اليابان .. الحُلم الذي اصبح حقيقة + يوم ونصف في كوريا

bashayr · 21-08-2017, 08:42 PM

السلام عليكم ورحمة الله وبركاته ..

بدايةً احب اشكر كل شخص ساعدني بشكل مباشر او غير مباشر استفدت كثير من تقارير الاعضاء هنا واللي لهم جُهود يشكروا عليها في المعلومات اللي طرحوها وكانت تسهل علينا كثير أو من الاخوان والاخوات المبتعثين او من محبي السفر لليابان وراح احط بعض الحسابات اللي استفدت منها كثير واللي كنت اوقات اسالهم عن اماكن او نصائح وماقصرو معايا الله يعطيهم العافيه

مهاوي تشان

توفي

محيي الشهري

سورا

سعد الهاجري ( يحب السفر لليابان وحسابه عبارة عن نصائح لاكتشاف البلد جداً استفدت منه كثير وحسابه عباره عن بوستات مقسّمه عن المطار – الفنادق – المُدن ..... الخ )

Naomi ( عندها مدونه عن اليابان وتقارير رحلاتها ومره مره استفدت من تقاريرها )

البدايـه والفكره كيف كانت ؟
التخطيط كان موجود من قبل وقت طويل بس ماكان فيه فرصه مُناسبة وكنا بنجمع أماكن تعجبنا سواءًا من النت او من الهاشتاقات عن اليابان واللي فيها اماكن ومواقع جيّده او المبتعثين والمبتعثات ونسجلها حتى وقت مانسافر تكون عندنا معلومات وفكره واضحه
اليين شهر يناير هذي السنه قررنا بشكل مبدئي اننا راح نروح , عددنا 4 انا واخواتي وابويا وفي شهر فبراير بديت احجز الطيران والفنادق ونرتب الجدول
الرحله كانت كالتالي :

الذهاب يوم 27 يونيو والعودة يوم 13 يوليو

رحلة الطيران :
بعد البحث لرحله من جده – سول والعودة طوكيو – جدة في موقع opodo ( عرفتني على هذا الموقع مديرتي ولقيت لنا رحلة بسعر مناسب جداً ) لكن ماحجزتها عن طريقهم وقررت اجرب شركة المسافر لان دايمن اشوف عندهم عروض مناسبه جداً ورخيصه

ف اتصلت بالمسافر وراح اذكر تجربتي كاملة معاهم واللي اتوقع لو باحجز معاهم مستقبلاً تكون طيران فقط لانه خدمات مابعد البيع مو مرة جيدّه ( في الفنادق احتجت اراسل الفنادق كثير وارسل طلبات واللي الحمدلله حجزتها عن طريق Booking وتمام ماحجزتها على المسافر مع انهم عرضو علينا )

الرحلة بموقع opodo كانت تقريباً تكلف 18000 ريال للـ 4 اشخاص

ولما اتصلت على شركة المسافر عشان احجز الرحلة واخذ منهم تفاصيل عن خدمات مابعد البيع الموظف كان بيقولي انه بعد الحجز نقدر نعدّل وقت مانبغى ومن خدماتهم انه يقدرو يطبعو بطاقة صعود الطائره واللي كانت مريحتني عشان مانروح للمطار بدري خصوصاً انه كل واحد مننا معاه شنطته فـ مانحتاج نشحنها لكن!

اتصلت عليهم اشوف الامكانيات المتاحه وجابولي اول رحلة بقيمة 43000 تقريباً وقلت للموظف انها ماناسبتني وانه لقيت افضل منها واعطيته تفاصيل الرحلة لو ممكن يلاقيها وقالي انه راح يكلمني وقت ماتتوفر معاه رحلة مناسبه وسالني عن الميزانيه وقلتله ماتزيد عن 20000 بعدها بكم ساعه اتصل وقال انه لقي رحله بقيمة 23000 ولما قلتله انها ماناسبتني كان نوعاُ ما فظ وبيقول انتي قلتي انك تبغي بهذي الحدود وفالاخير بعد مااتناقشنا قال راح يشوفلي شيء ثاني ومناسب وانا كنت افكر احجز خلاص من الموقع ومستنيه بدايه الاسبوع عشان اروح اطّلع بطاقه فيزا مسبقة الدفع من البنك الاهلي ( لانه كان معايا بطاقه فيزا الانماء والموقع ماقِبل عمليه الدفع ) الا اليوم اللي بعده اتصلوا عليا وانهم لقيو نفس الرحلة المطلوبه + الطيران من كوريا لليابان وكله بقيمة 18849 وكانت تفاصيلها كالتالي

