بلادكم حلووة .. حلووة ... بس الوطن ماله مثيل - الصفحة 15

طوق الياسمين · 17-03-2015, 02:16 AM

وكأني معاكم

تفاصيل كافيه ووافيه

شكرا على كرمك

توبليرون · 17-03-2015, 06:37 PM

اقتباس : المشاركة الأصلية كتبت بواسطة طوق الياسمين

وكأني معاكم

تفاصيل كافيه ووافيه

شكرا على كرمك

تسلمين يا الغالية
من ذوقج
الشكر لك لمرورك المميز والمتابعة الرائعه

توبليرون · 17-03-2015, 06:45 PM

الجزء الثامن عشر

السلام عليكم

اليوم الرابع في لندن

في هذا اليوم سمعنا ان في كرنفال قريب من الكوينز واي

فقررنا انا نروح بهاليوم هناك والكرنفال بيبدأ على الساعه 12 الظهر

ثنتين من البنات قاعدين الصبح مبجر ورايحين يتريقون في

ماكدونالدز وبعدين متمشين بالاكسفورد شوية

ارجعوا حطوا اغراضهم بالغرفة وبعدين طلعنا معاهم
انا وبنتي الثانية وتواعدنا مع بوحسين ويوسف ....اللي رايحين يتريقون بمطعمهم بالكوينز واي اما حسين نوووم بالفندق ...على اللقاء بالكافيهات اللي مقابل الهايد بارك بالكوينز واي

احنا نزلنا من الباص والا زحمة وشرطة وتنظيم بس مو هني الكرنفال

لا بالشارع الثاني ..........كانوا الشرطة يوزعون منشورات عن الكرنفال

اخذنا منهم ورحنا نتريق انا ودانه

وهذا ريوقنا وكان مطر ومحد قاعد على الكراسي .......بس احنا لقينا مكان مظلل
برررررد كان ......طلبنا

غنومة لازم

وانا لازم ريوقي كرواسوون بالجبن

حرقتها لي او حمشتها لي بس لذيذة

دانه باعتها تقول ما كانت تشتهي العشا وكانت يوعانه مو قادرة تصبر

المهم بعد ما وصلو الشباب قلنا لهم خلاص ما نبي نروح الكرنفال

ليش ؟؟

قلنا لهم على اللي مكتوب بالورقه عنه
:
اولا: لازم تديرون بالكم على جميع اغراضكم الشخصية ودايما انتبهوا

من السرقة.....ولا تلهون بالتصوير وتنسرقون

ثانيا: لا تتركون عيالكم بالارض شيلوهم يمكن ينداس عليهم

او يمكن ينخطفون

ثالثا: تماسكوا مع بعض لان ممكن الجماهير تمشي مع الكرنفال وتروحون وطي هههههه

رابعاا : شفنا هيبز بكثرة والبنات خافوا منهم ان راح يكونون حوالينا بالكرنفال

وخامساا : وهذا الاهم بالموضوع كله ان الكرنفال طلع للمثليين ...عرفتوهم يعني

ابوحسين قالها بسرعه لا يحوووووشك خخخخخخخخخ

طبعا احنا هالقرار اخذناه اول ما شفنا البرشور مالهم

بس انتظرنا الشباب لانهم كانوا بالطريق لنا

قررنا بوقتها ان نروح الويست فيلد الجديد ومكانه عند القرية الاولمبية

وهذا موقعهم من النت

http://uk.westfield.com/stratfordcity/

اخذنا تاكسي لان الباص ما نعرف اي باص يوصل هناك

وبعد المنطقة بعيدة اسمها ستراتفورد

وهذه صور من الطريق اول شي .....صورة للعائلة المالكة

سامحوني الصور عوية يعني مائلة شوي لاننا بالسيارة

وصلنا وشفنا هالاشكال بطول الشارع من الجهتين

وهذه محطة ستراتفورد

وهذه صورنا هناك........هني اول ما وصلنا والا انا اقول واويلااااااااااااه كل هالدريات ماني

لاعبة اولمبياد ههههههه..........لا وحظي في سلالم متحركة بس واقفة

قلنا يلا نركب بعد شنسوي

الممر بعد الدرجات للويست فيلد مول

وهني ديزني ستور

وغنومة تسترجع الطفولة

وهني سينما وركن يلعبون فيه اليهال على ما تخلص الام من المشترى

اكيد عرفتوه البريمكاك

هذا حلووووو اي واحد يخلص شحن موبايله في هالخزانات

تلاقي شحن لكل الانواع وترى الشحن من نفسك انت المسئول عنه وبعد ما تحط تلفونك تقفل بالمفتاح

