تم تأكيد الرحلة ونبي دعمكم

Abofahad · 08-09-2017, 01:03 AM

بعد تردد بينها وبين الفلبين قررت وحجزت وقصيت التذاكر على جاكرتا ورحلتي باذن الله 12 ليلة في اكتوبر طبعاً لحالي والله معي ...
ابي نصيحتكم في فندق ممتاز في الجبل وقريب من البقالات والمطاعم والخدمات ...

انا مقرر اريح اول ليلة في جاكرتا واليوم الثاني على الجبل واجلس هناك 8 ليال وبعدها ارجع ثلاث ليال جاكرتا ثم السعودية

وش تنصحوني في جاكرتا ابي فندق موقعة ممتاز ونظيف وقريب من المولات والمطاعم ..

كذلك كم سعر السائق في الجبل لاني مخطط اخذ واحد معي طول بقائي في الجبل ؟ وش رايكم مو احسن عشان يكون مرشد لي ...

علما انني سبق جيت لاندونيسيا 3 مرات لكن اخر مرة كانت قبل 12 سنة

ابي فزعتكم مخي متفرمت وابي اسوي حجوزاتي من بوكنق او اقودا من الان لان رحلتي وقتها 12 ليلة وودي اخليها مميزة وانبسط زمان ماسافرت وانا انسان ابي طبيعة ووناسة فيما يرضي الله فقط ...

فيصلمعجبون بهذا.

alradadi · 08-09-2017, 01:33 AM

هلا ابو فهد كلنا ان شاء الله ما عندنا الا ما يرضي الله والله يحفظنا ويحفظك

ابو فهد بنغير خط سير رحلتك وبنخليك تنبسط مضوبط باذن الله

هل سبق ان زرت جزيرة بالي ؟؟؟؟؟

عطنا تاريخ وصولك وتاريخ مغادرتك وابشر بالخير

فيصلمعجبون بهذا.

Abofahad · 08-09-2017, 03:09 AM

الله يوفقك ياغالي واكيد مايلحقني شك في الجميع بس ابي اوضح وضع رغباتي حتى تقدرون تستعدوني والله لايحرمكم الأجر مالكم غير الأجر والعلم الغانم في فزعتكم لنا ....

انا سلمك الله الذهاب باذن الله يوم الاثنين ٩ اكتوبر الساعة ١٢.٤٠ دقيقة فجراً والوصول ٢ الظهر يوم الاثنين بتوقيت جاكرتا

المغادرة للرياض بعد توفيق الله بتكون يوم السبت ٢١ اكتوبر الساعة ٤ عصراً

بالي ماسبق جيتها وبما اني لحالي شلت هم روحة من مطار لمطار وقلت خلني على بونشاك وجاكرتا واي شي حول جاكرتا

سبحان الله كنت ادلها شارع شارع لكن الآن والله ما اذكر غير بعض الذكريات

اذكر جاكرتا سكنا في فندق نظيف بجانبة مول على اليسار وانت طالع من الفندق بس نسيت اسمة..

كذلك احتاج فرعتكم في سواق يكون معي طول الرحلة اذا تعرفون احد انا والله ما اعرف واخاف يستغلوني لاني لحالي ...

صراحة فيني نشوة فرح للسفر مع قلق اني لحالي مع اني كنت متحمس لجزيرة بوراكي في الفلبين لكن غيرت رأي في اللحظة الاخيرة لأندونوسيا لاني سبق جربت السفر لها وماحصل لي مشاكل وان شاء اكون اتخذت القرار الصحيح ولا استغني عن فزعتك والاخوان جميعاً ولكم مني دعاء وانا مسافر باذن الله

وآسف على الاطاله...

فيصلمعجبون بهذا.

alradadi · 08-09-2017, 07:38 AM

ولا يهمك يابو فهد راح نعطيك كل شي فنادق و سواقين ومطاعم وصرافين واسواق وجدول لليوميات لا تشيل هم شي ولا تقلق اندونيسيا بلد جيد وقليل المشاكل فيه للاشخاص اللي طريقهم واضح وما عندهم لف ودوران

بس بما انك متحمس انك تزور بروكاي انا بعطيك مكان بديل ومشابهة لها في اندونيسيا انها جزيرة بالي كل شي موجود في بروكاي موجود مثله في بالي وكذا كأنك زرت المكانين والتنقل بين جاكرتا وبالي ما هو صعب واسعار التذاكر ايضاً رخيصه الان ما راح نتكلم في التفاصيل الا بعد ما نتعتمد الجدول

