بسم الله الرحمن الرحيم

اعتبر نفسي محظوظه لانني عضوه بهذا المنتدى الجميل والي تحس ان كل الاعضاء قلوبهم مفتوحه لمساعده بعض بكل مجالات السفر والسياح . الحمدلله على نعمه الصحبه الطيبه والمعلومات المفيده بمنتدانا .

ولاني ممتنه لكم حبيت ارد القليل من الفضل لمنتدانا بتقريري عن اذربيجان البلد الجديده نسبيا من ناحيه السياح العرب . اتمنى يعجبكم تقريري ويسفيد منه اكثر عدد من المتابعين . ونبدا بسم الله

الناقل :فلاي دبي . المطار حلو ومرتب وتدفع الفيزا بالمطار بقيمه 20 دولار للشخص .
الفنادق
Divan express 4* باكو :
الغرف جيده بس المكيف كان مو بارد _ الفطور ما يتغير ابد والموظفين في المطعم جدا غير متعاونين والغريبه موظفين الفندق ما يقبلون البقشيش ؟ طيب خدمه تعبانه كيف نكسب ودكم ؟
QafQaz Karvansary 5 * قبالا :
حلو الفندق وراقي والفطور ممتاز. بس للحين مو متعودين على الخليجين شفناكم عائله عمانيه واماراتيه حسيت اننا من أوائل السياح الخليجين.
Marxal Resort & Spa 5 * شيكي :
فندق رائع فوق الجبل والقريه تتشوفها تحتك كانك في مسلسل هايدي والموظفين بشوشين وفي برامج وعروض أغاني بالليل وتمارين صباحيه للأطفال بالنهار والمطعم للفطور وللوجبات الثانيه ممتاز ( لاحضت في أذربيجان ان أسعار المطاعم بالفنادق نفس أسعار المطاعم بره وبعض الأحيان ارخص )
جلسنا في فرنده الفندق والكوفي شب وفجاه برد الجوشفنا الجرسونات يركضون و جابو لنا بطانيات وصراحه حبيت الحركه ذووق ولما مطرت جابو مظلات
Imperial Mountain resort 5 * قوبا :
فندق حلو وفيه أشجار التفاح والورد في كل مكان . المطعم للفطور جميل والخدمه ممتازه المساوئ النت كحيان فيه و مافيه مكيفات ( الجو كان جميل ما احتجنا مكيفات )
خط الرحله : اجمالي 13 ليله و 14 يوم
3 ليالي باكو
ليلتين قبالا
ليلتين شيكي
ليلتين باكو
ليلتين قوبا
ليلتين باكو

العمله المنات : كل منات يساوي ريالين و30 هلله او 230 فلس بحريني . اخذنا معانا دولار وغيرنا العمله بعد الوصول .

الصور المصغرة للصور المرفقة

 

برنامج الرحله باكو –قوبا – قبالا- شيكى

اليوم الاول: الاستقبال في مطار حيدر عليف الدولي من قبل يوسف (وهو المرشد السياحي ومندوب شركه فري سبيرت تورز للسياحه ) الشركه نظمت لنا حجوزات الفنادق والتنقلات طول الفتره وصراحه ماقصرو مثل كل مره تعاملنا معاهم كانو اكثر من ممتازين . احنا جربناهم في 2012 في رحله جورجيا لمجموعه من 9 اشخاص . وفي 2015 مجموعه من 21 شخص رحله لتركيا وهذي الرحله الثالثه لمجموعتنا 14 شخص كلنا عائله وحده اخوان وخوات واولادنا وبناتنا.