وتاخذ المفتاح واذا رجعت تاخذ تلفونك تترك المفتاح عليه

وهو مجاني .........جربناه

وترحيب بكل لغات العالم ومن ضمنهم اللغة العربية

ما قصرواا

جعنا الحين ووقت الغدا حان وعصافير بطنا نص وصوصه ههههههه

قعدنا ببيتزا اكسبرس مع ان في مطاااعم وووايد ومتنوعه هندي وايطالي وامريكي وكلها

مطاعم راقية بس ما كان ودنا وجربنا نقعد بمطعم هندي ........بس باخر لحظة غيرنا راينا

مو مشتهين دسوومة وبهارات هنديه

وهذا مكانا

ودانه طبعااا بتحلي خلاص تقول مو يوعانه

طبعااا للتصريف .....احلى مشروب

واحنا بيتزااا

وحدة دجاج ...........ووحدة خضار ومكثريييييين البيديان

وسلطة

وطبق لحد يمد ايده هذا خاص بس لمديرنا فيصل

طبق بيديان باللحم المفرووم والصوص العجييييب...........بسم الله

مو اي صمون مشكل لا بيديااااان اكسبرس عجيييييييب

ملاحظة هالطبق الحين مو موجود ضمن منيو بيتزا اكسبرس
بالكويت

طلع حسابنا بحول الاربعين باوند تقريبااا

الذاكرة مييييح والفواتير تكرمووون المطاعم كلهم احذفهم لان ما فيهم تاكس فري

هههههههههههه

بعد الغدا قالت دانة وغنيمة نبي ندش فيلم كرتوني

راحت معاهم اختهم تقص لهم وتدخلهم السينما وانا قعدت بالمطعم لين ردت لي

وهذا تصويرهم بالسينما

وهذه بطلة الفيلم .........ويوم امدحووه لي شفته بالطيارة

واحنا راجعين ....ولا بالاخير قمت انام واقعد اشوف وارد انام لحد ما خلصت حربهم بالفيلم

عاد الحين بدأت ام حسين بالبحث عن الجنطة

ما ابي غاليه واايد اتحسف اشيلها كل مكان وما ابي رخيصه حييل عاد

ومشينا ندور ............وقبلها قلنا بنروح القريه الاولمبيه نتمشى واصور لكم الحدث خخخخخخخ

طلعت مسكرة لانهم يجهزون لاولمبياد المعاقين اللي بيكون باجر....يعني بكرة عندهم

وهذه القريه الاولمبية تحت وهذا طريقها من المول

صورتها لكم من فوق ....شوفوا الملاعب جدام ....مع النصب التذكاري

كأنه سكة قطار الموت او الافعوانيه ملتويه من فوق

رست تورانت ........مطعم شكله حليوووو بس لان احنا شبعانين

تابع
‬

توبليرون · 17-03-2015, 06:48 PM

التنظيم والبساطة تجتمع هني واحترام القانون

النصب التذكاري

شوفو الشبات .....اعمدة الاضاءة.......انا متعمدة اترجم لهجتي لكم

لان مو للي ما يعرفون اللهجة لا للي تخلوووو عن لهجتهم المحلية .........يعني احناااا وااااو

