السفر إلى سيرلانكا 5-Sep - الصفحة 2

محب السفر1 · 05-08-2017, 02:53 PM

‎في سيرلانكا وعن تجربة الشهر الماضي انصح بسائق ثقة وامين ويتحدث العربية وملم بكل نواحي سيرلانكا اسمه صديق وهذا جواله 00940777543034 ومعه سيارة صغيرة وكذلك كبيرة فان

شقاوية 333 · 01-09-2017, 08:57 PM

رحلة سعيدة

بوصلووح · 17-09-2017, 01:14 PM

جدولك ممتاز وواضح انك بحثت بشكل جيد
اذا ممكن افيدك بشي باقولك تجنب طريق نواراليا - بنتوته
لأنه طويل جدا ومتعرج ومتعب بمعنى الكلمة

يعني اذا ممكن بعد نجمبو تروح ل شلال هونس فولز مباشرة و تاخذ لك ليلة او ليلتين فيها
ثم تطلع منها إلى نواراليا , ثم ترجع لكاندي - ثم كولومبو ثم بنتوته .
او رتبها بالشكل الي تشوفه مناسب المهم حاول تتجنب هالطريق + لا يفوتك فندق هونس فولز في الجبل قريب من الشلال , مكان جميل جداً ومميز .

و بخصوص الاسعار قارن عروض الشركة مع اسعار البوكنق + 60$ يوميا للسائق
يعني مثلاً الشركة عطتك سعر 2000$ و انت حسبت مجموع الفنادق مع الضرائب =1200 + 600 للسائق صار المجموع 1800 فتوكل على الله . ولو طلع سعر الشركة اعلى خلك على البوكنق

و هو شي محير الصراحة لأن تخاف الشركة تجبرك على اماكن معينه تاخذ منك فايدة و تضايقك في رحلتك
لكن هي ضمان لك لو صار شي في الحجز هي تتحمل المسؤولية و مايصير ان السعر يختلف عليك لأنك دافع مسبقا

اما لو من بوكنق يمكن يزيد عليك السعر في الضرايب او يقول انت ماذكرت ان معاك طفل مثلا .. الخ
و يمكن يطلع السواق يبي ياخذ فايدة منك بعد و يوديك اماكن يستفيد هو منها ..

فأعمل مقارنة و شوف شنو الافضل و انا اشوف ان الاعتماد على شركة معروفة و معتمدة افضل .. و بالتوفيق

هذا تقرير رحلتي لسيريلانكا قد يفيدك
https://www.arabtrvl.com/vb/t14707.html

فيصل و القادم معجبون بهذا.

بوصلووح · 17-09-2017, 01:16 PM

في مدينة حلوه بعد تبعد عن بنتوته ساعة تقريبا
اسمها جال او جالي .. تاريخية و ممتعة اقرى عنها

فيصلمعجبون بهذا.

RedaHQ · 23-09-2017, 09:08 AM

يعطيكم العافية الجميع .. إلي شارك وإلي أفادنا بمعلومات
...

خلينا نبدأ من جديد

سافرنا ورجعنا ..

حالياً عندنا كمية من المعلومات
وحاب أضيفها لكم ..

العملة ...

100 ريال سعودي = 4079 روبية (لكن مستحيل تحصل هذا الرقم .. طيب ليش (لان كل مكان يصرف على كيفة))
100 ريال سعودي - 26.5 دولار امريكي .. لكن مستحيل تحصل هذا الرقم .. إلا عند البنوك .. و يفضل صرف ريالاتك إلى دولارات ..
ليش نصرف ريالاتنا إلى دولارات .. في سيرلانكا الدولار قوي جداً ..

على سبيل المثال ..

