مساء الخير



نرجع لعرض بعض الصور البسيطه للشقه








وهذى الصور للفندق من الخارج وموقعه على شارع حيوي والتكاسي بالكوووم قدام الفندق ولو تبي يطلبون لك تاكسي لكن انا ما احتجته ابد خلال هاليوم




اليوم الأول

طبعاً بعد ما وصلنا ارتحنا ونمنا حول ساعتين ثم نزلت وحصلت في السوق اللي مقابل الفندق كنق برجر وتغدينا ثم نزلت استرخيء في هدوء الفندق ومقابل المسبح ممكن على المغرب بتوقيتهم



تقريبا بعد المغرب العيال اللي راح المراجيح واللي يسبح وانا من يوم ما نزلت المسبح تحس رجع لك النشاط من جديد وخاصه بعد رحله طويله


كلمت السواق وكنت متفق معه من قبل وقلت له بسوي تشيك اوت الصبح بعد ما نفطر ونتقهوى تعال قال اوك

نمنا وارتحنا بعد العشاء مباشره والكل طافي خلاص

مشاهدات / اليوم الاول طبعاً انت جاي من خط سفر دولي يمتد 9 ساعات من غير ساعات الانتظار في المطار
ومعك اطفال فلابد من الراحه حتى تستعيد نشاطك من جديد
واقتصر هذا اليوم على الفندق ومايحويه من خدمات ولا فكرت اني اطلع منه الا للجبل دايركت

اليوم الثاني :

من الصبح نزلنا للفطور وطبيعي انه مافيه الا القليل اللي يناسب العرب
لكن الحمدالله ما احب ادقق على الآكل اللي موجود خير وبركه


واخذت بياله شاي تعدل المزاج




قدام هالمنظر



وفعلاً الساعه 9:30 وهو برا الفندق منتظرنا وكان الاتفاق على 600.000 الف روبيه لطلعه الجبل
وبعدها عن كل يوم 500.000 الف روبيه لان السياره اوسع واكبر شوى وجديده بعد
اللي بالكيس الابيض هذى ((تكايات الرأس عشان النوم لو حبيت تنام مهمه جداً في السفر ))




سوينا تشك اوت وعلى الجبل


طبعاً السواق شهادتي فيه مجروحه وآمين لدرجه اني لمن سافرت بالي تركت شنط العزبه عنده ورجعت لجاكرتا وجابها لى للمطار
ووصلني الفندق واستأذن مني لان عنده زبون ورايح يستقبله وان شاءالله راح احط لكم رقمه في الآخير


في الطريق لاحظت ان عندهم نفس زحمتنا بخصوص القطار يعني مو احنا بس اللي نشتكي



ومرينا اخذنا شريحه XL وشحنها كلفت تقريبا 80 ريال وشحنتها مره ثانيه من كثر التصوير والاولاد كل واحد معه ايباد ولحد اليوم شغاله



واقترح على السواق قالي وش رايك ابدأ يومك من بدري اوديك التجديف حامي حامي
وسئلت الاولاد مير قالوا مشينا واصلاً هم ماشاءالله عليهم يقولوا لا خاصه لو فيه موووويه هههههه

وعلى التجديف وقلت كل واحد يجهز له ملابس ثانيه في شنطه الظهر عاد تعال شوف سياره الرجال صارت دولاب متحرك قلت في نفسي خلك انت راعي الاقتراح هههههه


وطال الطريق وحاول يختصر قد ما يقدر لاننا في ويكند وانصح الكل ما يجي على ويكند ابد لانه اخذنا حول 3 ساعات في الطريق



والله حتى السواق انه تعب الضعيف من كثر ما يحاول يختصر الطريق



وآخيراً وصلنا لمكتب الألعاب المائية وطبعاً يضحكون على العالم باسعار خياليه
لكن انا عندي اطلب السعر وانا اجيبه لك ههههههه
لدرجه اني حصلت رجل وزوجته وكاسرت لهم الرجال الين نقص لهم 500.000 الف روبيه

طبعاً المبلغ على حسب المسافه 8/12/15 كيلو فقلت له كم اقل شيء قال 2000.000 مليون روبيه
قلت طيب واللي يبيها بـ 1000.000 وش رايك رفض وقال خلاص 1500.000 مليون ونص قلت معليش في مكاتب كثيره وشكرا على العصير الليمون المر بعد



وقبل ما اطلع وافق وقلت له انا معي صغار ومابي مكان فيه منحدرات وبهذله
ابي شيء خفيف لان معي طفله عمرها 7 سنوات
وتوكلنا على الله قام يعرض على تبون تصوير ونخليك انت والمدام تسون شكل قلب ونصوركم قلت لا خلي قلبي معي وقلبها معها أنت بس اخلص علينا هههههه
وحملوا القارب على دينا صغيره وراحوا قدامنا

وصلنا والقبطان وزميله واحد راح يجلس بدايه القارب المطاطي وواحد نهايته ولبسنا ستره النجاه والخوذه وخليت جوالي معي في الكيس الواقي عشان التصوير



وتونا نزلنا النهر الا وجانا المطر ولحد الحين كلش زين






لكن شد المطر فجأه وصار الترفيه مغامره مرعبه وانا اللي اشجع الاطفال وامهم يالله رددوا معي (( اربعه شالوا الجمل والجمل ما شالهم )) وانا داخلي رعب ههههههه





هنا جوالي الايفون 7 بلس كان بيروح ملح في النهر



وراح تلاحظون كيف كميه المويه المتدفقه للنهر



عاد انا هنا قمت اتذكر اني سرقت 10 ريال من جيب الوالد وانا صغير وقلت يارب تسامحني
بصراحه شفت رعب

وانا اللي اجدف معهم


وبدون مقدمات حصلت بين رجليني داخل القارب اكرمكم الله شبشب رجل وحده تتوقعون لمين !!
اثاريها طلعت لعامل التجديف اللي جالس خلفي في نهايه القارب وانا اللي ادور عليه ما حصلته اثاريه من قوه الامواج
والله طاح في النهر لكن تعلق بالحبل اللي في جنب القارب المطاطي والا اسحبه وارفع معه
وصرت اعوذ بالله ما ادري انتبه على البنت الصغيره والا الاولاد والا امهم والا على العامل هههههههه
موقف يضحك في نفس الوقت ومبكي بعد

وبعد كم كيلو هدء المطر شوى


وانتهت الرحله بسلام والحمدالله
ونصيحه اللي بينزل باطفال ينتبه عليهم واذا فيه مطر لا تغامر ابد مهما كلف الأمر

القبطان ومساعده اللي انقذته لو رجعت مره ثانيه بذكره كل شوى اني انقذته هههههه


طبعاً طلعنا للسياره واحنا غرقانين مويا لكن عند المكتب عندهم دورات مياه اكرمكم الله وكل واحد غير ملابسه وكملنا رحله الطلوع للجبل .....

دع الكتابه لنا واستمتع

المعذره / على رداءه الصور لاني ساحبها من السناب والا في السناب اوضح وافضل وماتتقارن ابد بالصور

لكم