يعد الوصول الى الفندق وأستلام الغرف – ساعه ونص راحه. بعد ذلك ذهبنا الى محل الصرافه لتغير العمله وكنا جوعانين ... طلبنا من يوسف يودينا مطعم حلو وودانا مطعم اسمه بيبي ... يقدم فيه الاكل الاذري الذي يشبه الاكل التركي لحم ومشاوي وعندهم طبق اسمه صاج فيه مشاوي مشكله مع بطاطس وخضار حوالينه . المطعم كان فيه موسيقي ومغنيه اتغني اذري وتركي ومغني يغني ايراني ...صراحه جو المطعم نسانا تعب الرحله واستطربنا مع المغني الإيراني وخلصنا عشانا وبدأنا بجولة في البوليفارد (كورنيش باكو) الواقع على ضفة بحر قزوين للاستمتاع بالأجواء الرائعة والتقاط الصور التذكارية كان الجو مساء جميل مع نسمه باردة من البحر . تمشينا عند فنيسا الصغيره وهي قوارب تمشي في ممرمائي مثل فينيسيا اللفه ب2 منات ونص . ( المنات يساوي ريالين ونص تقريبا ) للشخص وتقريبا كل لفه 15 دقيقه .شفنا أبراج الشعله من بعيد وصورنا واهي ورانا (أبراج الشعله شعار باكو ) وهو النار وبعدها رجعنا الفندق للنوم والاستعداد لأول يوم في باكو .


اليوم الثاني : بعدالفطور توجهنا الى ساحة الشهداء واستمتعنا بمشاهدة المدينة بأكملها من اعلى وصورنا عند النار المشتعله (رمز باكو) وشفنا أبراج الشعلة بالنهار وصورنا معاها. جو باكو يميل الى الحراره بالصيف اذا وقفت في شمس ممكن يكون حر بس هناك دائما نسمه هواء بارده جميله بالظل . درجات الحراره كانت بين 25-30 بالنهار وبين 22-26 مساء . وبعدها توجهنا الى منطقة باكو القديمة حيث برج العذراء (قلعة العذراء) أحد اهم المعالم السياحية في باكو والمصنف كأثر هام في منظمة اليونسكو العالمية.

ممكن تاخذ تذكره وتدخل البرج الصراحه كان الجو حار فقررت اني اخذ ايسكريم واريح . الشباب بالقروبب دخلو البرج وقالو درج طويل ومتعب. يبيعون البوظه نفس طريقه تركيا الي يلفها ويحط ويشيل فيها . ويبيعون فواكه لذيذه ..الصراحه في اذربيجان الفواكه والخضروات طعمها غيييير عن كل شي اكلته بحياتي ..طعم قوي ولذيذ . وفي محلات في السوق تبيع هدايا تذكاريه جميله اسعارها مو رخيصه بس مع المكاسره تصير معقوله .

بعدها اقترح المرشد السياحي اننا نتوجه الى قصر شروان شاه الذي يعود تاريخه الى القرن الخامس عشر وقال ان المسافه قريبه مشي ... طبعا قريب وسهل للمرشد لانه متعود على المشي اما احنا هلكنا لين وصلنا ... والجو كان مشمس والارض مرتفاعات فنصيحه روحو القصر بالسياره .
وصلنا القصر وكانت تذكره الدخول اظن 5 منات الصراحه توقعت قصر كشخه بس اتضح ان القصر قديم حوالي 600 سنه فهو مبنى اثري مو راقي وايد لان القصور في ذاك الزمان كانت هذي كشختها . بس عجبتني حديقه القصر كان فيها اشجار فستق وخوخ قديمه ومثمره . ماشاء الله الفواكهه والخضار عندهم لذيذه جدا طعمها مختلف جدا عن فواكهنا ..

بعدها رحنا مجمع البوليفارد . مجمع حلو وفيه منطقه مطاعم واسعه تغدينا وريحنا اشوي والبنات راحو يتسوقون طبعا وبعدها طلعنا لزياره منطقه البوليفارد اول شي ركبنا الويل (سميتها عيون باكو) نفس لندن أي .

