تخطيط الرحلة و تنظيمها و اقتراحاتكم - الصفحة 2

o0abdulhadi0o · 26-10-2017, 04:20 PM

يعني احمل ربع المبلغ كاش او النص

أرسلت بواسطة iPhone بإستخدام Tapatalk

alradadi · 26-10-2017, 04:33 PM

خذ معك 5000 ريال كاش والباقي في البنك

o0abdulhadi0o · 26-10-2017, 04:41 PM

ممتاز و بالنسبه ترشيحكم للفنادق لكل منطقة
ابي ترشيح ل كذا فندق لاجل اطلع علي جميعها و اشوف المناسب و اخذ رائيكم
اخوي الردادي فيه شي يدور بخاطري بصراحة و خاصة الجبل الفلل وش وضعها شفت مقاطع كثيرة لفلل بالجبل اطلالة و مسبح خاص و شي فوق الخيال ما ادري وش وضعها
هل هي مناسبة و افضل و مدري كم اسعارها
المشكله اكثرهم قسمين ناس تمدح و ناس تذم
طبعا شفت اكثر من فله و اشوفها لوحدها فوق جبل بس احسها كبيرة بزيادة بس اطلالتها و ترتيبها روعه
ما ادري كيف يا ليت توضحون لي كيف طريقتها

اما بالنسبه ل باندوق الي الان احس متردد اكثر اللي اشوفه يغلب عليها التسوق كثير و ما ادري عن فعالياتها هل مثل الجبل و من ناحية الطبيعه نفس الجبل هل الغيها علشان اخفف التنقلات لان الايام قليله
يهمني رايكم

أرسلت بواسطة iPhone بإستخدام Tapatalk

alradadi · 27-10-2017, 01:54 PM

شفت سؤالك من امس بس قلت لعل احد الاخوة يعطيك رائ اخر بحيث انك تحصل على اراء مختلفه لكن خفت اني انسى الموضوع وتقول طنشني

فلل بونشاك تحدثت كثيراً عنها وكنت دائماً اقول فلل بونشاك افضل حل لها هو حجزها عند الوصول لاسباب كثيرة وابرز تلك الاسباب النظافة والموقع لذلك اذا تبغى تحجز فله اول يوم احجز فندق واذا وصلت بالسلامة دور الفلة اللي تناسبك ولا تعتمد على الصور وتقع في خطأ وقع فيه كثير قبلك

بالنسبة لباندونق فهي مدينة جميلة وفيها وفي اطرافها مواقع سياحية اكثر من بونشاك وفيها التسوق ان رغبت به واضافتها الى الرحلة او عدمه هذا راجع لك انت احنا دورنا نوضح ونعطي المعلومات فقط

o0abdulhadi0o · 28-10-2017, 02:13 PM

هلا و غلا ي الردادي
شكل الاخوة منشغلين
تعرف عمل و مدارس

احس استقريت علي جدولك لاني ارتحت فيه كثير بعد تفكير

بيكون الجبل ثم باندوق ثم جاكرتا
وزعته
طلع
5 ايام الجبل
4 ايام باندوق
زودت باندوق علشان اكون اكثر اريحية من اوصل ولا احب كل شي سريع سريع ادور الفعاليات
تعرف فيني برود شوي
2 يومين جاكرتا

حسبتها من يوم الوصول 17 الظهر
الي العودة 28 الظهر

والفنادق عجبني بيسونا علم و ساهيد
بس بيسونا علم ابنتظر رد ابو تميم لانه لا يوجد حجز بوقتي
و بالنسبه ل ساهيد متوفر الحجز

بس باقي فنادق باندوق من ناحية النظافة و ابشوف اللي رشحتها و كأنك طريت شهر العسل للتدلع قلت ابشوف الفندق اللي اخترته

بس بالنسبه للقطار و الوصول ل جاكرتا كيف منطقة الوصول
المحطة
فيها تعب و عرقلات و مشاوير
لان معي عائلة و ثلاث شناط
من ناحية حمل الحقائب و كذا

و شكرا الردادي علي سرعة التجاوب

عسى الاخوة الباقين يشاركون ل نشوف ارائهم
وشكرا لكم

أرسلت بواسطة iPhone بإستخدام Tapatalk

alradadi · 29-10-2017, 05:18 PM

هلا اخوي عبدالهادي

طيب ممتاز وبما انك زدت يوم في باندونق راح نعطيك مكان جميل تضيفة للجدول منتزه تمان جواندا و الكهوف اليابانيه والهولندية و شلالات ماربيا وتضيفه معه ملاهي ترانس ستوديو في وقت بعد الظهر

بسيونا علم ممتاز اذا حصلت فيه واذا ما حصلت احجز شاهيد من تطبيق المسافر عارضينه بسعر حلو مره ارخص من جميع المواقع الاخرى

في باندونق خذ فندق سنسا حلو جنب السوق ونظيف راح يعجبك بأذن الله اهم شي تاخذ غرفة تنفيذية جونيور