وشوفوا بوابة الويست فيلد اللي كنا طالعين منها وخلفي صار القرية الاولمبية

برادا عجبت بنتي جنطة بس ما حصلت اللون اللي تبيه

هذا مثل الشلال ينزل منه ماي خفيف

في جلسات تحته قعدت وبنتي راحت تشوف المحلات اللي يمه

خلصنا من بره وما شرينا شي

يلا يا شباب امرووو وتدللوا

ملاعب او استراحة اطفال تحت بالسرداب وانا مصورتها من الطابق الثالث

وتعبت من التفرفر قلت حق بنتي خليني وروحي انتظرج هني مع الصحبة الاسيوية

شوفوا السقف رووعه

جون لويس ......تصدقون هالسفرة احس ما شرينا وااايد

من هالمحلات الكشخه بس لبس العيد طبعااا عيد الاضحى

اخذنا منهم والا باجي شغلات كل المحلات يا بوهم بالكويت وبالخليج

هذا المحل عجييييييييبه عنده الاحذيه النسائية

شوفوها عدل ما شرينا لان اللي عندهم كله كعوووب عاليه كانت والواطية مو ذاك الزود

رحنا ننتظر البنات لما يطلعون من السينما

قعدنا تحت عند شاشات تعرض الافلام المعروضة وتاريخ عرض الجديدة

هذا فيلم البنات اللي داشينه بريف

قالت لي بنتي تعالوووا عند محل الكب كيك

رحنا لها بهالمحل اللي دش بمخي بالفرفرة انه محل الكب كيك .....يا حلووه شغلاته بس

ما شرينا منه شي لان عندنا تقريبا نفسه بالكويت.......وهذه فترينته

انتبهوا على القوري وهو يصب بالكوب ......كل المحل تقريبا بالوان العلم البريطاني

وطلع اللي تقصده بنتي بالدور الثاني وهذا اهوووووو

وقعدنا نحلي عنده طعم رووووعه

محل صغير وشخص واحد يبيع فيه..........بس هذا

مدوووا ايدكم لا تستحووون ........يلا تفضلووو

وهذه طلباتنا اربع كب كيك واربع بيبسي

وما يصير اي شي يدخل البلعوم من غير البيبسي والماي

دانه تحب القصص ........واحنا قاعدين ناكل شفت مكتبه مقابل المحل

قلت لها روحي شوفي ...........نسيناها اقول لهم يمكن قعدت تقرا قصص المكتبه كلها

طولت طرشت لها غنومه .......ما ارجعت الثانية

ولو تشوفون الوقت بين اخر صورة وبين تحركنا من محل الكيك

راح تشوفون الوقت اللي قعدوه هناك

بالاخير طرشت عليهم اختهم ........ردت قالت للحين ما اشترت قالت لهم بنمشي

عاد الحمدلله رجعوا وراها ولا مو عاجبهم بعد يقولون ما خليتونا نشوف ........الوقت تأخر

بهالفترة قعدت انا القط لكم جم صورة من ديكورات المحل

رووعه حق مطبخ

وهني بعد ما ارجعوا قلنا خلاص نرد الفندق

خليجنا والدول العربيه على الكرة الارضيه

وعلى الستارة

وعلى نفنوفي خخخخخخخ

لحد يتطنز .........اي اي انت لا تتطنز ههههههههههههه

وهذا مساج مجاني وحتى الصغير له دور يا حليله

والاهم شوفوا اللاعب الاولمبي....وشفنا الصراحة وايد شفنا من الامارات وتونس

بس استحيت اصورهم طول ما حنا ماشين كانوا متواجدين

شفت وحدة عجوووز لابسه لبس الحكام ومعلقة الكرت برقبتها

شفنا هالمحل ينووو عليه البنات ودخلت بالغصب طلعنا

ببلوفرين وجنطة لابتوب .........اشكال حلوة وغريبه

اي نسيت اقول لكم افتحوه بالافنيوز .......الله يعيني

ورجعنا بتاكسي

وشوفوا النصب التذكاري للقرية الاولمبية

كلفنا التاكسي للمنطقة 50 باوند رايح و50 باوند في الرجعه

الحلوووو ان السايق في الروحة قال لنا هذه المنطقة بعيدة ليس تروحون الويست فيلد هناك خل اوديكم

اللي بشبربوش

قلنا له لا احنا نبي هناك للقرية بنشوفها........عندهم امانه ما يهمه الفلوس كثر ما تهمه مصلحة الراكب

وهذه الامانه من زمان انا مجربتها بسواق التاكسي

مرة وقفنا تاكسي والا حرمة تسوق........شفناها حبوبة ...

قلنا لها نبي مدينة العاب بكرة تاخذينا عليها واعتقد كنا نبي ثورب بارك

قالت لنا هذه بعيدة في وحدة اقرب بس انا ما اوديكم لها ما اقدر عندي ولدي وين اخليه طول اليوم

قلنا لها يبيه معانا قالت ما اقدر .........المهم جيتنا ثاني يوم وودتنا لمحطة باصات وقصت لنا التذاكر

