مطعم فريج صويلح في ابوظبي

هاوية الاسفار · 27-10-2017, 12:34 AM

السلام عليكم و رحمة الله و بركاته

صباح و مساء الخير

عدنا لكم بتقرير جديد و لكن متأخر

كانت لنا زياره قبل شهر رمضان لمدينة ابوظبي

و كانوا العيال هذاك الوقت في اجازة الفصل الدراسي الثاني

رجع زوجي من الشغل و قال شرايكم اوديكم فندق طبعا طرنا من الفرحه

انا و العيال لانه صارلنا فترة طويله ما بتنا في فندق قلت بس ما يكفينا يوم قال يوم و الا ما

شيء فندق و كان يومها خميس قعدت طول الليل ادور فنادق زينه طبعا كلها فل

و اخيرا حصلت فندق و حجزته

طلعنا قبل صلاة الجمعه بنص ساعة و وقفنا في الدرب عند مسيد مطعم غنتوت اللي تريقنا

منه وقت زيارتنا للكويت الحبيبه و خلصوا الصلاه الاولاد و انطلقنا لمدينة ابوظبي

بس قبلها وقفنا عند محطة البترول عشان أصلي

مطعم فريج صويلح

خاطري من اول ما افتتح اجربة لكن للأسف ما قدرت

و اليوم قلت لازم اجربه عشان اقيمه المطعم يقع في مدينة خلفية ( أ )

و هذا الوانيت الحمر

طبعا المطعم ماله علاقة بمطعم الكويت مجرد الاسم و الطابع التقليدي

لوحات جدارية قديمه

جلسات العائلات في الطابق العلوي

ركن العاب الاطفال

طاولة الطعام من الطراز القديم

المهفه و المكشه

السرود

و نشوف المنيو

طلبنا الغداء و طلعت اصور

غرفة لعب الاطفال

توبليرون, ! بنت دبي !, الايمان و 4 آخرون معجبون بهذا.

هاوية الاسفار · 27-10-2017, 12:50 AM

وصل طلبنا

سلطة فريج صويلح الخاصة و سمبوسة خضار

العصاير

مشاوي مشكلة و مجبوس دياي

مرقوقة لحم

و خبز التنور اللذيذ

و الفاتوره

الاكل بصراحة لذيييذ و الخدمة ممتازة و الاحلى المكان و الاجواء

تقييمي للمطعم 10 / 10

طلعنا و توجهنا لداخل مدينة ابوظبي

مسجد الشيخ زايد رحمه الله

نصب شهداء الواجب الله يرحمهم

! بنت دبي !, توبليرون, الايمان و 3 آخرون معجبون بهذا.

هاوية الاسفار · 27-10-2017, 01:18 AM

وصلنا فندقنا رويال روز

دخلت الفندق و اشوف عند الباب باصات سياح و داخل صينيين تارسين اللوبي

بصراحه خفت من المنظر و قلت لزوجي خلك في السياره و انا بدخل اشوف الغرفة

كنت حاجزة غرفين بينهم مدخل مفتوح و يوم شفت الغرفة ما عجبتني غير عن الصوره

و السريرين المفردين من غير قاعدة الراس قلت ما ابغيها دخلوني غرفة ثانيه و بينها و بين غرفة

اليهال باب قلت خلاص ابغي هذي و الفرق كان اعتقد 100 درهم زياده

قعدنا في اللوبي لين نخلص اجراءات الدخول

قعدت عدال صينيات و تخبلوا على ولدي الصغير و الا اشوف وحده رجعت وراء و صورته

بطريقه اونها تلعب بتيلفونها و مشت قلتلها لو سمحتي صورتي ولدي خافت و ترددت

بعدين قالت هيه قلتها امسحي الصورة انا ما اقبل تصورينه و الحمدلله مسحتها

اكره شيء عندي حد يصور عيالي في التيلفون

هاي غرفتنا

و هدا السرير الثاني نفسه كان في الغرفة اللي ما بغيتها

و قلتلهم هذا بعد طلعوه و ابغي سرير بيبي و افتحوا الباب

يرحبون فينا

غرفة اليهال

و هذا تكرمون الحمام

! بنت دبي !, توبليرون, الايمان و 3 آخرون معجبون بهذا.

هاوية الاسفار · 27-10-2017, 02:25 PM

صلينا العصر و توجهنا للمسبح

هذا مسبح الاطفال

و هذا مسبح الكبار

الفندق فيكتوري و ديكوره جميل جدا

و هاي بلكونتنا

صلينا المغرب و طلعنا نتمشى
هذا اللوبي

تاريخ افتتاح الفندق

توجهنا الى المارينا مول و اليوم الجمعة و الشوارع مزدحمة وصلنا المول لكن المواقف فل

و كان في عرض للسيارات الرياضية و حشرة و صدعة

قررنا نتجه لجزيرة الماريه و بالتحديد الجاليريا

تمشينا و خذنا حلويات و كيك و مرينا مطعم زهرة لبنان خذنا سندويشات و عصاير

و رجعنا الفندق

تعشينا و حلينا
و خلص يومنا على خير

سارة محمد, توبليرون, ! بنت دبي ! و 4 آخرون معجبون بهذا.

هاوية الاسفار · 27-10-2017, 03:07 PM

اليوم الثاني صحينا و توجهنا للفطور
الفول و الخضرة التابعه له

لحوم بارده و مخللات

الاجبان و الألبان

الحبوب و الحليب

الفواكه و المربيات

البيض

المخبوزات و الكيك

و هذا ريوقنا

و طبعا العيال وين ما نسير ريوقهم كورن فليكس و حليب

الحمدلله تريقنا و الاكل كان لذيذ و متنوع و من جميع الاصناف

توبليرون, ! بنت دبي !, الايمان و 3 آخرون معجبون بهذا.