100 دولار أمريكي = 15150 روبية سريلانكية
بينما
صرفت
400 ريال سعودي = 14800 روبية سريلانكية

بالنسبة إلى العملة
يفضل تحميل برنامج على الجوال يحل لكم هذي المشكلة
برنامج أسمه Currency

وسائل النقل

توجد أربع وسائل نقل:

- القطار
- الباصات (Van)
- سيارات سيدان
- التوك توك

- القطار ..
وهو ملزوم بخريطة معينة ونقاط توقف معينة
كان ودي أجربة .. واشوفة كيف يعبر في المزارع في الغابات (لكن ما حالف الحظ)
ليش ما حالف الحظ .. لان معاي زوجتي وابنتي .. وكنت أبحث عن وسائل الأكثر راحة في التنقلات
السعر .. قليل

- الباصات ..
وهي الأفضل في التنقل من منطقة إلا منطقة آخرى
بحكم الحقائب الكثيرة و الاغراض الكثيرة الموجودة معاك .. راح تنحط في الخلف
وراح تكون عندك مساحه في اخذ الراحة
السعر .. مرتفع

- السيارات ..
الأفضل في التنقل بين المواقع السياحية ..
السعر .. متوسط

التوك توك ..
الأفضل للتنقل بشكل سريع مثلاً للذهاب إلى السوبر ماركت و الرجوع
السعر .. قليل

السائق

بالنسبة إلى السائق
فهم ينقسموا إلى اربع انواع

- سائق الفندق
- سائق يطلب من الفندق
- الشركات
- الكوشكات

- سائق الفندق
في العادة يكون ملزوم بجدول الفندق ..
شنو المقصود بجدول الفندق .. جدول الفندق إلا هو زيارة بعض المناطق السياحية (مقتصر عليها فقط)
يعني ما يقدر يوديك غيرها .. يكون سعرة في العادة مرتفع
(مع العلم سعرة مرتفع - لكن أفضل هذا النوع أنا) - ليش أفضل هذا النوع؟ لاني أحس بالآمان
راح تواجهكم بعض المشاكل مع البعض منهم (لا يفهم عربي ولا انجليزي = ضياع في الطاسة)

- سائق يطلب من الفندق
بعض الفنادق إلي ماعندها سائقين .. يكونوا متعاملين مع بعض الشركات الداخلية الصغيرة لتأمين سيارات حق السواح ..
أستخدمت بعضهم ولقيت السعر مناسب جداً لي (طبعاً أرخص من سائق الفندق)
وايضاً افضل هذا النوع .. لان ما يقدر يتلاعب في السعر بمزاجة
و بموجب ان هذا السائق مطلوب من الفندق .. فأنا أعطي لفلوس إلى الفندق و الفندق يعطيها السائق
أيضاً راح تواجهكم مشاكل في هذا الموضوع إلا وهو موضوع اللغة.

- الشركات
في شركات كثيرة جداً في كل منطقة وفي منهم على مستوى سيرلانكا بالأكمل
بعض من هذي الشركات يتعامل مع الفنادق وتقدر انت تروح إلى نفس الشركه وتتعامل معاها
وتقدر أيضاً تكاسر معاهم وتختار المناطق إلي تبيها و السعر إلي تبيه و السيارة إلي تبيها
والحلو في الموضوع .. لما تروح لهم .. على الأقل تقدر تطلب واحد يتكلم أنجليزي او عربي اذا توفر
بالنسبة إلى السعر .. في شركات إلي على مستوى سريلانكا .. سعرها مرتفع
في الشركات إلي مستوى المنطقة .. يكون أرخص

- الكوشكات
بالنسبة للكشكات .. أيه انا استخدمتهم على الأغلب لأخذ التوك توك .. لشراء بعض الحاجيات من السوبر ماركت أسعارهم طايحه في الارض وهذا الحلو فيهم
هل بس عندهم توك توك أكيد لا .. عندهم باصات و سيارات

الشوارع ..

توجد ثلاث انواع من الشوارع ..

