رحلتي للجنوب الفرنسي (نيس وكان وموناكو وغيرها ) - الصفحة 10

|القحطاني| · 27-04-2015, 11:20 AM

ما شاء الله تقرير فخم جدا ومعلومات رهيبة

والصور يا جمال الأجواء

يا زين التسوق في فرنسا شوارع زحمة .. وأنا من محبي الزحمة

الله يعطيك العافية >> متااااااااابع

هداوه · 07-05-2015, 12:16 AM

اقتباس : المشاركة الأصلية كتبت بواسطة fanda

ما عليج قصور يا ام عيسى والله ييسر لك كل امورك

جزء رائع عن موناكو بكل تفاصيله
متابعين

اللهم آمين

شكرا حبيبتي

اقتباس : المشاركة الأصلية كتبت بواسطة الايمان

الله يبعد عنج ضيقة الخلق يا ام عيسى
هذه الدنيا يوم حلو ويوم مر
والحمدلله على كل حال
فقدتج بصراحه
المهم انج رجعتي وونستينا بالتقرير

اللهم آمين ويبعدها عني وعنكم

صدقتي حبيبتي دوام الحال من المحال

اتمنى دايما اكون معاكم بس ساعات غصبن عني نشغل وابعد

اقتباس : المشاركة الأصلية كتبت بواسطة |القحطاني|

ما شاء الله تقرير فخم جدا ومعلومات رهيبة

والصور يا جمال الأجواء

يا زين التسوق في فرنسا شوارع زحمة .. وأنا من محبي الزحمة

الله يعطيك العافية >> متااااااااابع

الله يعافيك اخويي والله ييسرلك امرك

وشكرا ع متابعتك

هداوه · 07-05-2015, 12:23 AM

اليوم السادس

غراس / انتيب

أنتيب Antibes

انشطة سياحية :

1- "LE PETIT TRAIN D'ANTIBES" جولة بالقطار المكشوف لترى:

متحف بيكاسو، ومتحف الآثار،و البلدة القديمة، ميناء فوبان"Port Vauban"

2- "Cap d'Antibes Tours"زيارة انتيب ديفوار بالسيارة المكشوفة.

3- "Plage de la Salis" شاطئ قريب من المدينة القديمة

4- "Plage Epi Hollywood"شاطئ رملي صغير في قلب انتيب بشارع إدوارد بودوان

5- "Plage La Gallice"شواطئ رملية صغيرة على أطراف كاب انتيب

6- "Plage le Rocher" شاطئ رملي متميز .

اماكن سياحية للزيارة في مدينة انتيب :

1- النزهة حول قلعة كاريه "Balade autour du Fort Carré"

حيث تتيح لك نزهة استثنائية امام البحر .

2- "Jardin Thuret" حديقة جميلة ولها نباتات مميزة.

3- "Parc de la Valmasque et de la Brague"

منتزه يتكون من ثلاثة تلال مشجرة و وديان عديدة، بين ثلاثة أنهار

مواقع ممكن تفيدكم

انتيب

هنا نصائح وصور من انتيب في فرنسا.

