السلام عليكم ورحمة الله وبركاته

اعجز عن الشكر وتعجز الكلمات ان توفيكم حقكم

موضوعي باحاول اختصره في نقاط مهمه يحتاجها المسافر الى تركيا ولن اكتب تقرير عن رحلتي وذلك نظرا لكثرة التقارير وكثرة الشروحات عن تركيا

ولكن باختصار اذا كنت بتنوي تروح تركيا (لاتتردد في هذا القرار .. فلن تندم ... فتركيا تفوز على كثير من الدول من ناحية السياحه) جو ممتاز و طبيعه ممتازه ومأكولات ممتازه وتسوق ممتاز جداً ورخيص ... قل ماتجتمع هذه الميزات في دوله واحده

ندخل في صلب الموضوع
1- اول ماتنزل في المطار تحتاج فيزا (مكتب الفيز بتحصله قبل تدخل على الجمارك) وتقدر تاخذ الفيزا من السفاره قبل تروح (بس يمدحون اللي فالمطار) السالفه بختصار تعطيه جوازك وتعطيه 60 دولار (مايقبل الا دولار او يورو او ليره تركيه) ويرجع لك الجواز وعليه الفيزا .. خلصنا من نقطه

2- خلصت من الجمارك وخلصت من الجوازات تحتاج الى نت ... اول ماتطلع من الجوازات بتشوف ثلاث شركات للاتصالات (فودا فون - ترك سل - ... نسيت الثالثه) تروح تشوف العروض اللي عندهم ( انا اخذت عرض من عند ترك سل (85 ليره تركيه فيها 6 جيجا نت و1000 دقيقه اتصال و1000 رساله نصيه ) وزدتها 20 ليره وحصلت على 60 دقيقه اتصال دوليه .. حاولت اتصل دولي ماضبط معي .. ماادري ليه) صار المجموع 105 ليره

وتقدر تستأجر كونكت مع نت مفتوح ( اتوقع انه خيار افضل من الشريحه ... ابحث عن معلومات عنه .. انا ماكان عندي وقت للاسف رحلتي كانت سريعه جدا وقصيره)

3- خلصت من النت ؟؟ تحتاج سياره اذا كنت بتروح مكان غير اسطنبول ... مثلا صبانجا او بورصه (انا كان وصولي الساعه 2 بعد منتصف الليل .. اخذت فندق قريب من المطار ... رحت نمت الى الساعه 10 الصبح .. رجعت المطار عشان اخذ السياره الاجار واتجهت الى صبانجا على طول .. كان نزولي في مطار صبيحه)

طيب بالنسبه للسياره .. في نفس مطار صبيحه مكاتب تاجير سيارات .. انتبه .. بعضهم يقول لك لازم تستاجر السياره اقل شي 5 ايام وبعضهم يقول اقل شي 3 ايام ... يعني مايصلح تاخذها يوم وترجعها ... انا استاجرتها من المكتب دايركت .. طلب مني تامين 200 دولار ويرجع لك اذا رجعت السياره ( قلت له الفيزا مافيها فلوس (كانت فيزا مسبقة الدفع) قالي مو مشكله عطني كاش وارجعهم لك كاش اذا رجعت السياره ( قلت احسن شي )
ملاحظه : نص الليل كان اغلب مكاتب تاجير السيارات ماعندهم سيارات .. يوم رحت لهم الصبح شفت اغلب مكاتب تاجير السيارات يستقبلون الزباين ويعطونهم سيارات (بالعربي لو تحجز من النت اتوقع افضل عشان ماتروح هناك وتشوف مافيه سيارات للاجار)

4- شطاف الماء تقدر تستغني عنه

5- التخاطب مع الاتراك مشكله بسبب عدم معرفة الكثير منهم للغه الانجليزيه ... الحل: نزل لك برنامج يترجم من العربيه الى التركيه ( يمدحون مترجم قوقل)

6- احذر من القياده داخل اسطنبول خصوصا اذا السياره قير عادي... ليه ؟؟!! في داخل اسطنبول شوارع مرتفعه ارتفاع عالي جدا .. خصوصا منطقة شيشلي .. ( تخيل عندك سياره قير عادي وانت واقف على مرتفع والشوارع زحمه واللي وراك لاصق فيك !! اذا ماتقوم السياره على طول والا السياره بترجع وبتصدم اللي وراك ) .. انا عشت رعب وتوتر غير معقول ... الحل : استخدم الباصات والمترو داخل اسطنبول او استخدم سياره قير اوتوماتيك ولا انصح بالسياره مطلقا داخل اسطنبول .. لاتوجد مواقف