وركبتنا الباص وقالت لنا بالساعه الفلانية تطلعون لان اخر باص يمر بهالوقت

وكان وقتها عيالي صغار .........صج ما شاءالله عليهم ما تهمهم الفلوس بكثر الامانه

ووصلنا فندقنا

وهذا بروشر ......السوق

شرينا اغراض وايد

تكرمون ملابس من بريماك وغيره من الاشياء وشنطة سحب حطينا فيها اغراضنا

وشرينا من المحلات الثانية كمان احذيه وملابس

وجنطة من باول بوتيك لغنيمة وصديقاتها

دانه شرت بوك

كذا شغله والله ناسيه بس تسوقنا عدل الصراحه

وانا لقيت هالميداليات خمسه ب15 باوند

ونشووووفكم على خير يا احلى متابعين

بأجزاء جديدة

شكرااا لكم

‬

q8ya metnaqla · 17-03-2015, 07:44 PM

يا سلاااام يا ام حسييين من احلة المولات
انا بعد ماافتحوه كله مطيحه فيه احبه اللي بسترادفورد مااحب الشبربوش
ومحل الجواتي عزكم الله موجود في سكة كارنابي اسمه irregular choice
Irregular Choice | Womens | High Heels | Flick Flack
ترا جواتية حلووه انا ماخذه منه مريح

ههههههههههههه اما سالفة الكرنفال صج لا يحوووشك

قواج الله على هالجزء الحلو

توبليرون · 17-03-2015, 08:57 PM

اقتباس : المشاركة الأصلية كتبت بواسطة q8ya metnaqla

يا سلاااام يا ام حسييين من احلة المولات
انا بعد ماافتحوه كله مطيحه فيه احبه اللي بسترادفورد مااحب الشبربوش
ومحل الجواتي عزكم الله موجود في سكة كارنابي اسمه irregular choice
Irregular Choice | Womens | High Heels | Flick Flack
ترا جواتية حلووه انا ماخذه منه مريح

ههههههههههههه اما سالفة الكرنفال صج لا يحوووشك

قواج الله على هالجزء الحلو

وااايد عجبني هالمول احسن من هذاك يمكن لانه ذاك اصغر
ووايد نروح له
بس هذا عجييب والقعده بره تونس
ومشكورة على عنوان محل الجواتي ان شاءالله يستفيد منه
لا يحوشك كرنفالهم انحشنا خوش نحشه
ويقويج الله على مرورج الحلوو

PrinceOfPersia · 17-03-2015, 09:16 PM

ماشاء الله

متابع على المقاعد الأمامية

توبليرون · 17-03-2015, 11:41 PM

اقتباس : المشاركة الأصلية كتبت بواسطة PrinceOfPersia

ماشاء الله

متابع على المقاعد الأمامية

نتشرف بحضورك يا برينس
شكراا للمتابعه

الغردقاوي · 17-03-2015, 10:14 PM

يعطيكي العافيه يا مراقبتنا الغاليه
حقا يا زين ما فعلتم لما تركتم المهرجان ورحتوا المول ، فليس كل نشاط بتلك البلاد قد يناسبنا
وتوجد صورتين مرتبطين مع بعض جدا وهي التي أمام السلالم الكثيره ، نفس الحدث بنفس اللحظه بس واحده من بعيد والتانيه من قريب ههههه بس واضحه والفكره جميله
حلو المساج المجاني اللي بالمول هذا ، بصراحه ده يشجع على الذهاب للمول كل يوم ههههه

مستمتعين بالصور والسرد يا أم حسين
متابعك

توبليرون · 17-03-2015, 11:46 PM

اقتباس : المشاركة الأصلية كتبت بواسطة الغردقاوي

يعطيكي العافيه يا مراقبتنا الغاليه
حقا يا زين ما فعلتم لما تركتم المهرجان ورحتوا المول ، فليس كل نشاط بتلك البلاد قد يناسبنا
وتوجد صورتين مرتبطين مع بعض جدا وهي التي أمام السلالم الكثيره ، نفس الحدث بنفس اللحظه بس واحده من بعيد والتانيه من قريب ههههه بس واضحه والفكره جميله
حلو المساج المجاني اللي بالمول هذا ، بصراحه ده يشجع على الذهاب للمول كل يوم ههههه

مستمتعين بالصور والسرد يا أم حسين
متابعك

يعافييك ربي يا احمد
اي والله وبعد زين منهم كانو الشرطة يوزوعون نشرات بالتنبيهات للجميع
شي مرتب الصراحة
السلالم كسرت ظهري وركبي خخخخخخ
اما المساج هههه
المول هو بنفسه يشجع
الحمدلله انه عاجبكم وهذا من ذوقك يا احمد
وانا تسعدني متابعتكم الجميلة

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
باسم الله أبدأ ترتيب رحلتي الثانية إلى تركيا ، نستفيد من خبراتكم.	ابن بطوطة	تركيا	19	27-07-2015 08:19 AM
10 صور لن تصدق أنها في الوطن العربي !!!	أبوعبدالله (الاسفار )	البوابة السياحية	13	31-03-2015 03:17 AM