مديتة تصلح للاطفال

Espace Marineland - le Must de la Côte d'Azur

مدينة العاب

Antibesland

تفاصيل اليوم السادس

غراس

الجو اليوم جميل غيوم ومطر وبروده حلوه

الريوق

تجهزنا ونزلنا نتريق في البوفيه

وهذا صحني

الباركن

عقب ماتريقنا سرنا صوب الباركن

انتوا نسيتوا سالفة الباركن لما نحط السياره فليل ونطلعها الصبح

وندفع ع حسب الساعات اللي تمت في الباركن

في هذا اليوم طلع علينا الباركن بـ 21 يورو

وتذكرون في الفندق لما خبرونا انه الباركن بيكلفنا 30 يورو

معنى هذا

انه اوفرلكم انكم انتوا تبركنونها بنفسكم

رحلتنا الأولى

عقب ماطلعنا من الباركن اتجهنا صوب غراس والهدف مصنع فراجونارد

معلومات أكثر عن فراجونارد

عندهم عدة فروع وكل فروعهم هي عباره عن متحف ومحل للبيع

في غراس عندهم فرعين وهاي مواقعهم

وفي باريس عندهم فرعين وهاي مواقعهم

وفي إيز عندهم فرع وهذا موقعهم

قصة فراجونارد

بدأت في غراس سنـ 926ـــة

في وحده اسمها يوجين وهاي فتحت محل عطور وسمته

فروجونارد

وهو ع أسم رسام مشهور في غراس

وعقب توارثته الأجيال وكبر البزنس

وصاروا ينتجون العطور والصابون ومنتجات الجمال

وهم يصدرون لشركات كبيره ومن ضمنهم اليزابيث آردن في أمريكا

وفي واحد أسمه جين وهو كان رئيس الشركه

هذا الشخص كان محب للفنون دمج بين العطور التاريخيه والحديثه

وفتح متحف في غراس ومتحفين

وهاي المتاحف زادت من مبيعات فروجونارد

هاي المعلومات البسيطه ترجمتها من بروشوراتهم

تابعوني في تفاصيل هذا اليوم

اليوم السادس

هداوه · 07-05-2015, 12:25 AM

اليوم السادس

غراس & انتيب

مصنع فراجونارد للعطور

عنوانهم

بحسب ماعطتني ياه موظفة محل منتجات الزيتون

حطينا العنوان في الجارمن وانطلقنا

شوفوا الجو شقايل يخبل

وصلنا

أول مادخلنا لقينا موظفه يالسه في االاستقبال

وسألتنا اذا نبا حد يشرحلنا

وقلنالها يس

وقالت انتظروا شوي وبتييكم وحده تراويكم المصنع

ونحن ننتظر صورت المدخل

هاي اللوحه تبين لنا الورود اللي تنمو في غراس

واللي يستخدمونها في العطور

واللي عدالها قايمه بالورود اللي يستوردونها من برع بس

للاسف ماصورت الجزء الثاني عدل

يتنا الموظفه وبعد الترحيب دخلتنا داخل

وما أقدر أقول عليه مصنع انما معرض عارضين فيه نماذج من الالات اللي تصنع العطور

والموظفه تشرح لنا كيفية صناعة العطور

طريقة صنع العطور

يحطون كميه من الورد + ماء

ويغلونهم والبخار اللي يطلع منه تتجمع فيه الروائح ويمر البخار في آلة تبريد

وعقب هذا البخار يتحول الى سائل وينزلونه في ماي وزيت

وعقب يخلطونه مع الكحول

(( وخبرتنا المقصود بالكحول

هو اللي يستخدم في المستشفيات مب اللي يشربونه ))

