نكمل اليوم الثالث ...
3 \ 12 \ 2014 يوم الاربعاء
" رتبت الجدول بحيث يكون متحف آيا صوفيا وتوب كابي سراي مفتوحين "
" مخطط اليوم منطقة السلطان احمد وما يجاورها"
صحينا ع الساعة 8 ونص ونزلنا نتريق ..
وما بتقصدون وين تريقنا....... في سميت سراي
ما شاء الله عليهم عاااادي عندهم ولا كاني قلت لهم شي اول يوم
اختي قالت حـ... ما بتاكل قلت لها خلاص امري لله يعني انا دايما الوحيدة
اللي تعترض خلاص باكل قالت صدق قلتلها ايوة صدق امري لله ...
والله لا يوريكم فتحت السميت ادور ادور فيه ولما تأكدت من نظافته ألتهمته
طلبت شاي قلت اجربه ما عجبني ... " احسه ماي احمر شتان بينه وبين الكرك
"
الحساب اممممم ما اذكر كم لان كل شوي نزود شي ...
بعد هالريوق نزلنا انا واختي نتفق مع تاكسي نروح لسلطان احمد ..
واتفقنا مع واحد 15 ليرة بطلوع الروح ... ركبنا واستنينا واستنينا
لا حياة لمن تنادي رحت اناديهم اللي يغسل ايده واللي بيرجع الفندق
قررنا الاتي ... انا و ابوي و اخوي نروح قبلهم "اختي وزوجها" وهم بيلحقونا
ركبنا التاكسي ..
سأل من وين ؟
من دبي ايوة دبي اعرف دبي
كانت سواقته متهورة وياريت جت ع التهور ...
اول ما ركبت طلعت فلوسه عندي 15 ليرة بس قلت حرام اخرناه
بزيده 5 اخذت من الوالد 10 وقلت له شوف هذي عشرين ها عشرين
اول ما نوقف بنعطيه ... اول ما وصلنا مكان امس " جسر غلطة " عند مطاعم السمك
مقابل النفق وقف حضرته وقال يلا انزلوا ..
نعم ايش ننزل كمل إلين عند سلطان احمت جامي .. قال لا انزلوا ما اقدر اروح لهناك
قريب من هنا بس بس 1 كيلو .. ياحبيبي
الشاطرين اللي ما صدقوا خبر اول ما قال نزلوا نزلوا .. هي انتوا تعالوا ارجعوا
يا بنت قال نزلوا بس 1 كيلو انزلي فكينا الرجال معصب عطيه فلوسه
مافي فلوس حذفنا بعيد .. عطيته امري لله من العصبية نسيت عطيته العشرين كاملة
لفها قدام اخوي عيني عينك وطلع 5 ليرات قلت له شوف اصلا ذي الـ 5 حقي
هاتها سحبها قلت له اعرف حركاتكم واصلا ليرة وحدة ما تستاهل ..
مشى حضرته وانا ريل برى وريل بالتاكسي فجعني الله يفجعه
سحبني ابوي قال طز فيه ناخذ تاكسي ثاني .. ايوة اصلا كله منكم لحد يكلمني
شفنا تاكسي ثاني ما طاع يشلنا قال قريب امشوا ...
وشفنا الثالث بعد ما عبرنا النفق هو بعد رفض حسبي الله عليهم كلهم
كملنا مشي صعوداً ... وهذي بعض الصور من الطريق
ساحة ومطعم البلدية اعتقد هنا ...
الشاطرين قدامي
نتبع اللوح طول الطريق ومرات نسأل
وكل واحد يقول لنا الجامع بمكان حد يسار وحد يمين
إلين الله فرجها سألت واحد وطلع يتكلم انجيليزي ووصف لنا الطريق
ولقينا لوحة الجامع اخيرااااااا ومشينا عليها ...
" بطريق شفت محل الحلويات كوسكا عاشق اسطنبول يمدح حلقومه "
وبنص الطريق اتصلت اختي انتوا وين نحن وصلنا عند المسلات
نحن وين نحن في بايزيت
حذفنا ولد الذين وكملنا مشي
دورت الترام قلت بنركب فيه .. ما جينا عليه
كان يوم نحس نحس نحس نحس
ونصيحة لكل بنت لا تثقلين باللبس
واذا بتثقلين إلبسي تحت الجاكيت لبس واسع
اذا احتريتي تقدرين تنزلينه مش تتورطين مثلي
كل شوي نوقف نرتاح ونشرب ماي ونرجع نكمل
بداية الوصل ...... الحمد لله
طبعا اول ما وصلنا ارتحنا وقعدنا نسبسب في راعي التاكسي
طلعوا الباقين جاين مع ولد حلال "شاب" نزلهم عند المسلات ع طول بــ 20 ليرة
نحن ركبنا مع شيبة نسيت تحذيراتكم
قال المسافة 1 كيلو يمكن 3 كيلو ..