الذهاب 27 يونيو جده – دبي (الخطوط السعودية ) ترانزيت 1:40 (ساعة واربعين دقيقة ).. دبي – مطار انتشون سول ( الخطوط الكورية )

يوم 30 يونيو مطار انتشون - سول الى مطار ناريتا – طوكيو ( الخطوط الكورية )

العودة 13 يوليو ناريتا – سول ترانزيت 1:40 ( ساعة واربعين دقيقة ) ( الخطوط الكورية ) ومن سول – دبي ( الخطوط الكورية ) ترانزيت 2:30 ( ساعتين ونصف ) دبي – جدة ( الخطوط السعودية )

اول مااعطاني العرض حجزت مباشره لانه السعر للرحله ذهاب وعوده طلع 15000 وشويه + الرحله من كوريا لليابان ( واللي ماكانت مشموله بالسعر اللي لقيته بموقع opodo ) كله بيساوي 18849

راح اكمل تفاصيل شركة المسافر هنا عشان تكون التفاصيل انكتبت كاملة :
قبل الرحله بيوم كلمتهم انهم يطبعو البوردينق بس عشان نجرب الخدمه قبل مانروح ونتورط وفعلا حصل اللي ببالي ولا احد استجاب لنا اتصل عليهم يقولو كلمي الرقم على الواتساب واديه تفاصيل الرحله ويطبعلك اياها ولمن ارسلتها محد رد عليا مع انهم شافوها ولمن كتبتلهم الليل قالو طلبك تحت الاجراء وفكرتهم فيها الصباح ورسلو بس من جده لدبي مع انه يقدرو يطبعو دبي – كوريا بحيث انه باقي اقل من 24 ساعه فـ فكرتهم الصباح ولا عاد ردو ! لمن رحت مطار جدة طبعتها مرة وحده ونفس الشيء قلت في اليابان يطبعولي اياها للتسهيل وكلمتهم واتس ولا ردو

فـ انا حجزت معاهم للتسهيل علينا ولقيت انه خدمات مابعد البيع مو مرة فـ مستقبلاً راح احجز معاهم طيران فقط لانه الاسعار جيدّه وحتى واحنا راجعين كنت بااغير حجز ابويا لدرجه رجال الاعمال لانه ظهره تعب من طول الرحله واحنا رايحين وبااعرف فرق السعر للتغيير ماجاء الرد الا متأخر فـ ماقدرنا ندفع الفرق ورجعنا كلنا بالدرجه السياحية ...

يوم 27 يونيو
وقت اقلاع الرحله اتاخرت الطيارة في مطار جدة مما سببلنا توتر واول ماوصلنا دبي صرنا نجري للطيارة ولما وصلنا كان النداء الاخير والحمدلله لحقنا عليها

المويا اللي بيوزعوها من جزيرة جيجو

وصلنا مطار انتشون

بعد ماوصلنا مطار كوريا اعطونا اوراق نعبيها وحده كانت اذا فيه امراض اتعرضنا لها خلال ال21 يوم الماضيه ووحده كانت بيانات ولما نزلنا عبينا الفيزا المؤقته واجراءاتها كانت سريعه

حبيييت هذا الجدار كان مزروع فيه نباتات متنوعه وكلها طبيعية شكله عجييب
بعدها رحنا نستلم الشنط وطولت مانزلت جاتنا موظفة وصارت تقولنا انه الشنط ماوصلت لاننا ماركبنا الطيارة بدري وماامداهم يشحنوها
اخذت مننا تفاصيل الشنط والوانها وعنوان الفندق وقالت راح تجي رحله اليوم اللي بعده ويجيبو الشنط معاهم قلتلهم انه لو ماجات اليوم اللي بعده راح نروح لليابان واعطيتهم تفاصيل الرحله عشان ماتوصل ويرسلوها للفندق ونتورط وقتها

رحت في البدايه لمحل تأجير مودم واي فاي اسمه LG U Rental service واستأجرت واحد لـ 3 ايام وكان لهم اكثر من مكتب ومكتبهم اللي اخذنا منه المودم يفتح 24 ساعه ووضحتلنا اماكن المكاتب الثانيه بس ضيعت الصورة ( كان فيه مكتبين بس يفتحو24 ساعة والباقيه افتكر من 7 الصباح الى 10 المساء )

( الصوره من النت لانه ماصورت المكتب )
وكل اللي اخذوه صوره من الجواز وصوره من البطاقة الائتمانيه والدفع لاحقاً .. ( الشنطه فيها مودم + بطاريه احتياطيه + سلكين شاحن + ورقة فيها خصومات لبعض المحلات وملاهي لوتي بس لانه مافي وقت مااستفدنا منها )

