سياحة عائلية في اورلاندو الأمريكية - الصفحة 5

أبو سعود Q8 · 08-03-2015, 11:57 PM

اقتباس : المشاركة الأصلية كتبت بواسطة هاوية الاسفار

ما شاء الله عليكم
معظم الألعاب تخوف صراحه و يبغيلها حد قلبه قوي
و كل مدن الألعاب كبيرة و مسليه
نتمنى انه تكون عندنا مدينة ألعاب بهالحجم و الضخامة في دبي
بانتظار البقية

مشرفتنا الظاهر من النوع الي تخاف من الألعاب
لازم تاخذين دورة مع العيال عشان تنسين الخوف وتتمتعين باللعب

بالنسبة للمدن اي والله كبيرة ومسلية لآخر درجة
انا قريت قبل مدة طويلة ان دبي قاعده تبني مدينة ملاهي عالمية ، يمكن يونيفيرسال ستوديوز ماني ذاكر
عموما ، ماشاء الله دبي فيها كل شي حلو
الله يزيدكم من خيره ويحفظ دار الحي من كل شر

أبو سعود Q8 · 09-03-2015, 12:03 AM

مدينة المرح

Fun Spot

هذي المدينة ليست عالمية مثل ديزني ويونيفيرسال وسي وورلد و و و الخ ، إنما مدينة محلية
لكنها رووووووعة لعدة أسباب راح أذكرها بعد شوي
المهم انها مدينة العاب مناسبة للكبار والصغار
في لها فرعين أحداهما في اورلاندو والآخر في منطقة كيسيمي وهي منطقة ملاصقة لاورلاندو
في هذا الجزء بتكلم عن الموجودة في اورلاندو

الموقع الرسمي :

هذا موقعهم على الانترنت ومنه تقدرون تختارون المنطقة المراد زيارة حديقتها

Fun-Spot

العنوان :

كما ذكرت ان في لهم فرعين أو مدينتين
عنوان الحديقة الموجودة في اورلاندو :

Add : 5700 Fun Spot Way
Orlando, FL 32819

تقريبا يكون مكانهم بأحد أطراف جانبي شارع الانترناشونال درايف
يعني قريبة جدا من سكنا

الأسعار :

التذاكر في هذي المدينة ما تعتمد على العمر ( صغار وكبار ) إنما على الطول !!
في طول أو حد معين عندهم والي أقصر من هذا الحد يكون له سعر ارخص من الي أطول منه
الطول أو الحد هذا هو 54
بس لا تسألوني شنو وحده القياس لأني مادري
طبعا مو بالمتر ولا بالسانتي متر ، يمكن بالقدم أو بالانج أو غيرها من وحدات القياس

الي طوله أكبر من 54 سعره = 45$ دولار
الي طوله أقل من 54 سعره = 35 دولار

طبعا هذا السعر
الرسمي عند بوابة الدخول
وممكن لو تحجزون عن طريق موقعهم بتحصلون على خصم 5 دولار لكل تذكرة
أما لو تسوون مثلنا وتحجزون من محل فزت اورلاندو ............ فالسعر يكون أرخص من السعر الرسمي وأرخص من سعرهم بالموقع الألكتروني

ساعات العمل :

تختلف أوقات العمل على حسب الأيام
هناك أيام تفتح فيها الحديقة الساعة 10:00 صباحا وأيام أخرى تفتح الساعة 2:00 الظهر
أما وقت الاغلاق فهو ثابت عند منتصف الليل في كل يوم

مميزاتها

بقولكم عن مميزاتها الي شفتها وليش حبيناها وحبينا زيارتها أكثر من مره بالسفرة الواحده