7- في باصات من المطار الى داخل اسطنبول بس اذا معك شنط الاحسن خذ تاكسي خاص

8- للباصات والمترو تحتاج ( اسطنبول كارد) هذه تركب فيها كل وسائل النقل العامه .. اين اجدها ؟؟ في الاكشاك قريب من اغلب مواقف الباصات (هذه البطاقه مهمه جداً .. لانه لاتوجد وسيله للدفع بغير هذه البطاقه .. تخيل بتركب الباص ويقولك سواق الباص ادفع وانت ماتقدر تدفع .. تقوله خذ فلوس .. يقول لك مااخذ فلوس .. بيصير وجهك ؟؟!!)

9- تحويل الفلوس.. يمدحون انك تاخذ دولارات من ديرتك وتحولها ليره تركيه هناك في تركيا ( التحويل داخل الديره احسن لك من المطار ) بس انتبه .. مش كل مدينه يوجد فيها اماكن تحويل الفلوس بكثره .. انا انتكبت في بورصه وصبانجا بسبب اني ماحصلت اماكن احول فيها الفلوس من دولار الى ليره تركيه ... حول من المطار .. ماراح تفرق كثير معك. وجهة نظر.

تركيا تحتاج من 10 ايام الى 15 يوم ولن تكفي .. اذا قدرت تزيد ايام ماعندك مشكله .. حتى لو تقعد شهر ماعندك مشكله .. لن تمل
انا كانت رحلتي لمدة سبع ايام فقط ( قصيره جدا) ولكن اننا راجعون باذن الله .. فتركيا تستحق الرجوع اليها اكثر من مرهز

فالاخير .. انا رحت تركيا وكنت خايف من الشعب وتعاملهم ومن الحراميه من كثر ماسمعت وقرأت .. بس اللي شفته شي غير .. ماشفت من الشعب ذاك التهويل اللي سمعت فيه بان التعامل معهم صعب ولا شفت الحراميه اللي سمعت عنهم وانا هنا .. بسبب اني ابتعدت عن اماكن الشبهه واوقات الشبهه .

احب اشكر واعيد الشكر على كل من وضع مواضيع وارشادات في هذا الصرح العظيم.
انا كنت ادخل واقرأ ولم احتاج ان اسأل اي عضو هنا .. بسبب كثرة المعلومات عن تركيا .. فلا يسعني الا ان اقول مثل قوله صلى الله عليه وسلم ( من قال جزاك الله خير فقد ابلغ في الثناء ) فجزاء الله خير كل الاعضاء المشاركين بمواضيعهم وكل القائمين على هذا المنتدى

والسلام عليكم ورحمة الله وبركاته

هذا وانا اقول بختصار ... شلون لو اني بكتب التفاصيل؟؟!!

آخر مواضيع رائد بومريم

- تجربي مع شركة enterprice rent car - استفسار عن شركة Entrerprice لتاجير السيارات - بورصه .انطاليا....اسطنبول..... - استفسار عن اكواخ في بورصه او اسكي شهير - اذا كنت بتستاجر سياره في تركيا...

توقيع : رائد بومريم

اجعل طاعة الله تجارة تأتيك الارباح بلا بضاعة

وعليكم السلام ورحمة الله وبركاته
شكرا لك علي النصائح
الفيزا من النت ممكن أسهل وأسرع
الفلوس أفضل احتياطي معاك ومن البطاقه تسحب
القياده في أسطنبول والله ما ألومك جربتها مره ما صدقت وصلت الفندق وكلمت المكتب يجي يستلمها
التاكسي التعامل معهم سيء وسمعنا قصص كثيره عن نصبهم
والفندق اذا تعامله طيب بعد بأذن الله رحلتك طيبه
بأي فندق سكنت في بورصه واسطنبول
طلع التفاصيل
ما قصرت وجزاك الله خير

وعليكم السلام

ونحن لا نستطيع اعطائك حقك من الشكر مقابل هذه النقاط الرئيسية الهامة
اجزم ان معظم الاستفسارات تدور حولها

اسلوب جميل و رائع لطرح وجهة نظرك
من جمال النقاط وشموليتها كان ودنا تسهب بدل الاختصار

الله يسعدك بو مريم

ماقصرت أخوي رائد ...