وقالت بدون كحول لايمكن انه ينخلط مع الماي والزيت

وعقب يتركونهم في قوالب استيل مدة 5 أسابيع

وعقب ينقل الى فريزر خاص 5 ساعات فيه وتكون درجة البروده 5

عشان يثبتون الريحه وعقب يصفونه

وخبرتنا انه زهرة اللافندر تعتبر من أرخص الانواع

عشان يسوون ليتر من عطر اللافندر يحتاجون نص طن من الورود

بينما عطر الروز يحتاج 3 طن من ورد الروز عشان يطلعلهم ليتر من العطر

والياسمين يحتاج طن عشان يطلع ليتر

وأفضل أنواع الياسمين في العالم موجود في غراس

وهاي هي الالات اللي راوتنا ياها

هنيه ينزل البخار ويتبرد

هاي قوالب الأستيل اللي يحطون فيها العطر

وخبرتنا هم يصنعون عطورات لشركات ثانيه بأسمائهم ويعطونهم العطور

وهاي الشركات هي تعبيهم فيه وتغلفهم

واللي موجود هنيه هو خاص وبأسمهم بس

يعني ماتلقون شراته في أي محل عطورات الا في فروعهم

ع فكره حصلت لهم محل في مطار نيس

وخبرتنا انه هالمصنع هو الأكبر

وهذاك اللي زرته أول مره أصغر منه ومسكر للصيانه وبيفتح بعد 4 شهور

نكمل جولتنا

ما أدري هم هنيه يصنعون شي ولا بس للعرض

نسيت أسألها وفي نفس الوقت ماشفت موظفين

عندهم هالصف يدرسون فيه أعتقد صناعة العطور

هاي الأموره اللي كانت تشرح لنا

هداوه · 07-05-2015, 12:27 AM

صناعة الصابون

معلومه حلوه

اللي مايسوق وماعنده سياره ممكن عن طريق موقعهم تحجزون رحله

وياقروب سياحي لزيارة المصنع

www.fragonard.com

نكمل جولتنا

الحمدالله حصلنا حد يشتغل

معلومات عن صناعة الصابون

لمدة اسبوعين مايصنعون الا نوع واحد من الصابون

وايبون الصابون مصنوع من مصنع ثاني ويكون مبشور بهالطريقه

وهم هنيه يخلطونه مع الريحه المطلوبه ويحطونه في الفرن

وعقب يظهر ع شكل قوالب ويقطع بالشكل اللي يبونه

طبعا الشغل كله بالآلات

وعقب مايقطعونه ينقلونه الى غرفه ويتركونه ينشف ع الجو الطبيعي

مدة اسبوعين

وهم ينتجون مابين 2000 الى 4000 لمدة اسبوعين نفس الشكل والنوع والريحه

وع حظنا كان شكل الصابون هو شكل

معلومه خبرتنا عنها واستغربتها

انه اللافندر لون الزيت اللي يطلع منه لونه أصفر

وانه هم يخلطونه بملون الطعام عشان يعطينا لون بنفسجي

هداوه · 07-05-2015, 12:28 AM

نتابع جولتنا في مصنع فراجونارد

بعد ماخلصنا جولتنا وتعرفنا ع صناعة الصابون

سرنا صوب المعرض الخاص ببيع منتجاتهم

يلست تشرحلنا الموظفه نسبة الماي والكحول في العطور

وقالت حرف E يرمز للماء

وحرف A يرمز للكحول

ونسيت باقي الكلام
خربطت علينا وايد

اختارتلي عطر وقالت عنه انه رومانسي

عاد أنا أشتريته خصوصا انه عجبني

وبعد خبرتنا انه عندهم دهن العود بس غالي

يعني 290 يورو = 15g

500 يورو = 30g

وقالت عندهم صندل

الموظفه جدا كانت حبوبه وطيبه وشرحه وماقصرت ويانا

والصراحه فكرنا نعطيها بخشيش بس

ترددنا لسببين

انه يمكن يكون تصرفنا غير لائق

والسبب الثاني

انه هاي وظيفتها وافضل مانخربهم ونطمعهم فينا

فقررنا مانعطيها

اتشرينا بس مب وايد لأني قبل كنا متشرين من محلهم الثاني

خلصنا وودعناهم وطلعنا

انطباعي عن هاي الرحله

انا وبوعيسى وايد استمتعنا وحبينا المكان والمعلومات اللي تعلمناها

وماكنا نعرف عنها شي

يعني اكتسبنا معلومات وخبرات يديده

وفي رأيي الشخصي

المكان يستحق الزياره والأفضل اتون هنيه مباشره

وتشترون من هالمحل لأنه هذا أكبر ومنتجاته أكثر

يعني مافي داعي تمرون ع هاذاك

وفي الأخير الشور عندكم

ركبنا سيارتنا

وحطينا عنوان مصنع الحلويات اللي موجود بعد في غراس

التمشي في هالجو هذا بروحه يرد الروح

ويخلي المشاعر غير

تابعوني في رحلتنا الثانيه لـ

مصنع الحلويات

هداوه · 07-05-2015, 12:30 AM

اليوم السادس

غراس & أنتيب

الرحله الثانيه

مصنع الحلويات

أسمه ...