1- لأن سعر تذاكرها رخيص جدا ، فهي ارخص من ديزني ويونيفيرسال و و و و
2- لأن مساحتها أكبر مما تصورت ، يعني كبيرة وفيها العاب وايد ومتنوعة وتناسب كل أعمال الاطفال
3- لأن العابها كلهم حلوين ، مافي شي ممل
4- لأن ما عليها زحمه نهائيا ، الناس قليلة بالحديقة لدرجة ان اليهال يلعبون اللعبة 3 أو 4 مرات متتالية !! والله ما أقص عليكم بس هذا الصج
يمكن احنا زرناها بيوم ما كان فيه ناس وايد أو يمكن اهي جذي الحديقة ما يزورنها ناس وايد ، الله اعلم
5- السبب هذا أكيد بيحبونه الحريم ، وهو ان بجانبها آوت لت كبيييييير جدا جدا ، وطبعا الحريم ومن ظمنهم ام سعود يفضلون التسوق على المرح واللعب
لذلك احنا ( الرجال ) نودي الحكومة ( الحريم ) لصرف وتدمير الميزانية ( التسوق ) واحنا نمسك ونراقب العيال ( بحسره )

والحين تعالوا معاي ندخل الحديقة الي حبيناها كلنا

هذي بوابة الدخول

من أحلى وأسرع الألعاب بالحديقة هذي اللعبة

تمتد على مساحة كبيرة وطويلة

يالله يا اعضاء منو بيلعب مع العيال

مشرفتنا ( هاوية الاسفار ) أم علي الظاهر تخاف من هذي الألعاب
في مكان فاضي عند سلمان تعالي ولا تخافين
العيال اسم الله عليهم بانتظارك

ماشاء الله عليهم

في العاب للكبار وفي للصغار
الكل بيستانس بالحديقة

وين مشرفتنا أم حسين ( توبليرون )
صديقها ياسين بانتظارها

بالعافية

هذي لعبة الزحلاقية

هذي أيضا من الالعاب المثيرة والسريعة

حبيبي الله يحفظه

من قبل ما نزور الحديقة كنا نمر عليها ونشوفها من الشارع
واليهال كانوا يحنون علي يبونها عشان يجربون لعبة السيارات
وهي لعبة تقريبا للكبار لأن السيارات تعمل بالبانزين وعلى حلبة حقيقية وكبيرة
والحمد الله ان وديتهم عشان يجربون اللعب فيها ويستانسون

يويو زعلان لأنه مالعب

بس الحمد الله قالولي يصير يركب معاي بالسيارة

وحتى ياسين طوله ما يأهله لقيادة السيارة بروحه ، لازم انا أكون معاه

تعالوا نكمل لعب بالمدينة الرائعة

الشيئ الحلو الي صارلنا ان بعد ما خلصنا من كل الالعاب رحنا للآوت لت القريب من الحديقة
تسوقنا وتغدينا وأخذنا أم سعود
ولما طلعنا العيال شافوا الحديقة وقاموا يحنون يبون يرجعون ، فرجعنا للحديقة ولعبنا لغاية ما غابت الشمس

طبعا ما حجزنا تذاكر مره ثانية يكفي وجود الشريط على ايديكم للدخول واللعب لمدة يوم كااااااااامل

تقييمي للحديقة :

ماله داعي أعيد وأكرر مميزات الحديقة لأني ذكرتهم بالأول
باختصار ، الحديقة عجيبة و عجبتنا كلنا وأنصح فيها لكل سائح مع أطفاله
أما لو كنتوا من غير أطفال ...... روحوا الآوت لت

إن شاء الله عجبكم جزء اليوم ..... ؟؟
أحس ان البوابة فيها خمول ................

AL Tunaijiمعجبون بهذا.

هاوية الاسفار · 09-03-2015, 01:21 AM

لا بالعكس يا ما لعبت بالالعاب في القرية العالمية اول ما فتحوها
و عندنا بعد مدينة ألعاب الهيلي في مدينة العين فيها ألعاب تعتبر خطرة على أيامنا و اخر مرة زرناها بعد الزواج و لعبت وَيَا اختي الكبيرة خلينا العيال عند الرياييل و احنا استمتعنا بوقتنا و بعدين صار عندي عيال و ما كنّا نفكر نزور أماكن الترفيه عشان ما نضيع وقتنا و نكتفي بأماكن لعب الأطفال
بس الحين كل ما لها الألعاب تخوف و تستوي خطيرة يعني اذا ركبت الكبسولة يكفي
متابعين التقرير بشوق