ملاحظات منسقة وواضحة تماماً ...

شكراً لجهدك وطرح تجربتك ونصائحك الأخوية ...

من خلال ماقرأته لك .. واضح ( ماشاء الله ) عندك نَفَس لكتابة التقارير

المشاركة القادمة ... نريدها تقريراً

شكراا للنصايح والافاده للجميع
بخصوص الفيزا هل مازالت مطلوبه على السعوديين ؟
احنا بالكويت خلاص بدون فيزا ندخل
وشكراا لك مرة اخرى

معلومات مفيدة
و خلاصة تجربة
للي متشتت من كثر ما قرأ
بيستفيد من هالموضوع
يحط له النقاط على الحروف
شكراً على نقل تجربتك
بالتوفيق

ما زالت ام حسين مطلوبه علينا

.
.

الحمد لله على السلامة

وشكرا شكرا طرح هكذا تجارب ،

وزي ما تفضلت احتسب الأجر ،

تذكير الأحبة ببعض النقاط شيء مفيد جدا

ومن باب ( وذكر فإن الذكرى تنفع المؤمنين )

خصوصا إنه في شغلات أساسية الواحد ينساها

أو ، شغلات الواحد يتذكرها وحاب تكلم عنها ويجدد المعلومات عنها



شخصيا إن سمحت لي 4 نقاط فقط:

1. الفيزا ، قدر الإمكان أون لاين ، ترتاح من الزحمة

وتحاول تدخل الجوازات قبل ما تزدحم أكثر بالركاب اللي جايين معاك في نفس الطائرة.

2. السيارة ، في تركيا ، قدر الإمكان ، لا تفكر في غير قارينتا Garenta

شركة مميزة جدا وأهم مشكلة تواجه الواحد ، مسألة ترجيع التأمين ( الوديعة )

الحجز دوما عن طريق رينتال كارز ، والتأمين تاخذه منهم أثناء الإستلام

لو معاك لغة تركية او إستعنت بترجمة قوقل ( الصفحة كاملة )

ادخل موقعهم وإحجز وسجل عضوية ، لما توصل ، إجراءات التسليم أسرع وأسهل

والاكيد ( يقبلون كل البطاقات مسبقة وعادية ) لكن ، لازم إنه اللي يحجز يكون موجود

يعني صاحب الحجز ، لازم يكون موجود + بطاقته الإتمانية + الرخصة ( السعودية تكفي )


3. لو فكرت في ضواحي إسطنبول ، خذها من قاصرها ،

إحجز السيارة وروح تمشى وإرجع لاحقا وسلم السيارة في فرع قارينتا

في فندق إنتركونتيننتال تقسيم.


4. النت ، غير المفتوح ما يرضيني ، فضلا عن سهولة الإستلام والتسليم

وبلا مشاكل شريحة وتاخير وغرابيل

الخبر الأخير وذكرته اكثر من مرة بالسناب

عندهم نية لتفعيل التجوال الدولي المفتوح

جربتهم في رحلتي الأخيرة ، أسبانيا ، ألمانيا ، رومانيا ، وتركيا

وصلني للفندق في مدريد ،

الخدمة قيد التجربة ، ويارب يخلصون أمورهم قريب

من أجل راحة أكبر في جميع دول العالم

وأعتقد ان أسعارهم راح تضرب السوق

المشكلة اللي تواجهمم حاليا ،

فقط التسليم ،

الإستلام سهل ، لإنه راح يرسلونه لمقر إقامتك في اول دولة

لكن التسليم هو المشكلة ، ولذلك جزء من نقاشهم ، ممكن الواحد يشتري المودم بكبره مع النت.



طولت عليكم وطلعت عن الموضوع ،

لكن بصراحة الخبر يستاهلكم

خصوصا إن تركيا ليست نهاية العالم

والواحد حاب يعش ويستمتع بهكذا خدمات في كل مكان يسافر له.




دمتم في حفظ الله ورعايته