بسم الله الرحمن الرحيم




ان شاء الله الجميع بخير..
حبيت اشارككم اول موضوع لي في المنتدى بسفرتي الاولى لمصر.
بطرح التجربة باختصار واهم النقاط (مواصلات-سكن-الاكل-الأماكن).

للمعلومية كتبت الموضوع ونزلت الصور وكل شي ولما جيت اعتمد الموضوع طلع من الصفحة وطار كل شي للأسف والان بعيد كتابته وان شاء الله ما انسى أي نقطة.

بالبداية بحذركم من اللي بالمطار ياخذونكم بالكلام وان عندهم سكن رخيص ويبون تشوفونه وبعدين تقررون انتبهووووا منهم.

الطيران
استخدمنا طيران الجزيرة التذكرة كانت ب 917 ريال وكان فيها ترانزيت بالكويت مدته تقريباً ساعة ونص.
والطيران من القاهرة لشرم الشيخ كان على طيران النيل بـ255 ريال.

السكن
القاهرة
كان فيه اختلاف كبير بين شقة أو فندق.. وبالنسبة لي ارشح فندق وبقوة لأنه أكثر اماناً من الشقة.. لكن رسينا على شقة عن طريق معرفه والحمدلله كانت موفقه وآمنه بعد الله تقريباً سعرها 48 ريال كانت متواضعة نوعاً ما.

شرم الشيخ
اخذنا منتجع شاطئ صن رايز أرابين .. حقيقة جميل جداً المنتجع وينفع كثير للعوائل لأن فيه فعاليات كثيرة يومية واسبوعية.. ويوجد مسرح يومي من 6-8 أطفال ومن 8-10 كبار.. وعندهم رحلة سفاري واشياء كثيرة اللي يروح يسأل عن العروض المتوفرة.
ورحت لشرم مره ثانية تقريباً قبل رمضان 2017 مدة 3 أيام سكنت في نوفوتيل كان سيء جداً أثاث قديم ومو على المستوى المطلوب.
سكنا في ماريوت البحر (لأن فيه ماريوت ثاني غير اللي عالبحر محد يمدحه) .. كان جميل واتوقع ينفع للشباب أكثر وكل الشباب يمدحونه ... لكن فيه عوائل بس مدري ليه طايحين فيه الشباب ..
وللمعلومية ماريوت ما يقبل إلا دولار

مواصلات
القاهرة
استخدمنا تطبيق كريم هناك لأن أشوفه الأفضل.. سيارات جديدة ومكيف وناس اغلبهم محترمه ومايقدر يلعب عليك بالسعر.

شرم الشيخ
تطبيق كريم لا يوجد في شرم الشيخ.. ممكن تاخذ من الفندق وتروح أي مكان أو تطلع برا الفندق يكون فيه ناس واقفين وياخذونك لأي مكان وبسعر أقل بكثير من أسعار اللي في الفندق.

الأكل والشرب
قالوا لنا انتبهوا من مطاعمهم لأن ممكن يجيك تسمم وممكن يقلب بطنك لكن الحمد لله ما صار من الكلام هذا كله لأي أحد فينا.
اذكر من المطاعم المشهورة عندهم كشري العمدة ومطعم فرحات وفيه كم واحد نسيتها... وفي شرم الشيخ مطعم أسماك جميل جداً اسمه فارس ... واللي يبغى يروح لفارس بشرم الشيخ يقول ابغى الفرع اللي عند السوق القديم لأن أفضل من الفرع الثاني.

الأماكن
القاهرة
حقيقة الأماكن كثيرة وكل واحد حسب الشي اللي رايح له ... يعني بعضهم يروح للتسوق او تغيير الجو او او ....
بالنسبة للأسواق والمولات .. رحنا كايرو فيستيفال وكان وقتها هو آخر وأحدث مول .. فيه النافورة الراقصة ومطاعم وكوفيهات خارجية واطلالات رائعة ويوجد سوق فيه ماركات عالمية وغيرها .. ايضاً يوجد مول العرب صغير نسبياً وتصميمه ليس بالحديث بحكم افتتاحه اواخر عام 2010 يوجد سينما ومطاهم ومحلات.. مجمع سيتي ستارز وهو أبرز وأحد أكبر مراكز التسوق في القاهرة , يحتوي على ستة أدوار ويضم صالات سينما ومنطقتين طعام ... بصراحة كبير كبير جدددداً لدرجة فيه (6) فروع ستاربكس .. والله يعينكم عالضياع فيه ..
وفيه أماكن تسوق مثل (مول مصر(ماكان فاتح لما رحنا) ويعد أكبر مول في مصر حالياً وهو التابع لشركة الفطيم-داون تاون مول-صن سيتي مول-مجمع المعادي سيتي سنتر-جنينة مول-سوق خان الخليلي) لكن ما اسعفنا الوقت نروح لها.
وبالنسبة للأماكن الأخرى ممكن تاخذ رحلة بالمركب وتروح للمعسل وتشوف أنواع العسل عندهم ... وانواع النحل وغيرها...
وفيه كوفيهات اذكر فيه لوكيشن لكن زحمة دايم وفيه العمدة اللي عليها كلام وفيه كم واحد طلع جديد ما اذكر اسمه.

شرم الشيخ
على كلامهم شرم حدها ثلاث أيام... وكنت اشوفها قليلة لكن يوم رحت لقيت كلامهم فعلاً صحيح .. لأن مافيه أي مكان تروح له غير البحر أو سوهو سكوير أو خليج نعمة(الأماكن اللي عليها الكلام)..

هذا التقرير المبسط والمختصر واعتذر على القصور ان حدث وأي استفسار انا جاهز ... بترككم مع الصور الآن.



سيتي ستارز



كايرو فيستيفال







المنحل وهذا يشرح لنا انواع العسل









سوهو سكوير

















السوق القديم في شرم الشيخ







مقهى فرشة شرم الشيخ



وهذي من المنتجع .. للمعلومية فيه عدة مسابح في نفس المنتج لانه كبير جداً










مطعم فارس شرم الشيخ




مقهى فرشة في شرم الشيخ



فندق فيرمونت







وبكذا أكون انتهيت من أول تقرير لي في هالمنتدى ان شاء الله يكون فاتحة خير يارب العالمين..
ومثل ما ذكرت اي استفسار انا جاهز..
ونشوفكم في تقارير ثانية بإذن الله..

أهلا وسهلا بك أخي الفاضل وحياك الله معنا.

ألف شكر على تقريرك المصور ونشر ملخص لرحلتك للقاهرة وشرم الشيخ والتفاصيل الجيدة فيما يخص الأمور التي تهم السائح من سكن ومأكل ومشرب وأماكن ترفيه وتسوق.

سواألي لك عن تجربتك في زيارة القاهرة لأول مرة وكيف وجدتها؟ وما هي الخبرات التي اكتسبتها من هذه الزيارة؟

تمنياتي بالتوفيق

تسلم ما قصرت
لفت انتباهي سعر الشقه بالقاهره


شرم جميله

بحر

مقاهي