وليد عنبه · 09-03-2015, 06:59 AM

اقتباس : المشاركة الأصلية كتبت بواسطة أبو سعود Q8

أهلين أخ وليد

اللعبة موجودة في أكثر من دولة ماعدا الكويت للأسف
إذا ما جربتها انصحك بتجربتها

شكرا لك على المتابعة المستمرة
تحياتي

اكيد بجربها بدبي انشاء لله مع العيد الفطر الجاي اذا الله احيانا حاطها اولويه بعد ماسمعت رأيك شكرا لك

التاج الذهبي · 09-03-2015, 12:07 PM

اقتباس : المشاركة الأصلية كتبت بواسطة أبو سعود Q8

AirHeads Trampoline Arena

هذا سلمكم الله مكان لطيف لرياضة القفز
طبعا خاص بالأطفال مو للكبار

بصراحة عجبني المكان من زرته في لوس انجلوس وبسفرتي الأخيرة لاورلاندو بحثت عنه والحمد الله لقيته موجود في اورلاندو

سلام بوسعود توا ما نور قسم امريكا بتقاريرك الممتعه والمفيده
ممكن تعطيني عنوان هذي اللعبه في لوس انجلوس وهذي اللعبه موجوده في الشارجة ودبي

منيرة · 09-03-2015, 12:23 PM

يا سلام عليك يابوسعود Q8

تقرير فايف ستار

بالنسبة لسعر التذاكر ارخص مرة اخذتها البحرين - لندن - نيويورك - لندن - البحرين 280 دينار بحريني على طيران الخليج بالتعاون مع اميركان ايرلاين

و الترانزيت بلندن مايزيد عن ساعتين

واصل

أبو سعود Q8 · 09-03-2015, 11:47 PM

ممشى المدينة في اليونيفيرسال

Universal City Walk

اليوم ماراح أتكلم عن مدينة أو حديقة ترفيهية
باخذكم إلى الممشى الموجود عند مدينة اليونيفيرسال واسمه
سيتي وولك

المكان باختصار عبارة عن ممشى كبير وجميل الشكل ، يحتوي على العديد من المحلات منها التابع لمدينة يونيفيرسال ومنها غير ذلك
أغلب المحلات عبارة عن كافيهات ومطاعم عالمية ومحلية ، صالات سينما ، محلات لبيع الملابس والتذكارات وغيرها من الأمور

هذا موقعهم على النت للي يحب معلومات أكثر

CityWalk

سبق وأن ذكرت الممشى هذا بجزء مدينة اليونيفيرسال ، لكني ما حطيت لكم الصور
واليوم ان شاء الله بحط لكم الصور وان شاء الله تعجبكم الصور ويعجبكم المكان الجميييييييييل جدا جدا

هذي بعض الصور للمشى من بعيد بوقت الغروب تقريبا

هذي الجهه المقابلة للممشى

فندق هارد روك يتوسط الجهه المقابلة للممشى

Hard Rock

وهذي صورة أوضح

ممكن استأجار قارب والتجول بين ضفتي النهر أو الممر المائي

هذا مدخل مدينة يونيفيرسال

هذي السينما

CINEPLEX

وهي كبيرة جدا ومقسمة إلى عدة قاعات وفيها عدة أفلام

المكان بالليل يعج بالناس والسياح

هذا محل خاص ببيع تذكارات مدينة اليونيفيرسال
من ملابس وهدايا وتذكارات و و و ....... الخ

Universal Studios Store

هذا مطعم و مقهى مكسيكي

الله يحفظهم العيال دشوا بالنافورة وقاموا يلعبون

طيارة حقيقية في المقهى

هذي بضاعة بعض الأكشاك الموجودة بالممشى

يوجد العديد من المطاعم والمقاهي في الستي وولك
أتوقع تعجب جميع الأذواق

هذا مطعم بابا جمب اللذيييذ

BUBBA GUMP

وهو مطعم مأكولات بحرية مشهور جدا في أمريكا

هذا موقعهم الألكتروني للي يحب أن يشوف المنيو والأكلات الي فيه

Bubba Gump Shrimp Co. - Fresh Seafood, Family and Fun

له فرع في ماليزيا سبق وأن زرناه ، ومثل ما سمعت بأن له فرع في دبي !!
أما فرعه الكائن في اورلاندو فهو موجود هنا في الستي وولك
من أحلى وألذ المطاعم الي تقدم أكلات بحرية في أمريكا

