السلام عليكم ورحمة الله وبركاته

أسعد الله صباحكم ومسائكم بكل خير و سرور

راح أدخل في الموضوع مباشرة بالنسبة لإستخراج الفيزا ،...

بداية أنا كنت مترددة من أي سفارة أطلع الفيزة !!! وهل راح أسافر أو أكنسل السفر والسبب حامل وقلت يالله ماراح أفوت السنة هذي بدون سفر >> حريم يحبون السوق والسفر

بالوقت الضايع قلت بطلع الفيز من السفارة الفرنسية لأني سبق وطلعتها من عندهم و السبب الثاني إجراءاتهم سهلة وسريعة

فتحت الموقع لقيت المواعيد بعيدة وأقرب موعد في تاريخ 6 أغسطس وكنا بتاريخ 9 يوليو ،، قلت لازم أغير السفارة

حست مابين السفارات وجلست أدور على اي سفارة موعدها قريب مالقيت ... سبحان الله بتاريخ 10 يوليو ربي سخر لي وحدة أجنبية حبيبة تشتغل بسفارة الرياض وما قصرت ساعدتني ،، عرفتها بالصدفة بمقر عملي عن طريق اجراء مكالمة لها


قالت لي كلميني بكرة الصباح و راح أساعدك ،، وفعلاً كلمتها باليوم الثاني بتاريخ 11 يوليو وطلبت مني صور الجوازات و تاريخ السفر المتوقع و حجوزات الطيران و خطاب تعريف من عملي و قالت لي أنها أرسلت خطاب توصية لي وللمرافقين اللي معاي

فجأة بعد ساعتين ونص كلمتني قالت لي بكرة الساعة 8 ونص توجهي للمركز الموحد بالخبر على صالة vip
بكامل أوراقك ولا تتأخري... وفعلاً اليوم الثاني توجهنا للمركز الموحد وكان يوم الأربعاء بتاريخ 12 يوليو بالوقت المذكور سابقاً..

من ضمن التوصيات راح احصل على الفيزا مدتها 4 سنوات ان شاء الله << اذكروا الله

دخلوني مع المرافقين اللي معاي والحمدلله كنا اول ناس ودخلونا قبل يبدأ دوام الموظفين بربع ساعة.. بقية الناس تنتظر على الكراسي برا

الحمدلله تيسرت الأمور ولازلت أنتظر أستلام الجوازات ..


وحدث ما لايتوقع واللي هو السيستم تعطل
اليوم رحنا نتأكد اذا الجوازات وصلت ولكن للأسف قالوا السيستم عطلان وأنتظرو أسبوع زيادة

تواصلت مع اللي ساعدتني بالرياض وقالت السيستم بفرنسا هو اللي عطلان وحسب كلامهم إنّو راح يتصلح على الأغلب يوم 26 يوليو هذا على حسب إفادتهم قبل الويك اند ... طبعاً ايام الويك اند عندهم تختلف عن أيام الويك اند عندنا (هم السبت والأحد )

وفي قائمة الانتظار 4000 شخص متقدم على الفيزا و إجراءاتهم لازالت معطلة حتى وقت إصلاح السيستم

قالت لي بكرة راح يداوموا الفرنسيين وإذا في اي اخبار جديدة راح تقول لي،، الله يجزاها الف خير ماقصرت

وربي ييسر امورنا كلنا و ييسرها

دعواتكم لي .... و رجاءً لأحد ينشر أخبار غير متأكد منها 100% بخصوص السيستم او اي شي آخر ....

شكرا على المعلومات المفصلة. ورجاء عطينا الأخبار اول بأول.

آخر سطر ماله داعي .. قولي تجربتك بدون همز ولمز واساءة للناس .. واضح انك تقصدين موضوعي ... بتقولين مااقصدك انا اتكلم بشكل عام .. بقول لك لا واضحه..

وكل واحد له تجربته الخاصة .. كلامك مو رويترز وكلامي مو بي بي سي ...

ما صار الا كل خير ياجماعة

وكلكم اصحاب تجارب مميزة وخبرة جميلة نستفيد منها

الله يسهل لكم وشكرا على ذكر تجربتك

الله يعطيك العافية

ان شاء الله تتيسر للجميع

يعني حتى الواسطة مانفعت
بس غريبه السستم اللي عطلان في فرنسا معناه أجل كل سفارات فرنسا بدول العالم متعطله ؟!!!!!!