- هاي وي
- شوارع مرصوصة
- شوارع رملية (ترابية)

- هاي وي ..
الهاي هو عباره عن شوارع محدوده جداً قريبة من المطار العاصمة و المناطق المجاورة
كما يأخذ قمية تقريبا 300 ربية سريلانكية للستخدامة
طبعاً معروفة .. بتعدد الشوارع .. (يعني الشارع الواحد مقسوم إلى عدد من الخطوط)

- شوارع مرصوصة ..
أغلب شوارع سريلانكا هي من نفس هذي الفئة..
وهو شارع واحد ينقسم إلى رايح جاي .. وراح يتعبكم كثير بسبب توقف بعض السيارات على الجوانب
و نزول بعض الصخور من الجبال

- شوارع رملية ..
راح تلاقي هذي الشوارع داخل القرى وبين المزارع

أكتفي بهذا القدر ..
وغداً لنا تكملة

شاكر لكم ومقدر

بوصلووح و فيصل معجبون بهذا.

بوصلووح · 24-09-2017, 01:19 PM

ماشاء الله صرت خبير في البلاد هههه
وين سكنت و كيف كان ترتيب المدن ؟؟

فيصلمعجبون بهذا.

RedaHQ · 25-09-2017, 12:17 PM

حي الله أبو صلوح

بالنسبة للجدول .. المرفق
راح تلاقي عدد الايام .. المدن
الفنادق والمناطق السياحية إلي زرتها

شاكر ومقدر لك

الصور المرفقة

Capture.JPG‏ (79.3 كيلوبايت, المشاهدات 143)

بوصلووح و فيصل معجبون بهذا.

توبليرون · 30-09-2017, 01:33 AM

رحله ممتعه ان شاءالله
ولا تنسى التقرير

فيصلمعجبون بهذا.

RedaHQ · 30-09-2017, 12:26 PM

رجعنا لكم ..

في البداية وكأي شخص موجود هنا ..
بحثنا على المعلومات المناسبة و المناطق المناسبة
لك يتم زيارتها في الدولة ..
وبدايتها من الفيزا ..
واستخراج الفيزا .. لها طريقتين ..

الطريقة الأولة .. عند الوصول إلى مطار كولمبو .. (راح تلاقي نافذه صغيرة اول ما تدخل الجوازات)
الطريقة الثانية .. عن طريقة الفيزا الاكلترونية .. (طبعاً قيمة الفيزا الألكترونية هي 35 دولار للشخص البالغ و ببلاش للأطفال).

قبل ما نبتدي .. (ما راح أحط صور من سفرتي .. راح أقتصر على أخذ صور من النت)

اليوم الأول

وصلنا عند الجوازات .. سلمتة الجوازات مع الفيز .. ورجع لي الفيز بدون ما يشيك عليهم
وسألني أنت مستخرجهم من النت .. قلت له نعم .. فقال لي خلاص خليهم عندك.

أستلمنا الأمتعه .. وتوجهنا إلى الخروج
طبعاً انا كنت طالب تكسي (من الفندق - وقلت لهم راح اعطيكم لفلوس لما أوصل)
لما وصلت عند بوابة الخروج (ما لقيت صاحب التكسي)

(أيوة أنسحب علينا)

فـ هناك راح تلاقي .. (شركات السياحة متوفره بعنف - استخراج الشرائح و إلى آخرة)
طبعاً .. عيوني كانت تبحث عن .. تكسي المطار .

ركبنا تكسي المطار .. للتوجه إلى نوجمبو (Dolphin club Hotel) بـ قيمة 45 ريال

https://i.ytimg.com/vi/Jztfms1bdxA/maxresdefault.jpg

طبعاً لما خرجنا من المطار .. أنشرح صدرنا من المنظر
ركبنا تكسي المطار .. وبعد ما مشينا .. وقف التكسي (وشال لوحه تكسي المطار - والظاهر أن التكسي من شركة سياحية مو من المطار) .. !! لا تسألني كيف..