خرجنا من المطار ورحنا لمواقف التاكسي واعطينا الموظفه اسم الفندق وكتبته بالكوري ووقفولنا تاكسي
اعطيناه الورقة وكان الفندق قريب من المطار لانه اول شيء رحلتنا لليابان الصباح ومايحتاج نعلق في زحمة سول غير كذا ماراح نطول كلها يوم ونص

اعطونا سعر تقديري للتاكسي 10000 وون تقريباً تساوي 33 ريال سعودي ووقت ماركبنا معاه كان بيلف عالناس ويسبسب وماعرفت كيف اشتكيه فعلاً قيادته غير آمنه ولما وصلنا للفندق كان الحساب 10100 ومعايا 11000 واعطيته اياها وصار يأشرلنا انه هذا السعر خلاص ومن التعب ماانتبهنا انه فيه باقي 900 وون ( كان جلست له وخليته يرجعها ) ..

وصلنا الفندق واسمه Incheon airtail سعر الليلتين 271600 وون يعني تقريباً 902 ريال اخذنا غرفتين منفصله لصغر مساحات الغرف ووقتها مالقيت في اغلب الفنادق غرفتين مع بعض

( الصور من booking لواجهه الفندق والغرفة حقتنا )
الاستقبال كان فيه شخص واحد واول ماوصلنا قالنا الموظف لو اننا اتصلنا كان جابولنا سياره مجاناً للمطار
اجراءات تسجيل الدخول كانت سريعه وبلغناه على الشنط ورحنا على اساس نريح شويه ونروح سول
لكن لطول الرحله ماقدرنا نروح مع انه الوقت كان ظهر ويمدينا نستفيد من الوقت
خرجت بعدها اكتشف المنطقة واشتري من السوبر ماركت اشياء خفيفه ورجعت بعدها للفندق وريحنا ساعتين وخرجنا في المنطقة المحيطه بالفندق وكان فيه حديقه قضينا فيها باقي اليوم ورجعنا

صوره من مدخل الحديقه

(هذا واحنا نمشي في الحديقه جاء لعندنا وقال السلام عليكم .. وطلع كوري يدرس عربي من 3 سنوات )

( في الفندق اول ماوصلنا كنا عطشانين واخذنا مويا من التلاجه حقتهم بس بعدين نزلت وجبت مؤونه مويا ولمن سألت الاستقبال عن قيمتها لان مافي اوراق توضّح قالي انها مجانية ولو احتجنا نطلع للدور السادس وناخذ قد مانبغا )

يوم 29 يونيو خططنا نروح لمنطقتين في سول
وسالنا الاستقبال عن افضل طريقه نروح فيها للعاصمه واقترح انهم يوصلونا للمطار وناخذ قطار او باص ولما نخلص نرجع للمطار ونتصل عليهم يرجعو ياخذونا لان المنطقه منقطعه ومافيها قطار قريب والباص راح يكون طريقه طويل
فـ اخذنا بإقتراحه ورحنا للمطار وسالنا عن طريقه الذهاب لسول ووقتها اخذنا بطايق للزوار تنفع للقطار والباص استخدام غير محدود لليوم والدفع كاش ولازم نرجعلهم هيا قبل الساعه 10 مساء والسعر للـ 4 اشخاص 60000 وون تقريباً حسب ماافتكر يعني حوالي 199 ريال ( البطايق تاخذوها من مركز المعلومات information center )

هذا شكل البطاقة واعطونا معاها خريطه للعاصمة واهم الاماكن السياحية

خرجنا من المطار بالقطار ورحنا لمنطقه myeong-dong وكنا جيعانين مره ( المنطقة اللي رحنا فيها مالقينا اكل مناسب ومافي مخابز فاعتمدنا على حليب الموز كنت اشوفه بالدراما واتاكدت منه قبل مانروح – جبنه وعيش توست جبناها معانا من جده )

هذا حليب الموز وطعمه مرررة لذيييذ

من الطريق في القطار ( نهر الهان )
المهم لما وصلنا للمنطقه دخلنا المخبز واشترينا فطاير وكنا نترجم المكونات الا فطيره فيها خضار ولما وصلنا عند الحساب صار يأشرلنا ويقول pork فـ رجعناها وسالناه عالباقي قالنا كله تمام

هذا المخبز وكان جنب محطه القطار اللي خرجنا منها

هذ طلباتنا كانت فطيرتين بالفاصوليا الحمرا + فطيره بالبيض + كيك اسفنجي ساده + فطيره بالسكر + حليب وماافتكر الاجمالي كم كان بس اعتقد انه قريب 10000 وون يعني 33 ريال

ر

اول مادخلنا منطقه myeong – dong

صور متنوعه من المنطقه

لاحظت انه العصيرات في كوريا مرتفعه اسعارها مااعرف ليش بـ 15 و 20 ريال للعصير الواحد مره غاليه وتجي كميته قليله !!