موقعهم الاكتروني

http://www.confiserieflorian.co.uk/

وعندعهم فرعين

واحد في نيس وهذا صغير

وواحد في غراس وهذا كبير

تفاصيل هذا اليوم

كملنا مشينا في هذا الجو الجميل

ومشينا مسافه طويله ودخلنا في سكيك وشوارع ضيقه ووسط مساكن ومناطق جبليه

حتى خفت انه نحن غلطانين

لكن قلنا بنمشي ورا الجارمن للنهايه وبنشوف

وين بيوصلنا

لأنه في البدايه لماحطينا العنوان مارضى يطلعنا الموقع وعقب حطينا اسم المدينه

وقلنا لما نوصل هناك بندخل عنوان المصنع او بنسأل عنه

هاي غراس

تجننت ع المكان والجو

وقلت لبوعيسى يوقفني أصور

ونزلت ويامظلتي

ياسلاااام بس

خذوا نفس ودخلوا اوكسجين نظيف في صدوركم

ونحن نمشي بين البيوت شفت بيت فيه شيرة ( شجرة ) تفاح

واشتهيت آكل منها

وسويت الحركه الشقيه بتاعتي

قلت لبوعيسى المساعد في الجريمه

وقفني عدال البيت

وبخفه وبراءه مني ( ااونه ما أدري انه ممنوع )