الان انت عندك 10 ليالي راح نقسمها كذا

11 >>>>>>>>>>>> 14 بونشاك

14 >>>>>>>>>>>> 18 بالي

18 >>>>>>>>>>>> 21 جاكرتا

انا اشوف هذا الجدول مناسب لك فيه مناطق جديدة عليك وفيه تنقل حتى ما تطفش من القعده في مكان واحد

الخيار الثاني هو نرجع للتقسيم اللي انت ذكرته والاكتفاء ببونشاك وجاكرتا ويمكن تضيف لها باندونق

اعتمد لنا جدول واترك الباقي علينا

بالتوفيق

فيصلمعجبون بهذا.

Abofahad · 08-09-2017, 08:17 AM

مع اني ابحث عن طبيعة وبراد وكان مخططي افر بونشاك كامل بجميع المواقع حولة لمدة ٨ ليال على الاقل بعدين ارجع جاكرتا ٣ ايام ثم الوطن لكن بالي كأنه دخلت مزاجي بعد ما اخذت لفة في تقارير عنها وحصلت في بوكنق فنادق لمدة خمسة ايام ورخيصة في نوسا دوا

مثل منتجع تانجونغ بينوا الشاطئ ؟ هل موقعة ممتاز طبعاً راح اخذ سائق في بالي

هل تستاهل بالي انا ماني حريص على العاب مائية بالعربي ما اعرف اسبح خوااااااف هههههه هل تتوقع استانس في بالي

انا مبدئيا في راسي لو ترشح لي بالي حاط الترتيب التالي:
من المطار الى بونشاك منتجع بونكاك باس او منتجع بالاس واقعد ٦ ليال الى الاحد مع اني ودي اجلس اكثر في بونشاك ابي الفه كامل على راحتي
ثم اطلع مباشرة لجزيرة بالي واقعد خمس ليال الى الجمعة ارجع لجاكرتا والسبت رحلتي للرياض

هل افضل احجز من مكتب كاها المطار الكل يمدحة او بوكنق ؟
الطيران الداخلي هل كاها يحجزة لي ؟

هل الفنادق تخصم كامل المبلغ من الفيزا ؟ لان فيه واحد يقول انهم يحجزون مبلغك واذا وصلت دفعوك كبلغ الاقامة مرة ثانية كاش والمبلغ المحجوز يخلونه تأمين عندهم ؟ هل هذا صدق!!!

ادري اني غثيتك يامشرفنا لكن لك مني كل الدعاء

والله دايخ وسلامتك

فيصلمعجبون بهذا.

Abofahad · 08-09-2017, 08:18 AM

سبحان الله قاعد اكتب ردي من اليوم وانت تكتب

فيصل و alradadi معجبون بهذا.

فيصل · 08-09-2017, 10:10 AM

أقتنع برأي الردادي ويإذن الله تنبسط

وكل أمرك لله

alradadiمعجبون بهذا.

alradadi · 08-09-2017, 02:48 PM

بالي تستاهل يابو فهد فيها برامج كثيرة مره وليست حكر على الالعاب البحرية بعدين عندي لك حل للسباحه فيه منطقة العاب مائية في كوتا اسمها ووتر بوم وما تحتاج انك تعرف تسبح ولا شي ممتعه بشكل ما تتصورة راح تنبسط فيها مره بأذن الله كذلك عندك الرافتنق في نهر Telaga بس بما انك وحدك راح تنضم الى مجموعه وفي الغالب خواجات راح تنبسط وانا متأكد انك بعد فترة من السفر راح تنسى اشياء كثيرة من الرحلة الا التجديف ما راح تنساه ابدا ولا تخاف ما تحتاج سباحة ولا شي اهم شي ملابس رياضة او شورت حتى ما تتضايق من البلل

اما السكن في بالي فاشوف ان السكن في نوسادوا لوحدك غير ممتع المكان ممتاز بس ما حولك شي اشوف انا السكن في كوتا افضل بكثير وريحك في حاجات كثيرة بعدين كوتا منطقة حية طول الوقت والخدمات والاسواق والمطاعم والشأطي كلها عندك تروح لها مشي لذلك انا ارشح لك عدة فندق وانت شوف على حسب ميزانيتك ولو اني افضل الخيار الاقتصادي بما انك راح تقضي الوقت كله خارج الفندق