خرجنا للمنطقه وصرنا نتمشى فيها وماانتبهنا للوقت فـ صار مافي وقت نروح للمنطقة الثانيه ورجعنا للمطار وطلبنا من مركز المعلومات information center يتصلو عالفندق ويبلغوهم يجو وفعلاً كلموهم قالو 10 دقايق ويوصلو وبلغونا بالبوابه ورحنا لعندها بالزبط 10 دقايق ووصل لما وصلنا الفندق قالنا انه المطار كلموه عالشنط وماطلعنا فوق بشويه الا يتصل انه الشنط وصلت وراح ابويا استلمها كلها جات الحمدلله

- معلومه مهمّه :
في كوريا كان معانا بطائق بنك من الاهلي والانماء وطلبنا من البنوك يفعلّوها على كوريا واستفسرنا منهم اذا تشتغّل وأكدو انها تشتغل هناك لكن في اكثر من محل جربنا وماكانت تقبل وبطاقه الانماء قبلت في محلين فقط فـ كان الدفع بالبطاقه الائتمانيه مسبقه الدفع في اغلب المحلات

30 يونيو خرجنا الصباح من الفندق وعملنا الـ check out وكانت الاقامه في هذا الفندق جيدّه والموظفين متعاونين الموقع كمان قريب من المطار للي بيريح او عنده رحله بعدها ويبعد 10 دقايق بالسياره عن المطار وجنبه 2 سوبر ماركت وكلها كبيرة

بعد مادخلنا مطار سول رحت رجعت المودم من مكتب ثاني ودفعت المبلغ اللي كان 24000 وون للـ 3 ايام يعني 78 ريال

في الطياره اعتذروا مننا انه مافي الا وجبه وحده اللي هيا دجاج ولانه مانقدر نآكل فـ جابولنا قطع فواكه

لما وصلنا مطار ناريتا اول شيء دورنا على مطعم ناكل فيه لان المسافه طويله لطوكيو
علبال مايدورو رحت جبت المودمات ( استأجرت 4 مودمات مسبقاً من موقع Rent iPhone, Cell / Mobile Phone & Mobile Data Card in Japan:: Global Advanced Communications ( وعرفت عن هذا الموقع عن طريق الاخ سعد واللي ذكرت حسابه قبل
اخذنا 3 انواع
ا اقتصادي وكان مع ابويا والعمر الافتراضي للبطاريه قلييل جداُ مايجلس معاه ساعتين الا ويطفي 6750 ين
2 ستاندرد وكانت جيدّه وتغطي افضل من اللي قبل ماعدا المناطق الجبليه 7350 ين للواحد
1 بريميوم وكان بيغطي في المناطق الشماليه والجبليه كمان ومره ممتاز 10450 ين
الاجمالي لـ 13 يوم 31900 مايقارب 1090 ريال

الحجز اونلاين من موقعهم وحتى خدمة العملاء سريعين بالرد على الاستفسارات ولازم تكلموهم قبل السفر باسبوعين حتى تتأكدو من التوافر , انا حجزت قبل شهر ونص من الرحله والتحويل بالبطاقة الائتمانيه وقبل مانسافر ب 3 اسابيع اضفت مودم زياده وتأكدو من التوافر ودفعته وطلبت يرسلوهم مع بعض للمطار وتقدرو تطلبو منهم يوصلوها للفندق بس انا فضّلت المطار لانه احتاج اشوف المسارات وطريق الفندق واضمن مااضيع الطريق ولو اني حفظتها كلها عالجوال من قبل )

ارسلوها على مكتب البريد وكان فاضي واستلمتها مباشره بعد مااتأكدو من اسمي في الجواز
كان كل مودمين في ظرف واحد
كل مودم واحد يجي جوه شنطه ومعاه سلك شاحن وورقه تعليمات مااعتقد صورتهم )
دخلنا المطعم وماصورت اسمه

سوشي تونه واخطبوط كلها نيئه واكلتها لوحدي كانت لذيذه

سلطه توفو وكانت عاديه والتوفو ماله أي طعم

طبق اودون تجي معاه خضار مقليه وكانت جيدّه
طبق خضار مقليه مع رز مقلي ( نفس الخضار المقليه اللي فوق بس بدال الاودون رز مع بيض ومالقيت له صوره )
ماافتكر كم كان الاجمالي وقتها

