اليابان .. الحُلم الذي اصبح حقيقة + يوم ونصف في كوريا

bashayr · 01-10-2017, 12:25 AM

اليوم اللي بعدها خرجنا من الشقه وتركنا لهم المفتاح ورحنا لمحطه شينجكو كنا متوجهين لـ hakone
رحت لشركه خاصه اسمها odakyu واخذت منهم تذاكر لمده 3 ايام لهاكوني شامله القطار من طوكيو لهاكوني ذهاب وعوده – تخفيض لبعض المطاعم – السفينه – التيلفريك وعدّه مميزات

ومن هنا كان التنقل جداً صعب لان الشنط صارت ثقيله ومنطقه هاكوني جبليه وكلها مرتفعات وصعب سحب الشنط واتمنيت انه سبتها في طوكيو او رحنا لهاكوني في البدايه وقت ماكانت الشنط خفيفه

كان اول فندق ريوكان بمنطقه naka-gora غيّرنا القطار 3 مرات تقريباً ومن نفس الشركه اعطونا ورقه فيها مواعيد القطار لايام الاسبوع – نهايه الاسبوع – اهم المطاعم الحلال – اماكن المناطق السياحيه

اول ماوصلنا المحطه كانت بين ممرين مختلفه تماماً نزلنا من الجهه اليمين وطلع ان الريوكان بالجهه اليسار ومافي جسر بين الممرين ! إما ننزل وندور دوره كامله حتى نوصل واللي كانت تآخذ 16 دقيقه مشي أو ننتظر 10 دقايق للقطار الجاي

الخيار الاكيد انه انتظرنا 10 دقايق لما جاء القطار ركبنا وعدّينا عالجهه الثانيه

كان اسم الريوكان ( معنى ريوكان بيت ياباني تقليدي ) yutorelo – an وكان في اعلى تل والدرج طووويل جداً
طلعنا وبلغناهم ان الشنط ثقيله ونزل معانا واحد ساعدنا فيهم وهذا من افضل الفنادق اللي اقمنا فيها بصراحه واخذناه لمدّه يوم فقط وسعر الليله بـ 2714 ريال

اول ماوصلنا كان فيه عشاء مجاني والاكل الصباحي كمان مجاني وكنت كاتبه لهم ملاحظه عن نوعيه الاكل قبل مانوصل
اعتذرو لنا كثير انه الاكل ماراح يكون متنوع ومحدود ولازم نبلغهم بالوقت اللي حابين نآكل فيه لان الشيف راح يطبخ لنا خصيصاً

سويت اجراءات الـ check in وكنا جيعانين فـ اخترنا العشاء 6:30 المغرب وطلعنا نرتاح

حجزت غرفتين بحمام ينابيع مطّل على الجبل
غرفة فها سريرين وفوتون + غرفه فيها طاوله يابانيه تقليديه وفوتون

الغرف كلها من خشب وكانو مجهزّين سلات للينابيع الساخنه كل سله فيها منشفتين + حزام اليوكاتا + كيس بلاستيكي للملابس

تحت عند الاستقبال فيه يوكاتا ( اللبس ياباني ) تقدرو تآخذوه وتجربوه ببلاش ومحددين كل طول بجهه مثلا 165 – 180 وعلى جنب معروضه الاشكال كلها حتى تشوفوها + عندهم كافي مصغّر بانواع قهوه وشاي مختلفه + ايس كريم + شوكولاته وكلها مجانيه بس لحد الساعه 7 المساء

يتوفر في الفندق متجر لو حبيتو تتسوقو منه

الدور الثاني فيه كراسي مساج مطلّه على حديقه ومجاني للاستخدام

جاء موعد الاكل ومن كثر مااعتذرو اتوقعنا انه ماراح نشبع واكلنا اكل خفيف كنا جايبينه معانا من محطه القطار ( 2 بينتو فيه رز + بطاطا + روبيان + الشيء البني كانه نوع من الديدان البحريه ! ذقته وماكان له طعم وماقدرت اكملّه والنوع الثاني ماصورته وماافتكر ايش مكوناته)

الا نتفاجأ بالسفره اول شيء جابو سلطه + شوربه + مخلل وكميتها ماكانت قليله شويه جابو هذا الحلى ( نوع بالقهوه + الاخضر ماله طعم ! – السمكه مااعرف ايش وضعها – واللي بالملعقه شويه غريب ماميّزت الطعم- اللي بالكوب باميه والشيء الثاني ماعرفته ) شويه جابو فخّار فيه ذره – قطعه سمكه – توفو – فطر!