هاوية الاسفار · 27-10-2017, 04:06 PM

خلصنا و بعد لازم نمر المسبح قبل ما نطلع من الفندق

و هذا الجاكوزي امس كانوا مسكرينه لانه فيه زجاج مكسور و اليوم ولدي لازم يجربه

و دخل و لقى قطعة زجاج و كلمتهم و رجعوا سكروه مره ثانيه

اليوم كانت ويانا عايله سعوديه عندهم بنتين صغار و ولدي ما قصر فيهم
يرش عليهم ماي و يصيحون

خلصنا و تجهزنا للخروج
و هذا المصعد لازم بالبطاقه و الاما بيتحرك

طلعنا من الفندق و كانت اقامة ممتازة و مريحه

توجهنا الى ياس مول و ندور على مطعم و العيال وين ما نسير يبون شيك شاك

قلت لا نشوف مطعم ثاني و بالصدفه شفت روجوس و طبعا في كل زياره يكون مزدحم

و اليوم حظنا حلو كان فاضي

اخترنا طاولة و قلنا ما نبغي حد يشاركنا فيها قالوا اذا انترس المطعم ما نقدر

و هذا الآيباد و نطلب منه

نطلب على طول من الآيباد و يوصل الطلب بدون قرصون

اول الواصلين المشروبات الغازيه

فكرة المطعم وايد حلوة طول ما احنا قاعدين بس نراقب الاطباق اللي تتزحلق و تنزل

وصلت الطلبات

عصيري ليمون بالنعناع

العيال و البرجر ورانا ورانا

نجتس دجاج

و البحري للباشا

و طلبت بودينج بالتوفي و كنت شبعانه

الحمدلله خلصنا و الاكل كان جيد مب ممتاز

و طلعنا من المول و عدنا الى مدينتنا دبي الحبيبه و كانت رحله خفيفه و سريعه

و اتمنى انكم استفدتوا من جولاتنا

دمتم بود

توبليرون, ! بنت دبي !, الايمان و 5 آخرون معجبون بهذا.

توبليرون · 27-10-2017, 04:39 PM

ماشاءالله عليكم بالعافيه الاكل والوناسه

فريج صويلح حلوو بس متأكده انه مو تبع مال الكويت ؟ اشلون حتى الكتابه نفس الشي والوانيت الحمر

الفندق حلو والريوق منوع اليهال لازم كورن فليكس اللي ما احبه

الصينيه ما استحت تصور بدون استئذان
المفروض تستأذن وبعدين تصور اذا سمح لها

المطعم الثاني بعد شكله حلو وتقديمه نفس مطعم لولي لوب اللي عندنا
عاد الاسم مادري صح والا غلط هههه
احلى تقارير من ايدج ربي يكثر طعاتكم وسفراتكم وتمتعينا

هاوية الاسفار, الايمان و فيصل معجبون بهذا.

هاوية الاسفار · 27-10-2017, 05:20 PM

اقتباس : المشاركة الأصلية كتبت بواسطة توبليرون

ماشاءالله عليكم بالعافيه الاكل والوناسه

فريج صويلح حلوو بس متأكده انه مو تبع مال الكويت ؟ اشلون حتى الكتابه نفس الشي والوانيت الحمر

الفندق حلو والريوق منوع اليهال لازم كورن فليكس اللي ما احبه

الصينيه ما استحت تصور بدون استئذان
المفروض تستأذن وبعدين تصور اذا سمح لها

المطعم الثاني بعد شكله حلو وتقديمه نفس مطعم لولي لوب اللي عندنا
عاد الاسم مادري صح والا غلط هههه
احلى تقارير من ايدج ربي يكثر طعاتكم وسفراتكم وتمتعينا

الله يعافيج
هههه هيه متأكده لانه سألنا اول ما فتحوا المطعم قالوا لا حتى خنين اذا تذكرين اللي في دبي صاحبه
كويتي بس غير عن اللي عندكم
كانت تلعب وياه اول و عقب أشوفها رجعت ورا عشان ما احس لكن قلبي دليلي
المطعم هذا فرع من ألمانيا أو بريطانيا نسيت
آمين
تسلمين على المرور و الدعوات الحلوه و انتظري التقارير اليايه

توبليرون و الايمان معجبون بهذا.

بن قوت · 27-10-2017, 11:05 PM

ماشاء الله عليكم
الفندق فخم كما صاحب التقرير وتستاهلون الخير
حتى المطعم اشوف الاكل حلو جدا

لاتلومين الاولاد في حب شك شاك
فانا من عشاقة
عجبني غرف الفندق روعه
تحياتي لك

هاوية الاسفار, توبليرون و الايمان معجبون بهذا.

هاوية الاسفار · 28-10-2017, 12:22 AM

اقتباس : المشاركة الأصلية كتبت بواسطة بن قوت

ماشاء الله عليكم
الفندق فخم كما صاحب التقرير وتستاهلون الخير
حتى المطعم اشوف الاكل حلو جدا

لاتلومين الاولاد في حب شك شاك
فانا من عشاقة
عجبني غرف الفندق روعه
تحياتي لك

تسلم على الإطراء الجميل
الغرف جميله و الديكورات رائعة
تسلم و شكرًا عَل المرور

توبليرون و الايمان معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مطعم (فريج صويلح للأكلات الكويتية) السالمية	Bu Rashid	بوابة الكويت	31	11-12-2019 07:20 AM
henderson wave جسر مشاه فريد من نوعة	الإماراتي	بوابة سنغافوره	7	20-12-2016 02:29 AM
مطعم فريج بن عاقول للمأكولات الكويتية	فتاة الدمى	بوابة السعودية	21	29-04-2016 06:43 AM