اخذنا قطار سكاي لاينر وكان يوقف في محطه ueno وهيا اللي فندقنا الاول جنبها المسافه من المطار للمحطه تقريباً 40 دقيقة ( اللي اعجبني في هذا القطار انه مايوقف كل شويه يخرج من terminal 1 – 2,3 ويوقف عند nippori وفالاخير ueno واللي هيا محطتنا وكان سعر التذكره للشخص تقريبا 2800 ين مايقارب 95 ريال

من الطريق الى طوكيو
وصلنا المحطه ورحنا مشي للفندق تقريباً 6 دقايق مشي اسم الفندق Tokyo ueno new izu hotel وكانت غرفتنا على الطراز الياباني + ابويا غرفه كينق بسرير
وقريبه من بعض ( للاسف ماكنت افتكر اصور الغرف حقت ابويا وانساها ><)

( الفنادق في اليابان اعتمدت في اختيارهم على الشكل والصور + السعر وماشفت التقييمات قبل – راح اذكر كل فندق وكيف كانت الاقامه فيه لكــن !! الفنادق اللي اخترتها كان كلها فيها مسافه مشي من محطه القطار للفندق ومع انه المسافات بسيطه ماتتجاوز 10 دقايق مشي وماكان عندنا مشكله بالبدايه ابداً لان الشنط خفيفه لكن في آخر الايام كان التنقل جداً متعب خصوصاً في الطلعات او المناطق الجبليه زي مابتشوفو معايا بعدين بإذن الله )

الاستقبال

بالنسبة للفندق اللي يشتغلو فيه يتكلمو انجليزي شوية , عندهم غساله بالعملات المعدنية لكن الوقت محدد لاستخدامها من 8 الصباح حتى 10 المساء ( السعر 200 ين للغسيل – 100 ين للتجفيف ) – عندهم يوكاتا مجاني تجربوه وحاطين على عددنا في الغرفه وفي حال اعجبكم تقدرو تشترو من الاستقبال وسعره 50 ريال تقريباً – المفتاح نسيبه عند الاستقبال واحنا خارجين ممنوع يطلع من الفندق مااعرف ليش ونكلمهم اول مانوصل وناخذه – الغرفه حقتنا زي ماذكرت على الطراز الياباني والارضيه بحصير التاتامي والاسرّه فوتونات – فيه كرسي مساج مجاني الاستخدام عند الاستقبال ويتوفر في الفندق مصعد

وصلنا عالساعه 5:30 العصر تقريباً ريحنا شويه وكانت المنطقه حيويه فيها اسواق ومحلات فـ خرجنا نتمشى فيها باقي اليوم لكن ماصارت 6:30 الا اغلب المحلات قفلت فـ رحنا لحديقه قريبه وفيها معبد

1 يوليو
الخطه كانت نروح لسايتما وندخل غابه توتورو
لكــن بسبب التنقل والرحله الطويله كنا لسا تعبانيين فـ اتغيرت الخطه
خرجنا الصباح انا وابويا ورحنا لحديقة الحيوان ueno zoo وكنت رايحه عشان الباندا خصيصاً
الحديقه تبعد 10 دقايق مشي من الفندق فـ رحنا مشي وكان فيه مطر خفيف
الطريق والحديقه كانت زحمة لانه يوم اجازتهم

قبل مدخل الحديقه كان فيه واحد يعمل عروض وقفنا عنده شويه ودخلنا لان المكان مزحوم
التذاكر نشتريها بنفسنا عند المدخل ( نسيت اصور شكل الجهاز ) القيمه 600 ين للشخص الواحد

دخلنا وعلى اليمين على طول الباندا ووقفنا في طابور طوووويل والصدمه انه لمن وصلنا كان موباين

خرجنا وكملنا على باقي الحديقة فيه محلات متنوعه للتذكارات واغلبها للباندا ( حزنت على الحيوانات الباقيه تقريباً مالهم شيء )

اخذت ايس كريم وكملنا على باقي الحيوانات وكنت ابا اشوف الـred panda برضو ماشفته

وقبل مانخرج رجعت وقفت طابور للباندا وابويا طلع برا يستناني وبعد الطابور الطويل لقيته واقف ومعطينا ظهره

خرجنا من الحديقه ورجعنا الفندق كانت تقريبا الساعه 3 الظهر , خرجنا على طول انا واخواتي لمنطقه asakusa وابويا قال بيرتاح ومابيجي معانا