وبعدها ركبنا بالقطار الي ياخذك على طول البوليفارد في نوعين من القطارات (مغطيه ومكشوفه ) اخذنا المكشوفه علشان نستمتع بالهواء العليل ويوصلك القطار لعند حديقة فينيسيا الصغرى كانت الشمس على وشك الغروب واخذنا تذاكرللسفينه الشخص 3 منات . اللفه قصيره تقريبا 15 دقيقه . بعد ما خلصنا لفتنا جلسنا في الحديقه المكان حلو وكان الجو جميل الى ان صار وقت الغروب والرجوع للفندق . قررنا نتعشى بمطعم كوشي باشي في الفندق وكان اكله لذيذ .

اليوم الثالث : بعد الأفطار سقنا الى شبة جزيرة ابشوران لمشاهدة اسطورة أذربيجان التي لا تنطفئ (جبل النار) والذي كان يعتقد قديما بأنه جبل مقدس لعدم انطفاء النيران به ابدا ويعتبر الجبل مزار ديني لبعض اتباع الديانة الزرادشتية من إيران والهند وغيرها ويصل ارتفاع النيران به قرابة العشر أمتار . الصراحه ما عجبتني مافيها شي خطير سياقه مسافه طويله واتشوف حريقه... طيب وبعدين ....

صورنا وخلصنا ورحنا الى مركز حيدر عليف والذي تأسس عام 2012 هو متحف ومركز ثقافي صممنه المرحومه المهندسة العراقية زها حديد ونالت عنه جائزة لندن للتصميم . حلو المكان فيه معلومات كثيره عن اذربيجان وحاكمها الحالي وفي ركن لملابسهم التراثيه وركن للادوات الموسيقيه واللوحات .

بعدها توجهنا الى مجمع جنجليك للغداء وطبعا اذا دخلنا مجمع لازم شويه تسوق .

رجعنا الفندق نرتاح لأننا كنا معزومين في مطعم شروان شاه . عماد مالك الشركه السياحيه جاء مخصوص من جورجيا علشان يسلم علينا وعزمنا على المطعم الجميل جدا. هو يبدو لي انه قصر قديم قامت ادراه المطعم بالاحتفاظ بالاثار الي فيه مثل المتحف تتمشى تشوف الأشياء وفي قاعات كثيره. راحو العيال يتمشون شافو قاعه خاصه فيها حفله زواج . وفي أماكن مفتوحه للاكل وأماكن مغلقه فضلنا المغلق علشان الجو ماكان بارد .



اليوم الرابع: بعد الأفطار طلعنا من باكو متوجهين الى مدينة قبالا والتي تبعد 218 كم تقريبا عن العاصمة بنقضي يومين في االطبيعة الخضراء الساحرة وجبال القوقاز. قبالا هي أقدم مدن أذربيجان على الاطلاق في الطريق وقفنا في مطعم صغير كان حلو وفيه جلسات رايقه اظن المنطقه اسمها اسماعيلي وبعدها وقفنا عند مجموعه باعه يبيعون انتاجهم المنزلي من أنواع المربي والعسل الطبيعي والفواكهه اللذيذه . وصلنا الفندق كان جميل جدا وراقي جدا وفي مغني يغني باللوبي وبالمسا طلعنا لمطعم على النهر بس للأسف كان ظلام فمااستمتعنا بالمنظر كفايه وكان عيدميلاد الدليل السياحي يوسف فسوينا له مفاجاه بالتعاون مع المطعم وجبنا له كيكه وغنينا له وانبسطنا بالعشوه ورجعنا للفندق ..





اليوم الخامس: طلعنا الى تلفريك توفانداغ هو تلفريك كبير في 4 مراح اللفه تأخذ 45 دقيقه أتوقع بالشتا يكون رائع لان المرتفاعات تكون للتزحلق . بالنسبه لنا نزلنا بكل محطه صورنا كم صوره ورحنا المحطه الي بعدها الى ان خلصنا ونزلنا . التذكره حوالي 7 منات للشخص .