"ما افهم في المسافات بس من التعب قدرت انها 3"
وبسم الله دخلنا
يا كثر السياح الهندوس وين ما نروح نشوفهم ..
لحقينا الهنود حتى بتركيا ما كفتهم دبي
طبعا الدخول مجاني
عجبني جداااااااااااااااااااااااااااااااا مريح
اللي يصلي واللي يدعي ... الله يتقبل منهم جميعاً
مجسم المسجد النبوي الشريف
ومنه طلعنا ع متحف آيا صوفيا
بسم الله دخلنا التذاكر 30 ليرة الشخص
اعتقد الرسمة اللي فوق مقصود فيها العذراء وابنها عيسى عليه السلام
صيانة بالداخل ...
في ناس طلعوا فوق يصورون بس نحن ما طلعنا .. كساله
حتى في الخارج صيانة
هذي الاثار عندي احلى شي بالمكان كله حسيت نفسي في اليونان " مسرح دلفي"
المبنى الخشب اللي امبين في الصور " دورات المياه " عزكم الله
بصراحة نظااااااااااااف ياريت المرافق العامة بدبي تكون ربع نظافة مرافق إسطنبول
واقفين نطلب ...
اول طلبين شاي اخضر لاخوي وهوت شوكليت لي
الصراحة الهوت شوكليت حقهم عجيب صدق شوكليت
مش حقنا حليب نيدو+ خاشقتين نيسكويك
الطريق إلى توب كابي سراي
محلات ع اليسار .. ملابس حريم السلطان ملابس .. فهمنا وبعدين يعني ؟
لفتت انتباهي حرمة عفيفة في بداية الـ 40 جايبه صوف وتحيك نعول لحديثي الولادة ..
شغلهااا رووعة اخذنا من عندها لبنت اختي "غلوي" بـ 5 ليرات ..
مبلغ بسيط جدااا مقابل تعبها الله يرزقها من حيث لا تحتسب ..
هذا المبنى ع يسار القصر
وهذا ع اليمين
والباص السياحي واقف
ودخلنا للحديقة .. التذاكر من الداخل قرب البوابة الرئيسية للقصر وليس من هنا
كلابهم امبطحين في كل مكان
اخذنا جولة عامة مع ان كان خاطري انا والوالد ندخل الحرملك
بس اختلفت الاراء بين مؤيد ورافض ... "يباله زيارة ثانية"
زي ما هو واضح بالصورة 30 ليرة لشخص
متخبله ع زرعهم
الشاطرين راحوا وخلوني واقفه
مشينا ع كيفنا .. ولما اتورطنا دورنا القروب ما لقيناه
صورنا الساعات بالسرقة
اختي عجبتها الساعة الصغيرة
قالت بكلم السيكورتي بشغله وانتي صوري
وتك تك وراء بعض وهو يلف يمين يسار حاس في شي غريب
ولما جت عندي عرف وضحك و قال ممنوع التصوير...
بعد ايش يالطيب
احلى شي في القصر كله وبتركيا ككل
افتخارهم بدينهم ... الله يعز الإسلام والمسلمين
قارى في القصر وصوته ما شاء الله عذب
" في المتحف اللي فيه مقتنيات الرسول عليه الصلاة والسلام والصحابة "
وفي شاشتين تطلع فيهم ترجمة القرآن الكريم ..
كل ما سالنا قالوا هذيل كلهم غرف السلطان
السلطان ينام ع ذول ؟!!!
بدون مرشد الواحد يحوس
ظلنا
القصر ملياااااان كوريين وهنود
اسميه السلطان عاش عيشة ..
إطلالة القصر
برج الفتاة ... محاولة لتقريبه
حتى الطفاية صورتها
اول ما جا ابوي يصور سحب السكيورتي ايفونه ووقف ع راسه إلين مسح الصور
كرسي السلطان مرصع بالالماس والحجر الكريم .. فلوووس
بعض الملبوسات
عجبني هذاااااا
السكيورتي اللي كان واقف اهني كان عبيط صورت صورت إلين شبعت
"ما غير" يقول ممنوع وممنوع التصوير طيب وينك عني ؟!