في الطريق للفندق لقينا محل يبيع تاكوياكي وأخذنا منه ( وكانت بدايه الادمان على هذا الشيء اللذيذ )
التاكوياكي عباره عن تاكو = اخطبوط داخل عجينه وفوقها يحطو بصل اخضر + صويا + مايونيز + والحاجة البنيه مااعرف اسمها او ايش هيا بس كأنها نوع من الاعشاب البحرية

للتنقلات استخدمنا بطايق pasmo مسبقه الدفع وتقدرو تشتروها من المكائن الموجوده في المحطات ومنتشره بكل محطه وحتى عند الشحن ومتاحه اللغه الانجليزيه وفيه بحساب الاخ سعد عن طريق الشراء والشحن وينفع نستخدمها في الدفع لبعض المحلات وكانت مريحه وماكنا نحتاج نعبيها كثير )

( في محطه القطار بـ ueno كان فيه آله تبين اسم المحطه اللي احنا فيها ونكتب المحطه اللي بنروحلها ويظهر لنا اكثر من خط عالقطار والمسار والاسعار اخترنا اقل مسار وكان مباشر بدون تبديل قطارات وطبعتلنا المسار وكان استخدامها ذاتي ( مالقيتلها صور بس كانت قريبه من مكتب JR وغير كذا مااشفتها بعد كذا وكنا نسأل عن الطريق بنقولهم اسم المحطه اللي نبغاها ويوجهونا او تكون موضحه بخرائط قوقل )

اول ما وصلنا asakusa دخلنا اول مطعم بحري قدامنا نتغدى فيه

روبيان

قواقع

اوكونومياكي ( اكله يابانيه عباره عن ملفوف وعليه صويا ومايونيز)

ماافتكر الاجمالي بس بحدود 3000 ين تقريباً حوالي 67 ريال

ولما خرجنا كنا جايين عشان نركب العربات اللي تاخذنا في جوله على المكان
وقفنا اول واحد وكان يتكلم انجليزي تمام ووضحلنا الاسعار وانه لو كانت عربه لـ 3 اشخاص مع بعض راح تكون بس من الخارج ماتدخل جوا لانها كبيره فـ قررنا ناخذ عربتين وحده لثنتين ووحده حتكون لحالها والمده 15 دقيقه ويوقفلنا قريب من معبد كان راح يصير فيه احتفال
القيمه كلها 5000 ين حوالي 169 ريال

واحنا راكبين كان يورينا الاماكن وقصصها منها محل لتأجير الكيمونو واليوكاتا للسياح وشرحلنا عن برج طوكيو والمعابد المنتشره وكيف انه هذي المنطقه قديمة وبتجمع ثقافات وحكالنا عن السوق المشهور وانه عالاغلب راح يكونو قفلو لكن لازم نزوره

وقفنا عند هذا المعبد الكبير وكان فيه محلات منتشره واتوقع مؤقته والمسرح فيه ناس بإنتظار العرض
من المحلات لقينا وحده تبيع ماتشا (شاي اخضر) مع كيكه بالفاصوليا الحمرا

خلتنا كلنا نجرب كيف نحركها وبعدها سوتلنا واحد وكان طعمه لذييذ سألناها اذا تبيع منه قالت لا

بدأ العرض ومااعرف ايش اسم هذا الفن

الحلقه هذي كانو يدورو حولينها اكثر من مره بعدها يروحو للمعبد اللي قدام ويصفقو ويرمو عمله ( نوع من انوع العباده بس مااعرف ايش يقصدو فيه )

بعدها بشويه خرجنا لجهه معبد كبير

جربنا نقرأ حظنا وطلع حظ عادي او طبيعي

خرجنا بعدها لجهه المحلات واغلبها كانت مقفله

هذا المحل لقينا فيه كيكه الفاصوليا الحمراء واشترينا منه كرتونين هدايا وكانت مدّه صلاحيتها شهر

لقينا محلات قليله مفتوحه دخلناها
وعند مخرج السوق لقينا محل يبيع تاياكي وعنده نوعين بالبطاطا الحلوه وبالفاصوليا الحمرا واخذنا حبه من كل نوع
( التاياكي اكله يابانيه عباره عن عجينه بداخلها حشوه )

كانت البطاطا الحلوه الذ من الفاصوليا مع انه الاثنين طعمهم حلو

وبكذا انتهى اليوم الثاني لانه المحلات خلاص قفلت تقريبا فـ رجعنا للفندق

ملللوك, AL Tunaiji, Prince Kytu و 9 آخرون معجبون بهذا.