بعد التلفريك رحنا مطعم وتغدينا وكنا خلاص طفشنا من الاكل الاذربيجاني لانه بالضبط نفس التركي مشويات الى مالا نهايه ...بس الحمدلله اكلنا وقررنا ناكل بمطعم الفندق للفتره الجايه لان عندهم اكل إيطالي وبرجر وبيتزا وغيره . في باكو جميع أنواع المطاعم متوفره بس بقوبا وقبالا وشيكي بس اكل اذري .... نفس الاكله بكل المطاعم (صاج)

بعد الغدا رحنا بحيرة نوهور منطقه جميله فيها أشجار عاليه وخضره وانشطه مثل ركوب الخيل وركوب الزوارق فى البحيرة ويبيعون اطواق الورد الطبيعي للشعر والفوشار والكاندي كوتن . شربنا شاي واكلنا الحلا الآذري الاكل خليط بين المطبخ التركي والإيراني . وبعدها رجعنا الفندق تعشينا ونمنا.

اليوم السادس: بعد الأفطار توجهنا الى نادي الرماية وجربو العيال حظهم مع المسدسات الصغيره والكبيره وبعدها رحنا مركز البولينج ونفس الشي احنا الكبار نصور والصغار يلعبون . تغدينا في مطعم اذري وطبعا نفس المنيو ...


وبعدها رحنا مدينة الالعاب الترفيهية قبالا لاند الدخول ببطاقه تشحنها وبالشحن تشتري كل شي وتركب بالالعاب . حديقه حلوه متوسطه الحجم فيها تقريبا 20-25 لعبه لمختلف الاعمار . الصغار انبسطو بالالعاب واحنا تمشينا وصورنا الورد وركبنا السفينه والدولاب الهوائي (ان شاء الله اسم اللعبه صح ) وبعدها رجعنا الفندق عشى ونوووم .


اليوم السابع: بعد الافطار طلعنا من الفندق متوجهين الى المنطقه الثالثه شيكي وهى تبعد حوالى 90 كم من قبالا بعد الوصول حطينا اغراضنا بالغرفه وخرجنا نستكشف الفندق الجميل . الفندق كان منتجع رائع فوق قمه الجبل تشوف القريه تحتك و عند المدخل عربات جولف توديك للمطاعم بالفندق او لمنطقه المسبح والسبا (المسبح اداخلي لان الجو بارد).

تغدينا بالفندق الجميل وبعدها طلعنا جولة فى مركز المدينة ورحنا منطقه شيكى خان وهي من اقدام المناطق ويعود تاريخة الى القرن ال 18. تمشينا بالمنطقه القديمه الي ذكرتني بمسلسلات الكارتون حق زمن الطيبين كان فيها المحاربين يلبسون خوذات ويجلسون على الخيل والاسوار الحجريه منطقه جميله جدا وكان في متحفين بس كانو مغلقين لأننا وصلنا بعد الساعه 5 . تمشينا وصورنا وبعدها رجعنا الفندق .


اليوم الثامن: بعد الافطار توجهنا الى منطقة منتجع مارخال هو فندق في المنطقه القديمه من شيكي وكان قصر قديم تم تحويله لفندق فيه حديقه جميله وبعدها تمشينا في بازار شيكي فيه المتاجر الاذربيجانيه و يضم مجموعه من السلع من ادوات التجميل الى الالكترونيات و التوابل بالاضافه الى الوجبات المحلبه.(سوق صغير جدا)

بعد ذلك توجهنا الى القصر الخانات و هو واحد من اهم المعالم الاثريه القديمه شيد عام 1762 بمزيج من الزجاج و الخشب بدون مسمار واحد و يعتبر عمل معماري نادر المبنى صغير نسبيا وفيه درج متعب والدخول بتذكره بقيمه 3 منات .