خلاص بدينا نشبع شويه الا جابو ساشيمي ( سمك وروبيان يكون نيء ) ووقتها مره خلاص شبعنا فكلمناهم انه خلاص

جو لعندنا ويحسبونا مااستسغنا الطعم او شيء بينّالهم انه مره شبعنا والاكل كثير بعدها اقترحو يجيبولنا شوايه عشان الساشيمي وشويناه واكلنا منه ولما كلهم قامو جاء النادل يقولي باقي اطباق وحلى بودينغ اعتذرتله وبلغته انه خلاص شبعنا بس البودينغ يرتبلي اياه وبآخذه معايا للغرفه آكله بعدين ( البودينغ حلى ياباني وحطو معاه كوب نسكافيه )

المنطقه مافي حولينها بقالات قريبه ومايبيعو في الفندق وماكان معانا مويا وقتها بعد العشاء نزلنا لاقرب بقاله وكنا ننزل من منحدر طووويل مايقارب 15 دقيقه وبعدها بآخر الممر كان فيه بقاله صغيره ووقت الطلوع كانو حاطيّن على الاطراف اشياء تتمسكو فيها كأنهم حاسين انه مو كل الناس تقدر تطلع ووقت الطلوع وقفت اكثر من مره للراحه كان متعب

بعدها الصباح اعطونا 40 دقيقه مجاناً لغرفه ينابيع خارجيه خاصّه وكانت مجانيه مع الحجز اخترنا الوقت وبلغناهم من وقت ماعملنا اجراءات الدخول

وقريب منها كان فيه ينابيع خاصّه بالاقدام ( مجانيه لكل النزلاء ) وانتو بكرامة وجلسنا فيها كم دقيقه وطلعنا نآكل

لقينا الطاوله مليانه زي اليوم اللي قبله ماشاء الله ( زبادي وعصير عنب طعمه خيااال – سلطه بالبيض – شاي – رز وسمك مشوي – مخلل خضار )
مالقيت لها صور بجوالي

بعد الاكل رحنا لمنطقه yumoto واللي كانت تبعد عننا بنص ساعه بالقطار

كان اليوم كامل مخصص لتجربه مثيره وحماسيه جداً ومره انبسسطت فيها

الوجهه كانت لـ Forest Adventure Hakone المكان هذا كان على طرف غابه واللي يحبو التحدّيات والمغامرات لازم يزوروه
ولهم أكثر من فرع في مدن متعدده باليابان تقدرو تطّلعو عليها من رابطهم :

Tree top parks in harmony with nature | FOREST ADVENTURE

كان فيه حبال للتسلق وعقبات بين الانتقال من شجره لشجره وبعضها تتحرك ومو ثابته

كان نوعين الاول canopy course وهذا حتى الصغار مسموح يجربوه او اللي يخافو من المرتفعات
النوع الثاني adventure course وهذا كان له شروط اهمهّا ان العمر مايكون اقل من 17 والطول مايقل عن 140 سم

وكانت المسارات فيه اكثر والارتفاعات عاليه مره وبنهايته فيه bungy jump ( قفز من مكان عالي جداً وتحت شبكه من الحبال نتمسك فيها ونتسلق الشجره )

( بتختلف نوعيه الكورسات بكل مدينه ونوعيه الالعاب والعقبات كمان بحسب ماقريت في موقعهم )

ارسلت لهم ايميل وحجزت من قبل ( مايطلبو مبلغ او دفع مسبق ) لاني قريت انه في بعض الايام يكون زحمة والانتظار يطّول لساعات بس وقت مارحنا كان فاضي مره واخذنا وقتنا وراحتنا باللعب

في هذا اليوم كنت متفقه مع toofy صحبتنا اللي ذكرت اسمها ببدايه التقرير
كلمتها وشكرتها وقت ماكنا في فورانو وصورتلها وسالتني عن جدولنا وبعد ماخبرتها اتفقنا نتقابل في هذا اليوم
بعد مانوصل لمحطه يامانوتو فيه باص مجاني ياخذ للغابه ومحطوط جنبه لوحه توضّح

الباص يوقّف كل 10 دقايق ويوقف عند المدخل تماماً ( توفي وصلت قبلنا فصورتلي شكل الباص واللوحه )