كانوا جثث .. هالبنطلون يجي طولي ويمكن اطول بعد
حسدت نفسي .. في اخر اللحظات انتبه لي
بس مافي فايدة كملت تصوير ..
جا معصب ممنوع ممنوع
سويت نفسي ماني فاهمه اشر ع اللوحة
ممنوع
خلاص فهمت وحطيت الموبايل بالشنطة
اول ما لف رجعت اصور خخخخخخخخخخخ
و اخوي و زوج اختي يقولون بس فضحتينا لا تصورين
لزم تتهزئين عشان تبطلين ولا يشلون الموبايل مرة وحدة
" يدفعونا ولا يخلونا نصور هذا عدل ؟!"
ومن القصر قلنا نلحق بسرعة ع الاسواق القريبة منه
" جراند بازار "
وفي الطريق شفنا ممر ضيق فيه 3 مطاعم مرتبة
منها حبيب قلبي أناتوليا "فاتح فرع في مردف بدبي"
ومنها هذا
واخترنا هذا تابع لفندق
اسعاره حلووة
هالخبز والجبن غني عن التعريف
ما اعرف شو هالاكلة بس كانت لذيذة
اما هذا استغفر الله ما عجبني ابدااا حسيته نقانق
ع فكرة انا احب اصور كل طبق " حتى في الإمارات"
عشان لرحت مرة ثانية وماعرفت اسمه اطلع الصورة وااشر عليه
المطعم ممتاز والعيران عنده يااااااسلام ألذ واحد شربته
واسعاره ممتازة
وهذا المطعم من الداخل
التصوير مرة يصيب ومرة يخيب
شكله مجهز بوفيه للعشاء
بعد الغداء دخلت الفندق استكشفه شويتين
الصراحة رحت اغسل ايدي من الحمص
وهذي دورة المياه عزكم الله
رحت الرسبشن سألتهم ليش مافي تقيم لفندقكم ببوكينق
لاني قد شفته من فترة قالت هذا ليسن خاص بوتيك
اما فندقنا الثاني 5 نجوم ...
وطلبت الكرت لانه عجبني قلت اجيبه لكم
وهنا موقعه
وبعدها ع طول نزلنا ع جراند بازار .. قريب كم دقيقة ووصلنا
اخذنا ع الطاير
درزن اساور بطلوع الروح 50 ليرة
ورجعنا وزودنا كم حبة من محل ثاني الوحدة بـ 5 ليرات
و حلقوم كان مسوين عرض مجموعة بكتات بـ 25 ليرة اخذنا 2
" كل ما شفنا شي اخذناه لان مافي وقت نكاسر"
شوي نشوف نفسه نفسه بــ 15 ليرة
وبالمحلات الخارجية بـ 20 ليرة
وحد بــ 16 ليرة وحد 18 ليرة
دوخوني كل واحد سعر وكل واحد يحلف ان حقه تمام والثاني يغش
المهم
نزلنا منه لانهم خلاص يشطبون " يقفل 7 مساء بدري"
هالمحلات في النزلة عجيبه لا اطوف اي بنت
في محل اكسسوارات اخذت منه خواتم الواحد بـ 5 ليرات فقط
"ينباع عندنا بالعين اقل شي بـ 65 درهم نفسه نفسه"
ركبنا تاكسي لتقسيم بـ 20 ليرة .. ما يعرفون اقل منها
ورجعنا الفندق صلينا وارتحنا شوية بعدين نزلنا ناكل
والوالد دقها نومه تعبااان ع الاخر ...
مشينا شوي نستكشف ورجعنا ع بداية الاستقلال
مقابل فندق cvk الـ 4 نجوم
تم اختيار هالمطعم .. اخذنا 4 شاورما و 1 رمان طلع حااامض
دسمه ما عجبتني ...... اللي اكلت فيه شاورما اول يوم كان لذيذ
لفينا شوي في حديقة Gezi ..
ما صورت لان الوضع كان ........
ما انصح حد يروح لها بليل خاصة لو معه اطفال
العودة إلى الفندق من هنا ...
لخبطت في ترتيب الصور سامحوني
ألقاكم في الجزء القادم ان شاء الله
دمتم ع طاعة الرحمن
انتهى اليوم الثالث بسلام
28-12-2014, 11:38 PM
رد: 5 أيام في إسطنبول ... رحلة عائلية شتوية 
رد: 5 أيام في إسطنبول ... رحلة عائلية شتوية 
اقتباس 
المشاركة الأصلية كتبت بواسطة oceanus 
العرض المتطور
المواضيع المتشابهه 