ثم بعدها توجهنا الى متحف شيكي الوطني . فيه النماذج الحياتيه المعبره عن تاريخ المدينه وبعدها توجهنا الى قلعة جياليارسان و كانت تعتبر الحماية لمدينة شيكي . بعد ذلك رجعنا الفندق كانت الساعه تقريبا 6 المسا الشمس تغيب على 9 تقريبا قررنا نجلس بالكوفي شب الخارجي للفندق كان الجو جميل والخدمه ممتازه والسواليف حلوه ماانتبهانا الا الساعه 9 ونص اذن المغرب فقررنا ندخل الغرف نصلى ونتجهز لليوم التالي . في الفندق قالو لنا في عرض واغاني بالمسا بس احنا مو راعين سهر وحفلات .


اليوم التاسع: بعد الأفطار غادرنا شيكى الجميله الى باكو- كان الطريق تقريبا 5-6 ساعات بس للامانه ما حسينا بتعب الباص كان مريح والجو جميل وصلنا باكو تقريبا على وقت الغدا رحنا على طول للمجمع وتغدينا .بعدها اخذنا السايق بجوله وشفنا مسجد بيبي حياة . وفيه مزار او قبر حفيده الامام حسين والعهده على الراوي .

أذربيجان دوله مسلمه بس ما اعتقد شعبها متدين . ماشفت متحجبات ولا سمعت الاذان طوال فتره 13 ليله الا مره وكان يوم جمعه في قبالا . في باكو تشغيل ميكروفونات المساجد ممنوع مثل ماقالو لنا . الغالبيه العضمى من الشعب شيعي على مااظن لان المساجد كانت على نظام الشيعه. في احد المتحف وقف معانا الموظف وكان يتكلم انجليزي وقال انا حلمي اتعلم العربيه علشان اقرا القران واعرف ديني زين . تمنيت لو الجمعيات الدينيه تروح لعندهم وتساعدهم على تعلم القران وقرائته .

اليوم العاشر: قررنا نخصص هذا اليوم للتسوق ورحنا سوق كبير يبعد عن باكو بس مايحضرني الاسم للأسف . يبيعون فيه منتجات آذريه . سوق ذكرني بالأسواق الشعبيه التركيه الأسعار مو رخيصه بس معقوله. بعدها طلعنا رحنا مجمع الجنجيليك ومجمع البوليفارد و شارع نظامي تمشينا وتسوقنا .

اليوم الحادى عشر: بعد الأفطار وفى العاشرة صباحا غادرنا باكو وتوجهنا الى مدينة قوبا والتي تبعد 170 كم تقريبا عن باكو تعتبر قوبا عاصمة إقليم رايون وتشتهر بزراعة التفاح وصناعة السجاد. اول ما عدينا بوابه قوبا شفنا مجموعه فرق مدرسيه لدول مختلفه مثل جورجيا وأذربيجان وايران وتركيا ودول ثانيه ماعرفناهم. أتوقع جيران أذربيجان . الظاهر هذا استعراض سنوي يمشون الفرق بالشارع كل فرقه بزي الدوله وموسيقتهم نزلنا صورنا معاهم واستمتعنا بجزء من العرض لانهم كانو بنقطه البدايه .

بعدها وقفنا عند مطعم اذري تغدينا وواصلنا للفندق . الفندق جميل وفيه أشجارتفاح تقطف وتاكل وفيه أشجار كثيره للفواكهه والورد وفيه جلسات حلوه خارجيه بس عيبه ان المطعم في مبنى والغرف في مبنى ثاني بس مو بعيد . الجو كان جميل فما احتجنا المكيف لان الفندق ما كان فيه تكييف . ريحنا اشويه وبعدها طلعنا لجولة المدينة وشفنا مسجدي الجمعة وسكينة خانوم وتمشينا اشوي مركز المدينة رجعنا الفندق للعشاء والنوم.


اليوم الثانى عشر : بعد الأفطار طلعنا الى منطقه الغابه وكان في منتزه جميل سبحان الله الأشجار العاليه مسويه مثل السقف للمنطقه ظلال وكان في قعده بسيطه كوفي شب شعبي يبيعون حلا ومشروبات بارده وحاره وكان في خيول يركبونها اللفه ب5 منات . جلسنا نستمتع بالاجواء الصغار راحو يركبون الخيول .