اخذنا الـ adventure course

اول مادخلنا استاجرنا بنطلونات عشان ماتنعدم حقتنا لانه تراب وطين وعندهم تي شيرتات يبيعوها لكن مافي تآجير
لو قررتو تروحو خذو لبس وجزمه الله يكرمكم ماتزعلو لو تتوسخ لانهم حاطين هذي العباره بموقعهم ويبلغوكم فيها لمن توصلو

الدفع كاش فقط وكان ￥3,600 للشخص وماافتكر كم كان سعر تأجير البنطلونات بس اعتقد الاجمالي للـ 3 اشخاص بحدود 10000 ين ووقتها عملولنا خصم لاننا 4

اول شيء يستنو مجموعه تجي ( تقريباً 10 اشخاص ) ويشرحولكم عن طريقه اللعبه لانه مافي مرشد معاكم وقت اللعب الا وقت الطلب وسعر الارشاد 5200 ين

كيف تثبتو الخطافات في اماكنها وتعليمات السلامه

مده اللعبه ساعه و 40 دقيقة الى ساعتين لكن احنا اخذنا 3 ساعات

اول شيء المرتفعات تكون بسيطه والتحديات سهله وكل مامشينا واتعمقنا في الغابه كل مازادت درجه الصعوبه وزادت العقبات

كنت اصور بالبدايه بعدين سحبت وحطيت جوالي بجيب البنطلون لان المسافه صارت عاليه مره وخفت انه جوالي يطيح

بعد ماكمّلنا كل شيء رجعنا للمحطه واتغدينا متأخر عالساعه 4 العصر

كنا رايحين لمحطه owakudani وابا اكل البيض الاسود بس كان الوقت متاخر ومافي قطار يروح للمكان
غير انه كل القطارات بدات توقف لاكثر من مكان ( نقطه لازم تنتبهو لها )

ودّعنا توفي ورجعنا لمحطتنا naka-gora ووقتها كان ابويا في الفندق الثاني وعمل الـ check in

كانت الفندقين لاصقه ببعض وغيّرت لان الاول سعره مرتفع وماحجزته الا عشان انجرب لينابيع الساخنه

الفندق الثاني اسمه yutorelo–an annex وسعر الليله الوحده 513 ريال

وقت نقل الشنط الفندق الاول طلبو من ابويا يسيبها كلها وشالو الشنط وحطوها بسياره ونقلوها للفندق الثاني ( حبيت الحركه منهم خصوصا انه المكان منحدرات زي مااذكرت ووقتها على اساس واحنا جايين نشيلها ويسيبها عند الفندق الاول )

مره ريحّو عليه وعلينا بس وقت ماجاء عند الفندق الثاني كان فيه درج لكن مو طويل فـ مافي احد ساعده وشالها كلها للغرفه

الفندق الثاني كان حجمه اصغر بكثير والخدمات اقل ( فيه حمامين ينابيع ساخنه لكن عموميه واحد للرجال وواحد للنساء )

الغرفه مطّله على شجره كبيره لكن لصغر مساحات الغرف وفيه صدى بحيث انه كنا نسمع كلام الناس اللي جنبنا بصوت واضح! الحمدلله ماسوو ازعاجات في الليل خصوصا اننا بنخرج بدري

الدفع عند الخروج في الفندقين لكن الفندق الثاني لو بتخرجو قبل 8:30 الصباح لازم تدفعولهم اول ماتوصلو

طلبت منهم مساج لو متاح وقالو بيتصّلو ويطلبولنا لانها شركه متعاونين معاها

وبعد ماطلعت فوق ولعّت لمبه في راسي ورجعت نزلتلهم وبلغت موظفه الاستقبال انه ابغاها تكون بنت مو رجال ( نقطه ثانيه لازم تنتبهولها )

وقتها اتلخبطت وقالت ماتعرف وهما جايين خلاص طلبت منها تتأكد ورجعت اتصلت وقالولها انه اللي جايين كلهم نساء ويجو للغرفه مافي مكان مخصص للمساج بالفندق

كان المساج 40 دقيقه بـ 5000 ين يعني 164 تقريباً

صحينا الصباح من 7 وعملنا check –out راجعين لطوكيو

المسافه تقريبا ساعتين و 40 دقيقه

هذا اخر يوم وحجزنا فندق جنب مطار narita لانه رحلتنا اليوم اللي بعده من 9:30 صباح

قررنا نجلس بطوكيو ونقضي فيها آخر يوم ونروح للفندق العصر او المغرب !!