مع المشوار .. صار الشارع ضيق (ومنظر المدينة مخزي .. أيه ماعجبتني منظر المدينة) - ليش طيب؟! أعطينا سبب
بسيطة لاني كنت متوقع الأجمل (نصيحة لا تتوقع شي وانت رايح )
وأظلمت علينا الدنيا .. لان وصلنا العصر مع المشوار .. (صارت الدنيا ظلمة)

http://static.panoramio.com/photos/large/76112251.jpg

فما كان في مجال نشوف الطبيعة في أول يوم بشكل مبسط.
وصلنا إلى الفندق .. وطلب التكسي مبلغ زيادة .. يقول لان الفندق تبعكم بعيد وانا مو متفق مع تكسي المطار انك تصير عدد الكيلوات إلى هذا الحد
عجيب عجيب .. أنا مالي خص .. أنا ادفع لك مثل ماهو موجود في الفاتورة

(طلع التكسي يحسب كم كيلو من المطار إلى الفندق).
طبعاً سويت روحي أصمخ هههه

نزلنا للفندق ..
وستقبلونا بمشروب جح مع فوطة باردة .. (أيييه شيل عناء السفر).
الأستقبال خبرني .. وقال لي محتاجك شوي قلت له نعم؟؟
قال في مجال اغير غرفتك قلت ليه ليش .. قال حسب خبرتي انها ما راح تعجبك .. قلت له نشوف

http://mrkzgulfup.com/do.php?img=25639

رحت معاه .. وشفت الغرفة .. كانت في المبنى الكبير إلي يكون قبال المسبح الكبير (رقم 1).
قلت ليه طيب شنو البديل المتوفر ..

أخذني إلى الجهه الثانية إلا سكني في مثل الكوخ منعزل وقدام البحر !!
قلت له بس .. خليني هنا ونساني (رقم 2).
(سكنت في كوخ أفضل من الغرفة إلي كنت ساكن فيها).

اليوم الثاني ..

طبعاً من الصبح رحنا نتفطر .. (وعجبنا البوفية وجلسنا أكثر من ساعه ونص) واحنا ناكل (ليش!) - لان ما اكلنا شي بالطيارة بحكم أبنتي .. كانت في حالة تخريب ههههه

رجعنا إلى كوخنا الجميل ..
ورحت أسأل عن رحلة إلى Muthurajawela Marsh
لكن أفادوني .. بما أن عندك طفل رضيع - فإحنا ما نقبل انك تاخذها .
سألت أكثر من مكان (كلهم عطوني نفس الجواب).

بإمكانك مشاهدة الرحلة عن طريقة اليوتيوب

ورجعت الكوخ بخيبة أمل ..
وقمنا بأخد جولة في المنتجع .. بشكل كامل

وبعدها أخذنا توك توك وتجولنا شوي في نوجمبو

تقريباً نوجمبو (مافيها مناطق سياحية كثيرة لذلك)
ما كان عندنا حلول .. غير الجلوس في المنتج والتنزه فية.

في الغد القريب نكمل البقية

فيصلمعجبون بهذا.

فيصل · 01-10-2017, 02:58 AM

حمدلله علي السلامه

زين تسوي نفسك أصمخ معاهم
طنش تنتعش بما أنك وصلت ومتفق معاهم علي سعر معين
غريبه يشيل لوحة المطار
الفندق ما قصر علي تغيير الغرفه
أنت ما كنت متفق مسبقا معاهم علي سائق يعني شركه سياحيه
ولا فكرت تأخذ من المطار
شكرا لك
ومتابع

بوصلوح القريه اللي تقصد هي قول

بوصلووحمعجبون بهذا.

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سيرلانكا.. إستفسارات	هدوووء	بوابة الهند وسيرلانكا	4	04-06-2019 02:13 AM
هل تستحق سيرلانكا ذلك	المغترب	بوابة الهند وسيرلانكا	24	26-10-2018 06:07 PM
سيرلانكا لأول مره	NESCAFE	بوابة الهند وسيرلانكا	21	13-08-2018 10:19 AM
سيرلانكا ام الفلبين	الاميز	بوابة الهند وسيرلانكا	6	18-05-2017 03:28 AM
مساعدة لرحلتي الى سيرلانكا	طلال مداح	بوابة الهند وسيرلانكا	14	29-03-2016 11:54 AM