دخلت بيت الناس وقطعت من تفاحهم

امممممم لذيذه

هاي تفاحتي

وهاي تفاحة شريكي

بالعافيه عليك بوعيسى

عقب ماقطعت التفاح شفت سياره وقفت من بعيد كأنه جارهم وتم يطالعنا

جان ارد السياره ونكمل طريجنا بعد ماخذيت تفاحتين

ونحن نمشي أشوف أشجار برتقال وفواكه ثانيه

واقول لبوعيسى خاطري اقطع برتقال

وحاولنا نحصل شيره نروم نقطع منها بس ماحصلنا

كملنا طريجنا ووصلنا آخيرا

من دخلنا المدينه لقينا لافتات لمصنع الحلويات

ووصلنا بسهوله

وبركنا عدال النهر

هذا الجسر ورا المصنع وله قصه تاريخيه

هذا الجسر كان مهم في وقتها وهو ينقل البضائع

وفي الحرب العالميه الثانيه فجروه الالمان

ومن عقبه تم بهالوضع

عبرنا النهر عقب مابركنا

وهذا كوفي عدال المصنع

وهذا مدخل المصنع وعريسي متجدم

والحين هداوه دخلت

هداوه · 07-05-2015, 12:32 AM

جولتنا في مصنع الحلويات

أول مادخلنا كانت في استقبالنا هاي الأموره

خبرتنا الموظفه انه أول شي بنشوف فلم ثقافي عن المصنع

وسألتنا اذا نباه باللغه بالانكليزيه

قلنالها يس

هاي صور من مكتبها اللي يلسنا فيه

هنيه يلسنا وجدامنا التلفزيون

وهذا الجسر اللي خبرتكم عنه قبل لايفجرونه الالمان

موقف يضحك

عقب ماشغلتنا الموظفه الفلم الثقافي

وعقب ماشفنا أكثر من نص الفلم هي انتبهت

انه هي حاطتنه بالفرنسي وهي لازم تحطه بالانجليزي

أنا كنت أشوف واصور من التلفزيون وعافانا الله ما افتركنا انه بالفرنسي

وفاجين حلوجنا ونتطالع

وهي اللي انتبهت بعد مب نحن

يلا بشغل الفلم

بعض المقتطفات منه

أول شي يتم قطف الورود

نسيت شو نوع هالورود اللي يستخدمونها للاكل

اللي فهمته منهم انه يخلط الورد ببودرة السكر وعقب يوضع في سلال

وعقب يوضع في البخار في درجة 80 وعقب يترك مدة 5 أيام

لين ينشف وعقب يوضع له صبغة الوان

وعقب ما أدري اظن يبيعونه للاكل

نسيت

والحين فاكهة الكلمنتين اللي تشبه البرتقال

طريقة صنعها

هاي الفاكهه تغطس في العسل الذهبي وهو عباره اعتقد من السكر وماي

وتغلى لمدة 3 دقايق بس

وعقب يشيلونها ويتركونها في غرفه عاديه وينزل ويتصفى عنه العسل

وثاني يوم

يكررون نفس العمليه لمدة 3 دقايق ويخلونه في العسل المغلي

ويترك في الغرفه

وكل يوم يسوون جذي لمدة 45 يوم

وعقب يكون جاهز للاكل

ونفس الطريقه اللي يستخدمونها ويافاكهة الكلمنتين بعد يستخدمونها مع

الكرز والخوخ والمشمش وغيرها

بتشوفون في المصنع باقي الأنواع

وخبرونا انه ينتجون 100 كيلو يوميا

ونحن نتفرج ع التلفزيون دخل علينا قروب من المعاقين مع معلمينهم

الله يعافيهم يارب ويعافي كل عبدن مسلم

عقب ماتفرجنا

يتنا أموره من المصنع وبكل ترحيب فينا خذتنا أنا وبوعيسى

في جوله داخل في المصنع

هداوه · 07-05-2015, 12:34 AM

جولتنا داخل مصنع الحلويات

اول مادخلنا المصنع شفنا الموظفين يشتغلون في صنع الحلويات

هاي فواكهه ثانيه طريقتها نفس طريقة الكلمنتين

ضحكت يوم شفت هاي البنكه ( المروحه )

ذكرتني بأيام قبل لما كنا نحطها في بيوتنا

بس الحين قليل نستخدمها

وبعد يصنعون جام ( مربى )

ويستخدمون 50 % ورد

و 50 % شكر

في صناعة الجام

وكل كيلو جام يستخدمون 20 درزن من الورد

والورود اللي يستخدمونها هي الياسمين والروز والفايلوت

هاي تغطس الحلويات في الكاكاو

مب لابسه قفازات

حتى الكاندي يسوونه بنفس الطريقه اللي سووا فيها الكلمنتين

وعقب ماخلصنا جولتنا في المصنع

ودتنا صوب المحل عشان نشتري من منتجاتهم

هداوه · 07-05-2015, 12:35 AM

نتابع تفاصيل جولتنا في

مصنع الحلويات

دخلنا المحل وكان كبير ومتنوع

وهذا اشتريته حق فوفو

هاي هي العايله مالكة المصنع

وهاي مشترياتنا

انطباعي عن المصنع

* زيارته وايد عجبتنا وحبيناها والمنطقه حلوه يعني أنصح فيه

* حلوياته ماحبيناها وايد يمكن لأنه وايد حلوه خصوصا هاي الفواكه اللي تتغطس بالعسل

بعض الانواع عجبتنا مثل كاكاو بالزنجبيل

واشترينا جام ماعجبني حسيته كله شكر

المحل كبير وبضاعته متنوعه والاذواق تختلف

* اسعاره غاليه بس للاسف نسيت أحتفظ بالفاتوره

بعد ماخلصنا من المحل تركنا أغرضنا عندهم وسرنا حديقة المصنع اللي خبرتنا عنها الموظفه

وكانت مفاجأه حلوه

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شرح حجز القطار من فيينا الى سالزبورغ وغيرها	حبْر	بوابة النمسا	39	19-07-2019 09:28 PM
سؤال شو يعنني جنيف الجانب الفرنسي احترت	india	بوابة سويسرا	10	04-08-2017 04:58 PM
في قرى قريبه من نيس وكان للسكن ؟	ريما عبدالعزيز	بوابة فرنسا	3	08-05-2015 08:47 PM