فنادق اقتصادية

فندق بينتانج كوتا هذا فندقي المفضل

فندق ايدن كوتا

منتجعات

منتجع فندق ذا أنفايا بيتش

منتجع دسكفري كارتيكا

طبعاً هذه الفنادق كلها على شارع واحد متقاربة من في المكان ومتفاوته في الاسعار

اما السائق في بالي موجودين بكثرة لا تشيل همهم وعندي سائق راح ارسل لك رقمه

بالنسبة الى بونشاك الفنادق اللي ذكرت صارت فيه فنادق احدث واجمل وانظف منها مثل بسيونا علم وهو الافضل من كل النواحي كذلك فندق ساهيد فندق حديث افتتح قريب نظيف ووممتاز بس عيبه موقعه بعيد بعض الشي

بالنسبة للحجوزات الافضل تحجز من الانترنت عندك بوكنق ومواقع اخرى كثيرة تحجز لك بأسعار متفاوته اما دفع قيمة الحجز هذه لها خيارت كثيرة وعلى حسب نوعيه الحجز هل الحجز مسترد الى تاريخ محدد او غير مسترد وهكذا وعلى حسب سياسة الفندق بعضها الدفع عند الوصول وبعض تحجز مبلغ اول يوم فقط وبعضها تأخذ المبلغ كامل في نفس الوقت وتعطيك خصم في حالة الدفع كاش كل هذا راح تجدة في صفحة الفندق في الموقع اللي بتحجز منه عموماً انت لا تشغل بالك بهذا كله راح نتشاور عليه اذا اعتمد الجدول والفنادق اللي بتحجز فيها بس اهم شي يابو فهد تكون عندك بطاقة فيزا

فنادق جاكرتا شوف لي السوق اللي تبغى هل هو شعبي والا فخم حتى نعطيك فندق قريب منه

الطيران الداخلي تقدر تحجز من هنا او اذا وصلت هناك من المطار او بونشاك الحجوزات متوفرة بكثرة خصوصاً في وقت سفرك السياح قليل والرحلات كثيرة

المطلوب منك الان هو اما تعتمد الجدول اللي اعطيتك ويمكن تأخذ يوم من ايام جاكرتا وتضيفة الى بالي او بونشاك خصوصاً اذا ما لك نيه في التسوق اما اذا تبغى تتسوق خليه زي ما هو واذا تبغى تعتمد الجدول اللي وضعت انت ابشر على عيني وراسي يابو فهد

فيصلمعجبون بهذا.

بن قوت · 08-09-2017, 03:05 PM

بيض الله وجهك اخ ردادي
على رحابة صدرك وحسن خلقك
وفيت وكفيت

اعتقد الاخ ابو فهد يرغب في بونشاك اكثر من بالي

الناس ماخذين فكرة عن بالي انها شاطي فقط والعالم متسدحة فية
ومايدرون عن بالى ان فيها جبل وفلل زي بونشاك

لو يسكن في فندق شويترا اول يوم جاكرتا قريب من المول

alradadi و فيصل معجبون بهذا.

alradadi · 08-09-2017, 03:20 PM

اقتباس : المشاركة الأصلية كتبت بواسطة بن قوت

بيض الله وجهك اخ ردادي
على رحابة صدرك وحسن خلقك
وفيت وكفيت

اعتقد الاخ ابو فهد يرغب في بونشاك اكثر من بالي

الناس ماخذين فكرة عن بالي انها شاطي فقط والعالم متسدحة فية
ومايدرون عن بالى ان فيها جبل وفلل زي بونشاك

لو يسكن في فندق شويترا اول يوم جاكرتا قريب من المول

وجهك ابيض اخوي منصور وما عليكم زود

كلامك صحيح هذي الفكرة السائدة عند الكثير من الناس والبعض لو تنصحه بزيارة بالي يعطيك محاضرة طويله عريضه

فيصلمعجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تأكيد وجود حالتين من أنفلونزا الطيور في المحافظات الشمالية لجنوب افريقيا	Oman Knight	بوابة جنوب افريقيا	12	21-08-2017 09:53 AM
محتارين ونبي ارائكم	Bu 3zOz	البوابة السياحية	9	14-03-2016 06:40 PM