى تاريخ تعيينك بالوظيفة ومقدار الراتب
والشي الخامس حجوزاتك بالفنادق اي فندق احجزه واطبع الورقة وعطهم اياها مع حجز الطيران
والشي السادس التأمين الصحي انا دخلت على شركة الدرع العربي واخذت تأمين من عندهم وانا جالس بالبيت عن طريق الفيزا وارسلوا التامين بالايميل وطبعتها بطابعة ملونه وعطيته المكتب الموحد طبعا الدرع العربي الشخص الواحد يحسبونه ب81ريال وعطوني خصم يوم اخذت لي وزوجتي وولدي طلع الحساب 205ريال والتعاونية للتأمين دخلت على موقعهم ويقول الشخص الواحد 110ريال
والشي الثامن اول صورة من الجواز
والشي التاسع تطبع الحجز حق الموعد بورقة عشان تعطيه الاستقبال ويعطونك رقم للإنتظار طبعا طريقة الحجز والله ولا اسهل منها مع طريقة التسجيل بالموقع وطبعا اكرر شكري لأخر فرصة لانه منزل موضوع وفيه شرح وافي وواضح بطريقة التسجيل بموقع المكتب الموحد وطريقة الدفع بالفيزا لانهم مايقبلون كاش وفيه شي مهم مبالغ الفيزة انتبهوا تراها كاااااااااااااش يعني حط معك مبلغ بجيبك عشان تحاسبهم ومبلغ الفيزة للكبير 239 وولدي مااخذوا عليه ولا ريال عمره الله يصلحة ست سنوات والشي المهم انهم ماطلبوا خطاب تحمل مصاريف ولا طلبوا خطاب موافقة الوالدين على سفر الطفل والتعهد نفس الموظف يعطيك واحد توقع عليه يعني الموضوع والله سهالات ولا يحتاج ان حنا نعطيه اكبر من حجمه
يعني نبي نحسبها وانتم احكموا تبون مكاتب ولا لا وتراهم ياخذون من 700ريال الى 1000ريال
الفيزة 239ريال
التأمين 68ريال لاني قسمت 205على 3اشخاص
حجز موعد 118ريال
والشي الاخير طبعا اختياري اذا تبي يرسلون لك رسالة قيمتها 5ريال واذا تبي ارامكس يوصل لك جوازك ب40ريال
يعني التكلفة كاااااااااااملة 425ريال والطفل تقريبا نصف القيمه |
| |
23الاعجاب
العرض الشجري
المواضيع المتشابهه 