وصلنا محطه شينجوكو وكنّا ندور ادراج نحط فيها شنط ( ميزه حلوه انه شنطنا حجمها صغير فـ نقدر ندخلها بسهوله )

لقينا واحد ودخلت فيه شنطتين بس والباقيه كلها فلّ ودورنا بالمنطقه المحيطه ولقينا درجين وحطينا باقي الشنط واتفرقنا
انا وابويا رحنا محطّه Tokyo station واخواتي راحو ikebukuro

اول ماوصلنا محطه طوكيو اتسوقنا ولفينا المحلات فيه محلات ( jump shop – totoro – pokemon ) المحطه تنفع للتسوق والمحلات فيها متنوعه اشتريت بسكويتات هدايا لانميات متنوعه haikyuu – gintama – one piece ( حبيت بسكويت هايكيو اكثر شيء كان بطعم الكاسترد )

بعدها رحنا لمحل tan tan وشفت بقوقل انه هذا المطعم يوفر خيارات للنباتيين وكان وقتها نفسي بنودلز
لمّا دخلت المطعم ووريتهم البطاقه بلغوني انه ماينفع نآكل الا صحن سلطه – طبق رز ساده !

ولاننا جيعانين ووقفنا طابور 10 دقايق يمكن طلبتهم كلهم مع كاسه شاي ولما جات من الصدمه ماصورتها
اكلنا وطلعنا ( كانت الكميه قلييييله جداً حق ملعقتين ممكن والسلطه شريحتين جزر و 3 حبات طماطم )

خرجنا وكان فيه جنبه مطاعم سالت مطعمين واعتذرو انه ماعندهم اللي يناسبنا والثالث طلع عنده نودلز نباتي ومافيه كحول واكلنا من عنده وماصورت اسم المحل

بعد ماخلّصنا عالساعه 2 تقريباً كان معايا اكياس ورجعنا لشينجوكو ووقتها خططت اشتري شنطه صغيره عشان ادخل فيها الاكياس اللي معايا ومعاهم كمان واشتريت من شينجوكو وحطيت فيها اللي معايا

وهنا بدأت المشكله دورنا كثير على الشنط لما لقيناهم مع انه معانا بطايق توضّح مكان الشنط بس المحطه مره ضخمه ولما لقيناهم صار معانا 5 شنط !

الوقت اتاخر ومحطه شينجوكو كبييييره وضخمه وضيعنّا اللي معانا

احنا ماصرنا نعرف هما فين ومانقدر نتحرك ومعانا 5 شنط!

الخرايط تخبّط وماتعطي موقع صحيح حطينا الشنط على جنب وكنت اطلع برا عشان اقابلهم او الاقيهم

صورنا الاماكن اللي حولينا وسالنا موظفين المحطه وكانو يوصفولي المكان اللي هما فيه او اخواتي يسالو ويحاولو يجو لكن ماوصلنا لبعض

طوّل الموضوع لـ 7 المغرب وبدات جوالاتهم بتطفي وفالاخير اخذت شنطتين وابويا 3 وخرجنا برا المحطه ومااعرف كيف شلناهم خصوصاً انه مافي مصاعد بطوول المحطه وفالاخير كان فيه مصعد وجنبه محلات وقفنا عنده

جلست انا عند الشنط وابويا راح وأخييرا اتقابلنا بعد 3 ساعات ونص أو 4 ساعات من البحث!!

كنا تعبانين جداً وبعد ما كل واحد اخذ شنطته رحنا بنركب الباص وقالو انه خرج في اخر وقت له ومابيطلع الا 6 الصباح ويمكن يجي باص عالساعه 12 او 1 !!!

سالنا عن قطار سكاي لاينر قالو روحو لمحطه اكيبوكرو ويمكن ماتلحقونه لانه خلاص ماراح يودي كمان !

التعب كان مآخذ مننا كثير والشيء اللي حاولنا نتجنّبه طول الرحله اخذناه لانه ماكان فيه حلّ غيره خصوصا وانه من 7 الصباح نلفلف

ركبنا تاكسي

بالبدايه قلت له لازم اروح لاقرب مكتب بريد عشان ارجع المودمات
لانه اليوم اخر يوم لمدّه الاستئجار ( ماحجزت اليوم اللي بعده لاننا بنكون في المطار من 7 )

وقفنا عند اول محل ومن العجله دخلتهم جوا الظرف اللي معاه وقفلت أي كلام
مارضي الظرف يدخل بالصندوق وكان جنبه فيه مكتب وفيه طابور من 4 اشخاص!