هذا المطعم من الداخل وديكوراته الغريبة

أنصح بتجربة الأكل فيه

تقييمي للممشى :

يستاهل 10 على 10 في كل شيئ
سواء بالموقع القريب أو بالترتيب أو بالإضائة الجميلة أو بتنوع المحلات والمقاهي ودور العرض والمطاعم
ينفع لقضاء الوقت الضائع بين الطلعات للأماكن السياحية
وينفع لسهره جميلة أو مشاهدة أحد الأفلام بالسينما مع وجبة عشاء لذيذة
بالصباح يكون جميل لكن بالليل يكون أجمل وأحلى
أنصح بزيارته وبشدة خصوصا من المغرب إلى الليل
ولالالالالالالالالالالالا أنصح بزيارته بعطلة نهاية الاسبوع أبدا

وإلى لقاء آخر مع جزء آخر من التقرير

AL Tunaijiمعجبون بهذا.

أبو سعود Q8 · 09-03-2015, 11:57 PM

اقتباس : المشاركة الأصلية كتبت بواسطة التاج الذهبي

سلام بوسعود توا ما نور قسم امريكا بتقاريرك الممتعه والمفيده
ممكن تعطيني عنوان هذي اللعبه في لوس انجلوس وهذي اللعبه موجوده في الشارجة ودبي

وعليكم السلام ورحمة الله
أهلا عزيزي

القسم منور بوجودك ولا يهونون باقي الاعضاء
شكرا على مرورك وكلماتك
تفضل هذا العنوان الي طلبته

Add: 1301 N. KELLOGG DR. | ANAHEIM, CA 92807

وهذا موقع الشركة الالكتروني الموجودة في لوس انجلوس

Sky Zone Anaheim Home

هاوية الاسفار · 10-03-2015, 12:05 AM

من احلى الصور اللي شفتها و اختيارك بوقت الغروب و بعده أضاف جمالية على الموقع بسبب الإضاءات
و الألوان
تسلم اخي بو سعود

أبو سعود Q8 · 10-03-2015, 12:05 AM

اقتباس : المشاركة الأصلية كتبت بواسطة منيرة

يا سلام عليك يابوسعود Q8

تقرير فايف ستار

بالنسبة لسعر التذاكر ارخص مرة اخذتها البحرين - لندن - نيويورك - لندن - البحرين 280 دينار بحريني على طيران الخليج بالتعاون مع اميركان ايرلاين

و الترانزيت بلندن مايزيد عن ساعتين

واصل

أ
هلا بمشرفتنا منيرة
أشكرج على مرورج ومتابعتج للتقرير
وإن شاء الله ياخذ التقرير فايف ستار بالمعلومات والصور الي فية

بالنسبة لسعر تذاكركم رخيص نوعا ما ، بس حجزنا على الخطوط السعودية كان أرخص بكثير
عموما السعر يعتمد على الحجز المبكر وعلى الموسم ايضا
حاليا سعر التذكرة على الخطوط الكويتية 215 دينار مباشره إلى نيويورك وبالعودة ترانزيت في لندن
السعر جدددددددددا رخيص بس لو بتحجزينها بالصيف سعر التذكرة مو أقل من 500 دينار
حتى الاماراتية مسوين عرض من الكويت إلى نيويورك 250 دينار ، بس بهذا الوقت مو للصيف

أسعار الصيف مولعه حاليا للأسف

مشاهدة نتائج الإستطلاع: ما هو تقييمك للتقرير لغاية الآن ؟؟
ممتاز	104	95.41%
جيد جدا	5	4.59%
جيد	0	0%
مقبول	0	0%
المصوتون: 109. أنت لم تصوت في هذا الإستطلاع

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رايحين اورلاندو ،، واحتاج مساعده	Hanadonh	بوابة امريكا	8	03-04-2015 03:18 AM
اورلاندو شهر 7+8	Mafio98	بوابة امريكا	6	18-03-2015 09:02 AM
شركه شحن في اورلاندو	Rainbow	بوابة امريكا	0	13-01-2015 09:38 AM