ملللوك · 21-08-2017, 09:18 PM

اهلا وسهلا بالاخت بشاير

تقرير ناري من بدايته
ذكرتي ادق التفاصيل الي تفيد السايح الي يفكر يزور اليابان

والحمد الله ان الله كتب لك زياره اليابان والأستمتاع بها
الفندق حسيت طرازه قديم شوي ولا !؟
ربما يرجع السبب للمنطقه الي سكنتو فيها
الي تعتبر من اقدم مناطق طوكيو

في المره القادمه انتبهي للتقييم وبعد المكان عن محطه المترو
ايضا في المستقبل خيار الحجز عن طريق Aribnb الخاص بالشقق والبيوت
ربما يكون افضل اذا كان عددكم 3 اشخاص فأكثر

حديقه الحيوانات اذكر انها لم تعجبني
جلست فيها اقل من نص ساعه وطلعت
ولكن لأنه كان معنا وقت طويل وجايين للمنطقه من الصباح فقلنا نقضيه بالحديقه

التاكوياكي جربته في اوساكا ليس بالسئ ولكن ماعجبني كثير ما اعرف ليش
منطقه اساكوسا جميله جدا تحس انه تعيش عالم قبل 300 سنه عربات وكذا

منتظرين بقيه التقرير بشغف

Prince Kytu, آخـــرفـــرصـــة, ملاك و 3 آخرون معجبون بهذا.

bashayr · 21-08-2017, 09:43 PM

اقتباس : المشاركة الأصلية كتبت بواسطة ملللوك

اهلا وسهلا بالاخت بشاير

تقرير ناري من بدايته
ذكرتي ادق التفاصيل الي تفيد السايح الي يفكر يزور اليابان

والحمد الله ان الله كتب لك زياره اليابان والأستمتاع بها
الفندق حسيت طرازه قديم شوي ولا !؟
ربما يرجع السبب للمنطقه الي سكنتو فيها
الي تعتبر من اقدم مناطق طوكيو

فعلا الفندق يعتبر قديم لكن داخلياً نظيف ومرتب ويفي بالغرض

في المره القادمه انتبهي للتقييم وبعد المكان عن محطه المترو
ايضا في المستقبل خيار الحجز عن طريق Aribnb الخاص بالشقق والبيوت
ربما يكون افضل اذا كان عددكم 3 اشخاص فأكثر

صح كلامك لازم انتبه .. الموقع اول مرة اسمع فيه راح اطّلع عليه✨
حديقه الحيوانات اذكر انها لم تعجبني
جلست فيها اقل من نص ساعه وطلعت
ولكن لأنه كان معنا وقت طويل وجايين للمنطقه من الصباح فقلنا نقضيه بالحديقه

التاكوياكي جربته في اوساكا ليس بالسئ ولكن ماعجبني كثير ما اعرف ليش
منطقه اساكوسا جميله جدا تحس انه تعيش عالم قبل 300 سنه عربات وكذا

فعلاّ جو هذي المنطقه غييير 👻

منتظرين بقيه التقرير بشغف

شكراً لمرورك وردك وباذن الله راح اشتغل عالجزء الثاني قرييب 🌸

Prince Kytu, آخـــرفـــرصـــة, ملاك و 2 آخرون معجبون بهذا.

Prince Kytu · 21-08-2017, 11:15 PM

وعليكم السلام ورحمة الله وبركاته
بداية موفقة أختـي في التقرير
يعطيج العافية على ذكر التفاصيل الجميلة
والشكر موصول لأصحاب الحسابات في الانستجرام يعطيهم العافية
استغربت إن سفرتكم إلى كوريا قصيرة جداً كانت تستحق على الأقل 5 أيام
بالنسبة لحديقة الحيوانات فيها نسبة من الحظ أحيانا تكون الحيوانات قريبة وواضحة وأحياناً تكون نايمة ومختفية
منطقة اساكوسا ما أمل منهم ومنطقة ايينو هادية وحلوة
جزء جميل ورائع وننتظر المزيد

يُثبت

آخـــرفـــرصـــة, ملاك, ali pontiac و 2 آخرون معجبون بهذا.

bashayr · 22-08-2017, 08:44 AM

اقتباس : المشاركة الأصلية كتبت بواسطة Prince Kytu

وعليكم السلام ورحمة الله وبركاته
بداية موفقة أختـي في التقرير
يعطيج العافية على ذكر التفاصيل الجميلة
والشكر موصول لأصحاب الحسابات في الانستجرام يعطيهم العافية
استغربت إن سفرتكم إلى كوريا قصيرة جداً كانت تستحق على الأقل 5 أيام

صحيح كلامك بس كوريا ماكانت اساساً في الحسبان واغلب الرحلات ترانزيت مابين 5 - 11 ساعه ف قررنا نوقف فيها لمدة يوم ومانطول اكثر 👌

بالنسبة لحديقة الحيوانات فيها نسبة من الحظ أحيانا تكون الحيوانات قريبة وواضحة وأحياناً تكون نايمة ومختفية
منطقة اساكوسا ما أمل منهم ومنطقة ايينو هادية وحلوة
جزء جميل ورائع وننتظر المزيد

يُثبت

الله يعافيك يارب وشكراً على ردك وتثبيت الموضوع وبإذن الله راح اكمل الباقي قريب ✨👍

ملاك, فيصل و توبليرون معجبون بهذا.