وانشوف في الجهه المقابله حفله عيد ميلاد لطفله آذريه وكانت حفله كبيره فيها معازيم من جميع الاعمار . والكبار اكثر من الصغار رجال ونساء وفي فرقه تعزف أغاني اذريه وبعد فتره اشتطو وقامو يرقصون رقصتهم المحليه واحنا كنا متفرجين .

بعدها طلعنا لمنطقه فيها مقبره جماعيه سوها ارمنيا في شعب أذربيجان بعد تحريرها وهذي المقبره الجماعيه تم اكتشافها بالصدفه عام 2000 لما قررو يبنون ملعب كره قدم بنفس المكان فقامت الحكومه وسوتها مزار ومتحف لذكرى المذبحه. وفي جزء من الأرض يبين جمام وعظام بشريه . كان المكان مرتب وفيه أشجار تفاح كثيره وفيه متحف كبير منظم جدا وفيه الكثير عن المعلومات عن تاريخ منطقه قوبا وحكامها والشعب .

طلعنا بعدها منطقه الشلالات وكان في ناس تبيع عسل وتطبخ فطاير شعبيه على الفحم جربناها لذيذه . وبعدها رحنا منطقه جبليه تمشي مسافه في طريق وعر وبعدها تشوف بحيره جميله وكوفي شب بسيط والباعه الجوالين يبيعون فواكه طازجه وممكن تستاجر سفينه صغيره تتمشى بالبحيره . وبعدها رجعنا الفندق تعشينا وتجهزنا لليوم الثاني الرجوع لباكو.


اليوم الثالث عشر: غادرنا قوبا راجعين لباكو الطريق تقريبا اخذ 3 ساعات بس الرحلات البريه في أذربيجان مريحه فالشوارع منظمه والاسفلت بالشوارع ممتاز. طلبنا من يوسف ياخذنا لمجمع نتغدى فيه وبعدها نروح رحله بالباخره جولة بحرية في بحر قزوين من البوليفارد تشابهه رحله البوسفور في تركيا .

تغدينا وريحنا بالمجمع والي بغى يتسوق تسوق وبعدها طلعنا للباخره كان الجو جميل والشمس تغرب ...فاستمتعنا بالرحله رغم ان السفينه كانت مكتضه بالناس ...الشعب الاذري شعب يحب العائله والأطفال ماشاء الله تشوف كل الناس تمشي مجموعات وعدد الأطفال كبير مع كل عائله لا يقل عن 4-6 .
خلصنا جولتنا ونزلنا البوليفارد تمشينا اشوي بعدها رجعنا الفندق

اليوم الرابع عشر: كان هذا اخر يوم لنا بباكو فقررنا نطلع بعد الظهر اول شي رحنا حديقه حيوان باكو ( من العادات والتقاليد العائليه لازم نشوف حديقه الحيوان في كل بلد نزورها) حديقه صغيره لكنها مرتبه وفيها الكثير من الحيوانات الصغار انبسطو على الدب . بعدها رحنا كملنا تسوق وتغدينا ورجعنا الفندق لان كان التخطيط بالليل نروح مطعم بيبي (المطعم الي رحناه اول ليله بباكو) ونحتفل بعيد ميلاد اختي .

وصراحه كان احتفال جميل المغني الإيراني غني لها كل عام وانت الحب بالايراني وكان في سياح إيرانيين بالمطعم رقصو وصفقو معانا وطفينا الشموع .

ورجعنا بالليل الفندق جهزنا شنطنا وطلعنا للمطار اليوم الي التالي الساعه 12 ظهرا .

أتمنى ان يكون هذا التقرير مفيد للي يحب يستكشف أذربيجان البلد الجميله التي بدأت تدخل مجال السياحه بخجل .

تحياتي ام ملاك

[IMG][/IMG]

[/IMG]

الكرز اللذيذ

[/IMG]

اكلتهم المشهوره الصاج

[/IMG]

[/IMG]

[/IMG]