بالنسبة للفطار انا صريح معك استخدمت ما عجبني بس فيه كثير من الاخوة استخدومه اعجبهم مره ويثنوا عليه قلت ممكن انا اكون معقد عموماً الشنط لا تشيل همها يارجل انت في اندونيسيا الجميع يخدمك العمال متوفرين ياخذوا لك الشنط من السيارة الى داخل القطار ومن القطار الى السيارة وانت ما تشيل شي الا ممكن تطلعها من داخل العربة في الوصول فقط يعني المسافة 3 الى 4 امتار فقط وبعدين تحصل العمال في كل مكان تعطيه 50 الف 14 ريال يسوى لك كل شي يجيب لك تكسي ويشيل الشنط

اهم شي درجة الحجز لازم تكون executif يعني مثل درجة الاعمال في الطائرة اما اذا حجزت الدرجة العادية راح تكون غطلة عمرك

شوف هذا الموضوع راح يفيدك كثير عن محلات الاوت لت في باندونق وهي كثيرة جداً ما يمديك تغطيها بس هذي المهم فيها

https://www.arabtrvl.com/vb/t28801.html

o0abdulhadi0o · 30-10-2017, 05:29 PM

يعطيك العافيه ما قصرت يا الردادي

بالنسبه للسواقين كيف طريقة الاتفاق و التعامل معهم و تنقلاتهم
طبعا جاكرتا ما اتوقع احتاجه ل توفر البرامج التنقل

مع ان البرامج الحاليه ما قصرت مثل اوبر و قراب
فادتني كثير ب ماليزيا و استغنيت حتي عن التكاسي و تجربتها حلووووة مع الموصلات العامه لان ماليزيا ما شاء الله البنية التحتيه مكتملة الخدمات و ما شاء الله من ناحية الامان بعد الله

و جربت البرنامج عن طريق قوقل ماب ممتاز جدا
وانصح اي احد يسافر ل شرق اسيا يستخدمه افضل برنامج عرفته قراب

أرسلت بواسطة iPhone بإستخدام Tapatalk

alradadi · 31-10-2017, 12:51 AM

الله يعافيك

السواقين خلاص اسعار ثابته في الجبل 500 الف ربيه لمدة 12 ساعة كل شي عليه ما عدا رسوم دخول السيارة في المزارات السياحية هذي عليك وفي باندونغ نفس الشي الا اذا السواق جاء معك من الجبل وجلس معك في بادندوق في العادة راح ياخذ 600 الف ربيه اما اذا كان من سكان باندونق سعره 500 الف ربية

في جاكرتا اوبر وقراب هي الخيار الافضل واسعارهم حلوة حتى في باندونق التطبيقات تشتغل بس المزرات السياحية البعيدة الافضل سواق خاص لان سواقين التطبيقات يوصلك فقط ما يستناك وبعد الخروج من المزار او الفاعلية ربما لا تجد من ياخذ خصوصاً البعيدة منها لكن داخل المدينة التطبيقات تعمل بشكل ممتاز

o0abdulhadi0o · 03-11-2017, 10:10 AM

يعطيك العافيه اخوي الردادي
و الحمد لله علي كل شي
تقريبا انتهيت من 80 من امور الرحله

ما قصرت معي و اتعبتك ب اسئلتي

ان شاء الله حجزت الرحلة
من 17 نوفمبر الجمعه
و الوصول نفس اليوم الظهر الساعه 2

و العودة ب 29 نوفمبر زودتها يوم

ما عاد باقي الا احجز الفنادق
اللي اقترحتها

و قسمت الرحلة
6 ايام الجبل بونشاك
4 ايام باندونق
2 جاكرتا

ابي رايكم و اقتراحاتكم واذا فيه تعديلات او شي من ناحية التقسيم و الترتيب في تقسيم الايام بعد ما زودتها يوم كان العودة ب 28 و صارت ب 29

الفنادق ابحجزها من النت
و السواقين انتظر معلوماتكم و تجربتهم معكم

و شكرا للجميع

أرسلت بواسطة iPhone بإستخدام Tapatalk

ام ريمو · 04-11-2017, 04:17 AM

التقسيم لو يكون 6بونشاك
3باندونق
3جاكرتا افضل
لاتفوت باندونغ جوها عجيب ومزاراتها متنوعه واسواق اسعارهم حلوه

alradadiمعجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
اقتراحاتكم	ابووليد	بوابة اندونيسيا	2	01-03-2017 08:20 AM
تخطيط الرحلة	Tot0tot0	بوابة المانيا	8	17-07-2016 12:38 AM
اقتراحاتكم لا هنتم	ابو جاسر	بوابة فرنسا	5	10-05-2016 06:05 PM
أرجو المساعدة في تخطيط الرحلة	meesh	بوابة المانيا	5	17-02-2016 01:29 PM
تخطيط الرحلة 2016	عاشقة السفر	بوابة سويسرا	23	31-01-2016 02:40 PM