خط الرحلة · 22-08-2017, 11:19 AM

الله يعطيك العافية

تقرير يقدم لنــا كبــاقة جميلة عن اليابـــان

تفاصيل هامه جداً لكل من يرغب في زيارة اليابــان

متــــابع

ملاك, فيصل و توبليرون معجبون بهذا.

bashayr · 22-08-2017, 05:44 PM

اقتباس : المشاركة الأصلية كتبت بواسطة خط الرحلة

الله يعطيك العافية

تقرير يقدم لنــا كبــاقة جميلة عن اليابـــان

تفاصيل هامه جداً لكل من يرغب في زيارة اليابــان

متــــابع

الله يعافيك يارب. .
اتمنى انه المسافرين يستفيدو بإذن الله شاكره ردّك 👍

توبليرونمعجبون بهذا.

ملاك · 22-08-2017, 11:12 PM

الله يعطيك العافية
للأمانة دخلت التقرير علشان اليوم والنص اللي في كوريا😄
ولكن ايضا أتمنى ان في يوم ما أزور اليابان وحاطتها في القائمة وان شاء الله تقريرك بفيدني
ومعاك حق بالنسبة للعصيرات الغالية اللي في كوريا الفواكه بالعموم عندهم غالية إِيش السبب (مادري) ولكن تلاقين اسعارها أرخص عند اللي يبيعون على سياراتهم في الأحياء السكنية
بالنسبة لليابان أعتقد المعضلة الكبرى هي إختيار الفنادق خصوصا سكن حق عائلة
متابعين معك الحلم الذي اصبح حقيقة وياليت تستمرين في ذكر كل التفاصيل وإنطباعك ورأيك عن الأماكن اللي زرتيها
وأشكرك على ذكر الحسابات اللي أستفدت منها وأكيد راح يستفيد منها كل اللي يفكر يزور اليابان 👍🏼

AL Tunaiji, فيصل و توبليرون معجبون بهذا.

bashayr · 23-08-2017, 08:57 AM

اقتباس : المشاركة الأصلية كتبت بواسطة ملاك

الله يعطيك العافية
للأمانة دخلت التقرير علشان اليوم والنص اللي في كوريا😄
😂😂
ولكن ايضا أتمنى ان في يوم ما أزور اليابان وحاطتها في القائمة وان شاء الله تقريرك بفيدني
ومعاك حق بالنسبة للعصيرات الغالية اللي في كوريا الفواكه بالعموم عندهم غالية إِيش السبب (مادري) ولكن تلاقين اسعارها أرخص عند اللي يبيعون على سياراتهم في الأحياء السكنية
بالنسبة لليابان أعتقد المعضلة الكبرى هي إختيار الفنادق خصوصا سكن حق عائلة
متابعين معك الحلم الذي اصبح حقيقة وياليت تستمرين في ذكر كل التفاصيل وإنطباعك ورأيك عن الأماكن اللي زرتيها
وأشكرك على ذكر الحسابات اللي أستفدت منها وأكيد راح يستفيد منها كل اللي يفكر يزور اليابان 👍🏼

الله يعافيكِ يارب واشكر تعليقك وبإذن الله يارب ❤❤

فيصل و توبليرون معجبون بهذا.

Abdulmo7sen · 23-08-2017, 03:51 PM

تقرير احترافي ما شاء الله
متشوق للجزء الثاني واتمنا ينزل بأسرع وقت
لإننا مسافرين لليابان بعد بكره
والحماس وصل لحد الانفجار

فيصل و توبليرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
باقي سنة ونصف من مدة فيزا اميركا السياحيه	blue@sky	فيزا امريكا	6	29-10-2017 03:38 AM
تطوير منطقة الأهرامات ...مشروع الحلم الذي أصبح حقيقة	تونسية متنقلة	بوابة مصر	13	21-05-2016 12:47 PM
أسئلة دقيقة..	نوح	بوابة اثيوبيا	5	04-06-2015 03:57 PM
اليابان البلد الذي لايضيع به شيئا ( المفقودات )	وليد عنبه	البوابة السياحية	28	06-05-2015 11:29 PM