انا موقفه التاكسي والعدّاد يحسب ومره اتوترت ولما وصلت عنده حاولت اشرحله عشان يشحنه او يبدّل الظرف
قال نو انجلش واللي بعده ! ماحاول حتى يفهم وكان اول موقف يمرّ عليا كذا وماكان يبا يسمع اساسا ويآشر انه اروح
مارحت وصرت اقوله كلمه بالياباني وشويه انجليزي وكان مايخليني اكمل الكلمه ويآشر عاللي بعدي!!

رجعت وكلمت حق التاكسي وحاولت افهمه جاء معايا ونادى على واحد ثاني وجاء فهمته وقال لازم اغير الظروف قلتله يغيرها وكتبت العنوان بالانجليزي واحرف الهيراغانا والكاتاكانا لانه اعرفها باقي الكانجي وماابا اخبص وماتوصل لعنوانهم وتبع البريد رفضو يكتبوها

بعدها صاحب التاكسي ساعدني وكتبلي اياها

حطيتله لوكيشن الفندق قبل مااسلّم المودمات ولما جينا من لفه قريبه غلط باللفه ووقف على جنب وقال نحاسبه ذحين لانه غلطه هوا ( مره حبيت امانته وعلى انها لفه بس )

بعد مادفعت له ببطاقه الفيزا ووصلنا للفندق كانت 11:30 !!

تركنا الشنط بالاستقبال وعملت check in وطلعنا ننام ( الفندق يوفر باص مجاني للمطار وتكلموهم قبلها )
بلغته اننا بنروح 6:30

اسم الفندق Narita gateway hotel وسعر الليله بـ 555 ريال لغرفتين منفصله

مره زعلت لانه جنب هذا الفندق حديقة مره شكلها حلو وفيه معبد قريب منه وكنت حابه استكشف المكان باقي اليوم
قريب منه اوتلت وبنفس الفندق فيه متجرين لمحتهم وانا داخله بس كانت مقفله

صحيت 6 رتبت باقي الاكياس بالشنطه ورحنا للمطار
عملنا شحن لكل الشنط ورحنا للمحلات القريبه

ولانه كله تآخير بتآخير من الامس دخلنا منطقه التفتيش 8:30 والحمدلله ماكانت زحمة والا كان اتورطنا

وقت ماخلصنا كانت بوابه الطياره انفتحت خلاص ودخلنا على طول !!
نسيت الـ tax free واللي ختموه على جوازاتنا والاوراق والتدبيسات وكله
ماكان فيه وقت والبوابه فتحت وطابورها طويل !!

آخر يوم كان منجد لخبطه الحمدلله عدّى ..

وقت الرجوع الخطوط ضيعو شنطتين ووحده فيها كل الهدايا والاشياء اللي اشتريناها بعد متابعتهم لاسبوع الحمدلله لقيناهم ..

الشوكولاته هذي من هوكايدو وطعمها حلوو مره

بعد مارجعت للدوام لقيت هذي الكيكة اللذيذه ...

انتهى التقرير ولله الحمد , اتمنى انه تكونو استفدتو من اللي ذكرته ويساعدكم بالرحلات الجايه

باقي بوست اخير عن نصائح وارشادات لاخطاء حصلت معانا ونحتاج نتجنبها المرات الجايه بإذن الله
وراح ابدأ اكتبها

شكراً لمتابعتكم وقراءتكم التقرير لاخر سطوره وشكراً لكل اللي ساعدوني وشجعوني اني اكتب تقرير عن رحلتنا هذي واللي اول مره اكتب فيها ....

فيصل, AL Tunaiji, حلم الترحال و 3 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
باقي سنة ونصف من مدة فيزا اميركا السياحيه	blue@sky	فيزا امريكا	6	29-10-2017 03:38 AM
تطوير منطقة الأهرامات ...مشروع الحلم الذي أصبح حقيقة	تونسية متنقلة	بوابة مصر	13	21-05-2016 12:47 PM
أسئلة دقيقة..	نوح	بوابة اثيوبيا	5	04-06-2015 03:57 PM
اليابان البلد الذي لايضيع به شيئا ( المفقودات )	وليد عنبه	البوابة السياحية	28	06-05-2015 11:29 PM